ក្រុមហ៊ុនរ៉ូយ៉ាល់គ្រុប កាលពីម្សិលមិញ បានចុះហត្ថលេខាជាមួយក្រុមហ៊ុនធំមួយមកពីប្រទេសហ្វីលីពីន ដើម្បីបង្កើតក្រុមហ៊ុនអាកាសចរណ៍មួយក្នុងរយៈពេលប៉ុន្មានខែខាងមុខនេះ។
លោកឧបនាយករដ្ឋមន្ត្រី សុខ អាន បានធ្វើជាគណៈអធិបតីក្នុងពិធីចុះហត្ថលេខា កាលពីយប់ម្សិលមិញ នារាជធានីភ្នំពេញ ដើម្បី
បង្កើតក្រុមហ៊ុនអាកាសចរណ៍កម្ពុជា ដែលជាក្រុមហ៊ុនរកស៊ីរួមគ្នារវាងក្រុមហ៊ុនរ៉ូយ៉ាល់គ្រុប និងក្រុមហ៊ុន សាជីវកម្មសានមីហ្គែល (San Miguel Corperation) ដែលគ្រប់គ្រងភាគហ៊ុនរបស់ក្រុមហ៊ុនអាកាសចរណ៍ប្រទេសហ្វីលីពីន(Philippine Airlines) ។
កិច្ចព្រមព្រៀងនេះនឹងរំពឹងថា មិនត្រឹមតែបើកផ្លូវសម្រាប់ជើងហោះហើរដោយផ្ទាល់ពីទីក្រុងម៉ានីលមកកម្ពុជាប៉ុណ្ណោះទេ ប៉ុន្តែបានបង្កើនការហោះហើរក្នុងស្រុកជាច្រើនទៀតនៅក្នុងប្រទេសកម្ពុជា។
លោក គិត ម៉េង ប្រធានក្រុមហ៊ុនរ៉ូយ៉ាល់គ្រុបមានប្រសាសន៍ក្នុងពិធីចុះហត្ថលេខានៅសណ្ឋាគារកាំបូឌីយ៉ាណា ដែលចូលរួមដោយភ្ញៀវកិតិ្តយស រួមទាំងលោក ហ៊ុន ម៉ានី កូនប្រុសរបស់លោកនាយករដ្ឋមន្ត្រី ហ៊ុន សែន និងលោក ជូសេ ដឺ វេណេស្យា (Jose de Venecia) អតីតប្រធានសភាតំណាងរាស្ត្រហ្វីលីពីនថា “ ផលប្រយោជន៍ក្នុងការធ្វើជាដៃគូជាមួយក្រុមហ៊ុនអាកាសចរណ៍ហ្វីលីពីន គឺជាដំបូងយើងនឹងមើលឃើញនូវការកើនឡើងរបស់ប្រជាជនហ្វីលីពីនមកដល់ប្រទេសកម្ពុជាក្នុងចំណោមប្រជាពលរដ្ឋហ្វីលីពីនចំនួន៩៤លាននាក់”។
លោក គិត ម៉េង ថ្លែងបន្តថា “ ក្រោយមកទៀត ខណៈពេលបណ្តាញការងាររបស់យើងបានពង្រីកនោះ យើងនឹងសម្លឹងមើលបណ្តាមុខជំនួញមួយចំនួនទៀត និងអ្នកទេសចរ ដែលបានមកពីតំបន់អាស៊ាន និងអាស៊ីអាគ្នេយ៍។ ការកើនឡើងផ្នែកវិស័យទេសចរណ៍ចូលនឹងចេញពីប្រទេសកម្ពុជា នឹងធ្វើឲ្យវិស័យពាណិជ្ជកម្មមានការរីកចម្រើន។ ម្យ៉ាងវិញទៀតមានការវិនិយោគដោយផ្ទាល់ពីបរទេសកាន់តែច្រើនមកប្រទេសកម្ពុជាអាចរំពឹងថា…នឹងនាំសហគមន៍សេដ្ឋកិច្ចអាស៊ាន មកដល់ប្រទេសកម្ពុជានៅក្នុងឆ្នាំ២០១៥”។
