មេធាវីម្នាក់តំណាងឲ្យ នួន ជា ចុងចោទនៅសាលាក្តីខ្មែរក្រហមបានប្រាប់តុលាការនេះកាលពីម្សិលមិញថា សុខភាពកូនក្តីរបស់លោក កាន់តែទ្រុឌទ្រោមហើយ ខណៈដែលសវនាការជំនំុជម្រះបន្តជាលើកដំបូង ចាប់តាំងពី នួន ជា និងជនជាប់ចោទ ខៀវ សំផន ត្រូវបានបញ្ជូនទៅសម្រាកព្យាបាលនៅមន្ទីរពេទ្យ កាលពីដើមខែនេះ។
នួន ជា វ័យ៨៦ឆ្នាំ ត្រូវបានបញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី១៣ ខែមករា បន្ទាប់ពីដួលនៅក្នុងមន្ទីរឃុំឃាំងរបស់តុលាការនេះ ដោយសារជំងឺរលាកទងសួតធ្ងន់។ ខៀវ សំផន វ័យ៨១ឆ្នាំ អតីតប្រធានរដ្ឋក្នុងសម័យខ្មែរក្រហមត្រូវបានបញ្ជូនទៅព្យាបាលនៅមន្ទីរពេទ្យនេះដែរ បីថ្ងៃក្រោយមក ដោយសារត្អូញថាពិបាកដកដង្ហើម និងអស់កម្លាំង។
ពេលអង្គជំនុំជម្រះស្នើសុំព័ត៌មានថ្មីអំពីស្ថានភាពសុខភាពរបស់ពួកគាត់ លោក វិកទ័រ កូប៉េ (Victor Koppe) មេធាវីរបស់ នួន ជា បានមានប្រសាសន៍ថា ស្ថានភាពកូនក្តីរបស់លោកកំពុងធ្លាក់ចុះ។
លោក កូប៉េ បានប្រាប់តុលាការត្រួសៗថា “ស្ថានភាពសុខភាព កាន់តែយ៉ាប់យុឺនទៅៗ នោះហើយជាបញ្ហា”។ លោក កូបេ៉ បានបញ្ជាក់ថា កូនក្តីរបស់លោកបានបដិសេធមិនចូលរួមសវនាការជំនុំជម្រះនៅថ្ងៃនេះ ដែលផ្តោតលើការទទួលយកឯកសារថ្មីៗពីគ្រប់ភាគីទាំងអស់។
លោក ងី ម៉េង វេជ្ជបណ្ឌិតនៅមន្ទីរពេទ្យមិត្តភាពខ្មែរ-សូវៀត ជាទីដែលជនចោទជាប់ទាំងពីរ កំពុងសម្រាកព្យាបាល បានមានប្រសាសន៍ថា លោកបានបញ្ជូនរបាយការណ៍ពីស្ថានភាពសុខភាពរបស់ពួកគាត់ទៅឲ្យសាលាក្តីកាលពីព្រឹកម្សិលមិញ ប៉ុន្តែលោកបានបដិសេធមិនបង្ហាញរបាយការណ៍នោះទេ។
លោកបានមានប្រសាសន៍ថា “យើងមិនអាចផ្តល់ព័ត៌មានអំពីរបាយការណ៍នេះឲ្យសារព័ត៌មានបានទេ សូមសួរសាលាក្តីទៅ”។ លោក ឡាស អូលសិន មន្ត្រីទំនាក់ទំនងកិច្ចការច្បាប់ប្រចាំសាលាក្តីនេះ បានមាន ប្រសាសន៍ថា លោកមិនអាចបញ្ជាក់ និងមិនបដិសេធចំពោះការអះអាងរបស់លោក កូប៉េ អំពីសុខភាពដុនដាបរបស់ នួន ជា ទេ ហើយថា ខ្លួនលោកផ្ទាល់កំពុងរង់ចាំព័ត៌មានថ្មីអំពីរឿងនេះដែរ។
លោកមានប្រសាសន៍ថា ព័ត៌មានចុងក្រោយ ដែលលោកបានទទួលបានមកដល់កាលពីថ្ងៃអាទិត្យ ដែលអះអាងថា នួន ជា បានធូរស្រាលវិញហើយ។
អ្នកស្រី លី គឹមសេង ប្រពន្ធរបស់ នួន ជា បាននិយាយថា អ្នកស្រីបានទៅសួរសុខទុក្ខប្តីរបស់គាត់ចុងក្រោយនៅឯមន្ទីរពេទ្យ កាលពីថ្ងៃអាទិត្យ។
អ្នកស្រីបាននិយាយថា “ ប្តីរបស់ខ្ញុំមិនអាចនិយាយបានទេ ពីព្រោះគាត់មានជំងឺរលាកទងសួត។ ពេលនេះ ខ្ញុំនៅឆ្ងាយពីគាត់ ដូច្នេះខ្ញុំមិនដឹងពីស្ថានភាពរបស់គាត់ទេ”។
