27 C
Phnom Penh

តុលាការ​​​កំពូល​​​បើក​​​សវ​​នាការ​​​ជំនុំ​​​ជម្រះ​​​​​​បណ្ដឹងសាទុក្ខ​​​ ពាក់​​​ព័ន្ធ​​​នឹង​​​ឃាតកម្ម​​​លើ​​​មន្ត្រី​​​រដ្ឋ​​​បាល​​​ជល​​​ផល

ដោយ ឌឹ ខេមបូឌា ដេលី

បទវិភាគ

កាល​​​ពី​​​ម្សិល​​​មិញ តុលាការ​​​កំពូល​​​បាន​​​បើក​​​​សវនាការ​​​ជំនុំ​​​ជម្រះ​​​សំណុំ​​​រឿង​​​របស់​​​សមា​ជិក​​​​គ្រួសារ​​​បីនាក់​​​ដែល​​​ត្រូវ​​​បាន​​​ផ្ដន្ទាទោស​​​ពី​​​បទ​​​សម​​​គំនិត​​​ និង​​​សម្លាប់​​​មន្ត្រី​​​រដ្ឋ​​​បាល​​​ជល​​​ផល​​​​ម្នាក់​​​ នៅ​​​ក្នុង​​​ខេត្ត​​​កំពង់​​​ធំ។ 

លោក ឯក ហេង នាយ​​​ខណ្ឌ​​​រដ្ឋបាល​​​ជល​​​ផល ខេត្ត​​​កំពង់​​​ធំ​​​ត្រូវ​​​ជន​ល្មើស​ប្រើ​​​កំបិត​​​បុ័ង​​​តោ​​​កាប់​​​ឲ្យ​​​ស្លាប់​​​ នៅ​​​ក្នុង​​​ការិយា​​​ល័យ​​​របស់​​​គាត់​​​ កាល​​​ពី​​​ខែ​​​ធ្នូ ឆ្នាំ​​​២០០៨។​​

លោក ឈុំ សុភា អាយុ​​​៥៨​​​ឆ្នាំ​​​ មន្ត្រី​​​រដ្ឋ​​​បាល​​​ព្រៃឈើ​​​ខេត្ត​​​កំពង់​​​ធំ​​​ ប្រពន្ធ​​​របស់​​​គាត់​ឈ្មោះ​​​អ្នក​ស្រី មាច ស៊ីថុល អាយុ​​​៥៨​​​ឆ្នាំ ​ប្រធាន​​​ផ្នែក​​​ហិរញ្ញវត្ថុរដ្ឋបាល​​​ជលផល​ខេត្ត​​​កំពង់​​​ធំ និង​​​កូនប្រុស​​​​​​របស់​​​ពួកគាត់​ឈ្មោះ ​ ឈុំ សុភារិទ្ធ អាយុ​​​៣៣​​​ឆ្នាំ មន្ត្រី​​​ក្រសួង​​​កសិកម្ម ​ត្រូវ​​​បាន​​​សាលាដំបូង​​​រាជធានី​​​ភ្នំ​​​ពេញ​​​ផ្ដន្ទា​ទោស​​​​ពី​​​បទ​​​​​​មនុស្ស​​​ឃាត កាល​​​ពីខែឧសភា​​​ ឆ្នាំ​​​២០១០ ឲ្យជាប់​​​ពន្ធ​​​នាគារ​​​រយៈពេល​​​២០​​​ឆ្នាំ។​​​

ឈ្មោះ​​​ គិត ហុកគាង កូន​​​ប្រសា​​​ប្រុស​​​របស់​​​​លោក សុភា និង​​​​អ្នក​​​​ស្រី ស៊ីថុល ​ជា​ជំនួយ​​​ការ​​​​​​ជន​​​រង​​​គ្រោះ​​​​​​នោះ​​​ត្រូវបាន​​​តុលាការ​​​​​​​ផ្តន្ទា​ទោស​​កំបាំង​​​មុខ ហើយ​​​ពេល​​​នេះ​​​កំពុង​​​រត់​​​គេច​​​ខ្លួន។​​​ សាលា​​​ឧទ្ធរណ៍​​​បាន​​​តម្កល់​​​សាលក្រម​​​ពិរុទ្ធ​​​ភាព​​​នេះកាល​​​ពី​​​ខែ​​​ធ្នូ ឆ្នាំ​​​២០១១។ អ្នក​ស្រី ស៊ីថុល បាន​​​ប្រាប់​​​តុលាការ​​​កាល​​​ពី​​​ម្សិល​​​មិញថា “ ខ្ញុំ​​​ប្ដឹង​​​សាទុក្ខ​​​ ​​ព្រោះ​​​តែ​​​សា​លា​ឧទ្ធរណ៍​​​មិន​​​មាន​​​យុត្តិ​​​ធម៌សម្រាប់​​​គ្រួសារ​​​ខ្ញុំ​​​”។

អ្នក​​​​ស្រី​​​បាន​​​​​​បន្ដ​​​ថា អ្នក​​ស្រី​​​បាន​​​ធ្វើការ​​​នៅ​​​​រដ្ឋ​​​បាល​​​ជលផល​​​នេះ​​​តាំង​​​ពី​​​ឆ្នាំ​​​១៩៧៩​​​​មក​​​ម៉្លេះ ប៉ុន្ដែ​​​មិន​​​ដែល​​​មាន​​​ជម្លោះ​​​ជា​​​មួយ​​​លោក ​ឯក ហេង នោះ​​​ទេ។​​​អ្នក​ស្រី​​​បាន​​​​និយាយ​ថា ​ការ​​​ដែល​​​​​​នគរ​​​បាល​​​ចោទ​​​ប្រកាន់​​​ថា អ្នក​​​​ស្រី​​​និង​​​ជន​​​រង​​​គ្រោះ​​​មាន​​​ជម្លោះ​​​ពាក់​​​ព័ន្ធ​​​នឹង​​​ការ​​​ចែក​​​លុយ​​​មូល​និធិ​​​សម្រាប់​​​អភិរក្ស​​​បឹង​​​ទន្លេ​សាប​​​នោះ​​​ គឺ​​​មិន​​​ត្រឹម​​​ត្រូវ​​​នោះ​​​ទេ។ អ្នក​ស្រី ស៊ីថុល បាន​​​បន្ថែម​​​ថា “ ខ្ញុំ​​​សូម​​​ឲ្យ​​​តុលាការ​​​លើកលែងការ​​​​​​ចោទ​​​ប្រកាន់​​​ខ្ញុំ  ​ហើយ​​​​ខ្ញុំ​​​សូម​​​ឲ្យ​​​តុលាការ​​​បញ្ជូន​​​រឿង​​​នេះទៅ​​​ស៊ើប​​​អង្កេត​​​ឡើងវិញ”។

ទាំង​​​លោក សុភា និង​​​លោក សុភារិទ្ធ បាន​​​អះ​​​អាង​​​ថា ពួកគេ​​​មិន​​​បាន​​​ដឹង​​​អំពី​​​ឃាត​​​កម្ម​នោះ​​​ទេ ហើយ​​​ពួកគេ​​​ក៏​​​មិន​ស្ថិត​នៅ​កន្លែង​កើត​ហេតុ​ដែរ​។​​​ លោក​​​បាន​​​​និយាយ​ថា “ ថ្ងៃ​​​ដែល​​​​ជន​​​រង​​​គ្រោះ​​​ត្រូវ​​​បាន​​​សម្លាប់​​​ ខ្ញុំ​​​រវល់​​​ជាមួយ​​​ការ​​​ងារ​​​ខ្ញុំ​​​នៅ​​​ក្នុង​​​ស្រុក​​​សណ្ដាន់ ចម្ងាយ​​​ប្រហែល​​​១២០​​​គីឡូ​​​ម៉ែត្រពី​​​ខេត្ត”។

អគ្គ​​​ព្រះ​​​រាជអាជ្ញារង​​​តុលាការ​​​កំពូល ​លោក ​ឈួន ចាន់ថា បាន​​​​ទាញ​ហេតុ​ផល​​​ថា ​តុលាការ​​​​មាន​​​ភ័ស្តុតាង​​​គ្រប់​​​គ្រាន់​​​ ដើម្បី​​​តម្កល់​​​​សាល​​​ក្រម​​​នេះ។​​​ លោក ឈួន ចាន់​​ថា ​​​បាន​​​មាន​​​ប្រសា​សន៍​​​ថា “ ខ្ញុំ​​​គិត​​​ថា សេចក្ដី​​​សម្រេច​​​របស់​​​សាលា​​​ឧទ្ធរណ៍គឺ​​​ត្រឹម​​​ត្រូវ”។

មូល​ហេតុ​​​ពាក់​​​ព័ន្ធ​​​នឹង​​​ឃាតកម្មនេះ​​​មិន​​​ត្រូវ​​​បាន​​​គេ​​​ដឹង​​​ទេ បុ៉ន្ដែ​​​គេ​​​​​​អះ​​​អាង​​​ថា  ​លោក​ ឯក​​​ ហេង ដែល​ទើប​​​តែ​​​​​​ឡើង​​​កាន់​​តំណែង​​​របស់​​​លោកបាន​​​រយៈ​​​ពេល​​​ប្រាំបី​​​ខែ  ​មុន​​​ពេល​​​​​​​​គាត់​ត្រូវ​បាន​ឃាតករ​សម្លាប់​នោះ បាន​​​បង្ក​​​បញ្ហា​​​ជា​​​ច្រើន​​​ជាមួយ​​​មន្ត្រី​​​​​​ជា​ច្រើន​ទៀត។

លោក ច័ន្ទ វិចិត្រ មេធាវី​​​ប្រពន្ធ​​​ជន​​​រង​​​គ្រោះ​​​​​​មានប្រសាសន៍ថា មុន​​​ពេល​​​លោក ​ឯក​ហេង ត្រូវ​​​បាន​​​តែង​​​តាំង​​​ឲ្យ​កាន់​តំណែង​​​នេះ​​​ក្នុង​​​ខេត្ត​​​កំពង់​​​ធំ សកម្មភាព​​​នេសាទ​​​ត្រី​​​ខុស​​​ច្បាប់​​​​នៅ​​​ក្នុ​​ង​ខេត្ត​​​នេះ​​​កើត​​​មាន​​​ច្រើន​​​ណាស់ ​​ដូច្នេះ​ហើយ​ទើប​​​រដ្ឋ​​​មន្ត្រី​​​ក្រសួង​​​កសិកម្ម​​​ប្រគល់​តួនាទី​ឲ្យ​​​គាត់​​​គ្រប់​​​គ្រង​​​សា្ថាន​​​ការ​​​ណ៍​​​នេះ។​​​

លោក​​​បាន​​​មាន​​​ប្រសាសន៍ថា “ រឿង​​​​​​នេះ​[ឃាតកម្ម​​​នេះ] មាន​​​អង្គការ​​​ចាត់​​​តាំង មាន​​​អ្នក​​​បញ្ជា មាន​​​អ្នក​​​ប្រព្រឹត្ត។​​​លោក​​​បាន​​​អះអាង​ថា មនុស្ស​​​​ក្រៅ​​​ពី​​​ជន​​​ដែល​​​ត្រូវ​​​​បាន​ផ្ដន្ទា​​​ទោស​​​​​រួច​ហើយ​នោះ ​​​ក៏​​​មាន​​​ការ​​​ពាក់​​​ព័ន្ធ​​​ក្នុង​​​ផែន​​​ការ​​​សម្លាប់នេះ​​​ដែរ”៕

ប្រែ​​​សម្រួល​​​ដោយ ហម សុផាណ្ណា​​​​​​​​​​​​​​​​​​​​​​​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស