កាលពីម្សិលមិញ ក្រុមមន្រ្តីរដ្ឋាភិបាលបានបញ្ចប់ការរៀបចំពិធីថ្វាយព្រះភ្លើងព្រះបរមសព សម្តេចឪព្រះបរមរតនកោដ្ឋ នរោត្តម សីហនុ ដ៏ធំបំផុតរបស់ប្រទេសកម្ពុជាក្នុងរយៈពេលជាច្រើនទសវត្សន៍កន្លងមកនេះ ដោយបានដាក់ពង្រាយកងកម្លាំងប្រដាប់អាវុធយ៉ាងច្រើន និងបានរៀបចំកាំភ្លើងធំចនួន១៤គ្រឿងនៅមុខព្រះបរមរាជវាំងផងដែរ។
អាជ្ញាធរបានបិទផ្លូវនានានៅជុំវិញតំបន់ជិតវាលព្រះមេរុជាទីដែលពិធីថ្វាយព្រះភ្លើងព្រះបរមសពព្រះបរមរតនកោដ្ឋ សម្តេចឪនរោត្តម សីហនុ ប្រព្រឹត្តទៅនៅទីនោះ នាថ្ងៃច័ន្ទបានបណ្តាលឲ្យស្ទះចរាចរណ៍ដោយសារមានរថយន្ត និងម៉ូតូជាច្រើនព្យាយាមធ្វើដំណើរតាមផ្លូវនានាក្នុងរាជធានីភ្នំពេញ។
ប្រជាពលរដ្ឋរាប់ពាន់នាក់ បានចាប់ផ្ដើមប្រមូលផ្ដុំគ្នានៅមុខព្រះបរមរាជវាំង ដើម្បីព្យាយាមចូលរួមក្នុងពិធីដង្ហែព្រះបរមសពព្រះបរមរតនកោដ នរោត្ដម សីហនុ ដែលមានចម្ងាយប្រាំមួយគីឡូម៉ែត្រ នៅថ្ងៃនេះ ដោយតម្កល់ព្រះបរមសពនៅក្នុងមឈូសា តាក់តែងលម្អដ៏ប្រណីត។
លោក ពង្ស សាវរិទ្ធ មេបញ្ជាការរងកងរាជអាវុធហត្ថរាជធានីភ្នំពេញ បានមានប្រសាសន៍ថា“ យើងបាននាំយកកាំភ្លើងធំសម្រាប់ចូលរួមក្នុងពិធីនេះ ទើបយើងត្រូវតែធានាសុវត្ថិភាព និងសន្ដិសុខ ដូច្នេះមិនត្រូវអនុញ្ញាតឲ្យមានមូ៉តូ ឬរថយន្ដណាមួយបុកកាំភ្លើងធំទាំងនោះទេ”។
លោកពន្យល់ថា ដូច្នេះហើយបានជាមានកងកម្លាំងប្រដាប់អាវុធក្នុងឯកសណ្ឋានប៉ារ៉ា ត្រូវបានដាក់ពង្រាយនៅក្នុងរាជធានីភ្នំពេញ។
លោកបានថ្លែងបន្ដថា កងកម្លាំងប្រដាប់អាវុធជាង១០.០០០នាក់ព្រមទាំងកងកម្លាំងរាជអាវុធហត្ថចំនួន២.០០០នាក់ នឹងត្រូវដាក់ពង្រាយ ក្នុងអំឡុងពិធីហែក្បួនថ្ងៃនេះផងដែរ និងនៅថ្ងៃចុងសប្ដាហ៍នេះ នៅមុនពេលពិធីចាប់ផ្តើមថ្វាយព្រះភ្លើងដល់ព្រះបរមសពសម្ដេចឪ ដែលនឹងប្រព្រឹត្តទៅនៅលើវាលព្រះមេរុ នៅខាងមុខសារមន្ទីរជាតិនាថ្ងៃច័ន្ទ។
លោក ជួន ណារិន ស្នងការរងនគរបាលរាជធានីភ្នំពេញ មានប្រសាសន៍ថា “ យើងត្រូវតែធ្វើការឲ្យបានហ្មត់ចត់បំផុត ដើម្បីរក្សាសន្តិសុខ និងសុវត្ថិភាពសម្រាប់ព្រះរាជពិធីជាប្រវត្តិសាស្ត្រនេះ”។