យោងតាមសេចក្តីប្រកាសព័ត៌មានមួយ ដែលផ្តល់ឲ្យអ្នកយកព័ត៌មានឲ្យដឹងថា លោក គិត ម៉េង និងមានភាគហ៊ុនចំនួន៥១ភាគរយនៅក្នុងក្រុមហ៊ុននេះ ហើយក្រុមហ៊ុន សាមីហ្គែល និងគ្រប់គ្រងភាគហ៊ុន ដែលនៅសេសសល់ចំនួន៤៩ភាគរយ។
ក្រុមហ៊ុនអាកាសចរណ៍កម្ពុជាធ្លាប់ផ្តល់ជំនួយបច្ចេកទេសឲ្យក្រុមហ៊ុនថៃគ័រអ៊ែរវ៉េ របស់ប្រទេសសិង្ហបុរីនៅក្នុងប្រទេសកម្ពុជា ប៉ុន្តែ បច្ចុប្បន្ននេះ ក្រុមហ៊ុនរ៉ូយ៉ាល់គ្រុប នឹងមានយន្តហោះប្រតិបត្តិការជើងហោះហើរអន្តរជាតិផ្ទាល់ខ្លួន ព្រមទាំងជើងហោះហើរនៅក្នុងស្រុក ក្នុងប្រទេសកម្ពុជាផងដែរ។
លោក រ៉ាម៉ុន អាង មន្ត្រីប្រតិបត្តិការរបស់ក្រុមហ៊ុនសាមីហ្គែល និងក្រុមហ៊ុនអាកាសចរណ៍ហ្វីលីពីនថ្លែងថា “ ខ្ញុំសូមថ្លែងអំណរគុណរដ្ឋាភិបាលកម្ពុជា និងដៃគូររបស់យើងគឺក្រុមហ៊ុនរ៉ូយ៉ាល់គ្រុបសម្រាប់ឱកាសនេះដែលបានជួយណែនាំក្រុមហ៊ុនអាកាសចរណ៍ជាតិ និងដំណើរការជើងហោះហើរពីប្រទេសរបស់អ្នកទៅកាន់ពិភពលោកទាំងមូល។
លោក ម៉ាកហាណា មន្ត្រីហិរញ្ញវត្ថុប្រចាំក្រុមហ៊ុនរ៉ូយ៉ាល់គ្រុប បានមានប្រសាសន៍ថា ក្រុមហ៊ុនអាកាសចរណ៍កម្ពុជាអាចជួលយន្តហោះម៉ាស៊ីនពីរ ចំនួនប្រាំបីគ្រឿងសម្រាប់ហោះហើរក្នុងស្រុក ដែលអាចរួមបញ្ចូលទាំងអាកាសយានដ្ឋាននៅតាមបណ្តាខេត្តនានា ដែលមិនបានប្រើប្រាស់ក្នុងពេលបច្ចុប្បន្ននេះដូចជានៅខេត្តបាត់ដំបង និងខេត្តរតនគិរីហើយយន្តហោះប្រភេទអ៊ែរបឺស A321 សម្រាប់ជើងហោះហើរអន្តរជាតិ។
លោក ហាណា បានមានប្រសាសន៍បន្តថា ការហោះហើរក្នុងស្រុកអាចចាប់ផ្តើមនៅដើមខេត្តមិថុនាក្នុងឆ្នាំនេះ ហើយលោករំពឹងថា ការហោះហើរជាអន្តរជាតិនឹងចាប់ផ្ដើមនៅខែតុលា។ ការភ្ជាប់ទំនាក់ទំនងជាមួយក្រុមហ៊ុនអាកាសចរណ៍ហ្វីលីពីនអាចបើកឲ្យមានជើងហោះហើរទៅកាន់សហរដ្ឋអាមេរិក និងអឺរ៉ុបតាមរយៈទីក្រុងម៉ានីល។
វានៅមិនទាន់ច្បាស់នៅឡើយថា តើក្រុមហ៊ុនអាកាសចរនេះនឹងប៉ះពាល់ដល់ក្រុមហ៊ុនអាកាសចរណ៍អង្គរកម្ពុជា ដែលមានស្រាប់នៅក្នុងប្រទេសកម្ពុជា ឬយ៉ាងណា ដែលក្រុមហ៊ុននេះមានភាគហ៊ុនរបស់រដ្ឋាភិបាលភាគច្រើនក្នុងការរកស៊ីរួមគ្នាជាមួយក្រុមអាកាសចរណ៍វៀតណាម។ ក្រុមហ៊ុនអាកាសចរណ៍អង្គរបច្ចុប្បន្ននេះ ដែលបានផ្តល់តែការហោះហើរក្នុងស្រុកតែប៉ុណ្ណោះ។
លោក ផាម ថេហ៊ុម អគ្គនាយកក្រុមហ៊ុនអាកាសចរវៀតណាមប្រចាំនៅប្រទេសកម្ពុជាបានថ្លែងកាលពីម្សិលមិញថា លោកមិនបានដឹងពីកិច្ចព្រមព្រៀងនេះទេ។ លោកមានប្រសាសន៍បន្តថា“ អ្នកជាអ្នកទីមួយហើយដែលបានប្រាប់ខ្ញុំអំពីអាកាសចរណ៍នេះ”។
ប៉ុន្តែ លោក ថេហ៊ុម និយាយបន្តថា ចាប់តាំងពីក្រុមហ៊ុនរកស៊ីរួមគ្នាថ្មីមួយបានចាប់ផ្ដើមរកស៊ីជាមួយក្រុមហ៊ុនអាកាសចរណ៍
ហ្វីលីពីនគឺវាអាចផ្តោតទៅលើជើងហោះហើរនៅក្នុងស្រុក ហើយវាអាចមានជើងហោះហើរជាមួយនឹងក្រុមហ៊ុនអាកាសចរណ៍អង្គរកម្ពុជា។លោកបន្តថា “ពួកគេ [ក្រុមហ៊ុនអាកាសចរណ៍អង្គរកម្ពុជា] គឺកំពុងផ្តោតមកលើប្រទេសវៀតណាម ប្រទេសចិនភាគខាងត្បូង និងប្រទេសថៃ។
កិច្ចព្រមព្រៀងនេះកើតឡើងស្របពេលមានកំណើនអ្នកធ្វើដំណើរមួយចំនួនមកដល់អាកាសយានដ្ឋានអន្តរជាតិទាំងនៅភ្នំពេញ និងខេត្តសៀមរាប។ក្រុមហ៊ុនអាកាសចរណ៍កម្ពុជាបានចំណាយថវិកាជិត១៥០លានដុល្លារដើម្បីពង្រីកអាកាសយានដ្ឋានទាំងពីរនេះ ដែលអាចមានលទ្ធភាពទទួលអ្នកដំណើរបាន៥លាននាក់ក្នុងមួយឆ្នាំៗ នៅឆ្នាំ២០១៥។
ក្រុមហ៊ុនអាកាសចរណ៍ថ្មី ដែលរកស៊ីរួមគ្នាជាមួយក្រុមហ៊ុនទូរស័ព្ទចល័តម៉ូប៊ីថែល ធនាគារ ANZ Royal ក្រុមហ៊ុនផ្លូវដែកថូលរ៉ូយ៉ាល់ និងក្រុមហ៊ុនធានារ៉ាប់រង Infinity ដែលលោក គិត ម៉េង បានពង្រីកពាណិជ្ជកម្មរបស់ខ្លួន ក្នុងពេលថ្មីៗនេះ លោកបានបន្ថែមភាគហ៊ុននៅក្នុងទំនប់វារីអគ្គិសនីសេសានក្រោម២។ ក្រុមហ៊ុនរ៉ូយ៉ាល់គ្រុបក៏បានគ្រប់គ្រងសណ្ឋាគារកាំបូឌីយ៉ាណា ដែលពិធីចុះហត្ថលេខាកិច្ចព្រមព្រៀងនេះ កាលពីម្សិលមិញនោះ។
ក្រុមហ៊ុន សានមីហ្គែល ខបភឺរ៉េសិន បានចាប់ផ្តើមផលិតស្រាបៀរ សានមីហ្គេល ជាងមួយសតវត្សរ៍មកហើយ ហើយក្រុមហ៊ុននេះ
មានឥទ្ធិពលផ្នែកហេដ្ឋារចនាសម្ព័ន្ធការរុករករ៉ែ និងប្រព័ន្ធទូរគមនាគមន៍ ដែលមានរបាយការណ៍ប្រាក់ចំណូលចំនួន ១២,៥ពាន់លានដុល្លារកាលពីឆ្នាំមុន។
កាលពីឆ្នាំ២០១០ ក្រុមហ៊ុនសានមីហ្គែលនិងក្រុមហ៊ុនរ៉ូយ៉ាល់គ្រុបបានប្រកាសថា ពួកគេអាចសាងសង់រោងចក្រស្រាបៀរមួយនៅក្នុងប្រទេសកម្ពុជា ប៉ុន្តែ គម្រោងនេះនៅមិនទាន់បានសម្រេចនៅឡើយទេ ៕
ប្រែសម្រួលដោយ ឃិន ណៃ