មនុស្សប្រមាណ៣.០០០នាក់ បានចូលរួមក្នុងព្រះរាជពិធីដង្ហែសាកល្បងលើកចុងក្រោយកាលពីព្រឹកថ្ងៃសៅរ៍ ដើម្បីជាការត្រៀមសម្រាប់ដង្ហែព្រះបរមសពសម្ដេចឪ ព្រះបាទនរោត្ដម សីហនុ ទៅកាន់ព្រះមេរុ នៅថ្ងៃទី១ខែកុម្ភៈ។
ពិធីដង្ហែសាកល្បង ដែលរៀបចំដោយនគរបាលជាតិនេះ មានការចូលរួមពីមន្ត្រីយោធា នគរបាល កងសន្ដិសុខ ក៏ដូចជាតំណាងមកពីគ្រប់ក្រសួង ក្រុមយុវជនមកពីគណបក្សប្រជាជនកម្ពុជា កាកបាតក្រហម តំណាងជនជាតិភាគតិច និងកងត្រែយោធា។
ក្រុមនីមួយៗ ដែលបានចូលរួមក្នុងព្រះរាជពិធីដង្ហែសាកល្បងនេះ បានដើរក្នុងចម្ងាយ១,៥គីឡូម៉ែត្រ នៃផ្លូវដែលគ្រោងទុកចម្ងាយ៦គីឡូម៉ែត្រ ដែលរួមមានតីរវិថីស៊ីសុវត្ថិ មហាវិថីព្រះសីហនុ មហាវិថីព្រះនរោត្ដម និងមហាវិថីសុធារស ព្រមទាំងផ្លូវមួយចំនួនទៀត ដែលស្ថិតនៅជុំវិញវត្តភ្នំ និងវិមានឯករាជ្យ។
អ្នកចូលរួមទាំងអស់មានដូចជា ព្រះរាជវង្សានុវង្ស មន្ត្រីជាន់ខ្ពស់មកពីគណបក្សប្រជាជនកម្ពុជា និងភ្ញៀវកិត្តិយសសំខាន់ៗជាច្រើនទៀត ព្រមទាំងមានព្រះទីន័ងដង្ហែព្រះបរមសពផងដែរ។
ថ្លែងទៅកាន់លោក គង់ សំអុល រដ្ឋមន្ត្រីក្រសួងព្រះបរមរាជវាំង នៅក្នុងកិច្ចប្រជុំមួយបន្ទាប់ពីការដង្ហែក្បួនសាកល្បង នាយឧត្ដមសេនីយ៍ ទា បាញ់ រដ្ឋមន្ត្រីក្រសួងការពារជាតិ បានហៅពិធីដង្ហែសាកល្បងនេះថា អាចយកជាការបាន។
នាយឧត្ដមសេនីយ៍ ទា បាញ់ បានមានប្រសាសន៍ថា “ខ្ញុំគិតថា ពិធីដង្ហែក្បួនសាកល្បងក្នុងថ្ងៃនេះ អាចយកជាការបាន ហើយខ្ញុំសង្ឃឹមថា ក្បួនដង្ហែនៅថ្ងៃថ្វាយព្រះភ្លើងព្រះបរមសពសម្ដេចឪ និងធ្វើបានល្អជាងនេះ។
នៅល្ងាចថ្ងៃសៅរ៍ ព្រះសង្ឃជាង២០.០០០អង្គបាននិមន្ដមកចូលរួមជាមួយព្រះមហាក្សត្រនរោត្ដម សីហមុនី និងសម្ដេចម៉ែ នរោត្ដម មុនីនាថ ដើម្បីប្រារព្ធព្រះរាជពិធីបុណ្យ១០០ថ្ងៃ នៅមុខព្រះបរមរាជវាំង ចាប់តាំងពីសម្ដេចឪ នរោត្ដម សីហនុ បានយាងចូលទិវង្គត ក្នុងព្រះជន្មាយុ៨៩ព្រះវស្សា នៅក្នុងទីក្រុងប៉េកាំង កាលពីថ្ងៃទី១៥ ខែតុលា។
យោងតាមព្រះញាណវង្ស ឃឹម សន ព្រះមេគណរាជធានីភ្នំពេញ បានមានសង្ឃដីកាថា ព្រះសង្ឃទាំងអស់បាននិមន្ដមកពីទូទាំងប្រទេសកម្ពុជា និងមកពីប្រទេសផ្សេងៗមួយចំនួនទៀត រួមមាន ប្រទេសថៃ អូស្ត្រាលី បារាំង កាណាដា និងសហរដ្ឋអាមេរិក។
ព្រះមហាក្សត្រ នរោត្ដម សីហមុនី និងម្ដេចម៉ែ មុនីនាថ បានយាងចេញពីព្រះបរមរាជវាំង និងបានយាងក្នុងចំណោមព្រះសង្ឃទាំងអស់អំឡុងពេលប្រារព្ធពីធីបុណ្យ១០០ថ្ងៃនេះ ដែលបានចាប់ផ្ដើមនៅវេលាម៉ោង៥ល្ងាច ហើយបានបន្ដរហូតដល់ម៉ោង៦ និង៣០នាទី។
ព្រះញាណវង្ស ឃឹម សន បានមានសង្ឃដីកាបន្ថែមថា ព្រះរាជពិធីបុណ្យនេះ គឺប្រារព្ធធ្វើឡើង ដើម្បីឲ្យអ្នកចូលរួមទាំងអស់មានភាពអត់ធ្មត់ និងសម្ដែងភាពក្រៀមក្រមនៅមុនព្រះរាជពិធីដង្ហែក្បួន ដែលនឹងប្រារព្ធធ្វើឡើងនៅថ្ងៃសុក្រ និងមុនថ្ងៃព្រះរាជពិធីបូជាព្រះបរមសពសម្ដេចឪ នៅថ្ងៃទី៤ ខែកុម្ភៈ។គេរំពឹងថាព្រឹត្តិការណ៍នេះនឹងមានប្រជាពលរដ្ឋប្រហែល១,៥លាននាក់ចូលមកក្នុងរាជធានីភ្នំពេញ។
សាលារាជធានីភ្នំពេញ ក៏បានចេញសេចក្ដីប្រកាសមួយកាលពីថ្ងៃសុក្រ ស្ដីអំពីការបិទផ្លូវ និងវិធានការគ្រប់គ្រងចរាចរណ៍ ដែលនឹងត្រូវអនុវត្តចាប់ពីថ្ងៃទី១ ដល់ថ្ងៃទី៤ ខែកុម្ភៈផងដែរ។ ផ្លូវដង្ហែព្រះបរមសាពនឹងត្រូវបិទចាប់ពីម៉ោង៧ និង៣០នាទីព្រឹក រហូតដល់ថ្ងៃត្រង់ នៅថ្ងៃសុក្រ គឺតាមបណ្ដោយផ្លូវដែលស្ថិតនៅខាងកើតមហាវិថីព្រះមុនីវង្ស ខាងជើងសាលមហោស្របចតុមុខ និងភាគខាងត្បូងវត្តភ្នំ៕ ប្រែសម្រួលដោយ ស៊ា ស៊ុយឈាង