នៅម៉ោង៩ព្រឹកកាលពីម្សិលមិញ យោធានគរបាល និងមន្ត្រីកងរាជអាវុធហត្ថជាង២០០នាក់ បាននាំគ្នាទៅប្រមូលផ្ដុំគ្នានៅខាងក្រៅភូមិគ្រឹះដ៏ស្កឹមស្កៃមួយ នៅតាមបណ្ដោយផ្លូវលេខ៥៥ ក្នុងខណ្ឌដូនពេញ រាជធានីភ្នំពេញ។ ហើយនៅម៉ោង១០ព្រឹកចំនួននេះ បានកើនឡើងប្រហែល១.០០០នាក់ ដោយមានបន្ថែមសមាជិកអង្គភាពកងអង្គរក្ស ហើយបានធ្វើឲ្យផ្លូវមួយនេះ មើលទៅពោរពេញទៅដោយឯកសណ្ឋានរបស់អាជ្ញាធរ។
ភាពីមុិច ដ៏មានឥទ្ធិពល អំឡុងពិធីបុណ្យចូលឆ្នាំចិន នៅភូមិគ្រឹះរបស់លោកស្រី ក្នុងខណ្ឌដូនពេញ កាលពីម្សិលមិញ។ Ben Woods /The Cambodia Daily
អ្នកទាំងអស់ដែលបានទៅប្រមូលផ្ដុំគ្នានោះ បានកំពុងរង់ចាំលោកស្រីជឹងសុភាពម្ចាស់ក្រុមហ៊ុនអភិវឌ្ឍន៍អចលនទ្រព្យភាពីមិុចដ៏មានអំណាច និងជាភរិយារបស់លោកឡៅ ម៉េងឃិនសមាជិកព្រឹទ្ធសភាមកពីគណបក្សប្រជាជនកម្ពុជា ជូនអាំងប៉ាវ ដែលមានលុយនៅក្នុងនោះដល់ពួកគេ ហើយការជូនអាំងប៉ាវនេះ ជាធម្មតាតែងតែធ្វើឡើងអំឡុងបុណ្យចូលឆ្នាំចិន។
ក្រុមហ៊ុន ភាពីម៉ិច បានកាន់កាប់ដីសម្បទានសេដ្ឋកិច្ចជាច្រើននៅទូទាំងប្រទេសកម្ពុជា។ ដីសម្បទានសេដ្ឋកិច្ច ដែលគួរឲ្យកត់សម្គាល់បំផុតនោះគឺជាដីសម្បទានសេដ្ឋកិច្ច ដែលមានទំហំ៣១៦.០០០ហិកតា នៅក្នុងស្រុកក្រគរ ខេត្តពោធិ៍សាត់ ដែលអ្នកភូមិបានតវ៉ាជាច្រើនលើកច្រើនសា ដោយលើកឡើងថា ដីរបស់ពួកគាត់ត្រូវគេកាប់រានដោយខុសច្បាប់។មន្ត្រីកងរាជអាវុធហត្ថជាច្រើនត្រូវបានដាក់ពង្រាយ ដើម្បីការពារដីសម្បទានសេដ្ឋកិច្ច។លោកឡៅម៉េងឃិនស្វាមីរបស់លោកស្រីជឹងសុភាពគឺជាម្ចាស់ក្រុមហ៊ុនស៊ូកាគូអុិនផងដែរ ដែលបានប្រើកងសន្ដិសុខរដ្ឋាភិបាលប្រដាប់ដោយអាវុធប្រឆាំងនឹងអ្នកតវ៉ានៅក្នុងគម្រោងអចលនទ្រព្យរបស់ខ្លួន ក្នុងសហគមន៍បឹងកក់ ក្នុងរាជធានីភ្នំពេញ។
អង្គការសិទ្ធិមនុស្សបានចោទប្រកាន់ជាយូរមកហើយថា កងសន្ដិសុខរបស់រដ្ឋាភិបាលជាពិសេសកងរាជអាវុធហត្ថ បានការពារដីសម្បទានឯកជនសម្រាប់គ្រួសារអ្នកមានទ្រព្យស្ដុកស្ដម្ភ និងមានទំនាក់ទំនងល្អជាមួយរដ្ឋាភិបាល ក្នុងជម្លោះផលប្រយោជន៍មួយ។
ប៉ុន្ដែមន្ត្រីដឹងគុណទាំងអស់ ដែលបាននាំគ្នាទៅប្រមូលផ្ដុំនៅខាងក្រៅភូមិគ្រឹះរបស់លោកស្រី ជឹង សុភាព ដែលគេហៅថាយាយ ភូ កាលពីម្សិលមិញ និងដែលបានទទួលអាំងប៉ាវម្នាក់ៗចំនួនពី៣០.០០០រៀលទៅ៥០.០០០រៀល បង្ហាញឲ្យឃើញយ៉ាងច្បាស់ពីទំនាក់ទំនងយ៉ាងពិសេសនេះ។
មន្ត្រីកងរាជអាវុធហត្ថម្នាក់ឈ្មោះ ស៊ាងរ៉ាឌីន បាននិយាយនៅពេលកំពុងរង់ចាំខាងក្រៅច្រកទ្វារភូមិគ្រឹះរបស់យាយ ភូ ថា“ យើងជួយគាត់នៅពេលមានបញ្ហាកើតឡើង មិនគ្រាន់តែនៅក្នុងរាជធានីភ្នំពេញប៉ុណ្ណោះទេប៉ុន្ដែក៏មាននៅបណ្ដាខេត្តផងដែរ”។គាត់បានបន្ដថា “ លោកស្រីស្រឡាញ់ចូលចិត្តកងកម្លាំងប្រដាប់អាវុធ ពីព្រោះលោកស្រីដឹងថាយើងអាចជួយការពារលោកស្រីបាន ហើយពីព្រោះគាត់គឺជាមន្ត្រីជាន់ខ្ពស់មួយរូបក្នុងជួររដ្ឋាភិបាល។ លោកស្រីគឺជាអ្នកជំនួញមួយរូប ហើយលោកស្រីក៏បានធ្វើការជាមួយកាកបាតក្រហមកម្ពុជាផងដែរ”។
លោក ស៊ាងរ៉ាឌីនបានបន្ថែមថា “ ហើយមិនគ្រាន់តែកងរាជអាវុធហត្ថនោះទេ វាក៏នៅមានកងកម្លាំងផ្សេងៗទៀតផងដែរ ដែលបានចូលរួមជួយលោកស្រីក្នុងការតវ៉ាផ្សេងៗ ដែលប៉ះពាល់ដល់គម្រោងរបស់លោកស្រី ដូចជាគម្រោងនៅបឹងកក់ជាដើម”។ លោកចាន់ដារ៉ា មន្ត្រីកងរាជអាវុធហត្ថម្នាក់ទៀត ដែលបាននិយាយថាអង្គភាពរបស់ខ្លួនបានធ្វើការឲ្យគ្រួសាររបស់លោកស្រីដោយផ្ទាល់និយាយថា ចិត្តសប្បុរសរបស់លោកស្រី ជឹង សុភាពចំពោះអ្នកដឹងគុណដល់លោកស្រីគឺដោយសារតែពួកគេបានជួយលោកស្រី។
លោកចាន់ ដារ៉ាបាននិយាយថា “ ខ្ញុំ គឺជាមន្ត្រីកងរាជអាវុធហត្ថម្នាក់ នៅក្នុងអង្គភាពដែលបានជួយការពារគ្រួសារលោកស្រី ហេតុដូច្នេះហើយបានជាលោកស្រីឲ្យអាំងប៉ាវពួកយើង គឺដើម្បីអរគុណពួកយើង។ ខ្ញុំពិតជាកោតសរសើរចំពោះទង្វើលោកស្រីណាស់។យើងជាមន្ត្រីកងរាជអាវុធហត្ថ ហើយយើងក៏បានជួយដល់លោកស្រីផងដែរ យើងតែងតែជួយលោកស្រី នៅពេលណាដែលលោកស្រីត្រូវការជំនួយ”។
លោកឡៅវណ្ណកូនប្រុសរបស់លោកឡៅម៉េងឃិនបានលើកឡើងថាគ្រួសាររបស់ខ្លួន បានចែកអាំងប៉ាវអស់ជាង៥.០០០ តែលោកមិនបានដឹងថា ចែកលុយអស់ប៉ុន្មាននោះទេ។
