យោងតាមមន្រ្តីរដ្ឋាភិបាលម្នាក់បានឲ្យដឹងថា រូបសំណាកអតីតព្រះមហាវីរក្សត្រព្រះបរមរតនកោដ្ឋសម្តេចឪ នរោត្តមសីហនុ ដែលមានកម្ពស់ប្រាំពីរម៉ែត្រនឹងត្រូវសាងសង់បញ្ចប់នៅមុនថ្ងៃប្រារព្ធព្រះរាជពិធីបុណ្យរំឭកខួបគម្រប់មួយឆ្នាំនៃការយាងចូលទិវង្គតរបស់ព្រះអង្គ។
យោងតាមលោកញឹកប៊ុនឆៃប្រធានប្រតិបត្តិគណបក្សហ្វុ៊នស៊ិនប៉ិច និងជាសមាជិកគណៈកម្មាធិការរបស់រដ្ឋាភិបាលទទួលបន្ទុករៀបចំព្រះរាជពិធីបុណ្យថ្វាយព្រះភ្លើងព្រះបរមសពព្រះបរមរតនកោដ្ឋសម្តេចឪ នរោត្តមសីហនុ បានឲ្យដឹងថា រូបសំណាកអតីតព្រះមហាវីរក្សត្រដ៏ធំនេះ នឹងត្រូវដាក់តាំងនៅលើសួនច្បារខាងកើតវិមានឯករាជ្យ ដែលអាចមើលឃើញពីភូមិគ្រឹះរបស់លោកនាយករដ្ឋមន្ត្រីហ៊ុន សែន ហើយនឹងយកគំរូតាមព្រះមហាវីរក្សត្រ ក្នុងបច្ឆិមវ័យ។
លោកញឹក ប៊ុនឆៃ បានបន្តថា“យើងបានទទួលការបញ្ជាក់ពីព្រះមហាក្សត្រ [នរោត្តមសីហមុនី ជាព្រះបុត្រារបស់អតីតព្រះមហាវីរក្សត្រ] រួចរាល់ហើយហើយយើងកំពុងចាប់ផ្តើមអនុវត្តគម្រោងនេះ”។
លោកញឹកប៊ុនឆៃ បានបន្តថា“ ព្រះមហាក្សត្រសព្វព្រះរាជហឫទ័យព្រះបិតារបស់ព្រះអង្គកាលទ្រង់ស្ថិតក្នុងបច្ឆិមវ័យ”។ លោកបានពន្យល់ពីមូលហេតុ ដែលរូបសំណាកនេះនឹងយកគំរូតាមអតីតព្រះមហាវីរក្សត្រ នរោត្តមសីហនុ ក្នុងបច្ឆិមវ័យរបស់ព្រះអង្គ ជាជាងយកគំរូតាមព្រះអង្គកាលពីព្រះអង្គគង់នៅជាព្រះមហាក្សត្រឬជាព្រះប្រមុខរដ្ឋ។
លោកញឹកប៊ុនឆៃ បានបន្តថា ការសាងសង់រូបសំណាកនេះនឹងត្រូវបញ្ចប់រួចរាល់នៅមុនថ្ងៃទី១៥ខែតុលាដែលជាថ្ងៃបុណ្យជាតិ ដើម្បីគោរពព្រះវិញ្ញាណក្ខន្ធព្រះមហាវីរក្សត្រព្រះបរមរតនកោដ្ឋ គម្រប់ខួបមួយឆ្នាំនៃការយាងចូលទិវង្គតរបស់ព្រះអង្គក្នុងជន្មាយុ៨៩ព្រះវស្សានៅទីក្រុងប៉េកាំង ប្រទេសចិន។ លោកញឹកប៊ុនឆៃមិនអាចប្រាប់អំពីតម្លៃនៃការសាងសង់រូបសំណាកនេះបានទេ។ ព្រះអង្គម្ចាស់ស៊ីសុវត្តិ ធម្មិកោ អ្នកនាំពាក្យ
ព្រះបរមរាជវាំងបានមានព្រះបន្ទូលថា ព្រះមហាក្សត្រនិងសម្តេចម៉ែ នរោត្តមមុនីនាថ សីហនុនឹងយាងទៅប្រទេសចិននៅចុងខែនេះ ដើម្បីពិនិត្យព្រះសុខភាព ហើយអាចនឹងយាងត្រឡប់មកកាន់មាតុប្រទេសវិញក្នុងរយៈពេលពីរសប្តាហ៍ទៀត៕
ប្រែសម្រួលដោយឃិនណៃ