មន្ត្រីម្នាក់បាននិយាយកាលម្សិលមិញថា មណ្ឌលកុមារកំព្រារបស់គ្រិស្តបរិស័ទមួយនៅក្នុងរាជធានីភ្នំពេញដែលពុំបានចុះបញ្ជីត្រឹមត្រូវ ហើយដែលកាលពីសប្ដាហ៍មុនត្រូវបាននគរបាលនាំកុមារចេញចំនួន២១នាក់នោះ អាចបើកឡើងវិញបាន ប្រសិនបើអង្គការអូស្ត្រាលីដែលគ្រប់គ្រងមណ្ឌលនេះមានឯកសារចាំបាច់គ្រប់គ្រាន់។
អង្គការប្រឆាំងការជួញដូរមនុស្សស៊ីសា(Sisha) បានលើកឡើងកាលពីថ្ងៃអង្គារថា កិច្ចប្រតិបត្តិការរួមគ្នារវាងអាជ្ញាធរ និងអង្គការប្រឆាំងការជួញដូរមនុស្សស៊ីសា កាលពីថ្ងៃទី២២ ខែមីនា បាននាំកុមារចេញពីមណ្ឌលកុមារកំព្រាដែលគ្រប់គ្រងដោយសប្បុរសជនអូស្ត្រាលីឈ្មោះថា មណ្ឌលស្រឡាញ់ក្មេងកំព្រា (Love In Action) ព្រោះមណ្ឌលនេះ “ ពុំបានចុះបញ្ជីត្រឹមត្រូវ ខុសច្បាប់ និងមិនមានការដឹងឮពីអាជ្ញាធរមូលដ្ឋានឡើយ”។
ប៉ុន្ដែ លោក សុន សុផល ប្រធានមន្ទីរសង្គមកិច្ចរាជធានីភ្នំពេញបានមានប្រសាសន៍កាលពីម្សិលមិញថា មណ្ឌលកុមារកំព្រានេះអាចបើកឡើងវិញបាន ដរាបណាចុះបញ្ជីជាមួយនឹងរដ្ឋាភិបាល។ លោក សុន សុផល បានមានប្រសាសន៍ថា “ ប្រសិនបើមណ្ឌលនេះបំពេញតាមតម្រូវការផ្លូវច្បាប់ យើងនឹងអនុញ្ញាតឲ្យ បើកឡើងវិញ”។ លោកបានបន្ដថា ការសើុបអង្កេតមណ្ឌលកុមារកំព្រានេះ គឺជាកិច្ចការរបស់នគរបាល។
នគរបាលរាជធានីនិងនគរបាលជាតិមិនអាចទាក់ទងសុំអត្ថាធិប្បាយបានទេ។ ថ្វីត្បិតតែអង្គការស៊ីសាបានអះអាងពីដំបូងថា លោកស្រី រូដ ហ្គោលឌើ (Ruth Golder) អាយុ៧១ឆ្នាំ ស្ថាបនិកមណ្ឌលនេះត្រូវបាននគរបាលស៊ើបអង្កេតពីបទជួញដូរមនុស្ស និងរំលោភបំពានមនុស្ស ហើយនគរបាលបានចុះទៅបង្ក្រាបមណ្ឌលនេះក៏ដោយ ក៏ពួកគេមិនបានលើកអំពីបញ្ហានេះដែរ នៅក្នុងសេចក្ដីថ្លែងការណ៍មួយនៅពេលក្រោយមក។នគរនបាលបាននិយាយថា លោកស្រី រូដ ហ្គោលឌើ បានសុំឲ្យពួកគេយកក្មេងៗទាំងនោះចេញ ព្រោះលោកស្រីពុំមានលទ្ធភាពចិញ្ចឹមពួកគេទេ។
នៅក្នុងការប្រែប្រួលដ៏ចម្លែកមួយអ្នកនាំពាក្យមណ្ឌលកុមារ ដែលបានចុះបញ្ជីនៅក្នុងទីក្រុងឃ្វីនឡែន ប្រទេសអូស្ត្រាលី បានអះអាងកាលពីម្សិលមិញថា លោកស្រី រូដ ហ្គោលឌើ និងកូនស្រីឈ្មោះ ត្រេស៊ី (Tracey)បានលាក់ខ្លួនបន្ទាប់ពីមានការគំរាមអាយុជីវិត ក្រោយពេលមណ្ឌលនេះត្រូវបិទ។
ពេលទាក់ទងតាមទូរស័ព្ទ ឈ្មោះ រ៉ប ម៉ាកវ៉េ ( Rob McVey)មិនបានលម្អិតអំពីការគំរាមកំហែងនោះទេ ប៉ុន្ដែបានប្រាប់កាសែតSunshine Daily Coast ក្នុងទីក្រុងឃ្វីនឡែនថា “ ពួកគេត្រូវបានគំរាមកំហែងដល់អាយុជីវិត ដូច្នេះ ពួកគេត្រូវផ្លាស់ទៅកន្លែងមានសុវត្ថិភាព”។
ក្នុងសារតាមបណ្តាញសង្គមហ្វេសប៊ុក ដែលបានបង្ហោះកាលពីថ្ងៃសៅរ៍ ដោយ “ លោកស្រី រូដ ហ្គោលឌើ និងកូនស្រី” បានឲ្យដឹងថា អង្គការស្រឡាញ់កុមារកំព្រានេះសូមធានាដល់ម្ចាស់ជំនួយថា ខ្លួនកំពុងតែបន្ដកិច្ចការរបស់ខ្លួន។
សារនោះមានខ្លឹមសារថា “ សូមអ្នកទាំងអស់គ្នាជ្រាបថា អង្គការស្រឡាញ់កុមារកំព្រា នៅតែដំណើរការដដែល…យើងមិនបានបិទអង្គការ ដូចដែលលោកអ្នកបានឮនោះទេ។ យើងនៅតែបន្ដសេចក្ដីស្រឡាញ់កុមារកំព្រាដដែល”៕
(រាយការណ៍បន្ថែមដោយ ផន បុប្ផា)
ប្រែសម្រួលដោយ ហម សុផាណ្ណា