31 C
Phnom Penh

ម៉ម សូណង់ដូ ​ជា​បេក្ខជន​ចុង​ក្រោយ​ ដែលនឹង​ទទួល​បាន​ពាន​រង្វាន់​

ដោយ ឌឹ ខេមបូឌា ដេលី

បទវិភាគ

អង្គការ​សិទ្ធិមនុស្ស​ ដែល​មាន​មូល​ដ្ឋាន​នៅ​ក្នុង​ទីក្រុង​ឌុយប្លាំង បាន​ចាត់​ទុក​លោកម៉មសូណង់​ដូម្ចាស់​វិទ្យុ​សម្បុក​ឃ្មុំ​ ដែល​កំពុង​ជាប់​ពន្ធ​នាគារ ជា​បេក្ខ​ជន​ចុង​ក្រោយ​ម្នាក់​ក្នុង​ចំណោម​បេក្ខជន​ចុង​ក្រោយ​ជា​ច្រើន​មក​ពី​ជុំ​វិញ​ពិភព​លោក​ ដែលនឹង​​ទទួលបាន​ពាន​រង្វាន់​ប្រចាំ​ឆ្នាំ​របស់​ខ្លួន​សម្រាប់​សកម្ម​ជន​ការពារ​សិទ្ធិមនុស្ស​។

កាល​ពី​សប្តាហ៍​មុនអង្គការហ្វ្រន់ឡាញឌិហ្វែនឌឺ (Front Line Defenders) បាន​ប្រកាស​បញ្ជី​បេក្ខជន​ចុងក្រោយ​របស់​ខ្លួនចំនួន​៩០នាក់ ដែល​នឹង​ទទួលបាន​​​ពាន​រង្វាន់​ ហ្វ្រន់ឡាញឌិហ្វែនឌឺប្រចាំឆ្នាំ​​របស់​ខ្លួន​សម្រាប់​សកម្ម​ជន​ការពារ​សិទ្ធិមនុស្ស​​។

លោកម៉មសូណង់ដូម្ចាស់​ស្ថានីយវិទ្យុ​សម្បុក​ឃ្មុំ និង​ជា​ប្រធាន​អង្គការ​ក្រៅ​រដ្ឋា​ភិបាល​ ដែល​បង្រៀន​សហគមន៍​នៅ​តាម​ជន​បទ​អំពី​សិទ្ធិ​មនុស្ស​ និងសិទ្ធិបោះ​ឆ្នោត​របស់​ខ្លួន​ ត្រូវ​តុលាការ​ផ្តន្ទាទោស​ឲ្យ​ជាប់​ពន្ធនាគារ​រយៈពេល​២០ឆ្នាំ​ ​ពី​បទ​ញុះ​ញង់​ឲ្យ​បង្កើត​ចលនា​អប​គមន៍​នៅ​​ក្នុង​ខេត្ត​ក្រចេះ កាល​ពី​ខែ​វិច្ឆិកា។

អង្គការ​សិទ្ធិមនុស្ស​ទាំង​ក្នុង​ស្រុកនិង​អន្តរជាតិ​ជាច្រើន​បាន​ប្រកាស​ជំទាស់​ដាច់អហង្ការចំពោះ​ការ​ផ្តន្ទាទោសនេះ​ ដោយ​ចាត់​ទុកថាជា​សកម្មភាព​នយោបាយ​មួយ​ ដើម្បី​គាប​សង្កត់​អ្នក​រិះ​គន់​រដ្ឋា​ភិបាល​ដ៏មាន​ប្រជា​ប្រិយ​ភាពរូប​នេះ បន្ទាប់​ពី​ការ​កាត់​ទោសដោយ​មិនបាន​ផ្តល់​ភ័ស្តុ​តាង​គ្រប់គ្រាន់ ដើម្បី​បញ្ជាក់​បាន​ថាលោកម៉មសូណង់ដូមាន​ជាប់​ពាក់ព័ន្ធ​​នៅ​ក្នុង​ចលនា​អបគមន៍​នោះ។

អំឡុង​ពេល​មក​ចូលរួម​កិច្ច​ប្រជុំ​កំពូល​អាស៊ាននិង​អាស៊ីបូព៌ា​នៅ​ក្នុង​ប្រទេស​កម្ពុជា​ កាល​ពីខែ​វិច្ឆិកាលោកបារ៉ាក់អូបាម៉ា (Barack Obama)ប្រធានាធិបតី​សហរដ្ឋអាមេរិក​បាន​ចាត់ទុក​លោកម៉មសូណង់ដូជា​អ្នក​ទោស​នយោបាយ​ ហើយ​បាន​ទទូច​ឲ្យ​លោក​នាយក​រដ្ឋ​មន្ត្រីហ៊ុនសែនដោះលែង​រូប​លោកដើម្បី​​​​ចៀស​វាង​​កុំឲ្យខូចទំនាក់​ទំនង​ល្អរបស់​ប្រទេស​ទាំង​ពីរ​។នៅក្នុង​កិច្ច​ប្រជុំ​មួយ​ជាមួយ​​លោកហ៊ុនសែនកាល​ថ្ងៃអាទិត្យ ​លោកហ្សង់ម៉ាកអាយរ៉ូល (Jean Marc Ayrault) នាយករដ្ឋមន្ត្រី​បារាំង​ក៏​បាន​សម្តែង​ក្តី​ព្រួយ​បារម្ភអំពី​ការ​ផ្តន្ទាទោស​លោកម៉មសូណង់​ដូដែល​មាន​សញ្ជាតិ​ពីរគឺសញ្ជាតិ​បារំាងនិង​សញ្ជាតិ​ខ្មែរ​ផងដែរ។

លោកជីមឡាហ្វរ៉េន (Jim Loughran) អ្នក​នាំ​ពាក្យ​របស់​អង្គការ​ ហ្វ្រន់ឡាញឌិហ្វែនដឺបាន​មាន​ប្រសាសន៍​កាល​ពី​ម្សិលមិញ​ថាមូល​ហេតុ​ដែល​លោកម៉មសូណង់ដូត្រូវ​បាន​ជ្រើស​រើស​ជា​បេក្ខ​ជន​ចុង​ក្រោយ​មួយ​រូប​សម្រាប់ទទួល​ពាន​រង្វាន់​ក្នុង​ចំណោម​បេក្ខជន​​ដែល​ត្រូវ​ជ្រើស​រើស​ចុង​ក្រោយ​ចំនួន​៩០​នាក់​ មក​ពី​គ្រប់​ទិស​ទី​ក្នុង​ពិភពលោកគឺដោយ​សារ​តែ​ការ​ខិត​ខំ​ និង​ការ​តាំង​ចិត្ត​ធ្វើការ​ងារ​ ដើម្បី​ការពារ​សិទ្ធិមនុស្ស​ដោយសន្តិវិធី​របស់លោក”។

លោក​បន្តថា ពានរង្វាន់នេះ​គឺជា​មធ្យោ​បាយ​​មួយ​ ដើម្បី​បង្ហាញ​ឲ្យ​ឃើញថាការងារ​របស់​សកម្មជន​ការពារ​សិទ្ធិ​មនុស្ស​ដូចជាលោកម៉មសូណង់ដូគឺពិត​ជាស្រប​​​​ច្បាប់​ទាំង​ស្រុង​ ហេតុ​ដូច្នេះ​រដ្ឋាភិបាល​កម្ពុជា​គួរ​តែ​ដោះ​លែង​រូប​លោកជាបន្ទាន់ដោយ​គ្មាន​លក្ខខណ្ឌ​។

លោក​បាន​ថ្លែង​ថា “ពានរង្វាន់នេះ​គឺ​ជា​សារ​មួយ​បង្ហាញ​ពីការ​គាំទ្រ​ដ៏មុត​មាំ​មិន​គ្រាន់​តែ​ចំពោះ​លោកម៉មសូណងដូ​ ប៉ុណ្ណោះ​ទេ​ ប៉ុន្តែក៏​សម្រាប់​សកម្មជន​ការពារ​សិទ្ធិមនុស្ស​ទាំង​អស់​នៅ​ក្នុង​ប្រទេស​កម្ពុជា​ ដែល​មាន​លោកម៉មសូណង់ដូជា​ឧទាហរណ៍​ឲ្យ​ឃើញ​ស្រាប់​ផង​ដែរ​។អង្គការ​ ហ្វ្រន់ឡាញឌិហ្វែន​ដឺ

កំពុង​តែ​មាន​ក្តី​ព្រួយបារម្ភ​ថាស្ថានភាព​របស់​សកម្មជន​ការពារសិទ្ធិមនុស្ស​នៅ​ក្នុង​ប្រទេស​កម្ពុជា​ កំពុង​តែ​យ៉ាប់​យុឺន​ទៅៗហើយ​ក៏​កំពុង​ព្រួយ​បារម្ភ​អំពី​ការ​រំលោភ​ច្បាប់​ដោយ​រដ្ឋា​ភិបាល​ដើម្បី​គាប​សង្កត់​ និង​រារាំង​ការ​ងារ​របស់​ពួកគេ​ផង​ដែរ​”។

​លោកឡាហ្វរ៉េន ​បាន​បដិសេធ​មិន​ព្រម​និយាយថានរណា​ជាអ្នក​ជ្រើស​រើស​លោកម៉មសូណងដូនោះ​ទេប៉ុន្តែលោក​បន្ថែមថាការ​ជ្រើសរើសនេះ​ជា​ធម្មតា​គឺការ​កើត​ចេញ​ពីក្រុម​អង្គការ​សិទ្ធិ​មនុស្ស​ ដែល​ធ្វើការ​នៅ​ក្នុង​តំបន់ឬក៏នៅ​ក្នុង​ប្រទេស​របស់​បេក្ខជន។

លោក​​មាន​ប្រសាសន៍ថាបេក្ខជនដែល​នឹង​ឈ្នះ​ពាន​រង្វាន់​នេះ​ នឹង​ត្រូវ​ប្រកាស​នៅពេល​មួយ​នៅក្នុង​ខែ​ឧសភាឬក៏ខែមិថុនាហើយ​អ្នក​ដែល​ទទួល​បាន​ពាន​រង្វាន់​​ កាល​​​ពី​​​លើក​មុនៗក៏នឹង​បង្ហាញ​វត្តមាន​របស់​ខ្លួន​ជា​​​មួយ​​​ពានរង្វាន់​ផងដែរ​ មាន​ដូច​ជា​លោក​​​នាយក​​​រដ្ឋ​​​មន្ត្រីអៀរឡង់និង​តារាចម្រៀង​រ៉ុក​ គឺលោកប៊ូណូ (Bono) ​ជាដើម។បេក្ខ​ជន​ដែល​ទទួល​​​បាន​ពាន​រង្វាន់​ នឹង​ទទួលបាន​ប្រាក់​ចំនួន​១៥.០០០​ អឺរ៉ូ (២០.២៩១ដុល្លារ) រហូតដល់បេក្ខ​ជន​ជាប់​លេខ​៣និងសម្រាប់គាំទ្រ​ដល់​សកម្ម​​​ភាពការងារនៅក្នុង​អង្គការ​នេះរបស់​​​អ្នក​​​ទទួល​​​បានពានរង្វាន់នេះ។

លោកអ៊ូវីរៈប្រធាន​មជ្ឈមណ្ឌល​សិទ្ធិ​មនុស្ស​កម្ពុជា​ បាន​មាន​ប្រសាសន៍ថាអង្គការ​របស់​លោកនិង​អង្គការ​ឃ្លាំ​មើល​សិទ្ធិមនុស្ស​​ ដែល​មាន​មូល​ដ្ឋាន​នៅ​សហ​រដ្ឋ​អាមេរិកគឺ​ស្ថិត​ក្នុង​ចំណោម​អង្គការ​ទាំង​អស់​ ដែល​បាន​ជ្រើសរើស​លោកម៉មសូណង់​ដូ។ លោក​មាន​ប្រសាសន៍ថា“លោក​​​គួរតែ​​​បាន​ពានរង្វាន់នេះ ​ពីព្រោះ​លោក​បាន​ខិត​ខំ​ប្រឹង​ប្រែង​ខ្លាំង​ណាស់​ ដើម្បី​ការពារ​សិទ្ធិ​​​មនុស្សរួម​មាន​ការ​តតាំង​ជាមួយ​តុលាការ​ជាដើម​”។

