27 C
Phnom Penh

សាលាដំបូង​ខេត្ត​ព្រះសីហនុ សម្រេច​ដោះលែង​លោក សឺហ្គី ប៉ូលុន​ស្គី ឲ្យ​នៅ​ក្រៅឃុំបណ្តោះ​អាសន្ន

ដោយ ឌឹ ខេមបូឌា ដេលី

បទវិភាគ

មន្ត្រី​ម្នាក់​បាន​និយាយថា កាល​ពី​ម្សិល​មិញសាលាដំបូង​ខេត្ត​ព្រះ​សីហនុ បាន​ដោះលែង​​លោក សឺហ្គី ប៉ូលុនស្គី (Seigei Polonsky)​អតីត​មហាសេដ្ឋី​ជនជាតិ​រុស្ស៊ី ឲ្យ​នៅ​ក្រៅឃុំ​បណ្តោះ​អាសន្ន បន្ទាប់ពី​គាត់​បាន​ជាប់ឃុំ​រយៈពេល​ជាង​​បីខែ​រង់ចាំ​ការ​ជំនុំ​ជម្រះពី​បទ​បង្ក​របួសស្នាម​ដល់​កម្មករ​ទូក​នៅ​ក្នុង​ដែនទឹក​កម្ពុជា។

លោក ប៉ូលុនស្គី​ ត្រូ​វ​កងរាជ​អាវុធ​ហត្ថ​​ចាប់​ខ្លួន​ជាមួយ​ជន​ជាតិ​រុស្ស៊ី​ពីរនាក់​ទៀត​កាលពីថ្ងៃទី​៣០ ខែ​ធ្នូ ហើយ​បាន​រង​ការ​​ចោទ​​ប្រកាន់ថា គាត់​បានយកកាំបិត​គំរាម​​កម្មករ​ខ្មែរ​ប្រាំមួយនាក់នៅលើទូក ហើយ​បាន​បង្ខំ​ពួកគេ​ឲ្យ​លោត​ចេញ​ពីទូក។

ជនជាតិ​រុស្ស៊ី​ពីរនាក់​ទៀត ឈ្មោះ អាឡិច​សាន់ដឺ  ការ៉ាជីនស្គី (Alexander Karachinsky) និង កុនស្តង់ទីន បេកឡេ (Konstantin Baglay)​ ត្រូវ​បាន​ដោះលែង​ឲ្យ​នៅ​ក្រៅឃុំបណ្តោះ​អាសន្ន​កាល​ពីខែមុន។

លោក ហួត វិចិត្រ ព្រះ​រាជ​អាជ្ញារង​អម​សាលា​ដំបូង​ខេត្ត​បាន​មាន​ប្រសា​សន៍​ថា លោក ​ប៉ូលុនស្គី ត្រូ​វបាន​ដោះលែង​ហើយ ប៉ុន្តែ​ស្ថិត​នៅ​ក្រោម​ការឃ្លាំ​មើល​របស់​តុលា​ការ​​ពេល​រង់ចាំ​ការ​ជំនុំ​ជម្រះ​​។
លោក វិចិត្រ ​បដិសេធមិន​និយាយ​​​ពី​ចំនួន​​ទឹក​ប្រាក់​ដែលលោក ប៉ូលុនស្គី​ បាន​បង់​ដើម្បី ធានា​ដល់​​ការ​ដោះលែង​រូបគាត់​ឡើយ។

លោក តាន់ ណារ៉េត អនុប្រធាន​ពន្ធនា​គារ​​ខេត្ត​ កន្លែង​ដែលគេ​ឃុំ​ខ្លួន​លោក ប៉ូលុនស្គី នោះ បាន​អះអាង​ថា គាត់​ត្រូ​វបាន​ដោះ​លែង​​នៅ​ម៉ោង​ប្រហែល​១១ព្រឹកម្សិលមិញតាម​សេចក្តី​បង្គាប់របស់​តុលាការ។

កាលពី​មុន តុលាការនេះ​បាន​បដិ​សេធ​មិន​ព្រម​ដោះលែង​ លោក ប៉ូលុនស្គី​ ឲ្យ​នៅ​ក្រៅ​ឃុំ​បណ្តោះ​អាសន្នឡើយ ហើយគេ​នៅ​មិន​ទាន់​ច្បាស់​ថា​ ហេតុអ្វី​បាន​ជាគាត់​ត្រូវ​បាន​ដោះ​លែង​ភ្លាមៗ​យ៉ាងនេះ។​ជន​រង​គ្រោះ​​ទាំង​​​ប្រាំមួយ​នាក់​បាន​ដកពាក្យ​បណ្តឹង​របស់​ខ្លួន​​កាល​ពី​ខែ​មករា​ បន្ទាប់ពី​យល់ព្រម​ទទួល​យក​ប្រាក់​សំណង​ជំងឺ​ចិត្ត​សរុបចំនួន ២០.០០០​ដុល្លារ។

លោក ឡុង សាលុច មេធាវី​ការពារ​លោក​ប៉ូលុនស្គី ​មាន​ប្រសាសន៍ថា ​កាលពីម្សិល​មិញ លោក​ទទួលបាន​សេចក្តី​បង្គាប់ឲ្យ​ដោះ​លែង​លោក ប៉ូលុនស្គី ដែល​ចុះ​ហត្ថ​លេខា​ដោយ​លោកស្រី សរ​ លីណា ចៅក្រម​ស៊ើប​សួរ។

លោក អូសថេប ដូរ៉ូសិនកូ (Ostap Doro-​shenko)​ ​​ជា​ភាគ​ហ៊ុន​របស់​​​គ្រួសារ ដែល​កាន់កាប់​សណ្ឋាគារ​និង​ភោជនីយ​ដ្ឋាន​ផ្ទះ​ពស់ក្នុង​ក្រុង​ព្រះសីហនុ​ និង​ជា​សហការីរបស់​​លោក​ប៉ូលុនស្គី ​មាន​ប្រសាសន៍ថា លោក ប៉ូលុនស្គីបាន​ធ្វើ​ដំណើរទៅ​កោះ​ដែក​គោល​ភ្លាមៗ ជា​កោះដែលគាត់​បាន​ជួល​ជាមួយ​ក្រុម​​គ្រួសារ​របស់​លោក ដូរ៉ូសិនកូ។លោក​បន្ត​ថា“ គាត់​បាន​ជិះ​អូប័រ​ទៅ​កោះ​នោះ​ភ្លាមតែ​ម្តង” លោក ប៉ូលុនស្គី ដែលគេ​ធ្លាប់​គិត​ថា​ជា​មហា​សេដ្ឋី​​ក្នុង​នាម​ជា​ប្រធាន​ក្រុម​ហ៊ុន អចលនទ្រព្យ​ Mirax Group ប៉ុន្តែ​ក្រុមហ៊ុន​នេះ​មាន​បញ្ហា​ពេល​មាន​វិបត្តិ​ហិរញ្ញវត្ថុ​ឆ្នាំ​២០០៨​។​

​គាត់​បាន​ផ្លាស់​ទៅ​កោះ​ដែក​គោល​កាល​ពី​ឆ្នាំ​មុន​ជា​មួយសហវិនិ​យោគិន​ដែល​ខកចិត្ត​ នៅ​ក្នុង​ទីក្រុង​មូស្គូ និង​ទីក្រុងឡុងដ៍ដែល​នៅ​តែ​ទារ​បំណុល​មិន​ទាន់បាន​សង​ ហើយ​ក្រសួង​មហា​ផ្ទៃ​រុស្ស៊ីលើ​កឡើង​ថា ខ្លួន​កំពុង​ស៊ើប​អង្កេត​ក្រុមហ៊ុនក្រោយ​របស់​លោក ប៉ូលុនស្គីឈ្មោះ Potok (Flow)​ ពីបទ​ឆបោក។

ព័ត៌មាន​ស្តី​ពី​ការ​ដោះលែង​លោក ប៉ូលុនស្គី​កាលពីថ្ងៃម្សិលមិញ​បាន​ផ្សព្វផ្សាយ​យ៉ាង​លឿន នៅ​ពេល​ដែល​ព័ត៌មាន​នេះ​ត្រូវ​បាន​ប្រកាសតាម​បណ្តាញ​ទំនាក់​ទំនងសង្គម ហ្វេសប៊ុករបស់លោក អាឡិចសានដឺ ដូប្រូ​វីនស្គី (Alexander Dobrovinsky) មេធាវី​ជន​ជាតិ​រុស្ស៊ី ដែលបាន​ធ្វើ​ដំណើរ​មក​ប្រទេស​កម្ពុជា ​ដើម្បីជួយ​លោក ប៉ូលុនស្គី។

គេហទំព័រ សំឡេង​រុស្ស៊ី បាន​ដក​ស្រង់​សម្តី​លោក ដូប្រូវីនស្គី ដែល​និយាយ​ថា ការ​​ដោះ​លែង​​​លោក ប៉ូលុនស្គី ឲ្យ​នៅ​ក្រៅឃុំ​បណ្តោះ​​អាសន្ន​ត្រូវ​​ចំណាច​អស់​ទឹកប្រាក់​ចំនួន៥០.០០០ដុល្លារ​ ហើយ​ថា ​មាន​មនុស្ស​ពីរនាក់​​ជា​អ្នកធានា។

នៅ​ល្ងាចថ្ងៃដដែលនោះ លោក ដូប្រូវីន​ស្គី បាន​ថតរូប​ភូមិគ្រឹះ​ដ៏ប្រ​ណីត​មួយ​ប៉ុស្តិ៍​នៅ​លើ​កោះ​ដែកគោល ហើយ​មួយ​ប៉ុស្តិ៍​ទេៀត​​គឺ​ថតរូបគាត់​ផ្ទាល់​ និង​ថតរូបលោក ប៉ូលុនស្គី​ ឥតពាក់​អាវ​ឈរញញឹម​នៅ​ក្បែរនោះ​៕

    ប្រែសម្រួលដោយ សោម សារុន​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស