កាលពីម្សិលមិញ រដ្ឋាភិបាលបានស្នើឲ្យភាគីរោងចក្រពិនិត្យពិរចារណាលើការដំឡើងប្រាក់ខែអប្បបរមាសម្រាប់កម្មករកាត់ដេរដរាបណាខាងសហជីពកម្មករយល់ស្របនូវលក្ខខណ្ឌនៃការទាមទារដំឡើងប្រាក់ខែ។
បច្ចុប្បន្ន មេដឹកនាំសហជីពកំពុងទាមទារឲ្យដំឡើងប្រាក់ខែអប្បបរមាពី៦១ដុល្លារក្នុងមួយខែ ទៅចន្លោះពី៩៣ដុល្លារដល់១៥០ដុល្លារក្នុងមួយខែ គឺកើនឡើងពី៥២ភាគរយទៅ១៤៥ភាគរយ។
មន្ត្រីការងារបានលើកឡើងនៅក្នុងសេចក្តីថ្លែងការណ៍មួយកាលពីម្សិលមិញ បន្ទាប់ពីកិច្ចប្រជុំរវាងភាគីរោងចក្រ និងមេដឹកនាំសហជីពអំពីបញ្ហានេះថា “បន្ទាប់ពីការពិភាក្សាជាមួយអ្នកមានវត្តមាននៅក្នុងកិច្ចប្រជុំនោះបានយល់ព្រមជាគោលការណ៍ក្នុងការពិភាក្សាលើការដំឡើងប្រាក់ខែអប្បបរមាដល់កម្មករកាត់ដេរ”។
សេចក្តីថ្លែងការណ៍បានលើកឡើងថា “កិច្ចប្រជុំបានស្នើឲ្យសហជីពទាំងអស់ជួបគ្នា និងលើកសំណើរួមស្ដីពីកម្រិតប្រាក់ខែអប្បបរមា សម្រាប់លើកយកមកពិភាក្សាជាមួយនឹងភាគីរោងចក្រ ដើម្បីឈានរកដំណោះស្រាយមួយសមស្រប”។
សេចក្តីថ្លែងការណ៍បានបន្ថែមថា មេដឹកនាំសហជីពគួរតែដាក់សំណើរបស់ខ្លួនជូនរដ្ឋាភិបាលមុនពេលជួបពិភាក្សាគ្នាលើកក្រោយនៅឯក្រសួងការងារ នៅថ្ងៃទី២៦ខែកុម្ភៈ។
កិច្ចប្រជុំកាលពីម្សិលមិញ កើតមានឡើងបន្ទាប់ពីសុន្ទរកថា របស់លោក ហ៊ុន សែន កាលពីថ្ងៃទី១២ ខែធ្នូ ដែលពេលនោះលោកបានអំពាវនាវឲ្យភាគីរោងចក្រដំឡើងប្រាក់ ខែ ដល់កម្មករកាត់ដេរ ដើម្បីជួយឲ្យកម្មករ ដែលមានបំណងស្វែងរកការងារធ្វើនៅក្រៅប្រទេសអាច បន្តធ្វើការងារនៅក្នុងប្រទេសខ្លួនវិញ។
កាលពីមុន ប្រាក់ខែអប្បបរមាត្រូវបានដំឡើងជាផ្លូវការណ៍ ក្នុងខែកក្កដា ឆ្នាំ២០១០ដែលពេលនោះប្រាក់ខែបានឡើងពី៥០ដុល្លារទៅ៦១ដុល្លារ។ លោក កែន លូ អគ្គលេខាធិការសមាគមរោងចក្រកាត់ដេរនៅកម្ពុជា មានប្រសាសន៍មុនពេលកិច្ចប្រជុំ កាលពីម្សិលមិញថា ការទាមទារពីសំណាក់មេដឹកនាំសហជីពមួយចំនួនគឺ “គ្មានលក្ខខណ្ឌច្បាស់លាស់”។
លោកបានថ្លែងថា “ យើងមិនអាចរំពឹងថា នឹង[ដំឡើងប្រាក់ខែអប្បបរមា] ពី៥០ទៅ៦០ និងទៅ៧០ភាគរយបាននោះទេ។ ព្រោះរាជរដ្ឋាភិបាលបានប្រកាសឲ្យដំឡើងប្រាក់ខែ២០ភាគរយ [ដល់មន្ត្រីរាជការ] ដូច្នេះខ្ញុំសន្និដ្ឋានថា នោះគឺជាចំណុចចាប់ផ្តើមមួយដ៏ល្អ”។
លោក ជីល ថាក់ឃើ (Jill Tucker)ប្រធានប្រឹក្សាយោបល់ប្រចាំកម្មវិធីរោងចក្រល្អប្រសើរនៅកម្ពុជារបស់អង្គការពលកម្មអន្តរជាតិមានប្រសាសន៍ថា អង្គការពលកម្មអន្តរជាតិនឹងសម្របសម្រួលការពិភាក្សាគ្នារវាងមេដឹកនាំសហជីពសេរីកម្មករ ដែលតំណាងឲ្យកម្មករប្រមាណជា៣០០.០០០នាក់។ គួរកត់សម្គាល់ថា នៅក្នុងប្រទេសកម្ពុជា មានសហជីពប្រហែលជាង៦០០សហជីព។
លោក សំ អូន ប្រធានសហព័ន្ធសហជីពកម្មករកម្ពុជា ដែលលម្អៀងទៅខាងគណបក្សប្រជាជនកម្ពុជា បានមានប្រសាសន៍ថា ប្រាក់ខែអប្បបរមា៩៣ដុល្លារគឺសមរម្យហើយសម្រាប់កម្មករកាត់ដេរ ចំណែកឯលោក អាត់ ធន់ ប្រធានសម្ពន្ធសហជីពប្រជាធិបតេយ្យកម្មករកាត់ដេរកម្ពុជាបានមានប្រសាសន៍ថា លោកនឹងជួយជំរុញឲ្យប្រាក់ខែអប្បបរមាឡើងបាន១៥០ដុល្លារក្នុងមួយខែ។
លោក សំ អូន បានមានប្រសាសន៍ថា “ខ្ញុំគិតថា ប្រាក់ខែ៩៣ដុល្លារក្នុងមួយខែអាចឲ្យកម្មកររស់បានហើយ ព្រោះពួកគេទទួលបានប្រាក់បន្ថែម ដូចប្រាក់សម្រាប់ជួលផ្ទះ និងប្រាក់សម្រាប់ធ្វើដំណើរ ព្រមទាំងប្រាក់ធ្វើការថែមម៉ោងបន្ថែមលើប្រាក់ខែរបស់គេទៀត”។
ប៉ុន្តែ លោក អាត់ ធន់ បានព្រមានថា ប្រសិនបើការដំឡើងប្រាក់ខែអប្បបរមាតិចពេក កម្មករនឹងនៅតែបន្តតវ៉ា។លោកបានមានប្រសាសន៍ថា “ខ្ញុំគិតថា ប្រសិនបើប្រាក់ខែអប្បបរមានៅតែទាប ហើយកម្មករមិនអាចរស់បានស្រួលទេ ដូច្នេះខ្ញុំគិតថា ពួកគេនឹងនៅតែតវ៉ា”៕ សុផាណ្ណា