អ្នកនាំពាក្យម្នាក់បានបញ្ជាក់កាលពីម្សិលមិញថាមេធាវីម្នាក់ ដែលជាប់ពាក់ព័ន្ធនឹងសំណុំរឿងដ៏រសើប ពាក់ព័ន្ធនឹងក្រុមហ៊ុនទូរស័ព្ទអឹមហ្វូន ដោយបាននិយាយប្រាប់ប្រព័ន្ធផ្សព្វផ្សាយនោះ បណ្តាលឲ្យមានការចេញសេចក្តីណែនាំមួយដ៏ចម្រូងចម្រាសពីគណៈមេធាវីកម្ពុជាមកលើមេធាវីទាំងអស់ ឲ្យប្រឹក្សាយោបល់ជាមួយគណៈមេធាវីកម្ពុជាជាមុនសិន មុននឹងធ្វើសេចក្តីថ្លែងការណ៍ណាមួយតាមប្រព័ន្ធផ្សព្វផ្សាយ។
លោកគួយធុនណាជាមេធាវីតំណាងឲ្យក្រុមហ៊ុនទូរគមនាគមន៍ហួវី (Huawei) របស់ចិន ក្នុងការតស៊ូតាមផ្លូវច្បាប់ ដើម្បីទាមទារប្រាក់ជំពាក់ចំនួន៦៥លានដុល្លារ ពីក្រុមហ៊ុនអឹមហ្វូនដែលបានក្ស័យធនទៅហើយនោះ ត្រូវបានគណៈមេធាវីកម្ពុជាចេញលិខិតព្រមានមួយចុះថ្ងៃទី៣១ខែមករាហើយបានចុះផ្សាយលើគេហទំព័ររបស់គណៈមេធាវីកម្ពុជាផងដែរ ដើម្បីហាមមេធាវីទាំងអស់ កុំឲ្យនិយាយជាមួយប្រព័ន្ធផ្សព្វផ្សាយ។
លិខិតនោះបានលើកឡើងថាលោកគួយធុនណាបានប្រព្រឹត្តខុសនឹងមាត្រា១៥នៃច្បាប់ស្តីពីក្រមសីលធម៌របស់មេធាវី ដែលហាមឃាត់មិនឲ្យមេធាវីទាំងអស់ផ្តល់ព័ត៌មានមិនពិត ឬផ្សាយអំពីខ្លួនឯង តាមប្រព័ន្ធផ្សព្វផ្សាយឡើយ។ មាត្រានេះមិន ដែលធ្លាប់លើកយកមកអនុវត្តទេ ដើម្បីហាមមេធាវីមិនឲ្យនិយាយជាមួយប្រព័ន្ធផ្សព្វផ្សាយ។
ជាការឆ្លើយតបតាមសំណើរបស់គណៈមេធាវីនៅក្នុងថ្ងៃដដែលនោះ ក្រសួងព័ត៌មានបានចេញសេចក្តីថ្លែងការណ៍មួយ ជូនដំណឹងប្រាប់អ្នកយកព័ត៌មានទាំងអស់ ឲ្យទាក់ទងគណៈមេធាវីនៅពេលណាចង់បានការអត្ថាធិប្បាយពីមេធាវីណាមួយនោះ។
លោកយឹមសារីអ្នកនាំពាក្យគណៈមេធាវី
កម្ពុជាបានបញ្ជាក់កាលពីម្សិលមិញថាមេធាវីទាំងអស់គួរតែទទួលបានការយល់ព្រមជាមុនសិនមុនពេលនិយាយជាមួយប្រព័ន្ធផ្សព្វផ្សាយ ប៉ុន្តែលោកថ្លែងថាការចេញសេចក្តីថ្លែងការណ៍ណែនាំពីអំពីច្បាប់នេះគឺសំដៅទៅលើការលើកឡើងរបស់លោកគួយធុនណាដែលចុះផ្សាយក្នុងប្រព័ន្ធផ្សព្វផ្សាយ។
លោកយឹមសារីមានប្រសាសន៍បន្តថា “ការហាមឃាត់នេះបានកើតឡើងបន្ទាប់ពីលោកគួយធុនណាបានប្រព្រឹត្តខុស ហើយគណៈមេធាវីកម្ពុជាមិនចង់ឲ្យមេធាវីផ្សេងទៀតធ្វើតម្រាប់តាមគាត់ឡើយ។យើងមានបម្រាម ដល់មេធាវីទាំងអស់មិនត្រូវនិយាយជាមួយអ្នកយកព័ត៌មាន ដោយគ្មាការយល់ព្រម បានទេ ពីព្រោះមេធាវីខ្លះក្នុងពេលថ្មីៗនេះបានផ្តល់បទសម្ភាសជាមួយប្រព័ន្ធផ្សព្វផ្សាយ ហើយពួកគេមិនគោរពវិជ្ជាជីវៈទេ”។
មានតែសំណុំរឿងក្តីមួយរបស់លោកគួយធុនណាដែលតុលាការកំពុងចាត់ការដោយចេញដីការក្សាការពារដើម្បីរារាំងក្រុមហ៊ុនអឹមហ្វូនបន្ទាប់ពីមានពាក្យបណ្តឹងពីក្រុមហ៊ុនហួវីនិងដីការក្សាការពាររបស់តុលាការមួយទៀតដើម្បីរារាំងក្រុមហ៊ុនអឹមហ្វូនកាលពីខែតុលាទាក់ទងនឹងបំណុលចំនួន៣,៧៣លានដុល្លារដែលក្រុមហ៊ុនអឹមហ្វូនបានជំពាក់ក្រុមហ៊ុនអែលទិច (Eltek) របស់ប្រទេសន័រវែស។
កាលពីខែធ្នូក្រុមហ៊ុនអឹមហ្វូនបានយល់ព្រមផ្ទេរអតិថិជនរបស់ខ្លួនជាង៤០០.០០០នាក់ ទៅឲ្យក្រុមហ៊ុនម៉ូប៊ីថែល ជាក្រុមហ៊ុនទូរគមនាគមន៍ ដែលគ្រប់គ្រងដោយអ្នកជំនួញដ៏ល្បីឈ្មោះគឺលោកគិតម៉េង។
ក្នុងអំឡុងពេលចេញដីការក្សាការពារ ដើម្បីរារាំងក្រុមហ៊ុនអឹមហ្វូនទាំងពីរលើករួចមកលោកគួយធុនណាបានថ្លែងប្រាប់អ្នកយកព័ត៌មាន អំពីព័ត៌មានលម្អិតនៅក្នុងសំណុំរឿងនោះ។នៅក្នុងសេចក្តីអត្ថាធិប្បាយ ដែលបានចុះផ្សាយមួយថ្ងៃ មុនពេលគណៈមេធាវីកម្ពុជាចេញលិខិតព្រមាន លោកគួយធុនណា បានប្រាប់អ្នកយកព័ត៌មានថាការផ្ទេរអតិថិជនរបស់ក្រុមហ៊ុនអឹមហ្វូននេះ គឺរំលោភដីការក្សាការពាររបស់តុលាការ ។
លោកត្រូវបានប្រព័ន្ធផ្សព្វផ្សាយដកស្រង់សម្តីដោយនិយាយថា“ក្រុមហ៊ុនអឹមហ្វូន កំពុងប្រើល្បិច ដើម្បីគេចមិនសងថ្លៃជំពាក់អតិថិជនរបស់ខ្ញុំ”។លោកគួយធុនណាធ្លាប់បានការពាររឿងក្តីធំៗដូចជាធ្លាប់ធ្វើជាមេធាវីតំណាងឲ្យលោកសយសុភាពនិងធ្លាប់ការពារក្រុមហ៊ុនរុករករ៉ែរបស់តៃវ៉ាន់មួយឈ្មោះហុងទុង (Hong Tung Resource) ដែលមានជម្លោះក្តីក្ដាំជាមួយក្រុមហ៊ុននឹមហេង គ្រុប ដែលគ្រប់គ្រងដោយភរិយារបស់លោកឧត្តមសេនីយ៍ នឹមម៉េងជុំវិញបញ្ហារកសុីរុករករ៉ែស្ពាន់រួមគ្នា នៅក្នុងខេត្តសៀមរាប។ លោកគួយធុនណាបានបដិសេធមិនធ្វើអត្ថាធិប្បាយទេ។
អ្នកជំនាញខាងច្បាប់បានថ្កោលទោសចំពោះបទបញ្ជាចេញថ្មីនេះរបស់គណៈមេធាវីដោយនិយាយថាវាជាការរំលោភលើសេរីភាពនៃការបញ្ចេញមតិ ហើយបម្រាមនេះអធម្មនុញ្ញភាព។ លោកឡោជុន្ធីមេធាវីមួយរូបនៅអង្គការជំនួយផ្នែកច្បាប់នៃកម្ពុជាមានប្រសាសន៍ថាការរឹតបន្តឹងចំពោះការធ្វើអត្ថាធិប្បាយជាសាធារណៈរបស់មេធាវី អាចធ្វើឲ្យការយល់ដឹងរបស់ប្រជាពលរដ្ឋអំពីប្រព័ន្ធតុលាការមានការថយចុះ។
លោកមានប្រសាសន៍ថា“វានឹងបង្កឲ្យមានបញ្ហា ប្រសិនបើវាប៉ះពាល់អ្វីដែលត្រូវបានចេញផ្សាយ និងចាក់ផ្សាយ ពីព្រោះ តើប្រជាពលរដ្ឋយល់ដឹងពីច្បាប់បានយ៉ាងមេ៉ចទៅ ប្រសិនបើមេធាវីទាំងអស់ត្រូវបានហាមឃាត់មិនឲ្យនិយាយនោះ?”។
តែទោះជាយ៉ាងណា លោក ម៉ាធ្យូ រ៉េនដល (Mathew Rendall) ជាដៃគូម្នាក់នៅការិយាល័យប្រឹក្សាផ្នែកច្បាប់ (Sciaroni & Associates) ថ្លែងថា ក្នុងបណ្តាប្រទេសផ្សេងៗវាជារឿងធម្មតាទៅហើយ ដែលមេធាវីត្រូវទទួលរងការរឹតបន្តឹងចំពោះអ្វីដែលពួកគេអាចនិយាយបានជាសាធារណៈ អំពីរឿងក្តី ដែលកំពុងតែដំណើរការប៉ុន្តែធម្មតាតុលាការនៅតែចាត់ការសំណុំរឿងទាំងនោះដដែល។
លោកបានមានប្រសាសន៍ថា“ដោយសារតែតុលាការកំពុងចាត់ការសំណុំរឿងក្តីរបស់ក្រុមហ៊ុនហួវី ពួកគេមិនគួរនិយាយបកស្រាយអំពីរឿងហ្នឹងឡើយ”៕ប្រែសម្រួលដោយ ឃិន ណៃ
និង តែម សុខុម