មន្ត្រីនគរបាលនិយាយកាលពីម្សិលមិញថា បុរសអាយុ៤៦ឆ្នាំម្នាក់ ដែលជាបក្ខពួកក្រុមចាប់ជំរិតដែលមានឈ្មោះអសោចនៅក្នុងប្រទេសកម្ពុជាអំឡុងចុងទសវត្សរ៍ឆ្នាំ១៩៩០ ហើយដែលបានគេចខ្លួនពីនគរបាលរយៈពេលជាង១០ឆ្នាំមកហើយនោះ ត្រូវបានចាប់ខ្លួនកាលពីថ្ងៃសៅរ៍ ក្នុងខណ្ឌឫស្សីកែវ ក្នុងរាជធានីភ្នំពេញ។
ចន្លោះឆ្នាំ១៩៩៧ ដល់ឆ្នាំ១៩៩៨ ឡាំ គឹមលាង បានចូលរួមជាមួយក្រុមចាប់ជំរិត ដឹកនាំដោយ សំ ណារ៉ា ដែលគេស្គាល់ថាឈ្មោះ “ រ៉ាស្មាច់” និងជាមនុស្សដែលនគរបាលកំពុងស្វែងរកចាប់ខ្លួនពាក់ព័ន្ធការចាប់ជំរិតជាច្រើនលើកអំឡុងពេលនោះ ព្រមទាំង ពាក់ព័ន្ធបទល្មើសថ្នាំញៀនដែលបានប្រព្រឹត្តចាប់តាំងពីចាកចេញពីក្រុមនោះមក។
លោកវរសេនីយ៍ឯក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានមានប្រសាសន៍ថា “ ឡាំ គឹមលាង គឺជាអតីតបក្ខពួកក្រុម រា៉ាស្មាច់ ហើយបន្ទាប់ពី [សំ ណារ៉ា] បានស្លាប់ទៅ គឹមលាង បានងាកទៅជួញដូរគ្រឿងញៀនជាមួយក្មួយប្រុសរបស់ខ្លួន ឈ្មោះ ឡាំ សុខហេង ដែលក៏ត្រូវបានចាប់ខ្លួនដែរកាលពីឆ្នាំ២០០៧”។
លោកបានបន្ថែមថា លោកមិនដឹងថា ឈ្មោះ គឹមលាង នេះមានតួនាទីអ្វីពិតប្រាកដនៅក្នុងក្រុមចាប់ជំរិតនោះទេ។ កាលពីខែ សីហា ឆ្នាំ២០០០ សំ ណារ៉ា ត្រូវកម្លាំងសន្តិសុខបាញ់ត្រូវមុខមួយគ្រាប់ ហើយបានស្លាប់នៅខាងក្រៅផ្ទះរបស់សាច់ញាតិម្នាក់នៅក្នុងខណ្ឌមានជ័យ រាជធានី
ភ្នំពេញ។ តាមការអះអាងថា ក្រុមរបស់គេទទួលខុសត្រូវចំពោះការចាប់ជំរិតជាច្រើន ដែលបានបណ្តាលឲ្យមានការគំរាមទារប្រាក់បានជាង ១,២លានដុល្លារ។ការចាប់ជំរិតដ៏គឃ្លើនបំផុតរបស់ក្រុម “ រ៉ាស្មាច់” នោះគឺការចាប់ជំរិតពាណិជ្ជករម្នាក់ក្នុងរាជធានីភ្នំពេញ កាលពីឆ្នាំ១៩៩៨ដែល
ក្រុមនេះទទួលបានប្រាក់៣៦០.000ដុល្លារ។
មុនពេលបាញ់សម្លាប់ នគរបាលបានបំបែកក្រុមរបស់ សំណារ៉ា នៅក្នុងរាជធានីភ្នំពេញ និងខេត្តពោធិ៍សាត់ អំឡុងការស្វែងរកចាប់ខ្លួនរយៈពេល១០ថ្ងៃ។
លោកវរសេនីយ៍ឯក ខេង ទីតូ បានមានប្រសាសន៍ថា ” ឡាំ គឹមលាង បានរត់គេចអស់រយៈពេលជាង១០ឆ្នាំមកហើយ”។ លោកបានបន្ថែមថា កាលពីម្សិលមិញ លោកបានបញ្ជូនជននេះទៅសាលាដំបូងរាជធានីភ្នំពេញហើយដើម្បីសាកសួរ។
លោកព្រះរាជអាជ្ញារង កើ ប៊ុណ្ណារ៉ា បានបដិសេធមិនធ្វើអត្ថាធិប្បាយលម្អិតពាក់ព័ន្ធករណីនេះទេ ប៉ុន្តែលោកបានមានប្រសាសន៍
ថា “ ឥឡូវនេះ តុលាការគ្រាន់តែសាកសួរជននេះប៉ុណ្ណោះ”៕
ប្រែសម្រួលដោយ សោម សារុន