វាមានរយៈពេល១៦ឆ្នាំហើយគិតមកដល់ថ្ងៃសៅរ៍នេះ ដែលជនមិនស្គាល់មុខមួយក្រុមបានគប់គ្រាប់បែកចំនួនបួនគ្រាប់ចូលទៅក្នុងកន្លែងជួបជុំរបស់អ្នកគាំទ្រលទ្ធិប្រជាធិបតេយ្យ នៅសួនមុខវត្តបទុម ជាការវាយប្រហារដ៏ឃោរឃៅ ដែលបានសម្លាប់បុរស ស្ត្រី និងកុមារ ចំនួន១៦នាក់ ហើយបានបង្កឲ្យមានអ្នករងរបួសយ៉ាងហោចណាស់១០០នាក់ថែមទៀត។
អ្នកស្រី អឹម ម៉ាឡែន ដែលបានចូលរួមជាមួយមិត្តភក្ដិជាជនរងគ្រោះ និងជាសាច់ញាតិអ្នកស្លាប់ព្រមទាំងអ្នកគាំទ្រគណបក្សប្រឆាំង នៅខាងក្រៅអតីតអគាររដ្ឋសភា ដើម្បីប្រារព្ធខួបប្រចាំឆ្នាំនៃការវាយប្រហារដោយគ្រាប់បែកដ៏ឃោរឃៅនេះ កាលពីព្រឹកថ្ងៃទី៣០ ខែមីនា ឆ្នាំ១៩៩៧ ហើយបានអំពាវនាវរកយុត្តិធម៌នៅក្នុងរឿងនេះ ដែលិនទាន់បានដោះស្រាយ ហើយអ្នកស្រីនៅចងចាំថា ការវាយប្រហារនេះ គឺជាសុបិនមួយដ៏អាក្រក់ជាទីបំផុត។
អ្នកស្រី ម៉ាឡែន បច្ចុប្បន្ននេះ មានអាយុ៧១ឆ្នាំ បានត្រូវអំបែងគ្រាប់បែកចំខ្នងរបស់អ្នកស្រី នៅថ្ងៃនោះ។ ចាប់ពីពេលនោះមកអ្នកស្រីបានធ្លាក់ខ្លួនពិការពាក់កណ្ដាលខ្លួនចាប់ពីត្រឹមចង្កេះចុះក្រោម ហើយអ្នកស្រីមិនអាចដើរបានទេ ចាប់ពីពេលនោះមក។ ជើងទាំងពីររបស់អ្នកស្រីបានខូច ហើយកាលពីថ្ងៃសៅរ៍អ្នកស្រីបានស្លៀកពាក់ពណ៌សជិះរទេះរុញ ចូលរួមក្នុងពិធីប្រារព្ធខួបប្រចាំឆ្នាំនៃការវាយប្រហារដោយគ្រាប់បែកនេះ។រូបថតជនរងគ្រោះចំនួន១៦នាក់ត្រូវបានដាក់លើស្តូបនៅជិតកន្លែងកើតហេតុនេះ។
អ្នកស្រីមានប្រសាសន៍បន្ទាប់ពីពិធីនេះថា “ ពេលនោះខ្ញុំកំពុងកាន់បដាមួយផ្ទាំង ខណៈពេលលោក សម រង្ស៊ី ចាប់ផ្ដើមថ្លែង ហើយមានសំឡេងផ្ទុះគ្រាប់បែកមួយគ្រាប់ ហើយបន្ទាប់មកមានគ្រាប់បែកពីរបីគ្រាប់ទៀតបានផ្ទុះឡើង ហើយខ្ញុំបានដួលទៅលើដី។ នៅទីនោះពោរពេញទៅដោយឈាមយ៉ាងច្រើន។ ឈាមបានហូរចេញពីផ្ទៃមុខកូនប្រុសរបស់ខ្ញុំយ៉ាងច្រើន”។ អ្នកស្រីបាននិយាយថា អំបែងគ្រាប់បែកមួយបានផ្ដាច់ម្រាមដៃកូនប្រុសរបស់ខ្ញុំ ហើយដៃម្ខាងទៀតក៏បានដាច់ដោយសារការផ្ទុះនេះដែរ។
អ្នកស្រី ម៉ាឡែន បានរំឭកថា“នៅពេលខ្ញុំដួលទៅលើដី ខ្ញុំមានអារម្មណ៍ថាឈឺចាប់តិចតួចនៅពេលនោះ។ ប៉ុន្ដែ នៅពេលខ្ញុំព្យាយាមក្រោកឈរ ខ្ញុំមិនអាចក្រោកឈរបានឡើយ”។
ដូចអ្នកដទៃដែរ នៅក្នុងពិធីប្រារព្ធខួបប្រចាំឆ្នាំនៃការវាយប្រហារដោយគ្រាប់បែកនេះ កាលពីថ្ងៃសៅរ៍ អ្នកស្រីចង់ឲ្យនាំមនុស្សនៅពីក្រោយការវាយប្រហារនេះ យកមកកាត់ទោស។ ដូចអ្នកផ្សេងទៀតដែរ អ្នកស្រីបានបន្ទោសគណបក្សប្រជាជនកម្ពុជា ដែលកំពុងកាន់អំណាច។
អ្នកស្រីបាននិយាយបន្ដថា “ ខ្ញុំចាស់ហើយខ្ញុំមានអាយុជាង៧០ឆ្នាំ ខ្ញុំបារម្ភថា ខ្ញុំនឹងស្លាប់មុនខ្ញុំទទួលបានយុត្តិធម៌។ ខ្ញុំចង់រកមនុស្សដែលចេញបញ្ជាឲ្យឃាតករគប់គ្រាប់បែកដាក់យើង។ ខ្ញុំចង់ឲ្យពួកគេទទួលទោសតាមច្បាប់”។ កិច្ចប្រឹងប្រែង ដើម្បីវែកមុខរកអ្នកទទួលខុសត្រូវក្នុងសំណុំរឿងនេះ មិនទាន់បានបញ្ចប់នៅឡើយទេ។
លោក សម រង្ស៊ី ដែលបានបន្ទោសលោកនាយករដ្ឋមន្ត្រី ហ៊ុន សែន អំពីការវាយប្រហារដោយគ្រាប់បែកនេះ ហើយបានដាក់ពាក្យបណ្ដឹងប្តឹងលោកនាយករដ្ឋមន្ត្រីនៅសាលាដំបូងរាជធានីភ្នំពេញនោះ បានដកពាក្យបណ្ដឹងរបស់លោកវិញ កាលពីឆ្នាំ២០០៥។
ក្រោយមកលោក សម រង្ស៊ី បានដកពាក្យបណ្ដឹងមួយផ្សេងទៀតដែលលោកបានប្តឹងប្រឆាំងនឹងលោកនាយករដ្ឋមន្ត្រីនៅតុលាការសហរដ្ឋអាមេរិក ពាក់ព័ន្ធនឹងការវាយប្រហារដោយគ្រាប់បែកនេះផងដែរ ដើម្បីឲ្យរដ្ឋាភិបាលលុបចោលបទចោទប្រកាន់ប្រឆាំងនឹងរូបលោក និងអនុញ្ញាតឲ្យមេដឹកនាំគណបក្សប្រឆាំង ដែលរស់នៅនិរទេសខ្លួននៅក្រៅប្រទេសរូបនេះអាចវិលត្រឡប់មកកម្ពុជាវិញ ដើម្បីចូលរួមក្នុងការបោះឆ្នោតជាតិ កាលពីឆ្នាំ២០០៨។
កាលពីឆ្នាំ២០០៥ ភ្នាក់ងារស៊ើបអង្កេតអេហ្វប៊ីអាយ(FBI) បានបិទការស៊ើបអង្កេតរបស់ខ្លួន ដែលនៅក្នុងនោះពលរដ្ឋអាមេរិកម្នាក់បានរងរបួសនៅក្នុងការវាយប្រហារដោយគ្រាប់បែកនេះដែរ ហើយថា ការស៊ើបអង្កេតនេះមិនទាន់ទទួលបានលទ្ធផលពេញលេញនៅឡើយ។
ទោះយ៉ាងណា នៅមុនពេលបិទការស៊ើបអង្កេតរបស់ខ្លួនលើសំណុំរឿងនៃការវាយប្រហារដោយគ្រាប់បែកនេះ ទីភ្នាក់ងារស៊ើប
អង្កេតបានបញ្ជាក់ថា ករណីនេះ មានជាប់ពាក់ព័ន្ធជាមួយគណបក្សប្រជាជនកម្ពុជា។
យោងតាមឯកសារសម្ងាត់របស់អេហ្វប៊ី អាយ សាក្សីដែលបានឃើញហេតុការណ៍នោះ បានរាយការណ៍ថា បានឃើញអ្នកវាយប្រហារពីរនាក់ភ្លាមៗបន្ទាប់ពីមានការផ្ទុះនោះបានរត់ចូលទៅក្នុងបន្ទាយទាហានមួយនៅខាងក្រោយវត្តបទុម ដែលនៅទីនោះកងកម្លាំងរបស់រដ្ឋាភិបាល បានបើកផ្លូវឲ្យពួកគេចូល។
លោក ហ៊ីង យឿន បច្ចុប្បន្ននេះជាទីប្រឹក្សាមួយរូបរបស់លោក គង់ គាំ ប្រធានគណបក្ស សម រង្ស៊ី មានប្រសាសន៍ថា លោកបានឃើញដោយផ្ទាល់ភ្នែករបស់លោក។
លោកបានមានប្រសាសន៍រំឭកឡើងវិញកាលពីថ្ងៃសៅរ៍បន្ទាប់ពិធីនោះថា “ នៅពេលគ្រាប់បែកផ្ទុះលើកដំបូង មានផ្សែងពណ៌សយ៉ាងច្រើន ហើយខ្ញុំគិតថា វាជាឧស្ម័នបង្ហូរទឹកភ្នែក។គាត់បានឃើញបុរសពីរនាក់រត់ចូលទៅក្នុងជួរទាហាននៅក្បែរនោះ”។
លោកបានមានប្រសាសន៍បន្ដថា “ ជនសង្ស័យបានរត់កាត់ក្រុមទាហាន ហើយបន្ទាប់មកពួកគេ [ទាហាន] បានឃាតអង្គរក្សរបស់លោក សម រង្ស៊ី ដែលបានដេញតាមជនសង្ស័យទាំងនេះ”។
ដូចជាអ្នកស្រី ម៉ាឡែន ដែរ លោក បានចងចាំអំពីការវាយប្រហារដោយគ្រាប់បែកដ៏ឃោរឃៅនេះ។ លោកមានប្រសាសន៍បន្ដថា “ ខ្ញុំបានរត់ចូលទៅក្នុងក្រុមមនុស្ស ដើម្បីទៅយកអ្នករងរបួស អ្នកខ្លះដាច់ដៃ ហើយអ្នកខ្លះទៀតកំពុងស្រែកយំ។ ស្ត្រីម្នាក់បានដាច់ជើងរបស់ខ្លួនទាំងពីរ ហើយខ្ញុំបានបីគាត់ទៅកាន់ទីស្នាក់ការគណបក្ស ដែលនៅឃ្លាតពីទីនោះតែមួយប្លុកប៉ុណ្ណោះ។ នៅពេលខ្ញុំដាក់គាត់ចុះ គាត់បានស្លាប់បាត់ទៅហើយ”។
ថ្លែងមកកាន់អ្នកចូលរួមក្នុងពិធីនេះតាមរយៈវីដេអូខន់ហ្វឺរិនពីប្រទេសបារាំង លោក សម រង្ស៊ី បានសន្យាលើកយកករណីនេះប្ដឹងទៅតុលាការ ក្នុងប្រទេសកម្ពុជាម្ដងទៀតប្រសិនបើគណបក្សថ្មីរបស់លោក គឺគណបក្សសង្គ្រោះជាតិឈ្នះការបោះឆ្នោតនៅក្នុងឆ្នាំនេះ។
នៅក្នុងករណីនេះដែរ រដ្ឋាភិបាលបានលើកឡើងថា ខ្លួនកំពុងតែស៊ើបអង្កេតលើករណីវាយប្រហារដោយគ្រាប់បែកនេះ ប៉ុន្ដែ មិនដឹងថា ការស៊ើបអង្កេតនេះដល់ណានោះទេ។
អ្នកស្រី ពៅ ហេង អាយុ៦៦ឆ្នាំ ដែលបានបាត់បង់កូនស្រីម្នាក់ និងក្មួយស្រីម្នាក់ក្នុងការវាយប្រហារនោះ បាននិយាយថា អ្នកស្រីមិនមានការភ្ញាក់ផ្អើលទេ។ អ្នកស្រី ពៅ ហេង បានបន្ដថា “ វាមានរយៈពេល១៦ឆ្នាំមកហើយ ហើយខ្ញុំនៅតែរង់ចាំរកយុត្តិធម៌។ប្រសិនបើពួកគេចង់ស្វែងរកយុត្តិធម៌ឲ្យពួកយើង ពួកគេអាចរកឃើញជាមិនខាន ប៉ុន្ដែ ពួកគេមិនរកយុត្ដិធម៌ឲ្យពួកយើងទេ”៕
ប្រែសម្រួលដោយ ឃិន ណៃ