លោក ឡៅ វណ្ណ លើកឡើងបន្ដទៀតថា “ នេះគឺជាចិត្តសប្បុសរបស់យើង ដែលបានជូនអាំងប៉ាវដល់កងកម្លាំងប្រដាប់អាវុធ ព្រោះពួកគេបានខិតខំធ្វើការខ្លាំងណាស់។
ពួកគេទាំងអស់ដូចជានគរបាលចរាចរ និងនគរបាលផ្នែកផ្សេងៗទៀតមិនគ្រាន់តែធ្វើការឲ្យគ្រួសាររបស់ខ្ញុំប៉ុណ្ណោះទេប៉ុន្ដែក៏ធ្វើការឲ្យគ្រួសាររបស់ប្រជាពលរដ្ឋគ្រប់រូបផងដែរ”។លោកបានបន្ថែមទៀតថាគ្រួសាររបស់លោកបានចែកអាំងប៉ាវរាស់ឆ្នាំអស់រយៈពេលជិតមួយទសវត្សរ៍មកហើយ។
លោកស្រី ជាវណ្ណាតអ្នកវិភាគនយោបាយឯករាជ្យមួយរូប បានមានប្រសាសន៍ថាការផ្ដល់ថវិកាទៅឲ្យកងកម្លាំងទាំងនេះពីសំណាក់ម្ចាស់ក្រុមហ៊ុនឯកជន ពិតជាធ្វើឲ្យគេមានចម្ងល់យ៉ាងខ្លាំង។ លោកស្រីបានថ្លែងថា “ អ្វីដែលយើងបានឃើញនៅពេលឥឡូវនេះ គឺស្ដែងឲ្យឃើញពីគោលនយោបាយក្រៅផ្លូវការរបស់មន្ត្រីជាន់ខ្ពស់ក្នុងជួររដ្ឋាភិបាល”។លោកស្រីបានបន្ថែមទៀតថា “ ហេតុដូច្នេះហើយ ប្រសិនបើមានការផ្លាស់ប្ដូរណាមួយ ត្រូវតែមានគោលនយោបាយពីមន្ត្រីជាន់ខ្ពស់ឲ្យនគរបាល និងកងរាជអាវុធហត្ថនៅឯករាជ្យ និងមិនស្វែងរកថវិកាពីអ្នកជំនួញ ឬក៏វិស័យឯកជន”។ លោកផៃស៊ីផានអ្នកនាំពាក្យទីស្ដីការគណៈរដ្ឋមន្ត្រី បានមានប្រសាសន៍ថា កងកម្លាំងប្រដាប់អាវុធរបស់ប្រទេសកម្ពុជាបង្កើតឡើង គឺដើម្បីការពារផលប្រយោជន៍
របស់សាធារណជនមិនមែនសហគ្រាសឯកជននោះទេ ហើយលោកបានបន្ថែមថាលោក មិនអាចធ្វើអត្ថាធិប្បាយថា តើប្រពៃណីជូនអាំងប៉ាវរបស់លោកស្រីជឹងសុភាពសមស្របឬក៏មិនសមស្របនោះទេ។ លោកបានមានប្រសាសន៍ថា “ វាពិបាកណាស់សម្រាប់ខ្ញុំ ដែលនិយាយថាវាសមស្រប
ឬក៏មិនសមស្របនោះ ពីព្រោះយើងគ្មានច្បាប់ណាមួយបែបនេះឬក៏ច្បាប់ជម្លោះផលប្រយោជន៍នោះឡើយ”។ ដោយឡែកលោកឡុនសារ៉ានមន្ត្រីកងរាជអាវុធហត្ថម្នាក់ផ្សេងទៀត ដែលទទួលបានអាំងប៉ាវប្រាំឆ្នាំជាប់ៗគ្នា បាននិយាយយ៉ាងខ្លីពីសុភាសិតខ្មែរមួយថា“ មានទៅមានមក” ដែលមានន័យថា ប្រសិនបើអ្នកផ្ដល់រង្វាន់ទៅឲ្យនរណាម្នាក់ អ៊ីចឹងអ្នកនោះនឹងផ្ដល់ផលប្រយោជន៍ទៅឲ្យអ្នកវិញ៕
(រាយការណ៍បន្ថែមដោយ Ben Woods)
ប្រែសម្រួលដោយស៊ាស៊ុយឈាង