កម្មករប្រហែល៨០នាក់បានធ្វើបាតុកម្មនៅមុខស្ថានទូតស៊ុយអែតកាលពីម្សិលមិញ ដោយជំរុញឲ្យមន្ត្រីនៅទីនោះជួយធ្វើអន្តរាគមន៍ក្នុងវិវាទការងារមួយទាក់ទងនឹងប្រាក់ខែមិនទាន់បើកពីរោងចក្រដែលផ្គត់ផ្គង់សម្លៀកបំពាក់ឲ្យក្រុមហ៊ុនស៊ុយអែត ឈ្មោះអេចអេនអេម (H&M)។
កម្មករដែលពាក់ព័ន្ធក្នុងវិវាទចាប់តាំំងពីដើមខែមករាមក បានលើកឡើងថារាងចក្រឃីងឡែនខេមបូឌា (Kingsland Garment Cambodia Co.Ltd) បានផ្អាកការងាររបស់ខ្លួន កាលពីក្នុងខែកញ្ញាឆ្នាំមុន ដោយអះអាងថាគ្មានការបញ្ជាទិញ ហើយថាការងារនឹងបន្តក្នុងខែមករា។បើទោះជាកម្មករបានទទួលប្រាក់ខែរបស់ខ្លួន៥០ភាគរយអំឡុងការផ្អាកនេះក៏ដោយ ក៏ពួកគេឈប់ទទួលបានតទៅទៀត កាលពីក្នុងខែធ្នូ ហើយបានដឹងថា ម្ចាស់រោងចក្របានប្រកាសក្ស័យធន និងបានចាកចេញពីរាជធានីភ្នំពេញ។
ចាប់តាំងពីពេលនោះមក កម្មករបាននិងកំពុងតែទាមទារប្រាក់អតីតភាពការងារ ព្រមទាំងប្រាក់លើកទឹកចិត្តប្រចាំឆ្នាំ ហើយបានផ្ញើញត្តិទៅស្ថានទូតអាមេរិក ពីព្រោះរោងចក្រនេះក៏បញ្ជូនសម្លៀកបំពាក់ទៅក្រុមហ៊ុនលក់រាយដ៏ធំមួយឈ្មោះ វ៉លម៉ាត (Wal-Mart) នៅសហរដ្ឋអាមេរិកដែរ។
កម្មករម្នាក់ក្នុងចំណោមកម្មកររោងចក្រទាំងនោះឈ្មោះយ៉នសុខឡេងអាយុ៣០ឆ្នាំ បាននិយាយថា “ យើងមកទីនេះដើម្បីដាក់ញត្តិទៅស្ថានទូតស៊ុយអែត និងញត្តិមួយទៀតផ្ញើទៅក្រុមហ៊ុនអេចអេនអេម ព្រោះយើងជាកម្មករ ដែលធ្វើការឲ្យក្រុមហ៊ុនអេចអេនអេម ហើយចង់ឲ្យស្ថានទូតនេះជំរុញក្រុមហ៊ុនអេចអេនអេមជួយដោះស្រាយបញ្ហានេះ”។
អ្នកស្រីបានបន្ថែមថា “ យើងសង្ឃឹមថា ពួកគេនឹងអាចដោះស្រាយបញ្ហានេះឲ្យពួកយើងបានពីព្រោះយើងធ្វើការឲ្យរោងចក្រនេះអស់រយៈពេលច្រើនឆ្នាំមកហើយ។ជាកម្មករនៅរោងចក្រនេះប្រាក់ដែលពួកគេជំពាក់យើង គឺជាញើសឈាមរបស់យើង”។
លោកស្រី អាណា អេរីកសាន់ (Anna Eriksson) អ្នកនាំពាក្យរបស់ក្រុមហ៊ុន អេចអេនអេមបានមានប្រសាសន៍ថា សម្លៀកបំពាក់ចុងក្រោយ ផលិតដោយរោងចក្រឃីងឡែន ចប់ក្នុងខែកក្កដា ឆ្នាំ២០១២។ទោះជាយ៉ាងណា សម្លៀកបំពាក់ទាំងនេះ ផលិតដោយមិនបានទទួលការសម្រេចយល់ព្រមពីភាគី
ក្រុមហ៊ុនឡើយ។
លោកស្រីអាណា អេរីកសាន់ បានមានប្រសាសន៍បន្ថែមថា “ មិនអាចទទួលយកបានឡើយ ព្រោះយើងមានគោលការណ៍ច្បាស់លាស់ថា ផលិតផលទាំងអស់ត្រូវតែធ្វើទៅតាមបរិមាណ ដែលក្រុមហ៊ុនអេចអេនអេម បានសម្រេច”។ លោកស្រីបានបន្ថែមថា វាជាការទទួលខុសត្រូវរបស់រោងចក្រឃីងឡែន ក្នុងការបើកប្រាក់អតីតភាពការងារឲ្យកម្មករ និងស្វែងរកដំណោះស្រាយ ឲ្យស្របតាមច្បាប់ការងារ។
លោកស្រីបានបន្ថែមថា “ ព្រោះតែក្រុមហ៊ុនអេចអេនអេម គ្មានជាប់ទាក់ទងរកស៊ីជាមួយរោងចក្រឃីងឡែនទេហើយយើងក៏គ្មានតួនាទីអ្វីសម្រាប់ការដាក់សម្ពាធលើម្ចាស់រោងចក្រនេះដែរ”។
អ្នកស្រី អានណេតដាល់ស្ត្រុម (Anette Dalstrom) លេខាទី១របស់ស្ថានទូតស៊ុយអែត បានបញ្ជាក់ថា ស្ថានទូតបានទទួលញត្តិនេះ ប៉ុន្តែបានបដិសេធមិនធ្វើអត្ថាធិប្បាយថែមទៀតឡើយ។
លោកមឿនតុលា ប្រធានកម្មវិធីការងាររបស់មជ្ឈមណ្ឌលអប់រំច្បាប់ សម្រាប់សហគមន៍ បានរិះគន់ចំពោះកង្វះខាតការត្រួតពិនិត្យលើអាជីវកម្មបរទេស ដែលរកស៊ីនៅក្នុងប្រទេសកម្ពុជា។ “ ដោយសារប្រព័ន្ធគ្រប់គ្រងរបស់រដ្ឋមិនល្អ រដ្ឋាភិបាលរបស់យើងមិនដឹងអ្វីសោះ សូម្បីតែក្រុមហ៊ុនក្ស័យធននៅពេលណាក៏មិនដឹងដែរ ប្រសិនបើកម្មករមិនតវ៉ាទេនោះ”៕
(រាយការណ៍បន្ថែមដោយ Dene-Hern Chen)
ប្រែសម្រួលដោយ ចេវប៊ុននី