កាលពីម្សិលមិញលោក អឹុមសិទ្ធី រដ្ឋមន្ត្រីក្រសួងអប់រំ បានចោទក្រសួងសេដ្ឋកិច្ចនិងហិរញ្ញវត្ថុថា មិនបានបញ្ចេញប្រាក់ឲ្យបានគ្រប់គ្រាន់ដល់វិស័យអប់រំ ដោយទុកឲ្យក្រសួងនេះពឹងផ្អែកយ៉ាងខ្លាំងលើជំនួយបរទេសក្នុងការធ្វើកំណែទម្រង់។
ដោយមិនអានសុន្ទរកថាដែលបានត្រៀមទុកអំឡុងសិក្ខាសាលាស្តីពីការអប់រំមួយដែលរៀបចំដោយសហភាពអឺរ៉ុបនៅសណ្ឋាគារកាំបូឌីយ៉ាណាក្នុងរាជធានីភ្នំពេញកាលពីម្សិលមិញ លោកអឹុមសិទ្ធី មានប្រសាសន៍ថាក្រសួងអប់រំបានទទួលថវិកាមួយផ្នែកតូចនៃថវិកាសរុបរបស់រដ្ឋាភិបាលរៀងរាល់ឆ្នាំ ចាប់តាំងពីឆ្នាំ២០០៧មក ជាមូលនិធិសំខាន់ក្នុងការបង្កើនការចុះឈ្មោះចូលរៀនរបស់សិស្ស និងការដំឡើងប្រាក់ខែគ្រូបង្រៀន។
លោកសិទ្ធី បានថ្លែងនៅក្នុងសិក្ខាសាលានេះថា“និយាយឲ្យត្រង់ទៅ ពេលនេះចំណែកថវិកាក្នុងវិស័យអប់រំ កំពុងតែថយចុះ ដូច្នេះក្រសួងសេដ្ឋកិច្ចនិងហិរញ្ញវត្ថុត្រូវគិតគូរពីបញ្ហានេះ”។
ដោយងាកចេញពីក្រុមអ្នកចូលរួម និងចង្អុលដាក់លោកជូគឹមឡេង អនុរដ្ឋលេខាធិការក្រសួងហិរញ្ញវត្ថុ ដែលអង្គុយនៅក្បែរលោក អឹុមសិទ្ធី និងដែលទើបតែថ្លែងសុន្ទរកថាបើកអង្គសិក្ខាសាលានេះ លោករដ្ឋមន្ត្រីបានបន្តថា“ក្រសួងហិរញ្ញវត្ថុមិនដឹងថាតើត្រូវបង្កើតគោលនយោបាយដូចម្តេចសោះឡើយ”។ លោក អឹុម សិទ្ធី បានមានប្រសាសន៍បន្ថែមទៀតថា“ដូចយើងឃើញស្រាប់ហើយគោលនយោបាយជាប់គាំងមិនអាចរារាំងកំណែទម្រង់បានទេ។ គោលនយោបាយនេះត្រូវធ្វើបច្ចុប្បន្នភាព និងធ្វើឲ្យប្រសើរឡើង”។
ដោយលើកពីការសាងសង់អគារថ្មីមួយនៅវិទ្យាស្ថានជាតិអប់រំជាឧទាហរណ៍នោះ លោក អឹុមសិទ្ធី បានមានប្រសាសន៍ថា នៅពេលការចំណាយលើការសាងសង់អគារនេះលើសពីថវិកាកំណត់ ក្រសួងហិរញ្ញវត្ថុបានបដិសេធមិនព្រមផ្តល់ប្រាក់បន្ថែមទៀតឡើយ។លោកបន្ថែមថាលិខិតចំនួនបួន ដែលលោកបានបញ្ជូនដោយផ្ទាល់ទៅក្រសួងនេះតាមកម្មវត្ថុនេះ មិនមានការឆ្លើយតបឡើយ។
លោកអឹុមសិទ្ធី បានមានប្រសាសន៍ដោយសម្តែងនូវការដឹងគុណសហភាពអឺរ៉ុបចំពោះការចំណាយថវិកាចំនួន៣៦លានអឺរ៉ូសម្រាប់កម្មវិធីអប់រំកម្ពុជារហូតមកដល់សព្វថ្ងៃនេះថា“ប៉ុន្តែខ្ញុំសូមថ្លែងអំណរគុណចំពោះដៃគូរបស់យើង[សហភាពអឺរ៉ុប] ដែលបានជួយយើង ពីព្រោះពេលខ្លះពលរដ្ឋកម្ពុជាមិនស្តាប់គ្នាទេ។ ខ្ញុំសូមថ្លែងអំណរគុណចំពោះដៃគូរបស់យើង ដែលបានចូលរួមជាមួយយើង និងមើលឃើញបញ្ហានេះ ហើយជួយដោះស្រាយបញ្ហានេះ”។
លោក ហ្សង់ ហ្វ្រង់ស័រ ខូថេន ឯកអគ្គរដ្ឋទូតសហភាពអឺរ៉ុប ដែលបានចូលរួមសិក្ខាសាលាបានសន្យាផ្តល់ប្រាក់ចំនួន៣៧,២លានអឺរ៉ូ ឬប្រហែល៥០,៣លានដុល្លារបន្ថែមទៀតដល់វិស័យអប់រំរបស់កម្ពុជាសម្រាប់ឆ្នាំ២០១៤ដល់ឆ្នាំ២០១៦ ហើយលោកបានមានប្រសាសន៍ថា ការគាំទ្ររបស់សហភាពអឺរ៉ុបសម្រាប់វិស័យអប់រំនេះ គ្រាន់តែជាការបំពេញបន្ថែមថវិការបស់រដ្ឋាភិបាលប៉ុណ្ណោះ មិនមែនជាការដាក់ជំនួសទេ។
លោកអគ្គរដ្ឋទូត ខូថេន បានលើកឡើងបន្ទាប់ពីសិក្ខាសាលានេះថា“ ការគាំទ្រ ដែលយើងផ្តល់ឲ្យនេះមិនគួរជំនួសថវិកាខ្វះខាតរបស់រដ្ឋាភិបាលទេ។វាគួរតែប្រើក្នុងផ្នែកផ្សេងទៀត”។ លោកបានបន្ថែមថា“នោះជាអ្វីដែលយើងនិយាយជាមួយរដ្ឋាភិបាលដោយសម្ងាត់ ប៉ុន្តែក៏និយាយជាសាធារណៈផងដែរ។ចំពោះបញ្ហានេះយើងសូមគាំទ្រយ៉ាងពេញទំហឹងចំពោះក្រសួងអប់រំ”។
ឯកអគ្គរដ្ឋទូតខូថេនបានមានប្រសាសន៍ទៀតថាខណៈដែលមូលនិធិរបស់រដ្ឋាភិបាលសម្រាប់វិស័យអប់រំបានកើនឡើងក្នុងរយៈពេលពីរបីឆ្នាំកន្លងមកនេះនោះការកើនឡើងនេះគឺមិនស័ក្តិសមនឹងកំណើននៅក្នុងការចំណាយសរុបរបស់រដ្ឋឡើយ។ លោកបានមានប្រសាសន៍ថា “អ្វីដែលយើងបានមើលឃើញក្នុងរយៈពេលប៉ុន្មានឆ្នាំចុងក្រោយនេះគឺថាទោះបីជាថវិកាសម្រាប់វិស័យអប់រំបានកើនឡើងក្តីក៏ភាគរយដែលត្រូវបានលៃទុកសម្រាប់វិស័យអប់រំ
ក្នុងថវិកាសរុបរបស់រដ្ឋាភិបាលកំពុងតែថយចុះ ដូច្នេះនោះជាការព្រួយបារម្ភមួយសម្រាប់យើង”។ លោកបានបន្តថា“ជាធម្មតាប្រសិនបើអស់លោកសម្លឹងមើលបណ្តាប្រទេសផ្សេងៗ
វិញ ចំណែកថវិកាសមរម្យសម្រាប់វិស័យអប់រំគួរតែមានចំនួនប្រហែល២០ភាគរយនៃថវិកាសរុបរបស់រដ្ឋាភិបាល។ខ្ញុំគិតថាកាលពីឆ្នាំមុនយើងមានប្រហែល១៦ភាគរយគឺធ្លាក់ចុះពី១៨ឬ១៩ភាគរយ”បើធៀបទៅនឹងឆ្នាំមុនៗ។
យោងតាមតួលេខផ្លូវការរដ្ឋាភិបាលបានលៃទុកថវិកាប្រហែល២៨០លានដុល្លារសម្រាប់វិស័យអប់រំក្នុងឆ្នាំនេះគឺប្រហែល៩,១ភាគរយនៃថវិកាសរុប៣,១ពាន់លានដុល្លារ។កាលពីឆ្នាំ២០១២ថវិកាសម្រាប់វិស័យអប់រំមាន២៤៥លានដុល្លារឬប្រហែល៩,៤ភាគរយនៃថវិកាជាតិ។
ផ្ទុយមកវិញថវិកាប្រហែល៤០០លានដុល្លារត្រូវបានលៃទុកសម្រាប់វិស័យការពារជាតិនិងសន្តិសុខនៅឆ្នាំនេះដែលមានចំនួនប្រហែល១៣ភាគរយនៃថវិកាចំណាយទាំងអស់ និងកើនឡើង១៧,៣ភាគរយពីឆ្នាំ២០១១ដែលមានចំនួន២៤៥លានដុល្លារគ្រាន់តែសម្រាប់ក្រសួងការពារជាតិមួយ។ប៉ុន្តែវាមិនមែនសុទ្ធតែបែបនេះនោះទេ នេះបើតាមការបញ្ជាក់ពីលោក អឹុមសិទ្ធី។
កាលពីឆ្នាំ២០០៧ ថវិកាចំនួន១៣២,៧លានដុល្លារត្រូវបានលៃទុកសម្រាប់វិស័យអប់រំ គឺប្រហែល១១,៥ភាគរយនៃថវិកាសរុបសម្រាប់ឆ្នាំនោះនិងកើនឡើង២៤ភាគរយ បើធៀបទៅនឹងឆ្នាំ២០០៦។ កាលពីម្សិលមិញមន្ត្រីក្រសួងសេដ្ឋកិច្ចនិងហិរញ្ញវត្ថុមិនព្រមធ្វើការបំភ្លឺទេ៕
ប្រែសម្រួលដោយចេវប៊ុននី
និង តែមសុខុម