នៅមុនការបោះឆ្នោតជាតិឆ្នាំក្រោយនេះ កាលពីម្សិលមិញ មេដឹកនាំគណបក្សប្រឆាំង គឺលោក សម រង្ស៊ី បានព្យាយាមបញ្ចុះបញ្ចូលឲ្យយុវជនបោះឆ្នោតគ្រាំទ្រគណបក្សរបស់លោក ដោយសន្យារកការងារឲ្យនិស្សិត និង និស្សិតទើបបញ្ចប់ការសិក្សាដែលបានចូលជាសមាជិកគណបក្សរបស់លោក។
គណបក្ស សម រង្ស៊ី របស់លោកទើបច្របាច់បញ្ចូលគ្នាជាមួយគណបក្ស សិទ្ធិមនុស្សក្នុងពេលថ្មីៗនេះបង្កើតជាគណបក្ស សង្គ្រោះជាតិ ដើម្បីប្រកួតប្រជែងជាមួយគណបក្សប្រជាជនកម្ពុជា ដែលកំពុងតែកាន់អំណាចនៅក្នុងការបោះឆ្នោតនៅខែកក្កដា។
លោក សម រង្ស៊ី បានថ្លែងប្រាប់ក្រុមនិស្សិតចំនួន២០០នាក់នៅឯទីស្នាក់ការគណបក្ស សិទ្ធិមនុស្សក្នុងរាជធានី ភ្នំពេញតាមរយៈវីដេអូ ខន់ហ្វឺរិន ពីប្រទេសស្វីសថា “ ខ្ញុំចង់ឲ្យក្មួយៗចូលរួមបោះឆ្នោតគាំទ្រគណបក្ស សង្គ្រោះជាតិ ហើយខ្ញុំនឹងជួយរកការងារឲ្យក្មួយៗទាំងអស់គ្នា”។
លោក សម រង្ស៊ី រស់នៅបែបនិរទេសខ្លួនឯងនៅក្រៅប្រទេស ដើម្បីគេចពីទោសជាប់ពន្ធនាគាររយៈពេល១១ឆ្នាំពីបទចោទប្រកាន់ជាច្រើន ករណីនោះ បានចោទប្រកាន់លោកនាយ ករដ្ឋមន្ត្រី ហ៊ុន សែន ថា មិនបានយកចិត្តទុកដាក់ចំពោះភាពគ្មានការងារធ្វើរបស់យុវជនក្នុងពេលកន្លងមក។
លោក សម រង្ស៊ី បានអះអាងថា យុវជនកម្ពុជាប្រហែល៧០ភាគរយគ្មានការងារធ្វើ ប៉ុន្តែកាលពីម្សិលមិញទាំងរូបលោក និង គណបក្សរបស់លោកមិនបានបង្ហាញពីតួលេខឬ ផ្តល់ផែនការណាមួយសម្រាប់ឲ្យនិស្សិតទាំងនោះមានការងារធ្វើនោះទេ។
ប៉ុន្តែលោក បានក្រើនរំឮដល់និស្សិតទាំងនោះថា ការបោះឆ្នោតមួយដោយមិនយុត្តិធម៌ឲ្យលោក ហ៊ុន សែន កាន់អំណាច នោះ អាចធ្វើឲ្យប៉ះពាល់ដល់សេដ្ឋកិច្ច។
លោក សម រង្ស៊ី បានថ្លែងបន្តថា “ នៅពេលមានការបោះឆ្នោតមិនសេរី និងយុត្តិធម៌នោះ សហគមន៍អន្តរជាតិនឹងមិនផ្តល់ប្រាក់កម្ចីដល់រដ្ឋាភិបាលរបស់លោក ហ៊ុន សែន ទេ ហើយរដ្ឋាភិបាលរបស់លោកនឹងស្លាប់ជាមិនខានឡើយ”។
គណបក្ស សង្គ្រោះជាតិ បានលើកឡើងថា ខ្លួនប្រហែលជាធ្វើពហិការមិនចូលរួមក្នុងការបោះឆ្នោតនេះទេ ប្រសិនបើលោក សម រង្ស៊ី មិនត្រូវបានអនុញ្ញាតឲ្យត្រឡប់មកប្រទេសកម្ពុជាវិញ ដើម្បីចូលរួមប្រកួតប្រជែងក្នុងការបោះឆ្នោតទេនោះ។
នឿន វិបុល អាយុ ១៩ឆ្នាំ ជានិស្សិតឆ្នាំទី១នៅវិទ្យាស្ថានពហុបច្ចេកវិទ្យាព្រះកុសុមៈដែលបានចូលរួមក្នុងព្រឹត្តិការណ៍កាលពីម្សិលមិញនោះបាននិយាយថា រូបគេកំពុងពិចារណាក្នុងការចូលរួមជាមួយគណបក្ស ប្រឆាំងហើយបានយល់ស្របតាមការវាយតម្លៃរបស់លោក សម រង្ស៊ី អំពីទីផ្សាការងារក្នុងពេលបច្ចុប្បន្ននេះ។
និស្សិតរូបេនះបាននិយាយថា “ខ្ញុំគិតថាទីផ្សាការងារនៅក្នុងប្រទេសកម្ពុជាមិនល្អទេសម្រាប់យុវជន។ការងារសំខាន់ណាស់សម្រាប់និស្សិតដែលបានបញ្ចប់ការសិក្សាហើយខ្ញុំបានយល់ស្របតាមចំណុចមួយចំនួនរបស់លោក សម រង្ស៊ី”។
ប៉ុន្តែលោក រស ចន្ត្រាបុត្រ អតីតអនុប្រធានរាជបណ្ឌិត្យសភាកម្ពុជា និងជាទីប្រឹក្សាផ្ទាល់របស់លោកនាយករដ្ឋមន្ត្រី ហ៊ុន សែន ទទួលបន្ទុកកិច្ចការយុវជនបានច្រានចោលនូវការអះអាងរបស់លោក សម រង្ស៊ី អំពីភាពគ្មានការងារធ្វើ និងប្រាក់កម្ចីថាជាការឃោសនាបោះឆ្នោតសុទ្ធសាធ។
លោកបានមានប្រសាសន៍បន្តថា “យើងមានធនធានមនុស្សគ្រប់គ្រាន់សម្រាប់ទីផ្សារនេះ ហើយយើងកំពុងបណ្តុះបណ្តាល [និស្សិត]សម្រាប់ទីផ្សារការងារ”។
គណបក្សប្រជាជនកម្ពុជាក៏បានបញ្ចុះបញ្ចូលក្រុមយុវជនឲ្យបោះឆ្នោតគាំទ្រខ្លួនផងដែរ។ កាលពីពីរសប្តាហ៍មុន មាននិស្សិតជាង៣.៦០០នាក់បានចូលជាសមាជិកគណបក្សប្រជាជនកម្ពុជានៅឯព្រឹត្តិការណ៍មួយនៅកោះពេជ្រក្រោមអធិបតីភាពរបស់លោក ហ៊ុន សែន ផ្ទាល់។
មួយសប្តាហ៍មុននោះ លោក ហ៊ុន សែន ក៏បានរៀបចំពិធីជប់លៀងដ៏ធំមួយឲ្យក្រុមនិស្សិតជាង៥.០០០នាក់ដែលបានចូលរួមក្នុងកម្មវិធីចែកប័ណ្ណកម្មសិទ្ធិដីធ្លីទូទាំងប្រទេសរបស់លោក ដោយសន្យាផ្តល់ប្រាក់ឲ្យនិស្សិតក្នុងម្នាក់ៗ១០០ដុល្លារផងដែរ៕ប្រែសម្រួលដោយ ឃិន ណៃ