29 C
Phnom Penh

កម្មករ​ក្រុម​ហ៊ុន​ចាប់​ផ្ដើម​​កាប់​ឆ្កា​ដី​​ព្រៃ​ដើម្បី​សាង​សង់​ទំនប់​វារី​អគ្គិសនី​សេសាន​២​ ​ក្នុង​​ខេត្ត​ស្ទឹង​ត្រែង

ដោយ ឌឹ ខេមបូឌា ដេលី

បទវិភាគ

កម្ម​ករ​បាន​ចាប់​ផ្ដើម​កាប់​ឆ្កា​ដី​ព្រៃ​ដោយ​ប្រើ​រណា​​យន្ត​​នៅ​ក្នុង​ខេត្ត​ស្ទឹង​ត្រែង​ដើម្បី​បើក​ផ្លូវ​សម្រាប់​ការ​សាង​សង់​ទំនប់​វារី​​អគ្គិស​នី​​ដ៏​ធំមួយ ដែល​ទង្វើ​នេះ​បាន​ធ្វើ​ឲ្យ​ប្រជា​ពលរ​ដ្ឋ​​នៅ​ក្នុង​តំបន់​នោះ​ខឹង​យ៉ាង​ខ្លាំង​ និង​និយាយ​ថា ពួកគេ​មិន​បាន​​ដឹង​អំពី​ផែន​ការសាង​សង់​ទំនប់​នេះ​ទេ។

ចំណែក​​រដ្ឋ​សភាឯណោះ​វិញ ​បាន​អនុ​ម័ត​ហិរញ្ញវត្ថុ​សម្រាប់​​ការ​សាង​សង់​ទំនប់​វារី​អគ្គិ​សនី​សេសាន​ក្រោម​២​កម្លាំង​៤០០​មេហ្គា​វ៉ាត់​​នេះ​តាំង​ពី​ខែ​កុម្ភៈ​មក​ម៉្លេះ​ ទោះ​បី​ជាមាន​ការជំទាស់​ពី​​គណបក្ស​ សម រង្ស៊ី ​ដែលបាន​លើក​ឡើង​​ថា ទំនប់​នេះ​ធ្វើ​ឲ្យ​មាន​​ផល​ប៉ះ​ពាល់​សង្គម​ និង​បរិស្ថាន​ច្រើន​ជាង​ផល​ប្រយោជន៍​ក៏​ដោយ។

គួរ​​រំឭក​ថា ដើម្បី​សាង​សង់​ទំនប់​វារី​អគ្គិសនី​​ក្នុង​តំបន់​នេះ ​គេ​ត្រូវ​បណ្ដេញ​ប្រជា​ពលរដ្ឋ​ជាង​៥.០០០​គ្រួសារ​ ហើយ​លទ្ធផល​នៃ​ការ​សិក្សា​ស្រាវ​ជ្រាវ​បាន​បង្ហាញ​ថា វា​នឹង​​ធ្វើ​ឲ្យ​ប៉ះ​ពាល់​យ៉ាង​ខ្លាំង​ដល់​ប្រជា​ពល​រដ្ឋ​​​រ​ហូត​ដល់​១០០.០០០​នាក់​ដែលរស់​​នៅ​​​ខាង​លើ​និង​ខាង​ក្រោម​ទំនប់​នេះ​ដោយ​សារ​មាន​ផល​ប៉ះពាល់​ដល់​ការ​នេសាទ​ត្រី។

លោក សៀក មេគង្គ មេ​ឃុំស្រែគរ ស្រុក​សេសាន​ ខេត្ត​ស្ទឹង​ត្រែង​ មាន​ប្រសាសន៍​ថា កម្មករ​មួយ​ក្រុម​មាន​គ្នា​ប្រហែ​​​​​​​​​​​​​​ល​២០​នាក់​​មក​ពី​ក្រុម​ហ៊ុន​រ៉ូយ៉ាល់​គ្រុប និង​ក្រុម​ហ៊ុនចិន ហាយដ្រូ​ឡាន​កាំង​​(China’s Hydrolancang International Energy Co.Ltd) បាន​ចាប់​ផ្ដើម​កាប់​រំលំ​ដើម​ឈើ​នៅ​ក្នុង​តំបន់​នេះ​ កាល​ពី​ថ្ងៃ​ទី​២១ ខែ​មីនា។​

