កាលពីម្សិលមិញលោកស ខេងរដ្ឋមន្ត្រីក្រសួងមហាផ្ទៃបានរិះគន់លោក សមរង្ស៊ីមេដឹកនាំគណបក្សប្រឆាំងដែលនិរទេសខ្លួនឯងថាវាជាកំហុសរបស់គាត់ផ្ទាល់ក្នុងការធ្វើឲ្យគាត់បាត់បង់សិទ្ធិចូលរួមក្នុងការបោះឆ្នោតជាតិនៅថ្ងៃទី២៨ ខែកក្កដានោះ។
គណៈកម្មាធិការជាតិរៀបចំការបោះឆ្នោតបានលុបឈ្មោះលោក សម រង្ស៊ី ចេញពីបញ្ជីឈ្មោះបោះឆ្នោត កាលពីខែតុលាដោយលើកហេតុផលថា លោកគឺជាទណ្ឌិត ដែលប្រការនេះបានរារាំងលោកមិនឲ្យមានសិទ្ធិបោះឆ្នោត ឬឈរឈ្មោះជាបេក្ខជនឲ្យគេបោះឆ្នោតឲ្យនោះទេ។
នៅក្នុងកិច្ចប្រជុំរដ្ឋសភា ស្ដីអំពីការបង្កើតឧត្តមក្រុមប្រឹក្សាទទួលបន្ទុកការពារជាតិនោះ លោកស ខេងបានបានថ្លែងថា“ឈ្មោះរបស់លោក សម រង្ស៊ី ត្រូវបានលុបចេញពីបញ្ជីបោះឆ្នោតហើយ”។
លោក ស ខេង បានបន្ដថា“សាលក្រមតុលាការបានចូលជាធរមានចាប់តាំងពីសាលាដំបូងរាជធានីភ្នំពេញរហូតដល់តុលាការកំពូលហើយបើតាមច្បាប់ស្ដីអំពី ការបោះឆ្នោតទណ្ឌិតគ្មានសិទ្ធិបោះឆ្នោតទេ ហើយក៏គ្មានសិទ្ធិឈរឈ្មោះជាបេក្ខជនឲ្យគេបោះឆ្នោតឲ្យដែរ”។
លោកបានមានប្រសាសន៍សំដៅដល់ការផ្តន្ទាទោសលោក សម រង្ស៊ី ពីបទដកបង្គោលតម្រុយព្រំដែននៅក្នុងខេត្តស្វាយរៀងកាលពីឆ្នាំ២០០៩ថា “លោក សម រង្ស៊ី បានប្រព្រឹត្តបទល្មើសនេះផ្ទាល់”។
ប្រសាសន៍របស់លោករដ្ឋមន្ត្រីបានធ្វើឡើងដើម្បីឆ្លើយតបទៅនឹងការលើកឡើងរបស់លោកយឹមសុវណ្ណអ្នកនាំពាក្យគណបក្សសមរង្ស៊ីអំឡុងកិច្ចប្រជុំពាក់ព័ន្ធនឹងសន្តិសុខនៅតាមព្រំដែន។
លោកយឹមសុវណ្ណ មានប្រសាសន៍ថាដូចដែលកម្ពុជាមិនយល់ព្រមជាមួយថៃពាក់ព័ន្ធនឹងប្រាសាទព្រះវិហារអ៊ីចឹងបញ្ហាព្រំដែនជាមួយប្រទេសវៀតណាមគួរតែបញ្ជូនទៅតុលាការយុត្តិធម៌អន្ដរជាតិនៅក្នុងទីក្រុងឡាអេ ដោះស្រាយ។
គណបក្ស សម រង្ស៊ី បានអះអាងម្ដងហើយម្ដងទៀតថា ដីរបស់កម្ពុជាត្រូវបានប្រគល់ឲ្យទៅវៀតណាម ហើយលោក យឹម សុវណ្ណបានប្រើពាក្យ “យួន” ដែលជាពាក្យប្រមាថជនជាតិវៀតណាមដោយលោកបានអះអាងថា គ្មានជនណាម្នាក់ត្រូវបានផ្ដន្ទាទោសពីបទទន្ទ្រានចូលដីខ្មែរនោះទេ។
លោក យឹម សុវណ្ណ បានមានប្រសាសន៍នៅក្នុងរដ្ឋសភាថា“លោក សម រង្ស៊ី ត្រូវបានផ្ដន្ទាទោសប៉ុន្ដែយួនមិនដែលត្រូវបានផ្ដន្ទាទោសទាល់តែសោះ”។
លោក ស ខេង បានបញ្ជាក់ថា ថ្វីត្បិតតែលោក សម រង្ស៊ី ត្រូវបានលុបឈ្មោះចេញពីបញ្ជីក៏ដោយក៏រដ្ឋាភិបាលគ្មានរបៀបវារៈរាំរាំងគាត់មិនឲ្យចូលរួមក្នុងសកម្មភាពនយោបាយដែរ។លោក ស ខេង ក៏បានចំអកឲ្យមេដឹកនាំគណបក្សប្រឆាំងរូបនេះថាលោក សម រង្ស៊ី ដែលរស់នៅក្នុងប្រទេសបារាំងនោះ ខុសគ្នាពីលោកស្រី អ៊ុង សាន ស៊ូជី (Aung
San Suu Kyi) អ្នកគាំទ្រលទ្ធិប្រជាធិបតេយ្យនៅភូមាឆ្ងាយណាស់។លោកថ្លែងអំពីលោកស្រីអ៊ុងសាន ស៊ូជី ថា“សូម្បីតែពេលប្ដីរបស់ខ្លួនសុំឲ្យចាកចេញ ក៏គាត់នៅតែមិនព្រមចាកចេញពីភូមាដែរ”។ លោកសមរង្ស៊ី មានទោសជាប់ពន្ធនាគាររយៈពេល១១ឆ្នាំពីបទញុះញង់ និងបំផ្លាញទ្រព្យសម្បត្តិសាធារណៈប្រសិនបើគាត់វិលមកកម្ពុជាវិញ៕ ប្រែសម្រួលដោយ ហម សុផាណ្ណា