លោកស្រីហួនផាន់ណារីអគ្គលេខា​ធិការ​​​​សមាគម​អ្នក​ប្រជា​ធិបតេយ្យ​ ដែល​បានគ្រប់​គ្រង​អង្គការ​នេះ​ចាប់​តាំងពី​លោកម៉មសូណង់ដូត្រូវ​តុលាការផ្តន្ទាទោស​ឲ្យ​ជាប់​ពន្ធនា​​​គារ​​​មកបាន​ស្វាគមន៍ចំពោះ​ដំណឹង​ ដែលគេ​ជ្រើស​​​​រើស​ប្រធាន​របស់​ខ្លួន​។ លោកស្រី​​មាន​ប្រសាសន៍ថា“ការ​ទទួល

បាន​ពានរង្វាន់នេះ​ ពិត​ជាមាន​សារៈសំខាន់​ខ្លាំង​ណាស់​សម្រាប់​រូប​លោកពីព្រោះ​អ្វីៗដែល​លោក​បាន​ធ្វើ​ គឺ​ដើម្បី​ប្រទេស​ជាតិ​ និង​ដើម្បី​ប្រជាពលរដ្ឋ​ក្រីក្រ”។ អ្វី​ដែល​អ្នកគាំទ្រលោកម៉មសូណង់ដូចង់​​​​បាន​បំផុត​នោះ​ គឺការ​ដោះ​លែង​រូប​លោក​។អង្គការ​ ហ្វ្រន់​ ឡាញឌិហ្វែនដឺសង្ឃឹម​ថាការ​​​ផ្តល់​​​​ពាន​រង្វាន់​ នឹង​ជួយ​ការ​ពារ​​សកម្មជន​ការពារ​សិទ្ធិមនុស្សដើម្បីឲ្យខិតខំបន្តការងារ​របស់​ខ្លួនថែមទៀត។

តែទោះជាយ៉ាងណាលោកស្រីហួនផាន់​ណារីនៅមិនទាន់ប្រាកដក្នុង​ចិត្ត​នៅ​​​ឡើយទេ។លោកស្រីថ្លែងថា“ខ្ញុំ​គិតថា​ រដ្ឋា​​​ភិ​បាលនឹង​​​​មិន​យក​ចិត្ត​ទុកដាក់​ ចំពោះ​​​រង្វាន់​​​នេះ​ឡើយ”។ បេក្ខ​ជន ​ដែល​ជាប់​ក្នុង​បញ្ជី​ចុង​ក្រោយ​ចំនួន​​​​​​​ប្រាំនាក់​ផ្សេង​ទៀត​ គឺមកពី​ប្រទេស​​​កូឡុំប៊ីអុីរ៉ង់កេនយ៉ាម៉ូរីតានីនិង​មក​​​ពី​​​ប្រទេស​​​

​អ៊ូសបេគីស្ថាន។នៅពេល​បេក្ខជន​សកម្មជន​ការពារ​សិទ្ធិមនុស្ស​ទាំងអស់​កំពុង​ប្រឈម​នឹង​គំរាម​គំហែង​និង​ការ​បំភិតបំភ័យ​នោះមាន​តែលោកម៉ម​ សូណង់ដូនិង​​​សកម្ម​​​ជន​​​ម្នាក់ទៀត​ប៉ុណ្ណោះ​ ដែលកំពុង​ជាប់​ពន្ធនាគារ​៕

ប្រែសម្រួលដោយស៊ាស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស