ជាការឆ្លើយតបទៅនឹងការបាញ់ប្រហារបុរសម្នាក់កាលពីសប្តាហ៍មុនដែលមិនព្រមផ្តល់សំណូកឲ្យមន្ត្រីនគរបាលនៅក្នុងខណ្ឌទួលគោក រាជធានីភ្នំពេញ អគ្គស្នងការនគរបាលជាតិបានសម្រេចបញ្ឈរជើងមន្ត្រីនគរបាលរាជធានីជិត៧០នាក់ ដោយសារប្រព្រឹត្តបទល្មើស ខណៈដែលកំពុងបំពេញតួនាទីរបស់ខ្លួន។
លោកឧត្តមសេនីយ៍ឯក ជួនសុវណ្ណ ស្នងការនគរបាលរាជធានីភ្នំពេញ បានមានប្រសាសន៍កាលពីម្សិលមិញថា អំឡុងកិច្ចប្រជុំនៅសាលារាជធានីកាលពីថ្ងៃព្រហស្បតិ៍ លោកបានប្រកាសថា នាយនគរបាលចំនួន៦៦នាក់ នឹងត្រូវព្យួរការងារ ខណៈដែលការសើុបអង្កេតរបស់នគរបាលបង្ហាញថា ពួកគេបានរំលោភច្បាប់ ឬមិនបានទទួលខុសត្រូវចំពោះភារកិច្ចរបស់ខ្លួនក្នុងនាមជាមន្ត្រីនគរបាល។
លោកឧត្តមសេនីយ៍ឯក សុវណ្ណ បានមានប្រសាសន៍ថា “ ខ្ញុំបានបញ្ជូនសំណើមួយទៅឯកឧត្តម [នេត សាវឿន] អគ្គស្នងការនគរបាលជាតិ ដើម្បីសុំការអនុញ្ញាតឲ្យដាក់វិន័យមន្ត្រីនគរបាលណាដែលប្រព្រឹត្តបទល្មើសព្រហ្មទណ្ឌ ពីព្រោះយើងមិនអាចអត់ឱនឲ្យមនុស្សទាំងនេះទេ”។ លោកបានបន្ថែមថា មន្ត្រីនគរបាលជាច្រើនត្រូវទទួលរងការចោទប្រកាន់ថាបានគំរាមទារប្រាក់។
លោកឧត្តមសេនីយ៍ឯក សុវណ្ណ បានមានប្រសាសន៍ថា មន្ត្រីនគរបាល១៣នាក់ទៀត ដែលត្រូវបានបញ្ឈរជើងរួចហើយ ព្រមទាំងត្រូវបញ្ជូនខ្លួនទៅកាន់អង្គភាពប្រឆាំងអំពើពុករលួយ ឬទៅក្រសួងមហាផ្ទៃ ដែលត្រួតពីលើនគរបាលជាតិ ដើម្បីសាកសួរបន្ថែមទៀត ហើយថា មន្ត្រីនគរបាលណាមួយ ដែលត្រូវបានរកឃើញថាមានកំហុសពីការប្រព្រឹត្តខុសធ្ងន់ នឹងត្រូវបញ្ជូនខ្លួនទៅតុលាការ។
លោកបានមានប្រសាសន៍ថា “ យើងនឹងដាក់ទោសយ៉ាងធ្ងន់ ចំពោះមន្ត្រីនគរបាលពីព្រោះពួកគេបានបំផ្លាញកិត្តិយស និងឥទ្ធិពលរបស់នគរបាលជាតិ”។
លោក សុវណ្ណ បានមានប្រសាសន៍ថា “ករណីនេះកើតចេញពីមន្ត្រីនគរបាលពីររូប ដែលបង្កឲ្យអាជីវករម្នាក់រងរបួស នៅពេលពួកគេព្យាយាមគំរាមទារប្រាក់”។
កាលពីថ្ងៃពុធ សាលាដំបូងរាជធានីបានចោទប្រកាន់មន្ត្រីនគរបាលទាំងពីររូបនេះពីបទបាញ់ឈ្មោះ ឌីវិចិត្រ អាយុ២៩ឆ្នាំ ដែលកាលពីថ្ងៃទី២៧ ខែមករា បដិសេធមិនផ្តល់ប្រាក់សំណូកឲ្យពួកគេ នៅត្រង់កុងត្រូលជជុះតាមដងផ្លូវលេខ៥៩៨ ក្នុងខណ្ឌទួលគោក។
លោក វិចិត្រ ដែលបើករថយន្តដឹកម្ទេសពីរាជធានីភ្នំពេញទៅកាន់ខេត្តកំពង់ឆ្នាំង ត្រូវមន្ត្រីនគរបាលមា្នាក់បាញ់យ៉ាងកៀក ហើយត្រូវចំទ្រូង បន្ទាប់ពីមានការដេញតាមបន្តិចនៅលើផ្លូវជាតិលេខ៥ក្នុងខណ្ឌឫស្សីកែវ។លោក វិចិត្រ ត្រូវបានបញ្ជូនទៅកាន់មន្ទីរពេទ្យកាល់ម៉ែត ដែលនៅទីនោះក្រុមវេជ្ជបណ្ឌិតបានវះយកក្បាលគ្រាប់កាំភ្លើង ដែលមិនចំបេះដូងគាត់។
លោកយូសុខគា មន្ត្រីនគរការិយាល័យប្រឆាំងគ្រឿងញៀនរាជធានីភ្នំពេញ ត្រូវតុលាការចោទប្រកាន់ពីបទប៉ុនប៉ងមនុស្សឃាត ចំណែកគូកនរបស់ខ្លួន ឈ្មោះ គង់ ដារា ជានាយនគរបាលសង្កាត់ច្រាំងចម្រះ២ ត្រូវបានតុលាការចោទប្រកាន់ពីបទគំរាមទារប្រាក់។
លោកវិចិត្រ បានមានប្រសាសន៍កាលពីម្សិលមិញថា លោកទាមទារសំណងជំងឺចិត្តចំនួន១០.០០០ដុលា្លារ ដើម្បីសងតម្លៃព្យាបាលរបួសរបស់លោក។លោកបានមានប្រសាសន៍ថា “ ខ្ញុំនឹងដាក់ពាក្យបណ្តឹងទារសំណងចំនួន១០.០០០ដុល្លារពីមន្ត្រីនគរបាលទាំងពីរនាក់នេះ ដើម្បីបង់ថ្លៃព្យាបាល ព្រោះខ្ញុំបានចំណាយលុយច្រើនណាស់ក្នុងការស្នាក់នៅទីនេះ
និងបានទទួលការព្យាបាលរយៈពេលមួយសប្តាហ៍”។ លោកបានបន្ថែមថា លោកនឹងចេញពីមន្ទីរពេទ្យនៅថ្ងៃនេះ។ លោកក៏បានជំរុញឲ្យអាជ្ញាធរលុបចោលកុងត្រូលជជុះនៅតាមផ្លូវជាតិលេខ៥ ពីរាជធានីភ្នំពេញ ដល់ខេត្តបាត់ដំបងផងដែរ។
លោកបានមានប្រសាសន៍ថា “ ខ្ញុំសូមសំណូមពរឲ្យសម្តេចនាយរដ្ឋមន្ត្រី ហ៊ុនសែនលុបបំបាត់ចោលកុងត្រូលជជុះនៅតាមផ្លូវជាតិលេខ៥ ពីព្រោះនគរបាលនៅទីនោះពុករលួយណាស់”៕
ប្រែសម្រួលដោយចេវប៊ុននី