មន្ត្រីសុខាភិបាលបាននិយាយថា កុមារពីរនាក់បានស្លាប់កាលពីម្សិលមិញ ដោយសារជំងឺគ្រុនផ្ដាសាយបក្សី ដែលបានឆ្លងរាលដាលទូទាំងខេត្តចំនួនបួន ក្នុងរយៈពេលពីរសប្ដាហ៍កន្លងមកនេះ ដែលធ្វើឲ្យចំនួនសរុបនៃអ្នកស្លាប់ បានកើនដល់បួននាក់ ហើយចំនួននៃករណីជំងឺនេះបានកើនឡើងដល់ប្រាំករណីចាប់តាំងពីថ្ងៃទី២១ខែមករាមក។
លោកវេជ្ជបណ្ឌិតដេនីសឡូរ៉ង់ (Denis Laurent) អនុប្រធានមន្ទីរពេទ្យគន្ធបុប្ផាបានមានប្រសាសន៍ថាកុមារីម្នាក់អាយុ១ឆ្នាំមកពីស្រុកគងពិសី ខេត្តកំពង់ស្ពឺ និងក្មេងស្រីម្នាក់ទៀតអាយុ៨ឆ្នាំ មកពីស្រុកទឹកឈូ ក្នុងខេត្តកំពត បានស្លាប់ កាលពីម្សិលមិញខណៈពេលសម្រាកព្យា បាល នៅក្នុងមន្ទីរពេទ្យកុមារគន្ធបុប្ផាក្នុងរាជធានីភ្នំពេញ។
ករណីស្លាប់ទាំងពីរនេះកើតមានទើបតែមួយសប្ដាហ៍ប៉ុណ្ណោះ បន្ទាប់ពីក្មេងស្រីអាយុ១៥ឆ្នាំម្នាក់ មកពីស្រុកព្រៃកប្បាស ខេត្តតាកែវនិងបុរសអាយុ៣៥ឆ្នាំម្នាក់មកពីស្រុកគងពិសី ខេត្តកំពង់ស្ពឺ ក៏បានស្លាប់នៅក្នុងមន្ទីរពេទ្យ ក្នុងរាជធានីភ្នំពេញដោយសារមេរោគអេចហ្វាយអេនវ័ន (H5N1)។ ក្នុងចំណោមករណី ដែលត្រូវបានកត់ត្រាទុកទាំងប្រាំរហូតមកទល់នឹងពេលនេះក្មេងប្រុសម្នាក់អាយុប្រាំបីខែមកពីសង្កាត់ចោមចៅខណ្ឌពោធិ៍សែនជ័យរាជធានីភ្នំពេញ ដែលមានអាការជំងឺដូចគ្នានេះកាលពីថ្ងៃទី៨ខែមករា គឺជាជនរងគ្រោះតែម្នាក់គត់ដែលរួចផុតពីសេចក្ដីស្លាប់។
លោកវេជ្ជបណ្ឌិត ឡូរ៉ង់ មានប្រសាសន៍ដោយមិនលម្អិតអំពីការផ្ទុះករណីជំងឺនេះថា“ ពេលនេះយើងមានអ្នកជំងឺស្លាប់បីនាក់នៅក្នុង [មន្ទីរពេទ្យគន្ធបុប្ផា] ដោយករណីទី១គឺក្មេងស្រីម្នាក់ [អាយុ១៥ឆ្នាំ]។ថ្ងៃនេះក្មេងស្រីអាយុ១៧ខែម្នាក់និងក្មេងស្រីម្នាក់ទៀតអាយុ៨ឆ្នាំ បានបាត់បង់ជីវិត”។
ថ្វីបើមានករណីថ្មីៗ ផ្ទុះឡើងភ្លាមៗជាច្រើនករណីក្ដីក៏មានមនុស្សតែបីនាក់ប៉ុណ្ណោះ ដែលត្រូវបានធ្វើរោគវិនិច្ឆ័យ ហើយរកឃើញមានរោគសញ្ញាគ្រុនផ្ដាសាយបក្សីពេញមួយឆ្នាំ២០១២ក៏ដោយក៏មន្ត្រីអង្គការសុខភាពពិភពលោក បាននិយាយកាលពីម្សិលមិញថាភ្លាមៗវាគ្មានគ្រោះថ្នាក់ទេ ឲ្យតែប្រជាពលរដ្ឋយកចិត្តទុកដាក់ពីរបៀបធ្វើអនាម័យ។
លោកសូនីគ្រីសនែន (Sonny Krishnan) មន្ត្រីផ្នែកទំនាក់ទំនងសាធារណៈរបស់អង្គការសុខភាពពិភពលោកបានមានប្រសាសន៍ថា “វាមិនគ្រោះថ្នាក់ខ្លាំងណាស់ណាទេ មិនទាន់មានភ័ស្ដុតាងណាបង្ហាញថាប្រជាពលរដ្ឋដែលលក់បក្សីរស់នៅតាមផ្សារអាចឆ្លងជំងឺនេះទេ។ប៉ុន្ដែនៅក្នុងឆ្នាំ២០០៥យើងក៏មានករណីមួយចំនួនដែរ ក្នុងរយៈពេលពីរ ឬបីសប្ដាហ៍ ហើយខ្ញុំគិតថាយើងមិនទាន់អាចសន្និដ្ឋានបែបណាមួយបាននៅឡើយទេ”។
យោងតាមលោក គ្រីសនែន ឲ្យដឹងថាការកើនឡើងនៃចំនួនបក្សីត្រូវលក់ដូរនៅមុនថ្ងៃចូលឆ្នាំចិន ដែលនឹងប្រពឹត្តទៅនៅថ្ងៃទី៨ខែកុម្ភៈព្រមទាំងនាពេលបច្ចុប្បន្នមានអាកាសធាតុត្រជាក់ដែលធ្វើឲ្យប្រព័ន្ធការពាររបស់មនុស្សចុះខ្សោយផងនោះ ជាមូលហេតុមួយ ក្នុងចំណោមមូលហេតុ ដែលអាចបង្កឲ្យមានករណីឆ្លងជំងឺនេះ។ លោកបានមានប្រសាសន៍ថា“ប្រសិនបើតម្រូវការ [បក្សី] កើនឡើង ហានិភ័យនៃការកើតជំងឺនេះមានកាន់តែខ្ពស់”។លោកបានពន្យល់ថាមេរោគដែលបានសម្លាប់មនុស្សអស់ជាង៣៣០នាក់នៅទូទាំងពិភពលោកនេះគឺឆ្លងពីសត្វមាន់ទៅសត្វមាន់ផ្សេងទៀតមុនពេលឆ្លងមកមនុស្ស។
លោកសូនី គ្រីសនែន មានប្រសាសន៍ថាកិច្ចប្រជុំបន្ទាន់មួយជាមួយមន្ត្រីក្រសួងសុខាភិបាលនឹងធ្វើឡើងនៅថ្ងៃនេះដើម្បីជំរុញការផ្សព្វផ្សាយតាមទូរទស្សន៍ និងតាមវិទ្យុ ដើម្បីអប់រំអំពីគ្រោះថ្នាក់ដោយសារជំងឺគ្រុនផ្ដាសាយបក្សី។លោកម៉មប៊ុនហេងរដ្ឋមន្ត្រីក្រសួងសុខាភិបាល បានបដិសេធមិនបំភ្លឺជុំវិញការផ្ទុះជំងឺគ្រុនផ្ដាសាយបក្សីនេះទេ។
កាលពីកក្កដាឆ្នាំមុន នៅក្នុងប្រទេសវៀតណាម ជំងឺគ្រុនផ្ដាសាយបក្សីថ្មីមួយប្រភេទបានផ្ទុះឡើងនៅក្នុងប្រទេសនេះប៉ុន្ដែគេមិនដែលរកឃើញជំងឺថ្មីនេះនៅក្នុងខ្លួនមនុស្សទេ។យោងតាមអង្គការសុខភាពពិភពលោកបានឲ្យដឹងថាមនុស្សពីរនាក់បានស្លាប់ហើយករណីជំងឺ H5N1 បួនករណីទៀតត្រូវបានកត់ត្រាទុកក្នុងប្រទេសវៀតណាមពេញមួយឆ្នាំ២០១២។
លោកវេជ្ជបណ្ឌិតហ្វីលីបប៊ូឈី (Philippe Buchy) ប្រធានផ្នែកវិសាណូសាស្ត្រ នៅវិទ្យាស្ថានប៉ាស្ទ័រក្នុងរាជធានីភ្នំពេញ ដែលបានធ្វើតេស្ដ ដើម្បីពិនិត្យករណីថ្មីៗទាំងនេះបានជំរុញឲ្យប្រជាពលរដ្ឋស្ថិតនៅឆ្ងាយពីបក្សីរស់ និងទិញមាន់ ឬទាណា ដែលទទួលបានការត្រួតពិនិត្យត្រឹមត្រូវ។
លោកវេជ្ជបណ្ឌិតហ្វីលីបប៊ូឈី បានមានប្រសាសន៍បន្ថែមថា“នេះជាអនុសាសន៍ដ៏សំខាន់មួយ សូមបងប្អូនកុំទិញបក្សីរស់ ពីព្រោះវាគ្មានសុវត្ថិភាពទេនៅក្នុងប្រទេស ដែលមេរោគនេះកំពុងរីករាលដាល”។ លោកបានមានប្រសាសន៍ទៀតថា ប្រជាពលរដ្ឋខ្មែរភាគច្រើនសម្លាប់ និងបោចរោមមាន់ដោយខ្លួនឯង ហើយទំនងជាមិនបានឆ្លងកាត់ការត្រួតពិនិត្យនោះទេ។
លោកវេជ្ជបណ្ឌិតរូបនេះក៏មានប្រសាសន៍ដែរថា ពិតជាគ្មានវិធីណាអាចព្យាករដឹងថាតើមានករណីបន្ថែមទៀតនៅក្នុងប្រទេសកម្ពុជាឬយ៉ាងណានោះទេ។
លោកម៉ាសាវ៉ាតអភិបាលស្រុកគងពិសី ដែលរហូតមកទល់ពេលនេះមានអ្នកជំងឺចំនួនពីរករណីនោះបានមានប្រសាសន៍ថាមិនទាន់រកឃើញប្រភពឆ្លងជំងឺនេះនៅឡើយទេហើយមន្ត្រីកំពុងតែព្យាយាមស្រាវជ្រាងស្វែងរកប្រភពបង្កឲ្យកើតមានជំងឺទាំងប្រាំករណីនេះ។
លោកបានមានប្រសាសន៍បន្ថែមទៀតថា “មន្ត្រីមកពីក្រសួងសុខាភិបាល និងមន្ទីរសុខាភិបាលខេត្ត មិនទាន់បានរកឃើញប្រភពនៃការឆ្លងជំងឺនេះទេ”៕ ប្រែសម្រួលដោយតែម សុខុម