មេធាវី​របស់ ខៀវ សំផន ស្នើ​សុំ​ឲ្យ​កូន​ក្ដី​​​នៅ​ក្រៅ​ឃុំ​ ខណៈ​ពេល​​សំណុំ​រឿង​០០២មិន​មានការ​វិវឌ្ឍ​​

កាល​ពី​ថ្ងៃ​ច័ន្ទ​ មេធាវី​របស់​​ ខៀវ សំផនដែល​ជា​ជន​ជាប់​ចោទ​ពី​បទ​ឧក្រិដ្ឋ​កម្ម​សង្គ្រាម​បាន​ធ្វើ​សំណើ​សុំ​ឲ្យ​កូន​ក្ដី​របស់​ខ្លួន​នៅ​ក្រៅ​ឃុំ​ជា​បន្ទាន់​ ដោយ​លើក​ឡើង​ថា សិទ្ធិ​​ចូល​រួម​សវនាការ​របស់​​កូន​ក្ដី​​ខ្លួន ត្រូវ​បាន​រំលោភ​បំពាន​ ហើយ​ថា ការ​បន្ត​ឃុំ​ខ្លួន​កូន​ក្ដី​របស់​ខ្លួន​គឺ​​យូរ​ពេក ​​​និង​មិន​សម​ហេតុ​ផល​ឡើយ​។

សំណើ​កម្រាស់​១៥​ទំព័រ​ ដែល​ត្រូវ​បាន​​ធ្វើ​ឡើង​​ដោយ​លោក​ ហ្សាកេស​ វើ​កេស (Jacques Verges) លោក​ អាសឺ វើ​ខេន (Arthur Vercken) និង​លោក​ អង់​​តា ហ្គីសេ (Anta Guisse)មក​ពី​ទីក្រុង​ប៉ារីស​ និង​លោក​ គង់ សំអុន ​លើក​​ឡើង​ថា ចាប់​តាំង​ពី​ការ​ចាប់​ខ្លួន និង​ការ​ឃុំ​ឃាំង​គាត់​ កាល​ពី​ឆ្នាំ​២០០៧ ស្ទើ​រ​មិន​ឃើញ​មាន​គ្រោះ​ថ្នាក់​ណា​មួយ​ដែល​បង្ក​ឡើង​ដោយ​ ខៀវ​ សំផន ​ឡើយ​​។​សំណើនេះ​ បាន​បញ្ជាក់​​​ថា គាត់​មិន​អាច​គេច​ខ្លួន​ ហើយ​ក៏​មិន​​មាន​​​គ្រោះ​ថ្នាក់​​ដល់​សន្តិ​សុខ​របស់​គាត់​ដែរ​​ ប្រសិន​បើ​គេ​ដោះ​លែង​រូប​គាត់​។

​សំណើ​នេះ​លើក​ឡើង​ទៀត​ថា គាត់​ត្រូវ​បាន​​ឃុំ​ខ្លួន​បណ្ដោះ​អាសន្ន​អស់​រយៈ​ពេល​ប្រាំ​ឆ្នាំ​ និង​បួន​ខែ​មក​ហើយ​ ក៏​ប៉ុន្ដែ គេ​នៅ​តែ​អាច​ សន្និដ្ឋាន​បាន​ថា ខៀវ​ សំផន គ្មាន​ទោស​​ឡើយ​។ ​សំណើ​​ដដែល​នេះ​ បន្ថែម​ទៀត​ថា សព្វ​ថ្ងៃ​គាត់​មាន​អាយុ​៨២​ឆ្នាំ​​ហើយ​។ ​ការ​បន្ត​ឃុំ​ខ្លួន​គាត់​ដោយ​គ្មាន​ការ​វិនិច្ឆ័យ​​នោះ​​មិន​អាច​ទទួល​យកបាន​ទេ​​។

សំណើ​ដាក់​ជូន​តុលាការ​នេះ​​បាន​ស្នើសុំ​ឲ្យ​បើក​សវនាការ​ជំនុំជម្រះ​ជា​សាធារណៈ​​ ដើម្បី​អនុញ្ញាត​ឲ្យ​ជន​ជាប់​ចោទ​ពីបទ​ឧក្រិដ្ឋ​កម្ម​
សង្គ្រាម​វ័យ​ចំណាស់​រូប​នេះ​អាច​បញ្ជាក់​ថា រូប​គាត់​នឹង​​បំពេញ​តាម​លក្ខខណ្ឌ​ច្បាប់​នានា​ ដែល​​តុលាការ​ចង់​បាន​ ប្រសិន​បើគាត់​ត្រូវ​បាន​ដោះ​លែង​នោះ​ និង​ដើម្បី​បញ្ជាក់​ថា គាត់​​នឹង​បន្ដ​មាន​វត្ត​មាន​នៅ​ឯ​សវនាការ​របស់​គាត់​។

