29 C
Phnom Penh

អង្គការ​ឃ្លាំ​មើល​សិទ្ធិ​មនុស្ស​នៅ​បុរីញូវយ៉ក ប្រកាស​ជំទាស់​ទៅ​នឹងការចេញបម្រាមមកលើ​មេធាវី​​​

ដោយ ឌឹ ខេមបូឌា ដេលី

បទវិភាគ

អង្គការ​ឃ្លាំ​មើល​សិទ្ធិ​មនុស្ស​ ដែល​ជា​អង្គការ​តស៊ូ​មតិ​មាន​មូល​ដ្ឋាន​នៅ​បុរី​ញូវយ៉ក​ បាន​ចោទ​ប្រកាន់​គណៈមេធាវី​កម្ពុជា​ ពី​បទ​ព្យាយាម​គាប​សង្កត់​អ្នក​រិះ​គន់​​រដ្ឋាភិបាល​សំខាន់​ៗ នៅមុន​ពេលបោះ​ឆ្នោត​ជាតិ​នៅ​ខែ​​កក្កដា ដោយបាន​ចេញ​បម្រាម​ហាម​មេធាវី​មិនឲ្យ​ធ្វើ​សេចក្ដី​ថ្លែង​ការ​ណ៍​ជា​សាធារណៈ​​​។

គណៈ​មេធាវី​ និង​ក្រសួង​ព័ត៌មាន​សុទ្ធ​តែ​បាន​ចេញ​សេចក្ដី​បង្គាប់ថា មុន​ពេល​មេធាវី​មានប្រសាសន៍តាម​ប្រព័ន្ធ​ផ្សព្វ​ផ្សាយ​នានា​ ចាំ​បាច់​ត្រូវ​តែ​មាន​ការ​អនុញ្ញាត​ជា​ផ្លូវ​ការ​ជាមុន​សិន​។បទ​បញ្ជា​នេះធ្វើ​ឡើង​បន្ទាប់​ពី​មាន​​ការ​ចាប់ពិរុទ្ធការបកស្រាយ​របស់​មេធាវី​​ម្នាក់ ដែល​បាននិយាយ​ឥត​សំចៃមាត់នៅ​ក្នុង​រឿងក្តីក្តាំ​នៅក្នុងតុលាការទាក់ទង​នឹង​ករណី​ជំពាក់​ប្រាក់​ជាង​៦៥លាន​ដុល្លារ​​ រវាង​ក្រុម​ហ៊ុន​​ទូរគមនាគមន៍។​

នៅ​ក្នុង​សេចក្ដី​ថ្លែង​ការ​ណ៍​ ដែល​ទទួល​បាន​កាល​ពី​ម្សិលមិញ អង្គការ​ឃ្លាំ​មើល​សិទ្ធិ​មនុស្ស​ ​រិះ​គន់​រដ្ឋាភិបាល​ និង​គណៈ​មេធាវី​យ៉ាង​ខ្លាំង។

លោកប្រេដអាដាម (Brad Adams) ប្រធាន​​អង្គការ​ឃ្លាំ​មើល​សិទ្ធិ​មនុស្ស​ប្រចាំ​តំបន់​អាស៊ី​ ត្រូវ​បាន​គេ​ដក​ស្រង់សម្ដី​ នៅ​ក្នុង​សេចក្ដី​ថ្លែង​ការ​ណ៍​មួយ​ ដោយ​លោក​បាន​លើក​ឡើង​ថា“ ដូច​អ្វី​ដែល​យើង​បាន​ដឹងហើយថា រដ្ឋា​ភិបាល​កម្ពុជា​ មិន​អាច​ស្វែង​រក​វិធីសាស្ត្រ​ផ្សេង​ណាមួយ​ ដើម្បី​គាប​សង្កត់​អ្នក​រិះ​គន់​រដ្ឋាភិបាល​ឡើយ ក្រៅ​តែពី​ដាក់​បម្រាម​ អំឡុង​ឆ្នាំ​មានការ​បោះ​ឆ្នោត​ ដើម្បីកុំ​ឲ្យ​មេធាវីផ្តល់​សម្ភាស​តាម​ស្ថានីយវិទ្យុ និង​តាម​ស្ថានីយទូរទស្សន៍”។

សេចក្ដី​ថ្លែង​ការ​ណ៍​នេះ​បន្ដ​ថា“ ​សេចក្ដី​បង្គាប់​របស់​គណៈមេធាវី​ នឹង​រារាំង​មេធាវី​មិន​ឲ្យ​ធ្វើ​សេចក្ដី​ថ្លែង​ការ​ណ៍​ណាមួយ​តាម​រយៈ​ប្រព័ន្ធ​ផ្សព្វផ្សាយ​នានា​ ដូចជា​តាម​កាសែត​ ទស្សនាវដ្ដី​ វិទ្យុឬក៏​ទូរទស្សន៍​ជា​​​ដើមប្រសិនបើ​គ្នានការ​អនុញ្ញាត​ពី​គណៈ​មេធាវី​ជាមុនទេ​នោះ”។

អង្គការ​ឃ្លាំ​មើល​សិទ្ធិ​មនុស្ស​បាន​លើក​ឡើង​ថាគណៈ​មេធាវី​ គឺ​ស្ថិត​នៅ​ក្រោម​ការ​គ្រប់​គ្រង​គណបក្ស​កាន់​អំណាច គឺ​គណបក្ស​ប្រជាជាន​កម្ពុជា តាំង​ពី​ឆ្នាំ​២០០៤​មក​ម៉្លេះនៅ​ពេល​គណបក្ស​នេះ បានជួយ​រៀប​ចំ​ការ​បោះ​ឆ្នោត​ជ្រើស​រើស​ប្រធាន​គណៈ​មេធាវី​ ដោយបដិសេធ​ជ័យ​ជម្នះ​របស់​បេក្ខជន​ឯក​រាជ្យ​​មួយ​រូប​ ហើយ​បាន​លើក​បន្ដុប​បេក្ខជន​ ដែលគណបក្ស​ប្រជា​ជន​កម្ពុជាគាំទ្រ ដើម្បី​ឲ្យ​ឡើង​ជំនួស​តំណែង​របស់​បេក្ខជន​ឯករាជ្យ​រូប​នោះ​វិញ”។

សេចក្តីថ្លែងការណ៍នេះ​ ក៏បាន​លើក​ឡើង​ដែរ​អំពីការជាប់ទាក់ទងជាមួយ​រដ្ឋាភិបាល​របស់​លោកប៊ុនហុនប្រធាន​គណៈមេធាវី​ និង​ជា​អតីត​អនុ​រដ្ឋ​លេខា​ធិការ​ក្រសួង​យុត្តិធម៌​ដែល​បានចូល​កាន់​តំណែង កាល​ពី​ខែ​វិច្ឆិកាដោយ​បាន​លើក​ឡើង​ថាការ​ជ្រើស​រើស​ជា​ប្រធានគណៈ​មេធាវី​​នេះ​ គឺ​មាន​ការ​គាំ​ទ្រ​យ៉ាង​ពេញ​ទំហឹង​ពី​លោកឧបនាយក​រដ្ឋ​មន្ត្រី​ សុខអាន។

កាល​ពីម្សិលមិញលោក​ ប៊ុនហុន ​មាន​ប្រសាសន៍​​ថា​ លោក​មិន​អាច​ឆ្លើយ​តប​ភ្លាម​ៗ​ចំពោះ​សេចក្ដី​ថ្លែង​ការណ៍​នេះបាន​ទេ។ ប៉ុន្ដែលោកខៀវកាញារីទ្ធរដ្ឋ​មន្ត្រី​ក្រសួង​​ ព័ត៌មាន​ បាន​មាន​ប្រសាសន៍​តាម​រយៈសារ​ទូរស័ព្ទ​ថា “ គណៈ​មេធាវី​ គឺ​មិន​មែន​ជា​ស្ថាប័នរបស់​រដ្ឋាភិបាល​ឡើយ​”។

ការចេញបទ​បញ្ជា​នេះគឺដើម្បី​ឆ្លើយ​តប​ទៅ​នឹង​ការ​លើក​ឡើង​របស់​លោក​មេធាវី​ គួយ​ ធុនណាដែល​ជាមេធាវី​តំណាង​ឲ្យ​ក្រុម​ហ៊ុន​បរទេស​ គឺ​ក្រុមហ៊ុនហួវី (Huawei) និង​អេល​ទិក (Eltek) ដើម្បី​ទារ​ប្រាក់​បំណុល​ពី​ក្រុមហ៊ុន​ទូរស័ព្ទ​ចល័ត​អឹមហ្វូនដែល​ទើប​តែ​នឹង​ក្ស័យ​ធន​​។លោក​ គួយ​ ធុនណាបាន​មាន​ប្រសាសន៍​ថាការ​ផ្ទេរ​អតិថិជន​របស់​ក្រុម​ហ៊ុន​​

អឹមហ្វូន​ទៅ​ឲ្យ​ក្រុមហ៊ុនទូរស័ព្ទ​ចល័ត​ម៉ូប៊ីថែល ដែល​គ្រប់​គ្រង​ដោយ​ក្រុមហ៊ុនរ៉ូយាល់ គ្រុបរបស់​លោកគិតម៉េងគឺ​រំលោភ​ដីកា​រក្សា​ការពាររបស់​តុលាការ​ ដែល​បានរារាំង​ក្រុម​ហ៊ុន​អឹមហ្វូន​។

លោកឡៅម៉ុងហៃអ្នក​វិភាគ​ឯក​រាជ្យ​មួយ​រូប​ បាន​មាន​ប្រសាសន៍​ថាថ្វី​បើ​សេចក្ដី​បង្គាប់​នេះត្រូវ​បាន​ធ្វើ​ឡើង​ដោយ​សារ​តែ​មាន​ការ​លើក​ឡើង​របស់​មេធាវី​មួយ​រូប​ នៅ​ក្នុង​ជម្លោះ​ពាណិជ្ជ​ក​ម្ម​ក្ដី​ តែ​បម្រាម​នេះក៏​ទំនង​ជា​មាន​បំណង​ចង់​គាប​​សង្កត់​អ្នក​រិះ​គន់​រដ្ឋាភិបាល​សំខាន់​ៗផង​ដែរ​។លោក​បាន​បន្ថែម​​ថា “ វា​ជាវិធីការពារ​អំណាច​”។លោក​បាន​បន្ដ​ថា “ ផល​ប្រយោជន៍​​ផ្នែកពាណិជ្ជ​កម្មនិង​ផល​ប្រយោជន៍​របស់​អ្នក​នយោបាយ​ ហាក់​​ ដូច​ជា​កើត​ឡើង​ដំណាល​គ្នា។​ វា​​ជា​ការយោគ​​យល់​គ្នា​ទៅវិញ​ទៅ​មក​មួយ​ ដើម្បី​ការ​ពារ​ផល​ប្រយោជន៍​របស់​ភាគី​ទាំង​ពីរ​នេះ​”៕

(រាយការណ៍​បន្ថែម​ដោយអូនភាព)

ប្រែសម្រួល​ដោយ ស៊ា ស៊ុយ​ឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស