នៅក្នុងកិច្ចប្រជុំមួយជាមួយអភិបាលក្រុងប៉ារីសកាលពីថ្ងៃអង្គារ លោកនាយករដ្ឋមន្ត្រីហ៊ុន សែន បានសម្តែងការព្រួយបារម្ភរបស់លោក ចំពោះហេដ្ឋារចនាសម្ព័ន្ធមិនល្អនៅក្នុងរាជធានីភ្នំពេញ ដោយលោកបានមានប្រសាសន៍ថា វាមិនទាន់អាចឆ្លើយតបទៅនឹងតម្រូវការបានទេ ដោយសារកំណើនរបស់
ប្រជាពលរដ្ឋរស់នៅក្នុងរាជធានីភ្នំពេញ។
នៅក្នុងការជួបពិភាក្សាជាមួយលោក ប៊ែរត្រង់ ឌឺឡាណូ (Bertrand Delanoe) ដែលបានអញ្ជើញមកដល់រាជធានីភ្នំពេញកាលពីថ្ងៃអង្គារ ដើម្បីជួបពិភាក្សាជាមួយលោកនាយករដ្ឋមន្ត្រី ហ៊ុន សែន និងលោក កែប ជុតិមា អភិបាលរាជធានីភ្នំពេញ អំពីសមាគមអន្តរជាតិសម្រាប់អភិបាលក្រុងនិយាយភាសាបារាំង លោក ហ៊ុន សែន បានមានប្រសាសន៍ថា រាជធានីភ្នំពេញ សព្វថ្ងៃកំពុងជួបបញ្ហាមួយចំនួនដូចជាបញ្ហាដាច់ចរន្តអគ្គិសនី និងការកកស្ទះចរាចរណ៍ ដែលកើតឡើងស្ទើររៀងរាល់ថ្ងៃ។
លោក អៀង សុផាល្លែត ជំនួយការផ្ទាល់របស់លោកនាយករដ្ឋមន្ត្រី ហ៊ុន សែន បានមានប្រសាសន៍ថា “ [សម្តេច ហ៊ុន សែន បានមានប្រសាសន៍ថា] ការពង្រីកទីក្រុង បាននាំឲ្យមានបញ្ហាមួយចំនួនដូចជា កង្វះថាមពលអគ្គិសនីប្រើប្រាស់ និងបញ្ហាកកស្ទះចរាចរណ៍ខ្លាំង ព្រមទាំងបញ្ហាគ្រប់គ្រងសំរាម និងការខ្វះខាតប្រព័ន្ធទឹកស្អាត ដែលត្រូវការជាចំបាច់សម្រាប់តភ្ជាប់ទៅតំបន់អភិវឌ្ឍន៍ថ្មីនោះ”។
លោក សុផាល្លែត បានបន្ថែមថា លោកនាយករដ្ឋមន្ត្រី ក៏បានលើកឡើងដែរថា រដ្ឋាភិបាលកំពុងសុំជំនួយពីវិស័យឯកជន ដើម្បីឲ្យជួយសហការគ្នាក្នុងការការពារ និងពន្លត់អគ្គិភ័យ។
លោក នីកូឡា បូឌង់ (Nicolas Baudouin) លេខាទី១របស់ស្ថានទូតបារាំង បានមានប្រសាសន៍ថា លោក ប៊ែរត្រង់ ឌឺឡាណូ បានគូសបញ្ជាក់ថា បញ្ហាទាំងនេះ គឺជាបញ្ហារបស់ទីក្រុង ដែលមានការអភិវឌ្ឍយ៉ាងឆាប់រហ័សនៅក្នុងតំបន់អាស៊ីអាគ្នេយ៍កំពុងជួបប្រទះ។
លោក បូឌង់ បានលើកឡើងតាមរយៈអុីម៉េលថា “ លោក ឌឺឡាណូ បានលើកឡើងម្តងទៀតថា ទីក្រុងប៉ារីស បានត្រៀមខ្លួនរួចជាស្រេចដើម្បីជួយរាជធានីភ្នំពេញក្នុងការដោះស្រាយបញ្ហាទាំងនេះ”។
ការស្ដីបន្ទោសខ្លាំងៗរបស់លោក ហ៊ុន សែន អំពីស្ថានភាពអាក្រក់ នៅក្នុងរាជធានីភ្នំពេញ ត្រូវបានធ្វើឡើង បន្ទាប់ពីការលេចឮថា លោក កែប ជុតិមា អភិបាលរាជធានីភ្នំពេញនឹងចុះចេញពីតំណែងនៅឆ្នាំនេះ ដើម្បីឈរឈ្មោះជាសមាជិកសភាសម្រាប់ការបោះឆ្នោតជាតិនៅខែកក្កដា ខាងមុខនេះ។
លោក ហ៊ុន សែន បានថ្លែងកាលពីខែមករាថា លោក កែប ជុតិមា ឈានដល់អាយុ៦០ឆ្នាំ ដែលជាអាយុត្រូវចូលនិវត្តហើយ។ នៅពេលសួរអំពីហេតុផល ដែលនៅពីក្រោយការចុះចេញពីតំណែងរបស់លោក កែប ជុតិមា លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា “ រហូត
មកដល់ពេលនេះ មិនទាន់មានសេចក្ដីជូនដំណឹងជាផ្លូវការណាមួយអំពីការចុះចេញពីតំណែងរបស់លោកអភិបាលរាជធានីទេ ដូច្នេះខ្ញុំមិនអាចពន្យល់បានទេ ទាល់តែខ្ញុំទទួលបានសេចក្ដីជូនដំណឹងជាផ្លូវការសិន”។
លោក អេហ្គាមី ម៉ាសាហ៊ីកូ (Egami Masahiko) តំណាងទីភ្នាក់ងារជប៉ុនសម្រាប់កិច្ចសហប្រតិបត្តិការអន្តរជាតិ ដែលបានផ្ដល់ជំនួយផ្នែកបច្ចេកទេស និងថវិកាសម្រាប់គម្រោងសាងសង់ហេដ្ឋារចនាសម្ព័ន្ធជាច្រើនចាប់តាំងពីឆ្នាំ១៩៩៣មក បានថ្លែងថា ស្ថានភាពនេះចេះតែអាក្រក់ទៅៗ ខណៈដែលរាជធានីភ្នំពេញកំពុងតែរីកធំឡើង។
លោក អេហ្គាមី បានមានប្រសាសន៍ថា “ គេត្រូវការពេលវេលា និងថវិកា ប៉ុន្តែ បញ្ហាទាំងនេះមិនអាចរង់ចាំយូរបានទេ ដោយសារតែមានស្ថានភាពមិនល្អខ្លាំងនៅក្នុងរាជធានីភ្នំពេញដូចជា បញ្ហាស្ទះចរាចរណ៍ ឬក៏កង្វះអគ្គិសនីប្រើប្រាស់ជាដើម”។
លោក សេង ចំរើន នាយករងក្រុមហ៊ុនសុិនទ្រី ជាក្រុមហ៊ុនប្រមូលសំរាម ដែលទទួលបានកិច្ចសន្យាជាមួយសាលារាជធានីភ្នំពេញ ដើម្បីប្រមូលសំរាម មានប្រសាសន៍ថា អាជ្ញាធររាជធានីគួរតែធ្វើកិច្ចការឲ្យបានច្រើនបន្ថែមទៀត ដើម្បីធ្វើយ៉ាងណាធានាឲ្យបានថា ប្រជាពលរដ្ឋមិនចោលសំរាមផ្ដេសផ្ដាស ហើយត្រូវអនុវត្តតាមការកំណត់នៃការប្រមូលសំរាម។
លោកបានបន្ថែមទៀតថា ប្រជាពលរដ្ឋត្រូវការការគាំទ្រពីសំណាក់សាលារាជធានីបន្ថែមទៀត អំពីកម្មវិធីធ្វើជីកំប៉ុស និងកែច្នៃសំរាម ដើម្បីទប់ទល់នឹងសំរាមកើនឡើង នៅក្នុងរាជធានីភ្នំពេញ។
លោក ចំរើន បានមានប្រសាសន៍ថា “ យើងមានផែនការទាំងអស់ ដើម្បីដោះស្រាយបញ្ហានេះ ក៏ប៉ុន្តែ រដ្ឋាភិបាលមិនទាន់គាំទ្រវិធានការនេះទេ ហើយវាមិនងាយស្រួលនោះទេ វាជាការវិនិយោគក្នុងទ្រង់ទ្រាយធំ”។ លោក នេត វន្ថា ប្រធានអង្គភាពពន្លត់អគ្គិភ័យរាជធានីភ្នំេពញ បានមានប្រសាសន៍ថា អង្គភាពពន្លត់អគ្គិភ័យរាជធានី ក៏កំពុងប្រឈមនឹងបញ្ហាពន្លត់អគ្គិភ័យ ដែលចេះតែកើនឡើងនៅក្នុងរាជធានីដែរ។
ចាប់តាំងពីដើមឆ្នាំ២០១៣រហូតមកដល់ពេលនេះ មានអគ្គិភ័យចំនួន៣៧ករណីបានកើតឡើង នៅក្នុងរាជធានីភ្នំពេញ ដោយបានសម្លាប់ជីវិតមនុស្សអស់ចំនួនបីនាក់ និងធ្វើឲ្យមនុស្សចំនួនប្រាំពីរនាក់រងរបួស។
លោក វន្ថា បានមានប្រសាសន៍ថា “ ការប្រើប្រាស់ឧបករណ៍អគ្គិសនី និងហ្គាសសម្រាប់ចម្អិនម្ហូបអាហារមានការកើនឡើង ហើយទាំងនេះ គឺជាកត្តាដែលបណ្ដាលឲ្យមានអគ្គិភ័យ។ បញ្ហាប្រឈមមួយចំនួនចំពោះការពន្លត់អគ្គិភ័យ គឺកង្វះការសហការរវាងប្រជាពលរដ្ឋ និងអាជ្ញាធរមូលដ្ឋាន ព្រមទាំងអ្នកធ្វើដំណើរតាមផ្លូវ ដែលមិនព្រមបើកផ្លូវឲ្យរថយន្តពន្លត់អគ្គិភ័យ”៕
ប្រែសម្រួលដោយ ស៊ា ស៊ុយឈាង
និង ហួង កុកទៀន