ខៀវ​ សំផន គឺ​ជា​​ជន​ជាប់​ចោទ​មួយ​រូប​ ក្នុង​​ចំណោម​ជន​ជាប់​ចោទ​ ដែល​នៅ​រស់​ក្នុង​សំណុំ​រឿង​០០២ ដែល​សំណុំ​រឿង​នេះ​មាន​គោល​បំណង​ឲ្យ​មេដឹកនាំ​ខ្មែរ​ក្រហម​កំពូល​ៗ​ ទទួលខុស​ត្រូវ​ចំពោះ​បទ​ឧក្រិដ្ឋ​ជា​ច្រើន​ ដែល​បាន​ប្រព្រឹត្ត​នៅ​ក្នុង​របប​ ប៉ុល ពត។ អៀង ធីរិទ្ធ ត្រូវ​បាន​ប្រកាស​ថា មិន​មាន​កាយ​សម្បទា​​គ្រប់​គ្រាន់​ ដើម្បី​​ឡើង​សវនា​ការ​បាន​ទេ​កាល​ពី​ឆ្នាំ​មុន​​ ចំណែក​ឯ អៀង សារី ដែល​ជា​ប្ដី​របស់​គាត់​វិញ​បាន​ស្លាប់​កាល​ពី​ថ្ងៃ​ទី​១៤ ខែមីនា​។

សំណុំ​រឿង​០០២​នេះ​មិន​មាន​ការ​វិវឌ្ឍ​ទេ ចាប់​តាំង​ពី​បាន​​ចាប់​ផ្ដើម​កាល​ពី​ខែ​វិច្ឆិកា​ ឆ្នាំ​២០១១មក​​ ដែល​មួយ​ផ្នែក​ធំ​ដោយ​សារ​តែ​​បញ្ហា​សុខភាព​​របស់​សហ​ចុង​ចោទ​របស់​គាត់​​​ ក៏​ប៉ុន្ដែ ខៀវ​ សំផន ដែល​ជា​អតី​ត​ប្រមុខ​រដ្ឋ​ខ្មែរ​ក្រហម​ នៅ​តែ​មាន​វត្ត​មាន​ នៅ​សាល​សវនាការ​។

សំណើ​សុំ​​នៅ​ក្រៅ​ឃុំ​នេះ​​លើក​ឡើង​ម្ដង​ហើយ​ម្ដង​ទៀត​អំពី​ការ​អូស​បន្លាយ​ពេល​​នៅ​​ក្នុង​​សំណុំ​រឿង​​០០២​នេះ​ថា តើ​ ខៀវ សំផន នឹង​ត្រូវ​ជំនុំ​ជម្រះ​លើ​បទ​ចោទ​ប្រកាន់​ទាំង​អស់​ចំពោះរូប​គាត់​នា​ពេលនេះ​​ដោយ​របៀប​​ណា​ និង​ពេល​ណា​នោះ​ ដូច​ជា​​មិន​​មាន​នរណា​​ម្នាក់​អាច​ឆ្លើយ​សំណួរ​នេះ​​បាន​ទេ​។

​ជា​ការ​គាំទ្រ​សំណើសុំ​​នៅ​ក្រៅ​ឃុំ​នេះ​​ គេ​​​បាន​ដក​ស្រង់​សម្ដី​របស់​ចៅ​ក្រម​ស៊ើប​អង្កេត​លោក ម៉ាសែល​ លើម៉ុង (Marcel Lemonde) ដែល​បាន​មាន​ប្រសាសន៍​នៅ​ក្នុង​កិច្ច​សម្ភាស​​ជាមួយ​​គេហទំព័រ​បារាំង​មួយ​ កាល​ពី​ខែ​មុន​ថា សវនាការ​កាត់​ក្ដីនេះកំពុង​តែ​បន្ដ​ដំណើរ​ការ​ក្នុង​ស្ថានភាព​​ច្របូក​ច្របល់​មិន​សូវ​ពេញ​ចិត្ត​ យឺត​យ៉ាវ​ ដោយ​មាន​បញ្ហា​ខាង​នីតិវិធី​ម្ដង​ហើយ​ម្ដង​ទៀត​ សុខភាព​មិន​ប្រាកដ​ប្រជា​របស់​ជន​ជាប់​ចោទ​ និង​បញ្ហា​មិន​ច្បាស់​លាស់​ខាង​ហិរញ្ញ​វត្ថុ​។

ពាក្យ​ស្នើ​សុំ​នៅ​ក្រៅ​ឃុំ ដដែល​បាន​លើក​​ឡើង​ថា សិទ្ធិ​ជាមូលដ្ឋាន​ និង​សិទ្ធិ​មាន​កិត្តិយស​​ដូច​មនុស្ស​ធម្មតា​របស់​ ខៀវ សំផន ត្រូវ​បាន​​រំលោភ​បំពាន​ដោយ​ការ​បន្ត​ឃុំ​ខ្លួន​គាត់​។ ហានិភ័យ​ដែល​ជា​ហេតុ​ផល​​នាំ​ឲ្យ​មាន​​ការ​​បិទ​សិទ្ធិ​​សេរីភាព​របស់​គាត់​កាលពី​ដំបូង​ ឥឡូវ​នេះ​បាន​ថយ​ចុះ​យ៉ាង​ច្រើន​ ឬក៏​គ្មាន​តែ​ម្ដង។ គេ​អាច​ការ​ពារ​មិន​ឲ្យ​កើត​មាន​ហានិភ័យ​​នីមួយៗ​​ ក្នុង​ចំណោម​ហានិភ័យ​ទាំង​នេះ ដោយ​​ដាក់​គាត់​ឲ្យ​ស្ថិត​ក្រោម​ការ​គ្រប់​គ្រង​របស់​តុលាការ​។ ការ​បើក​សវនាការ​​គ្រោង​បន្ត​​នៅ​ថ្ងៃ​ច័ន្ទ​៕

(រាយការណ៍​បន្ថែម​ដោយ Kate Bartlett)
ប្រែ​សម្រួល​ដោយ ហួង កុកទៀន

© 2013, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.