លោកស្រី អង់តា ហ្គីស (Anta Guisse)មេធាវីការពារ ខៀវ សំផន មានប្រសាសន៍ថា សុខភាព កូនក្តីរបស់គាត់នៅមានស្ថានភាពនឹងនរ។ លោកស្រីលើកឡើងក្នុងតុលាការថា “គាត់ខ្សោយណាស់ ហើយគាត់អស់កម្លាំងណាស់។ យើងកំពុងរង់ចាំព័ត៌មានថ្មីៗពីក្រុមគ្រូពេទ្យ”។
មុនពេលបញ្ជូនគាត់ទៅព្យាបាលនៅមន្ទីរពេទ្យកាលពីសប្តាហ៍មុន ខៀវ សំផន ហាក់ដូចជាមានសុខភាពល្អជាងគេក្នុងចំណោមចុងចោទបីនាក់ និងបានចូលរួមសវនាការជាប់ជានិច្ច។
ចំណែកឯ អៀង សារី អតីតរដ្ឋមន្ត្រីក្រសួងការបរទេសខ្មែរក្រហម ជាសហចុងចោទទី៣ និងចុងក្រោយនោះ តុលាការបានលើកឡើងកាលពីម្សិលមិញថា គាត់បានសម្រេចមិនចូលរួមសវនាការជំនុំជម្រះនៅថ្ងៃនេះទេ ដោយគ្រាន់តែមើលពីបន្ទប់ឃុំខ្លួននៅសាលាក្តីនេះបានហើយ ដោយសារតែអស់កម្លាំង។
ចុងចោទចាស់ជាងគេវ័យ៨៨ឆ្នាំរូបនេះ មានជំងឺច្រើនប្រភេទ ដូចជាជំងឺបេះដូងជាដើម និងមានការវះកាត់បេះដូងបួនលើកចាប់តាំងពីឆ្នាំ១៩៩៤មក។ គាត់បានចូល
សម្រាកព្យាបាល នៅមន្ទីរពេទ្យអស់រយៈ ពេលពីរខែ កាលពីចុងឆ្នាំមុន ដោយសារជំងឺវង្វេងវង្វាន់។
ការបញ្ជូន នួន ជា និង ខៀវ សំផន ទៅសម្រាកព្យាបាលនៅមន្ទីរពេទ្យបានធ្វើឲ្យយឺតយ៉ាវដល់សំណុំរឿង០០២ ដែលកំពុងមានការវិវឌ្ឍសន្សឹមៗក្នុងបើក “ សវនាការជំនុំជម្រះតូចៗ” ដែលបានគ្រោងទុកជាលើក
ដំបូងនេះ និងបានធ្វើឲ្យមានការបារម្ភថា ចុងចោទពីបទឧក្រិដ្ឋកម្មសង្គ្រាមទាំងនេះស្លាប់មុនពេលប្រកាសសាលក្រម។
ដោយសារពួកគាត់ចូលសម្រាកព្យាបាលនៅមន្ទីរពេទ្យ តុលាការបានពន្លឿនផែនឲ្យតំណាងអយ្យការនិងមេធាវីការពារពិភាក្សាអំពីសំណើសុំឯកសារថ្មីមួយចំនួនធ្វើជាភ័ស្តុតាង រួមមានសៀវភៅ ខ្សែភាពយន្ត និងឯកសាររបស់ក្រសួងការបរទេសអាមេរិក និងបានបើកសវនាការពិភាក្សាអំពីឯកសារទាំងនោះកាលពីម្សិលមិញ។
នៅពេលរសៀល ព្រះរាជអាជ្ញាបានចាប់ផ្តើមបង្ហាញឯកសារពីរបបខ្មែរក្រហមដែលលោក ដេល លីសាក់ (Dele Lysak)ជំនួយការព្រះរាជអាជ្ញា បានលើកឡើងថា “នឹងបង្ហាញពីព័ត៌មានពិស្តារ និងសេចក្តីរាយការណ៍ជាញឹកញាប់ទៅថ្នាក់លើ”។ឯកសារទាំងនោះ រួមមានកំណត់ហេតុកិច្ចប្រជុំរបស់គណៈកម្មាធិការអចិន្ត្រៃយ៍ ដែលមានការចូល រួមពីសំណាក់ចុងចោទ ដែលក្នុងនោះមានការពិភាក្សា និងសម្រេចអំពីផែនការយោធា។
អំឡុងពេលបើកសវនាការជំនុំជម្រះនួន ជា និង ខៀវ សំផន បានអះអាងម្តងហើយម្តងទៀតថា ខ្លួនត្រូវបានដកចេញពីមិនឲ្យចូលរួមធ្វើសេចក្តីសម្រេចសំខាន់ៗជាច្រើនអំឡុងរបប ប៉ុល ពត។ អយ្យការនឹងធ្វើបទបង្ហាញពីឯកសាររបស់របបនោះនាព្រឹកនេះ៕ប៊ុននី