មិនដល់មួយខែផងបន្ទាប់ពីឃាតករបាញ់សម្លាប់លោក ជា វិជ្ជា ដែលជាទូទៅគេគិតថាត្រូវបានទម្លាក់កំហុស ហើយត្រូវបានបញ្ជូនទៅពន្ធនាគារវិញដោយសារតែបទឧក្រិដ្ឋដែលមានមនុស្សតិចតួចជឿថា ពួកគេបានប្រព្រឹត្តនោះ អ្នកកាន់ទុក្ខប្រមាណ២០០នាក់បានជួបជុំគ្នាកាលពីម្សិលមិញ នៅកន្លែងដែលមេដឹកនាំសហជីពសេរីកម្មកររូបនេះត្រូវឃាតករបាញ់សម្លាប់កាលពីប្រាំបួនឆ្នាំមុន។
ការជួបជុំគ្នានេះមានចំនួនតិចណាស់បើប្រៀបធៀបទៅនឹងចំនួនអ្នកកាន់ទុក្ខជាង១០.០០០នាក់ ដែលបានចេញមកចូលរួមក្នុងពិធីបុណ្យសពលោក ជា វិជ្ជា កាលពីឆ្នាំ២០០៤ ហើយក៏មានអ្នកចាប់អារម្មណ៍តិចតួចដែរចំពោះការផ្តន្ទាទោសឡើងវិញនាពេលថ្មីៗនេះលើ ប៊ន សំណាង និង សុខ សំអឿន ដែល
សហជីពសេរីកម្មករនិងបណ្តាអង្គការសិទ្ធិមនុស្សបានចាត់ទុកថា ជាការផ្តន្ទាទោសដោយមិនត្រឹមត្រូវពីសំណាក់តុលាការ។
បុរសទាំងពីរដែលទទួលបានការដោះលែងឲ្យនៅក្រៅឃុំបណ្តោះអាសន្នអស់រយៈពេលបួនឆ្នាំរង់ចាំលទ្ធផលនៃការស៊ើបអង្កេតឡើងវិញដែលតុលាការកំពូលបានបង្គាប់ឲ្យធ្វើលើសំណុំរឿងទាំងមូលរបស់ពួកគេនោះ ត្រូវបានសាលាឧទ្ធរណ៍ផ្តន្ទាទោសឡើងវិញ
កាលពីថ្ងៃទី២៧ ខែធ្នូ ថ្វីបើខ្វះភ័ស្តុតាងថ្មីៗក្តី។អ្នកទាំងពីរត្រូវតុលាការផ្តន្ទាទោសឲ្យជាប់ពន្ធនាគារ២០ឆ្នាំ។
នគរបាលបានបើកផ្លូវសម្រាប់អ្នកកាន់ទុក្ខកាលពីម្សិលមិញ នៅពេលដែលពួកគេដើរក្បួនតាមផ្លូវលេខ៥១ឆ្ពោះទៅតូបកាសែតនៅខាងក្រៅជាប់របងវត្តលង្កា កន្លែងដែលលោក ជា វិជ្ជា ត្រូវឃាតករបាញ់សម្លាប់ទាំងកណ្តាលថ្ងៃកាលពីព្រឹកថ្ងៃទី២២ ខែមករាឆ្នាំ២០០៤ ខណៈពេលលោកកំពុងអានកាសែតពេលព្រឹក។នៅតូបកាសែតនោះ ពួកគេបានដាក់បាច់ផ្កា និងអុជធូបឧទ្ទិសដល់វិញ្ញាណក្ខន្ធរបស់លោក។
លោក ជា មុនី ប្អូនប្រុសលោក ជា វិជ្ជា និងជាអ្នកបន្តតំណែងជាប្រធានសហជីពសេរីកម្មករ បានហៅសាលាឧទ្ធរណ៍ថា “ តុលាការអាយ៉ង” ក្នុងពិធីរំឭកវិញ្ញាណក្ខន្ធនេះ ហើយបានថ្កោលទោសចំពោះសេចក្តីសម្រេចរបស់តុលាការនេះក្នុងការផ្តន្ទាទោស ប៊ន សំណាងនិង សុខ សំអឿន ឡើងវិញ។
លោកបានមានប្រសាសន៍ថា “រយៈពេលប្រាំបួនឆ្នាំមកហើយ តុលាការកម្ពុជា មិនទាន់ស្វែងរកឃើញឃាតករសម្លាប់ ជា វិជ្ជា ទេ។
សូមតុលាការដោះលែង ប៊ន សំណាង និងសុខ សំអឿន ពីព្រោះពួកគេមិនមែនជាឃាតករទេ”។
ក្រៅពីមន្ត្រីគណបក្សប្រឆាំងប៉ុន្មាននាក់មកពីគណបក្ស សម រង្ស៊ី មនុស្សដែលបានជួបជុំគ្នាកាលពីម្សិលមិញដើម្បីប្រារព្ធខួបនៃការធ្វើឃាតមួយក្នុងចំណោមការធ្វើឃាតល្បីៗបំផុតនៅក្នុងប្រទេសកម្ពុជា ក្នុងរយៈពេល២០ឆ្នាំមកនេះ ភាគច្រើនមកពីសហជីពសេរីកម្មករ។ការស្លាប់របស់មេដឹកនាំសហជីពដ៏មានប្រជាប្រិយភាពរូបនេះ បានក្លាយជានិមិត្ត
រូបនៃឃាតកម្ម ដែលមិនទាន់បានដោះស្រាយនិងមានកាន់តែច្រើនឡើងៗ ព្រមទាំងវប្បធម៌និទណ្ឌភាពក្នុងប្រទេសកម្ពុជា។
ហើយថ្វីបើសហជីពសេរីកម្មករ មានសមាជិកប្រមាណ៩០.០០០នាក់ ស្ថិតក្រោមបញ្ជារបស់លោកក្តី ក៏លោកមានប្រសាសន៍ថា លោកសម្រេចធ្វើពិធីតូចមួយកាលពីម្សិលមិញ។
លោកបានមានប្រសាសន៍ថា “យើងប្រារព្ធពិធីនេះដដែលៗជារៀងរាល់ឆ្នាំ ដូច្នេះ ខ្ញុំមិនចង់ហៅកម្មករច្រើនមកចូលរួមទេ”។ លោកបានមានប្រសាសន៍បន្ថែមថា លោកមិនចង់ធ្វើឲ្យរាំងស្ទះការងារនៅតាមបណ្តារោងចក្រកាត់ដេរក្នុងប្រទេសកម្ពុជានោះទេ។
អ្នកកាន់ទុក្ខទាំងនេះ ក៏ទទួលបានការចូលរួមពីសំណាក់សមាជិកសមាគមអ្នកប្រជាធិបតេយ្យរបស់លោក ម៉ម សូណង់ដូ ដែលត្រូវតុលាការផ្តន្ទាទោសឲ្យជាប់ពន្ធនាគាររយៈពេល២០ឆ្នាំ កាលពីខែតុលា ពីបទញុះញង់ឲ្យមានចលនាអបគមន៍មួយនៅជនបទ ហើយមជ្ឈដ្ឋានទូទៅជឿថា បទចោទប្រកាន់េនះត្រូវបានគេប្រឌិតឡើង។
លោក ស៊ា សុផុន ប្រធានសមាគមអ្នកប្រជាធិបតេយ្យ ក្នុងស្រុកកំពង់សៀម ខេត្តកំពង់ចាម បានមានប្រសាសន៍ថា “យើងចូលរួមកាន់ទុក្ខ ជា វិជ្ជា ពីព្រោះយើងគិតថា ជា វិជ្ជាគឺជាគំរូដ៏ល្អម្នាក់សម្រាប់ប្រជាពលរដ្ឋរបស់យើង ដែលស្រឡាញ់សេរីភាព និងប្រជាធិបតេយ្យ”។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សក្នុងស្រុកលីកាដូ បានមានប្រសាសន៍ថា “ព្រលឹងរបស់លោក ជា វិជ្ជា នៅតែមិនស្ងប់ ពីព្រោះតុលាការនៅតែរកមិនឃើញឃាតករពិត។ ប៉ុន្តែ ករណីនេះមានជនរងគ្រោះដល់ទៅបីនាក់ គឺ ជា វិជ្ជា ប៊ន សំណាង និង សុខ សំអឿន”។
មេធាវីរបស់ ប៊ន សំណាង និង សុខ សំអឿន បានដាក់ពាក្យបណ្តឹងសាទុក្ខទៅតុលាការកំពូល នៅថ្ងៃដែលសាលាឧទ្ធរណ៍ផ្តន្ទាទោសពួកគេឡើងវិញ។ លោក ឈាង វណ្ណថា ក្រឡា បញ្ជីនៅតុលាការនេះ បានអះអាងថា បានទទួលបណ្តឹងសាទុក្ខនេះហើយ ហើយបានមានប្រសាសន៍ថា កាលបរិច្ឆេទបើកសវនាការមិនទាន់កំណត់នៅឡើយទេ។
សំណំុរឿងប្រឆាំងនឹងបុរសទាំងពីរនាក់នេះ ដំបូងឡើយត្រូវបានច្រានចោល កាលពីឆ្នាំ២០០៤ ដោយសារតែខ្វះភ័ស្តុតាង ពីសំណាក់លោក ហីុង ធីរិទ្ធ ចៅក្រមសើុបសួរនៅសាលាដំបូងរាជធានីភ្នំពេញ ដែលត្រូវបានផ្ទេរចេញពីមុខតំណែងរបស់លោកប្រាំថ្ងៃក្រោយមក។ ប៊ន សំណាង និង សុខ សំអឿនត្រូវតុលាការផ្តន្ទាទោស កាលពីឆ្នាំ២០០៥ ទោះបីជាអ្នកទាំងពីរមិនបានប្រព្រឹត្តក្តី។
កាលពីឆ្នាំ២០០៦ ក្នុងនាមជាជនរត់គេចខ្លួន ដែលកំពុងលាក់ខ្លួនក្នុងប្រទេសសិង្ហបុរី លោក ហេង ពៅ អតីតស្នងការរាជធានីភ្នំពេញ ដែលបានដឹកនាំការសើុបអង្កេតរឿងក្តីសម្លាប់លោក ជា វិជ្ជា បានប្រាប់ទស្សនាវដ្តីព័ត៌មានមួយរបស់បារាំងថា បុរសទាំងពីរនាក់នេះ ត្រូវគេទម្លាក់កំហុស។
ពេលនេះ ដោយកំពុងអនុវត្តទោសជាប់ពន្ធនាគារជាង១០០ឆ្នាំ ពីបទព្រហ្មទណ្ឌជាច្រើន រួមទាំងករណីធ្វើឃាតចៅក្រមមួយរូបផងនោះ លោក ហេង ពៅ បានបដិសេធមិនឡើងផ្តល់សក្ខីកម្មនៅក្នុងសវនាការកាត់ទោស ប៊ន សំណាង និងសុខ សំអឿន ឡើងវិញនោះទេ ដោយហេតុផលថា វានឹងធ្វើឲ្យប៉ះពាល់ដល់ការផ្លាស់ប្តូរជំនឿរបស់លោកទៅជឿសាសនាគ្រិស្ត៕សុខុម