27 C
Phnom Penh

ក្រម​អ្នក​ស៊ើប​អង្កេត​បារាំង​សើុប​អង្កេត​​ឃាត​កម្ម​លើ​ស្ត្រី​​ជន​ជាតិ​បារាំង ដែល​ប្រទះ​ឃើញ​អណ្ដែត​ទឹក​

ដោយ ឌឹ ខេមបូឌា ដេលី

បទវិភាគ

នគរ​បាល​និង​មន្ត្រី​ស្ថាន​ទូត​បាន​ឲ្យ​ដឹង​កាល​​ពី​ម្សិល​មិញ​ថា អ្នក​​សើុប​អង្កេត​​បារាំង​មួយ​ក្រុម​ដែល​បាន​មក​​ប្រទេស​កម្ពុជា​កាល​ពីខែ​មុន​​ ដើម្បី​ស៊ើប​អង្កេត​​ការ​ស្លាប់​បុរស​ជន​ជាតិ​បារាំងម្នាក់​និង​កូន​បួន​នាក់​របស់​គាត់​នៅ​ក្នុង​ខេត្ត​កំពង់​ស្ពឺ​នោះ​ ក៏​បាន​ឆ្លៀត​ឱកាស​នេះ​​ស៊ើប​អង្កេត​ករណី​ឃាតកម្ម​​លើ​ស្ត្រី​ជនជាតិ​បារាំង​ម្នាក់​ឈ្មោះ អូហ្វេលី ប៊េកនីស (OphelieBegnis)​ អាយុ​២៥​ឆ្នាំ​​ ផង​ដែរ។​

​​​​​សាក​សព​អាក្រាតកាយ​​របស់​ស្ត្រី​ទេសចរ​​បារាំង​នេះ​ត្រូវ​បា​ន​​ប្រទះ​ឃើញ​អណ្ដែត​​ទឹក​ក្បែរ​​​មាត់​ស្ទឹង​​ នៅ​ក្នុង​សង្កាត់​អណ្ដូង​ខ្មែរ ក្រុងកំពត​ កាល​ពី​ថ្ងៃ​ទី​១០ ខែ​កុម្ភៈ ដោយ​មាន​ស្នាម​​របួសក្បាល ​និង​ដៃ។​

កញ្ញា​ អូហ្វេលី ស្នាក់​នៅ​ឯ​ផ្ទះ​សំណាក់ ឡេ ​ម៉ង់គីយេ នៅ​ក្នុង​សង្កាត់​ទឹក​ឈូ ហើយ​គេ​បាន​ឃើញ​​គាត់​ចុង​ក្រោយ​ពេល​គាត់​​​ជិះ​កង់​​ចេញ​ពី​ផ្ទះ​សំណាក់​នេះ ​មួយ​ថ្ងៃ​មុន​ពេល​ប្រទះឃើញ​សាក​សព​គាត់​។ ​ការ​ស៊ើប​អង្កេត​របស់​មន្ត្រី​​មូល​ដ្ឋាន​នោះ​មិន​អាច​រក​ឃើញ​ជន​​សង្ស័យ​ណា​មួយ​​​ឡើយ​ ហើយ​​ថែម​ទាំង​បាន​សន្យា​​ផ្ដល់​រង្វាន់ចំនួន​២.៥០០​ដុល្លារ សម្រាប់​អ្នក​ដែល​រក​ឃើញ​ភ័ស្តុតាង​។​

កាល​ពី​ពីរ​សប្ដាហ៍​កន្លង​ទៅ មន្ត្រី​បារាំង​​មួយ​ក្រុម​មានគ្នា​១០​នាក់ ​គឺ​ចៅ​ក្រម​ស៊ើប​អង្កេត​ម្នាក់​អម​ដំណើរ​ដោយ​អ្នក​វិទ្យា​សាស្ត្រ​​កោសល្យ​វិច័យ​និង​នគរ​បាល​​ បាន​បញ្ចប់​ការ​ស៊ើប​អង្កេត​​លើ​ការ​ស្លាប់​របស់​លោក​ ឡូរ៉ង់ វ៉ាល្លី​យេ (Laurent Vallier)​អាយុ​៤២​ឆ្នាំ​ និង​កូន​បួន​នាក់​របស់​គាត់​ ​ហើយ​គេ​បាន​រក​ឃើញ​​សាក​សព​របស់​ពួកគេ​នៅ​ក្នុង​រថ​យន្ដ​របស់​គាត់​​ ដែល​​លិច​ក្នុង​​ស្រះ​​ទឹក​កាល​ពី​ខែ​មករា​ ឆ្នាំ​២០១២។

ទោះ​បី​ជា​នគរបាល​កម្ពុជា​​បាន​​និយាយ​ថា ការ​ស្លាប់​នេះ​​​ទំនង​ជា​ការ​ធ្វើ​អត្តឃាត​​ក៏ដោយ​​ក៏​អ្នក​ស៊ើប​អង្កេត​បារាំង​​បាន​និយាយ​ថា ករណី​​នេះ​មិន​មែន​ជា​ការ​ធ្វើ​​អត្ត​ឃាត​ដែរ​។

លោក​ គង់ សុខន នាយ​ការិយាល័យ​នគរ​បាល​ព្រហ្មទណ្ឌ​ខេត្ត​កំពត​ ​ថ្លែង​ថា បន្ទាប់​ពី​ក្រុម​ស៊ើប​អង្កេត​ ដែល​មាន​គ្នា​១០​នាក់​នេះបាន​បញ្ចប់​ការ​ស៊ើប​អង្កេត​​លើ​ការ​ស្លាប់​​របស់​លោក​ឡូរ៉ង់ វ៉ាល្លីយេ និង​កូន​ៗ​របស់គាត់​រួច​មក​ សមា​ជិក​ក្រុម​នេះ​ចំនួន​បួន​នាក់​ បាន​ធ្វើ​ដំណើរ​ទៅ​ខេត្ត​កំពត​ ដើម្បី​ស៊ើប​អង្កេត​​លើ​ការ​ស្លាប់​​របស់​​អូហ្វេលី ប៊េក​នីស។​គ្រួសារ​របស់​អូហ្វេលី ប៊េកនីស បាន​ដាក់​ពាក្យ​​បណ្ដឹង​ទៅ​អាជ្ញាធរ​បារាំង​ កាល​ពី​ខែ​កុម្ភៈ​ ស្នើ​​​សុំ​ឲ្យ​ពួក​គេ​ស៊ើប​អង្កេត​​លើ​ការ​ស្លាប់​​របស់ អូហ្វេលី។

លោក​ គង់ សុខន បាន​មាន​ប្រសាសន៍​ថា “ ​មន្ត្រី​នគរបាល​បារាំង​បួន​នាក់​ បាន​ធ្វើ​ការ​ស៊ើប​អង្កេត​រយៈ​ពេល​ពីរ​ថ្ងៃ​លើ​ករណី​ឃាត​កម្ម​របស់​ស្ត្រី​ជន​ជាតិ​បារាំង​រូប​នេះ។ ពួក​គេ​បាន​បាច​ម្សៅ​គី​មី​នៅ​ចំណុច​ដែលគេ​បាន​ប្រទះ​ឃើញ​សាកសព​​ និង​កន្លែង​ដែល​គេ​​សង្ស័យ​ថា ​នាង​ត្រូវ​បាន​​គេ​សម្លាប់​”។
លោក​បាន​បន្ថែម​ថា មិន​ទាន់​រក​ឃើញ​​ភ័ស្តុតាង​ថ្មី​​ក្នុង​ករណី​នេះ​​នៅ​ឡើយ​ទេ​។ លោក គង់ សុខន បន្ដ​ថា “ រហូត​មក​ដល់​ពេល​នេះ​យើង​នៅ​​មិន​ទាន់​រក​ឃើញកន្លែង​ដែល​ឃាតកម្ម​នេះ​បាន​កើត​ឡើង​ទេ​ប៉ុន្ដែ​យើង​​កំពុង​បន្ដ​ស៊ើប​អង្កេត​ករណីនេះ​”។

ការ​ធ្វើ​តេស្ដ​ដោយ​​ប្រើ​សារធាតុគីមី​ដូច​គ្នា​នេះ​ត្រូវ​​​បាន​ធ្វើ​​នៅ​ឯ​ផ្ទះ​របស់​លោក ឡូរ៉ង់​វ៉ាល្លីយេ ដែល​នៅ​ទី​នោះ​ គេ​​បាន​​រក​ឃើញ​ស្នាម​ឈាម​​លើ​ឥដ្ឋ​ ក៏ដូច​ជា​​ក្នុង​វ៉ាលិស​ដែល​គេ​​យក​ចេញ​ពី​រថយន្ដ​​លិច​ទឹក​​ស្រះ​នោះ​​។

លោក​ នីកូឡាស បូឌូអុីន (Nicolas Baudouin) លេខាទី​១ នៅ​ស្ថាន​ទូត​បារាំង​បាន​បញ្ជាក់​កាល​ពី​ម្សិលមិញ​ថា ​​ក្រុម​​អ្នក​ស៊ើប​អង្កេត​បាន​ធ្វើ​ដំណើរ​ទៅ​ខេត្ត​កំពត​ ដើម្បី​ស៊ើប​អង្កេត​ករណី​ឃាតកម្ម​​លើ​​នាង​​ អូហ្វេលី ប៊េក​នីស​ ហើយ​បាន​មាន​ប្រសាសន៍​ថា ក្រុម​នេះ​បាន​ចាក​ចេញ​​ពី​កម្ពុជា កាល​ពី​ថ្ងៃ​ទី​២៣​ ខែ​មីនា។

លោក​ បូឌូអុីន មាន​ប្រសាសន៍​ថា “ ក្រុម​​នេះ​បាន​ធ្វើ​ដំណើរ​ទៅ​ខេត្ត​កំពត​ ព្រោះ​យើង​​​ចាំ​បាច់​ត្រូវ​ធ្វើ​ការ​វិភាគ​មួយ​ចំនួន​ ដែល​​មិន​ទាន់​បាន​ធ្វើ​ពីមុន​មក​​ ហើយ​ការ​វិភាគ​នេះ​ធ្វើ​ឡើង​ដោយ​សហការ​ជាមួយ​នឹង​នគរ​បាល​កម្ពុជា​។ ចំណែក​ឯ​លទ្ធផល​មិន​ទាន់​ដឹង​នៅ​ឡើយ​ទេ​”៕

(រាយការណ៍​បន្ថែម​ដោយ Dene-Hern Chen)
ប្រែសម្រួល​ដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស