កាលពីម្សិលមិញនៅមុខរោងពុម្ពសិង្ហមាសមានព្រះឆាយាល័ក្ខណ៍ របស់អតីតព្រះមហាវីរក្សត្រ សម្តេចឪ នរោត្តម សីហនុ ជាច្រើនសន្លឹកនៅពាសពេញកម្រាលឥដ្ឋ និងមានកាតដែលរចនាដោយព្រះភក្រ្តរបស់ព្រះអង្គបានហៀរចេញមកលើចិញ្ចើមផ្លូវ ។
អ្នកស្រីហ្គួរ៉ានស៊ីគីអាយុ៤១ឆ្នាំជាម្ចាស់រោងពុម្ពនេះ ដែលស្ថិតនៅតាមផ្លូវលេខ១៣ក្នុងរាជធានីភ្នំពេញ តែងតែផលិតស្លាកសញ្ញាប័ណ្ណផ្សព្វផ្សាយ និងស្លាកសញ្ញាពាណិជ្ជកម្ម ឲ្យភោជនីយដ្ឋាន និងហាងនានា ក្នុងរាជធានីភ្នំពេញ។ ប៉ុន្តែ សម្រាប់រយៈពេលបីថ្ងៃនេះ អ្នកស្រីបានបន្ថែមបុគ្គលិក ដើម្បីជួយបោះពុម្ព និងអ៊ុតព្រះឆាយាល័ក្ខណ៍ របស់អតីតព្រះមហារីរក្សត្រ។
អ្នកស្រីរា៉នស៊ីគីគឺជាម្ចាស់ហាងម្នាក់ក្នុងចំណោមម្ចាស់ហាងជាច្រើន និងជាអាជីវករមួយរូប នៅក្នុងរាជធានីភ្នំពេញ ដែលបានយកហាងរបស់ខ្លួនធ្វើជាកន្លែងលក់ និងចែកចាយដល់អ្នកលក់ព្រះឆាយាល័ក្ខណ៍តាមដងផ្លូវ ដែលព្យាយាមបំពេញតម្រូវការរបស់ប្រជាពលរដ្ឋរាប់ម៉ឺននាក់ ដែលអញ្ជើញមកគោរពព្រះវិញ្ញាណក្ខន្ធព្រះបរមសពព្រះរតនកោដ្ឋ ដែលនឹងត្រូវថ្វាយព្រះភ្លើងនៅល្ងាចនេះ។
អាជីវកររាប់រយនាក់ បានលក់ព្រះឆាយាល័ក្ខណ៍នៅតាមដងផ្លូវជុំវិញព្រះបរមរាជវាំង ដើម្បីលក់បូកាន់ព្រះមរណទុក្ខ និងប័ណ្ណផ្សេងៗ ដល់អ្នកកាន់ទុក្ខ ដើម្បីរំឭកដល់ព្រះមហាវីរក្សត្រជាទីស្រឡាញ់របស់ខ្លួន។
អ្នកស្រី រ៉ានស៊ីគី បានលក់ក្នុងតម្លៃ១៥០០រៀល និងអ្នកស្រីបានប៉ាន់ប្រមាណថា បានលក់អស់ចំនួន៧.០០០សន្លឹក ព្រមទាំងបូកាន់ទុក្ខរាប់ពាន់ និងព្រះឆាយាល័ក្ខណ៍តូចៗ រាប់ពាន់សន្លឹក ដែលលក់ក្នុងតម្លៃដូចគ្នាដែរ។
កាលពីម្សិលមិញ របររកស៊ីបែបនេះបានចំណេញយ៉ាងច្រើននៅឯហាងលក់សៀវភៅហ្គោលដិនបុ៊ក ស្ថិតនៅតាមផ្លូវលេខ១៣០ក្នុងរាជធានីភ្នំពេញ។ មនុស្សម្នាជាច្រើនប្រមូលផ្តុំគ្នានៅជុំវិញតុមួយដាក់ នៅខាងក្រៅហាងលក់សៀវភៅ ដើម្បីទិញព្រះឆាយាល័ក្ខណ៍របស់អតីតព្រះមហាវីរក្សត្រ។ នៅខាងក្នុងហាងមានម៉ាស៊ីនសម្រាប់អ៊ុតរូបថតចំនួនប្រាំមួយគ្រឿងកំពុងតែដំណើរការដោយមានបុគ្គលិកធ្វើការដាក់រូបថតមួយសន្លឹកហើយមួយសន្លឹកទៀតជាបន្តបន្ទាប់គ្នា។
អ្នកស្រីសៅលក្ខិណាជាម្ចាស់ហាងលក់សៀវភៅបានបដិសេធមិនសន្និដ្ឋានថា តើគាត់បានលក់ព្រះឆាយាល័ក្ខណ៍អស់ប៉ុន្មានសន្លឹកនោះទេប៉ុន្តែបាននិយាយថាអ្នកស្រីកំពុងព្យាយាមឆ្លើយតបតាមតម្រូវការរបស់ប្រជាពលរដ្ឋ។
អ្នកស្រីបាននិយាយថា “ យើងកំពុងលក់ព្រះឆាយាល័ក្ខណ៍ដូចលក់នំ ដែលទើបនឹងចេញពីឡអ៊ីចឹង។ មានអ្នកលក់ជាច្រើនមករកដល់ហាងរបស់យើង ហើយយើងបានលក់ឲ្យពួកគាត់ ហើយពេលខ្លះយើងផ្តិតព្រះឆាយាល័ក្ខណ៍លក់ឲ្យមិនទាន់ផង”។
កាលពីម្សិលមិញ ក្រុមអ្នកលក់បានប្រកួតប្រជែងគ្នា ដើម្បីទិញព្រះឆាយាល័ក្ខណ៍សម្រាប់ទុកលក់ឲ្យប្រជាពលរដ្ឋមកចូលរួមកាន់ព្រះរាជមរណទុក្ខ ដែលនាំគ្នាមកកាន់វាលព្រះមេរុ ដោយដើរតាមផ្លូវនានា នៅជុំវិញបរិវេណជុំវិញព្រះបរមរាជវាំង កាលពីល្ងាចម្សិលមិញ។
អ្នកស្រី អឿត មានអាយុ៦២ឆ្នាំ បាននិយាយថា អ្នកស្រីបានទិញ និងលក់ព្រះឆាយាល័ក្ខណ៍របស់អតីតព្រះមហាវីរក្សត្រ សម្តេចឪ នរោត្តម សីហនុ អស់ចំនួនប្រហែល៥០០សន្លឹក និងបានលក់បូមានព្រះឆាយាល័ក្ខណ៍ចំនួន៣០០បូ ចាប់តាំងពីថ្ងៃសៅរ៍មកក្នុងតម្លៃ៥០០រៀល សម្រាប់បូនីមួយៗ។
អ្នកស្រីនិយាយបន្តថា “ ប្រជាពលរដ្ឋបានប្រាប់ខ្ញុំថា ពួកគាត់ទិញព្រះឆាយាល័ក្ខណ៍ទាំងនេះ ដើម្បីទុកធ្វើជាវត្ថុអនុស្សាវរីយ៍ ពីព្រោះពួកគេចង់រក្សាទុកព្រះឆាយាល័ក្ខណ៍នេះសម្រាប់បង្ហាញដល់កូនចៅរបស់ខ្លួនឲ្យនឹកឃើញដល់ព្រះអង្គ”។
អ្នកស្រីមានបន្ថែមទៀតថា “ ប្រសិនបើខ្ញុំមិនលក់ព្រះឆាយាល័ក្ខណ៍សម្ដេចឪ នរោត្តម សីហនុ ទេនោះ តើប្រជាពលរដ្ឋខ្មែរនឹងចងចាំព្រះភក្ត្រ និងព្រះកិត្តិសព្ទរបស់ព្រះអង្គដោយរបៀបណា។ប្រជាពលរដ្ឋនឹងនឹកឃើញនូវអ្វី ដែលទ្រង់បានលះបង់ដើម្បីកសាងប្រទេសនិងអប់រំប្រជាពលរដ្ឋរបស់ទ្រង់ តាមរយៈព្រះឆាយាល័ក្ខណ៍របស់ទ្រង់”។
យោងតាមស្ត្រីម្នាក់ឈ្មោះ ហួត គៀតអាយុ២៥ឆ្នាំ ដែលអញ្ជើញមកដល់រាជធានីភ្នំពេញ ដើម្បីទិញព្រះឆាយាល័ក្ខណ៍ចំនួន១០០សន្លឹកឲ្យប្អូនស្រីរបស់ខ្លួនលក់នៅក្នុងខេត្តសៀមរាប បានឲ្យដឹងថា មិនមែនតែនៅក្នុងរាជធានីភ្នំពេញប៉ុណ្ណោះទេ ដែលប្រជាពលរដ្ឋខ្មែរត្រូវការព្រះឆាយាល័ក្ខណ៍នេះ។ ស្ត្រីរូបនេះនិយាយថា “ មានប្រជាពលរដ្ឋក្នុងខេត្តសៀមរាបច្រើនណាស់បានមកទិញព្រះឆាយាល័ក្ខណ៍របស់ព្រះអង្គ”។
ចំណែកព្រះឆាយាល័ក្ខណ៍ពាក់ព័ន្ធនឹងព្រះរាជពិធីថ្វាយព្រះភ្លើងដល់ព្រះបរមសពសម្ដេចឪ នរោត្តម សីហនុលក់ពុំសូវដាច់ទេព្រោះគេមិនសូវចាប់អារម្មណ៍។ព្រះឆាយាល័ក្ខណ៍ទាំងនោះមានខ្លះថតយូរមកហើយប៉ុន្ដែក៏មានព្រះឆាយាល័ក្ខណ៍ថ្មីៗពាក់ព័ន្ធនឹងពីធីដង្ហែព្រះបរមរតនកោដ្ឋសម្ដេចឪ កាលពីថ្ងៃសុក្រដែរ។
អ្នកស្រី រ៉ានស៊ីគី បានមានប្រសាសន៍ថា រូបថតរបស់អ្្នកស្រីខ្លះបានមកពីគេហទំព័រហ្គូហ្គល ដោយប្រើពាក្យស្វែងរក “ សម្តេចឪនរោត្តម សីហនុ”។បន្ទាប់មកអ្នកស្រីទាញយករូបថត ដែលអ្នកស្រីចង់លក់ រួចផ្ញើទៅឲ្យរោងពុម្ពរបស់អ្នកស្រី ដែលស្ថិតនៅជិតផ្សារអូរឫស្សី រួចបោះពុម្ពព្រះឆាយាល័ក្ខណ៍ទាំងនោះ សម្រាប់យកមកលក់វិញក្នុងរយៈពេល២៤ម៉ោង។ ព្រះឆាយាល័ក្ខណ៍ទាំងនោះរួមមាន ព្រះឆាយាល័ក្ខណ៍តូចៗរបស់សម្តេចឪសម្តេចម៉ែ
នរោត្តម មុនីនាថសីហនុនិងព្រះមហាក្សត្រ នរោត្តម សីហមុនី។ ក្នុងព្រះឆាយាល័ក្ខណ៍មួយ មានព្រះមហាវីរក្សត្រ សម្តេចនរោត្តមសីហនុនិងសម្តេចព្រះមហាក្សត្រីមុនីនាថសីហនុទ្រង់បង់កក្រមា និងកំពុងក្រសាលជាមួយសត្វស្វាមួយក្បាលនៅក្នុងព្រៃ។ក្នុងព្រះឆាយាល័ក្ខណ៍មួយទៀត រាជវង្សានុវង្សកំពុងគង់នៅក្នុងបន្ទប់ទទួលភ្ញៀវ ដែលពេលនោះព្រះមហាក្សត្រ នរោត្តមសីហនុ ទំនងជាមានព្រះជន្មនៅក្មេងវ័យនៅឡើយ ដោយមានព្រះកេសាខ្មៅរលើប។
ព្រះឆាយាល័ក្ខណ៍មួយចំនួនទៀតរបស់ព្រះបរមរតនកោដ្ឋ ជាអគ្គមេបញ្ជាការនៃកងយោធពលខេមរភូមិន្ទរយៈពេលច្រើនឆ្នាំកំពុងគំនាប់ទាហាន ឬជាព្រះឆាយាល័ក្ខណ៍ទ្រង់ព្រះពស្ត្រក្នុងឯកសណ្ឋានយោធា។
ជាការពិតណាស់ ក្នុងមួយព្រះជន្មរបស់ព្រះអង្គ ចាប់ពីកុមារភាពរហូតដល់ពេលឡើងគ្រងរាជសម្បតិ្ត នៅពេលព្រះអង្គមានជន្មាយុវ័យ១៩ព្រះវស្សា និងការឡើងគ្រងរាជ្យសម្បិត្តទាំងពីរលើក ពេលជាព្រះប្រមុខរដ្ឋ ព្រមទាំងក្នុងរយៈពេលប្រាំបួនឆ្នាំជាព្រះមហាវីរក្សត្រចូលនិវត្តន៍ និងមានព្រះឆាយាល័ក្ខណ៍នៃព្រះរាជពិធីជាបន្តបន្ទាប់នៅក្នុងរាជធានីភ្នំពេញ ដូចជាពិធីដង្ហែព្រះបរមសពព្រះបរមរតនកោដ្ឋ ដល់លើព្រះមេរុនៅទល់មុខសារមន្ទីរជាតិ ដើម្បីថ្វាយព្រះភ្លើង។
អ្នកស្រីលៀមជាម អាយុ៥៤ឆា្នំ បានកាន់ព្រះឆាយាល័ក្ខណ៍របស់ព្រះបរមសព ព្រះបរមរតនកោដ្ឋសម្តេចឪចំនួនប្រាំមួយសន្លឹកកាលពីម្សិលមិញ ដែលអ្នកស្រីចង់រក្សាទុកនៅផ្ទះដើម្បីបង្ហាញដល់កូនចៅជំនាន់ក្រោយរបស់អ្នកស្រី។ អ្នកស្រីបន្តថា “ បើទោះជាសម្តេចឪ យាងចូលទិវង្គតទៅហើយក៏ដោយ ក៏យើងនៅតែចងចាំព្រះអង្គតាមរយៈព្រះឆាយាល័ក្ខណ៍ទាំងនេះ”៕ ប្រែសម្រួលដោយ ឃិនណៃ