លោក មេគង្គ​ មានប្រសាសន៍​ថា “ ពួកគេ​​មក​កាប់​ព្រៃ​​ស្ថាបនា​អាង​ស្តុក​ទឹក​នេះ​ ពុំ​បាន​​សហការ​ជាមួយ​​អាជ្ញាធរ​ទេ ហើយ​ខ្ញុំ​ឆ្ងល់​ណាស់ថា ហេតុ​អ្វី​បាន​ជា​ពួកគេ​កាប់​រំលំ​ឈើ​ប្រណីត​យ៉ាង​ដូច្នេះ?ខ្ញុំ​គិត​ថា ពួកគេ​​រំលោភ​សិទ្ធិ​​អាជ្ញាធរ​​មូល​ដ្ឋាន ព្រោះ​ពួកគេ​មិន​​បាន​ជូន​ដំណឹង​​អាជ្ញាធរ​​ជាមុន​ទេ​”។

មួយ​ផ្នែក​នៃ​​ថវិកា​​សម្រាប់​​ទំនប់​វារី​អគ្គិស​នី​នេះ​​ ​មាន​ចំនួន​១០​លាន​ដុល្លារ​ ​​ទុក​សម្រាប់​​ផ្តល់​សំណង​​ដល់​​ប្រជាពល​រដ្ឋ​​។ ​ថវិកា​​​ចំនួន​១៩,៣៤​លាន​ដុល្លារ​​​​ទៀត​សម្រាប់​​សាងសង់​ផ្ទះ​ ១,៩៨​លាន​ដុល្លារ​សម្រាប់​ការ​ស្ដារ​ប្រាក់​ចំណូល​​​​ និង​​៣,២៣​លាន​ដុល្លារ ​សម្រាប់​ប្រព័ន្ធ​ធារាសាស្ត្រ។​​​​​​​​​

ប៉ុន្ដែ​ លោក មេគង្គ​ បាន​លើក​ឡើង​ថា លោក​បារម្ភ​ថា ​ប្រជា​ពលរដ្ឋ​នឹង​ទទួល​បាន​​ផល​ប្រយោជន៍​តិច​តួច​ពីការ​សាសង់​ទំនប់ក្នុង​តំបន់​នេះ។​ លោក​បន្ដថា “ ខ្ញុំ​បាន​លើក​យក​ចំណុច​នេះ​មក​ពិភាក្សា​ក្នុង​អង្គប្រជុំ​ជាមួយ​នឹង​លោក​អភិ​បាល​ខេត្ត​និង​គណៈ​កម្មា​ធិការ​​ទទួល​បន្ទុក​សាង​សង់ទំនប់​នេះរួច​​ហើយ​ គឺ​ថា ពេលក្រុម​ហ៊ុន​ចាប់​ផ្ដើម​​កាប់​ឆ្កា​​ដី​សម្រាប់ស្ថាបនា​​អាងស្តុក​ទឹក​នេះ ពួកគេ​ត្រូវ​តែ​ជួល​ប្រជា​ពល​រដ្ឋ​នៅ​ក្នុង​មូល​ដ្ឋាន​នេះ​​ ប៉ុន្ដែ​ពួកគេ​​មិន​បាន​ជួល​ទេ​​​​”។

បុគ្គលិក​​ក្រុម​ហ៊ុនរ៉ូយ៉ាល់​គ្រុប​ មិន​អាច​ទាក់​ទង​បាន​ទេ។ ទោះ​ជា​យ៉ាង​ណា លោក ឡូយ​ សុផាត អភិបាល​ខេត្ត​ស្ទឹង​ត្រែង ​បាន​មានប្រសាសន៍​ថា ក្រុម​ហ៊ុន​មិន​បាន​ធ្វើ​អ្វី​ខុស​ទេ ព្រោះ​រដ្ឋា​ភិបាល​បាន​​យល់​ព្រម​​ឲ្យ​ពួកគេ​ចាប់​ផ្ដើម​កិច្ច​ប្រតិ​បត្តិ​ការ​របស់​ពួកគេ។​

លោក​បានមាន​ប្រសាសន៍​​បន្ដ​ថា “ អ្វី​ដែល​មេ​ឃុំ​និយាយ​នោះ​ គឺ​មិន​ពិត​ទេ។ យើង​​មិន​ជួល​អ្នក​នៅ​ក្នុង​តំបន់​នោះ ព្រោះ​ពួកគេ​មិន​ចង់​ធ្វើ​ការ។ ដូច្នេះ យើង​ត្រូវ​តែ​ជួល​កម្មករ​មក​ពី​ខេត្ត​ដូច​ជា ខេត្ត​កំពង់​ចាម និង​ខេត្ត​ព្រៃ​វែង​”៕

ប្រែ​សម្រួល​ដោយ ហម សុផាណ្ណា​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស