មន្ត្រីជាន់ខ្ពស់ម្នាក់របស់កងទ័ពរំដោះប្រជាជនចិន កាលពីម្សិលមិញបានសន្យាផ្តល់ជំនួយយោធាបន្ថែមទៀត ព្រមទាំងអំណោយនានា ដូចជាឧបករណ៍ភ្លេងសម្រាប់ពិធីថ្វាយព្រះភ្លើងព្រះបរមសពព្រះមហាវីរក្សត្រនរោត្តម សីហនុ នៅខែក្រោយនេះ។
លោកឧត្តមសេនីយ៍ ទៀ បាញ់ រដ្ឋមន្ត្រីក្រសួងការពារជាតិកម្ពុជា បានមានប្រសាសន៍ថា ឧត្តមសេនីយ៍ ហ្គី ចៀនហ្គូ (Gi Jianguo)នាយសេនាធិការរងកងទ័ពរំដោះប្រជាជនចិន និងលោក មុឹង សំផន រដ្ឋលេខាធិការក្រសួងការពារជាតិកម្ពុជាចុះហត្ថលេខាលើកិច្ចព្រមព្រៀងនេះអំឡុងជំនួបក្នុងរាជធានីភ្នំពេញ។
លោកឧត្តមសេនីយ៍ ទៀ បាញ់ បានមានប្រសាសន៍ប្រាប់អ្នកយកព័ត៌មាន បន្ទាប់ពីពិធីចុះហត្ថលេខា ដែលមានការចូលរួមពីសំណាក់លោក ប៉ាន ហ្គាងហ្សូ៊ (Pan Guangxue) ឯកអគ្គរដ្ឋទូតចិនថា “យើងបានចុះហត្ថលេខាលើកិច្ចព្រមព្រៀងមួយនាថ្ងៃនេះ បន្ទាប់ពីកម្ពុជាបានស្នើឲ្យប្រទេសចិនជួយផ្តល់ឧបករណ៍ភ្លេងសម្រាប់ពិធីថ្វាយព្រះភ្លើងព្រះបរមសពព្រះមហាវីរក្សត្រ”។
មួយផ្នែកនៃកិច្ចព្រមព្រៀងនេះ ប្រទេសចិនបានយល់ព្រមសហការថែមទៀតជាមួយកងយោធពលខេមរភូមិន្ទ តាមរយៈការផ្តល់ការបណ្តុះបណ្តាល និងឧបករណ៍នានាបន្ថែមទៀត។
លោកឧត្តមសេនីយ៍ ទៀ បាញ់ បានមានប្រសាសន៍ថា “កម្ពុជាខ្វះសម្ភារយោធានៅឡើយ និងឧបករណ៍ទប់ស្កាត់បទល្មើសខ្លះ ដូច្នេះរដ្ឋាភិបាលចិនព្រមព្រៀងផ្តល់សម្ភារយោធានិងឧបករណ៍ទាំងនេះឲ្យដល់ទាហានរបស់យើង”។
ប្រទេសចិនគ្រោងផ្តល់ឧទ្ធម្ភាគចក្រយោធាប្រើបានច្រើនបែប ម៉ាក Z-9 ផលិតនៅប្រទេសចិនចំនួន១២គ្រឿងឲ្យមកកម្ពុជានៅពេលឆាប់ៗនេះ។ ឧទ្ធម្ភាគចក្រម៉ាក Z-9 ដែលអាចបំពាក់អាវុធនេះ ផលិតឡើងក្រោមអាជ្ញាប័ណ្ណរបស់ក្រុមហ៊ុនសាជីវកម្មផលិតយន្តហោះ ហាប៊ីន(Harbin Aircraft Manufacturing Corporation) របស់ចិន និងយកលំនាំតាមឧទ្ធម្ភាគចក្រយូរ៉ូកបធ័រ ដូហ្វីន (Eurocopter Dauphin)របស់បារាំង។
លោក ទៀ បាញ់ បានមានប្រសាសន៍ថា តម្លៃឧទ្ធម្ភាគចក្រ ដែលនឹងជំនួសយន្តហោះចាស់ៗផលិតនៅប្រទេសរុស្ស៊ីនោះ មានតម្លៃជាង១៩០លានដុល្លារ ហើយមួយផ្នែកនៃតម្លៃនេះត្រូវប្រើកម្ចីចិន ដែលបានចុះហត្ថលេខាក្នុងខែសីហា ឆ្នាំ២០១១។
លោកឧត្តមសេនីយ៍ ទៀ បាញ់ បានមានប្រសាសន៍បន្តថា “ឧទ្ធម្ភាគចក្រទាំងនេះ មិនមែនសម្រាប់តែយោធាទេ ប៉ុន្តែយើងក៏អាចប្រើវា នៅពេលបទល្មើសកើតឡើងនៅជនបទដាច់ស្រយាលផងដែរ”។
យោងតាមទីភ្នាក់ងារព័ត៌មាន សីុនហួ គ្រប់គ្រងដោយរដ្ឋចិនបានឲ្យដឹងថា លោក ហ្គី ជាសមាជិកម្នាក់នៃគណៈកម្មាធិការកណ្តាលមានសមាជិកចំនួន២០៥រូបរបស់បក្សកុម្មុយនីស្តចិននោះ ក៏បានជួបជាមួយលោក ប៉ុល សារឿន អគ្គមេបញ្ជាការកងយោធពលខេមរភូមិន្ទ កាលពីម្សិលមិញផងដែរ។ នៅថ្ងៃព្រហស្បតិ៍នេះ លោក ហ្គី នឹងចូលរួមពិធីប្រគល់សញ្ញាបត្រដល់ទាហានថ្មើរជើងកម្ពុជាដែលទៅបណ្តុះបណ្តាលនៅចិន រួមជាមួយលោកនាយករដ្ឋមន្ត្រី ហ៊ុន សែន៕ ប៊ុននី
(រាយការណ៍បន្ថែមដោយ Simon Lewis