មន្ត្រីរដ្ឋាភិបាលបានឲ្យដឹងកាលពីម្សិលមិញថា ក្រសួងកសិកម្មនឹងស្នើទៅលោកនាយករដ្ឋមន្ត្រី ហ៊ុន សែនឲ្យលុបចោលដីសម្បទានសេដ្ឋកិច្ចទំហំ៤.៩០០ហិតា របស់ក្រុមហ៊ុនចម្ការកៅស៊ូវៀតណាមមួយក្នុងខេត្តរតនគិរី ដោយសារក្រុមហ៊ុននេះបានកាប់បំផ្លាញព្រៃឈើយ៉ាងច្រើនដោយខុសច្បាប់។
លោកច័ន្ទសារុនរដ្ឋមន្រ្តីក្រសួងកសិកម្មមានប្រសាសន៍ថា លោកបានបញ្ជូនគណៈកម្មការមួយក្រុមរបស់ក្រសួងកសិកម្ម ដើម្បីទៅស៊ើបអង្កេតករណីក្រុមហ៊ុនហ្សៃហ្សុងយឿន ដោយបានរកឃើញភ័ស្តុតាងយ៉ាងច្រើន បញ្ជាក់ពីសកម្មភាពកាប់ឈើខុសច្បាប់នៅក្នុងដីសម្បទានសេដ្ឋកិច្ចរបស់ក្រុមហ៊ុនទំហំ៤.៨៨៩ហិតាក្នុងស្រុកអូរយ៉ាដាវ។
លោកច័ន្ទសារុន បានមានប្រសាសន៍បន្តថា “ យើងបានរឹបអូសឈើហុបមូលជាច្រើននៅក្នុងដីសម្បទានសេដ្ឋកិច្ចនេះ ហើយយើងកំពុងបន្តការស៊ើបអង្កេតទៀត។
យើងមិនអាចអត់ឱនឲ្យក្រុមហ៊ុននេះបានទេ ពីព្រោះក្រុមហ៊ុននេះបានកាប់ឈើដោយខុសច្បាប់ ដែលជាបទល្មើសដ៏ធ្ងន់ធ្ងរ និងបានរំលោភលើកិច្ចសន្យារបស់ខ្លួនជាមួយរដ្ឋាភិបាល”។ លោកច័ន្ទសារុនថ្លែងបន្តថាលោកអាចនឹងបញ្ជូនរបាយការណ៍នៃការរកឃើញនេះទៅទីស្តីការគណៈរដ្ឋមន្ត្រីក្នុងពេលឆាប់ៗនេះ ហើយស្នើសុំឲ្យលោកនាយករដ្ឋមន្ត្រីលុបចោលដីសម្បទានសេដ្ឋកិច្ចរបស់ក្រុមហ៊ុន។លោកថ្លែងបន្តទៀតថា “ ខ្ញុំនឹងស្នើឲ្យរដ្ឋាភិបាលរឹបអូសដីសម្បទានសេដ្ឋកិច្ចនេះសម្រាប់ជាកម្មសិទ្ធិរបស់រដ្ឋ ពីព្រោះក្រុមហ៊ុននេះបានកាប់ឈើខុសច្បាប់”។
យោងតាមក្រសួងកសិកម្មបានឲ្យដឹងថាមិនមានដីសម្បទានសេដ្ឋកិច្ចណាមួយទទួលបានការអនុញ្ញាតឲ្យកាប់ឈើនៅក្នុងតំបន់ព្រៃការពារនោះទេ ទោះបីជាព្រៃឈើនោះត្រួតស៊ីគ្នាជាមួយដីសម្បទានសេដ្ឋកិច្ចក៏ដោយ។
នៅពេលសួរថា តើរដ្ឋាភិបាលអាចលុបចោលដីសម្បទានសេដ្ឋកិច្ចរបស់ក្រុមហ៊ុនហ្សៃហ្សុងយឿនតាមសំណើ ឬយ៉ាងណានោះ លោកផៃស៊ីផានអ្នកនាំពាក្យទីស្តីការគណៈរដ្ឋមន្ត្រីមានប្រសាសន៍ថាវាអាចលុបចោលបាន។
លោកមានប្រសាសន៍ថា “ ខ្ញុំគិតអ៊ីចឹងដែរ ដោយសារក្រសួងកសិកម្មមានជំនាញខាងការងារនេះ។លោកនាយករដ្ឋមន្ត្រីនឹងសម្រេចចំពោះបញ្ហានេះដោយយោងតាមជំនាញរបស់ក្រសួងកសិកម្ម”។
កាលពីខែមុនមន្ត្រីរដ្ឋបាលព្រៃឈើបានរកឃើញឈើហុបមូលចំនួន១.០៩១កំណាត់ដែលបានកាប់រួចជាស្រេចនៅក្នុងដីសម្បទាន
សេដ្ឋកិច្ចរបស់ក្រុមហ៊ុនហ្សៃហ្សុងយឿននេះ។ ការរកឃើញនេះធ្វើឡើងបន្ទាប់ពីមន្ត្រីមូលដ្ឋាន និងសកម្មជនសិទ្ធិមនុស្សនានាបានអំពាវនាវឲ្យរដ្ឋាភិបាលធ្វើអន្តរាគមន៍ ដើម្បីបញ្ឈប់ការកាប់បំផ្លាញព្រៃឈើនៅក្នុងដីព្រៃ ដែលជាកម្មសិទ្ធិរបស់សហគមន៍ជនជាតិដើមភាគតិចចារ៉ាយនៅក្នុងភូមិឡំក្នុងឃុំប៉ក់ញ៉ៃ។
កាលពីថ្ងៃទី៤ខែមករាក្រុមហ៊ុនបានប្រើគ្រឿងចក្រឈូសឆាយដីព្រៃទំហំទទឹង១០០ម៉ែត្រ និងបណ្តោយ១៥០ម៉ែត្រ ជាដីសម្រាប់គ្រួសារជនជាតិភាគតិចចារ៉ាយកប់ខ្មោចរបស់ពួកគេ ដោយបានបំផ្លាញផ្នូរដូនតាអស់ចំនួន១៥០ផ្នូរផងដែរ។ យោងតាមអង្គការសិទ្ធិមនុស្សអាដហុក ដែលបានអំពាវនាវឲ្យរដ្ឋាភិបាលលុបចោលដីសម្បទានសេដ្ឋកិច្ចរបស់ក្រុមហ៊ុនហ្សៃហ្សុងយឿន ដែរនោះបានឲ្យដឹងថាក្រុមហ៊ុននេះបានកាប់ឈើដោយខុសច្បាប់ ចាប់តាំងពីខែកក្កដាមកម៉្លេះ ហើយបាននាំឈើទាំងនេះទៅកាន់ប្រទេសវៀតណាម ឆ្លងតាមច្រកព្រំដែនថ្មដា។
លោកធនសារ៉ាត់អ្នកនាំពាក្យរបស់ក្រសួងកសិកម្ម បានមានប្រសាសន៍ថា ក្រុមហ៊ុនចម្ការកៅស៊ូនេះបានទទួលបញ្ជាឲ្យបញ្ឈប់សកម្មភាពកាប់ឈើជាបណ្តោះអាសន្ន រហូតទាល់តែមានសេចក្តីសម្រេចស្តីអំពីដីសម្បទានសេដ្ឋកិច្ចនេះសិន។ ក្រុមហ៊ុនហ្សៃហ្សុងយឿន មិនអាចទាក់ទងបានដើម្បីសុំសេចក្តីអត្ថាធិប្បាយបានទេ៕
ប្រែសម្រួលដោយឃិនណៃ