29 C
Phnom Penh

លោក​ ហ៊ុន សែន សរសើរ​ពី​​ទំនាក់​ទំនងជាមួយ​​លោកស្រី​ យីងឡាក់

ដោយ ឌឹ ខេមបូឌា ដេលី

បទវិភាគ

កាល​ពី​ម្សិល​មិញ ​លោកនាយករដ្ឋ​មន្ត្រី​ ហ៊ុន សែន បាន​ព្រ​មាន​​លោក អភិស៊ីត វីចាជីវ៉ា (Abhisit Vejjajiva)មេដឹក​នាំ​គណបក្សប្រឆាំង​ថៃ និង​ជា​អតីត​នាយក​រដ្ឋមន្ត្រី​ កុំ​ឲ្យ​​ភ្ជាប់​ប្រទេស​​កម្ពុជា​​ទៅ​​ក្នុង​​បញ្ហា​នយោបាយ​​របស់​​ប្រទេស​ថៃ និង​​ធ្វើ​ឲ្យ​ខូច​ទំនាក់​ទំនង​ល្អ​​ជា​មួយ​រដ្ឋាភិបាល​បច្ចុប្បន្ន​​​របស់​លោក ស្រី យីង​ឡាក់ ស៊ីណាវា៉ត្រា​។

​ថ្លែង​នៅ​ក្នុង​ពិធី​ចែក​ប័ណ្ណ​កម្មសិទ្ធិ​ដី​ធ្លី​ជូន​ប្រជាពលរដ្ឋ​ជាង​១.២០០​គ្រួសារ​ នៅក្នុង​ស្រុក​សៀម​បូក​ក្នុង​ខេត្ត​ស្ទឹង​ត្រែង លោក ហ៊ុន សែន បាន​រិះ​គន់​​គោល​ជំហរ​គណបក្ស​ប្រជា​ធិបតេ​យ្យ​របស់​លោក វីចាជីវ៉ា លើ​​បញ្ហា​​ដី​មាន​​ជម្លោះ​នៅ​ជុំវិញ​ប្រាសាទព្រះ​វិហារ​ ​ព្រម​ទាំង​ជម្លោះ​​ដែន​សមុទ្រ​ ក្នុង​ឈូង​សមុទ្រ​​​ថៃផង​ដែរ​។

លោកមាន​ប្រសាសន៍ថា “ខ្ញុំ​ចង់​ការពារ​ប្រទេស​កម្ពុជា​ព្រម​ទាំង​ការពារ​មនុស្ស​ល្អ​នៅ​ក្នុង​ប្រទេស​ថៃផង​ដែរ”។

លោក​ថ្លែង​បន្តថា”​ ផល​ប្រយោជន៍​ដែល​កម្ពុជា​ទទួល​​បាន​​ពី [អតីតនាយករដ្ឋ​មន្ត្រីថៃ]​ ថាក់ស៊ីន [ស៊ីណាវ៉ាត្រា] និង​​រដ្ឋាភិបាល​[​ថៃ]​បច្ចុប្បន្ន​នេះ ​គឺ​សន្តិភាព​និង​ការ​អភិវឌ្ឍន៍​នៅ​តាម​បណ្តោយ​ព្រំ​ដែន​… ប្រសិន​បើ​មាន​ផល​ប្រយោជន៍​សម្ងាត់​ប្រសិន​បើ​​ អភីស៊ីត និង​ក្រុម​របស់​គាត់​​បាន​ដឹងអំពី​បញ្ហា​​នេះ ​​សូម​​ប្រកាស​ឲ្យ​​ដឹង​ឥឡូវ​នេះ​”។

លោក​ ហ៊ុន សែន ទំនង​ជា​ឆ្លើយ​តប​ទៅ​នឹង​​ការ​លើក​ឡើង​​​របស់​លោក​ អភីស៊ីត ដែលបាន​​ចុះ​ផ្សាយ​លើ​ទំព័រ​កាសែត​បាងកក​ប៉ុស្តិ៍ កាល​ពី​ម្សិលមិញ អំពី​​ជម្លោះរវាង​ប្រទេស​ទាំង​ពីរ​ជុំវិញ​ប្រាសាទ​ព្រះ​វិហារ​​ដែល​បណ្តាល​ឲ្យ​មាន​អំពើ​ហិង្សា​កើត​ឡើង​នៅ​ពេល​លោក អភីស៊ីតកំពុង​​កាន់​អំណាច​។

តាម​សសេចក្តី​រាយ​ការណ៍​ថា​ លោក អភីស៊ីត ​បាន​អំពាវ​នាវ​ឲ្យ​រដ្ឋាភិបាល​ថែ​បច្ចុប្បន្ននេះ​​ចាត់​វិធាន​ការ​ខ្លាំង​ជាង​មុន​អំពី​ជម្លោះ​ប្រាសាទ​ព្រះ​វិហារ​ជា​មួយ​កម្ពុជា​​នៅ​ពេល​​ការ​បើក​សវនាការ​ជា​សាធារណៈ​របស់​​​​​តុលាការ​យុត្តិធម៌​អន្តរជាតិ​​នៅ​​ខែមេសាខិតជិត​មក​ដល់​។

លោក​ អភីស៊ីត ត្រូវ​បាន​ដក​ស្រង់​សម្តី​ចុះ​ផ្សាយ​ក្នុង​​កាសែត​បាងកកប៉ុស្តិ៍ថា ” ខ្ញុំ​សូម​អំពាវនាវ​ឲ្យ​រដ្ឋាភិបាល​ចេញ​សេចក្តី​ថ្លែងការណ៍​​ជំទាស់​នឹង​​ការ​អះអាង​របស់​កម្ពុជា [​នៅ​ឯតុលាការ​យុត្តិធម៌​អន្តរជាតិ]​។បើ​មិន​និយាយ​អ្វី​សោះ​​នៅ​ពេល​នេះ​​អាច​ធ្វើ​ឲ្យ​ប្រទេស​ថៃ​ចាញ់​ប្រៀប​​ពេលបើក​​សវនាការ​”។

កាល​ពីឆ្នាំ២០០១ កម្ពុជា​ និង​​ថៃ បាន​ចុះ​ហត្ថលេខា​លើ​អនុស្សរណៈ​យោគយល់​គ្នា​មួយ​ ហើយ​បាន​ព្រម​ព្រៀង​​អភិវឌ្ឍ​រួម​គ្នា​លើ​​ដែន​ទឹក​ទំហំ​២៧​.០០០​ម៉ែត្រ​ក្រឡា​ដែល​គេដឹង​ថា​ជា​តំបន់​ត្រួត​ស៊ីគ្នា។

ក្រុម​ហ៊ុន​ កូកូណូ ​ហ្វីលីព​(Cocono Philipps) របស់​សហរដ្ឋ​អាមេរិក​ ​ក្រុម​ហ៊ុន​តូតាល់(Total)​របស់​បារំាង​ និង​ក្រុម​ហ៊ុន អ៊ីដេមីស៊ូ(Idemitsu) របស់​ជប៉ុន ​បាន​ទទួល​​​​អាជ្ញាប័ណ្ណ​រុក​រក​ប្រេង​​នៅ​ក្នុង​តំបន់​នោះ​ ប៉ុន្តែ មិន​​ទាន់​​ចាប់​ផ្តើម​ការ​ងារ​របស់​​ខ្លួន​​ទេ​រហូត​ទាល់​​តែ​ប្រទេស​ទាំង​ពីរ​​​មាន​កិច្ច​ព្រមព្រៀង​គ្នា​​អំពីដែន​ទឹក​​​មាន​ជម្លោះ​នោះសិន​​។

លោក ហ៊ុន សែន បាន​អាន​សេចក្តី​​ប្រកាស​ព័ត៌​មាន​​មួយ​ចុះ​ផ្សាយ​លើ​គេហទំព័រ​របស់​ទីស្តីការ​គណៈរដ្ឋមន្ត្រី​ កាលពីម្សិលមិញ​ដែល​​បាន​បញ្ជាក់​​ពី​ការ​អះអាង​របស់​កម្ពុជា​ថា​​ ​រដ្ឋាភិបាល​របស់​លោក អភីស៊ីត​ ដែល​​កាន់​អំណាច​​​ចន្លោះ​ពី​​​​ឆ្នាំ​២០០៨ ​ដល់​​ឆ្នាំ​២០១១​នោះ អះអាង​ថា​​​មាន​ការ​​ចរចាសម្ងាត់​អំពី​​ដែន​ទឹក​​​ត្រួត​ស៊ី​គ្នានោះ។

លោក ហ៊ុន សែន មាន​ប្រសាសន៍ថា លោក អភីស៊ីត និង​មន្ត្រី​ម្នាក់​​បាន​ស្នើ​ឲ្យ​មាន​កិច្ច​ប្រជុំ​សម្ងាត់​​មួយ​” ​កាល​ពីឆ្នាំ​២០០៩ នៅ​ភូមិគ្រឹះ​របស់​លោក ហ៊ុន សែន ក្នុង​ខេត្ត​កណ្តាល និង​កិច្ច​ប្រជុំ​ពីរ​លើក​ផ្សេង​ទៀត​រវាង​ឧបនាយក​រដ្ឋមន្តី​ថៃ នៅ​ពេលនោះ​គឺលោក សូថេប ថុងសុបាន​(Suthep Thaugsuban) ជាមួយ​​ឧបនាយក​រដ្ឋមន្ត្រី​កម្ពុជា គឺលោក សុខ អាន នៅ​ទីក្រុង​ហុងកុង​ និង​នៅ​ទីក្រុងគុន​មីង ​​ប្រទេសចិន​ ​នៅ​ក្នុង​ឆ្នាំនោះដែរ​។

លោក ហ៊ុន សែន​ ​បាន​អាន​​សេចក្តី​​ប្រកាស​ព័ត៌​មាន​​នោះ​ថា ” អំឡុង​កិច្ច​ប្រជុំនោះ​ ​លោក ស៊ូថេប បានបញ្ជាក់​ពី​បំណង​​របស់​ពួកគេ​ក្នុង​ការ​​ដោះស្រាយ​បញ្ហា​នៅ​​[តំបន់​ត្រួត​ស៊ីគ្នា​នោះ​] ឲ្យ​បាន​​មុន​ពេល​បញ្ចប់​អាណត្តិ​របស់​រដ្ឋាភិបាល​អភីស៊ីត”។

លោកនាយករដ្ឋ​ហ៊ុន សែន​ថ្លែង​បន្ថែមថា​ “​កម្ពុជា​​ឆ្ងល់​​ថា ហេតុ​អ្វី​បាន​ជា​រដ្ឋាភិបាល​របស់ អភីស៊ីត​ ត្រូវការ​​ចរចារ​ដោយ​សម្ងាត់នោះ​​”។

លោក ហ៊ុន​ សែន មាន​ប្រសាសន៍ថា​ថ្វីបើ​មាន​​កិច្ច​​ប្រជុំ​សម្ងាត់​ក៏ដោយ​ ក៏មិន​មាន​កិច្ច​ព្រម​ព្រៀង​រវាង​រដ្ឋា​ភិបាល​ទាំង​ពីរដែរ ហើយ​លោក ហ៊ុន សែន មាន​ប្រសាសន៍​ថា ​រដ្ឋា​ភិបាល​អភីស៊ីត ​​​បែរ​ជា​​បង្ក​សង្គ្រាម​ជាមួយ​​កម្ពុជា​នៅ​តាម​តំបន់​ព្រំដែន​ក្នុង​ខេត្ត​ព្រះ​វិហារ​​ទៅ​វិញ​។

លោក​បាន​មាន​ប្រសាសន៍​ថា “ក្នុង​រយៈ​ពេល​ប៉ុន្មាន​ថ្ងៃនេះ ​នៅពេល​នយោ​បាយ​នៅ​ក្នុង​ប្រទេស​ថៃ កំពុង​តែបង្ក​បញ្ហា​ស្មុគ​ស្មាញ​​នោះ យើង​ចង់​បញ្ជូន​សារ​ទៅ អភីស៊ីត វីចាជីវ៉ា ថា លោក​ពួកគេ​​មិន​គួរ​ភ្ជាប់​​កម្ពុជា​ទៅ​នឹង​​នយោ​បាយ​នៅ​ក្នុង​ប្រទេស​ថៃ​ទេ​។ បច្ចុប្បន្ននេះ រដ្ឋា​ភិបាល​ទាំង​ពីរ​ គឺ​​កម្ពុជា​ និង​ថៃ… គឺកំពុង​​ព្យាបាល​របួស​ចាស់​​ ប៉ុន្តែសព្វ​ថ្ងៃ​ ​ក្រុម​ដដែល​នេះ​កុំ​ព្យាយាម​បើក​​មុខ​របួស​​នោះ​​វិញ “។

ទោះ​បី​មាន​ការ​​ចរចា​ជាមួយ​លោក សុខ អាន និងលោក ស៊ូរ៉ាដេត ជីរ៉ាធីទិត្យ​ចារើន​ ប្រធាន​គណៈកម្មាធិការ​ថាមពល​ព្រឹទ្ធសភាថៃ កាល​ពី​ខែ​កក្កដា​​ក៏​ដោយ ក៏សេចក្តី​​ប្រកាស​ព័ត៌​មាន​​នោះ​នៅ​តែ​​លើក​ឡើង​ថា រដ្ឋា​ភិបាល​របស់​លោក​ស្រី​ យ៉ីងឡាក់ មិន​ទាន់​បាន​ចរចាជាមួយ​កម្ពុជា​​អំពី​តំបន់​ត្រួត​ស៊ីគ្នា​នោះ​ដែរ៕ ណៃ

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស