នគរបាលបានឲ្យដឹងកាលពីម្សិលមិញថា មន្ត្រីនគរបាលម្នាក់បានបាញ់សម្លាប់ស្ត្រីអាយុ២៨ឆ្នាំម្នាក់ ដែលមានកូនតូចៗពីរនាក់ ក្នុងចម្ងាយជិត កាលពីយប់ថ្ងៃអង្គារ នៅឯពិធីរៀបអាពាហ៍ពិពាហ៍មួយកន្លែង នៅក្នុងស្រុកចន្ទ្រា ខេត្តស្វាយរៀង។
លោក ពេញ វ៉ាន់ឌី អធិការនគរបាលស្រុកចន្ទ្រាបានមានប្រសាសន៍ថា បន្ទាប់ពីជម្លោះមួយបានផ្ទុះឡើងរវាងអ្នករាំពីរក្រុមនៅក្នុងពិធីមង្គលការក្នុងភូមិបុស ឃុំមេសរថ្ងកមន្ត្រីនគរបាលឃុំឈ្មោះ នុច ភក្ត្រា បានបាញ់ព្រមានពីរគ្រាប់ឡើងលើ ក្នុងបំណងធ្វើឲ្យអ្នកឈ្លោះគ្នាស្ងប់ស្ងាត់ មុនពេលប្រើកាំភ្លើងAK47 របស់ខ្លួនបាញ់ទៅលើឈ្មោះ រ័ត្ន សាម៉ក់ ។
លោក វ៉ាន់ឌី បានមានប្រសាសន៍ថា អ្នកស្រី រ័ត្ន សាម៉ក់ ដែលបានស្លាប់ចោលកូនតូចពីរនាក់ ម្នាក់អាយុ៧ឆ្នាំនិងម្នាក់ទៀតអាយុ២ឆ្នាំ ត្រូវបានបាញ់ចំសុដន់ខាងស្ដាំ និងស្លាប់នៅកន្លែងកើតហេតុ នៅម៉ោងប្រហែល១០យប់។
លោកបន្ដថា “ វាជាការធ្វេសប្រហែសរបស់នគរបាលរូបនេះ។ ខ្ញុំគិតថា គាត់ត្រូវតែមានទោស ប៉ុន្ដែយើងមិនដឹងថា តើ នុច ភក្ត្រា មានបំណងបាញ់ជនរងគ្រោះមែនឬអត់នោះទេ។ យើងកំពុងស៊ើបអង្កេតលម្អិតបន្ថែមទៀត”។
លោក វ៉ាន់ឌី បានបន្ថែមថា លោកមិនដឹងថា មានមន្ត្រីនគរបាលណាខ្លះនៅកន្លែងកើតហេតុ និងមិនដឹងថា តើអ្នកបាញ់ដែលមានឋានៈតូចតាចនោះ អាចគេចខ្លួនបានដោយរបៀបណាឡើយ។ លោកបានមានប្រសាសន៍ថា “ បន្ទាប់ពីគាត់បានបាញ់ជនរងគ្រោះរួចហើយ គាត់ក៏បានបាត់ខ្លួនពីស្រុកនោះ។ ខ្ញុំគិតថា ប្រហែលជាគាត់រត់គេចខ្លួន។ ប្រសិនបើគាត់មិនរត់ទេ យើងចាប់ខ្លួនគាត់ទៅហើយ។ ពេលនេះយើងកំពុងស្វែងរកគាត់”។
ប៉ុន្ដែផ្ទុយពីទស្សនេនះ អ្នកស្រី កើត សាម៉ន អាយុ៥០ឆ្នាំ ជាម្ដាយរបស់ រ័ត្ន សាម៉ក់ ដែលបានឃើញកូនស្រីរបស់គាត់ស្លាប់ផ្ទាល់ភ្នែក បាននិយាយពីដំណើររឿងដែល នុច ភក្ត្រា បានយកកាំភ្លើងទៅបាញ់ដល់ដើមទ្រូងកូនស្រីរបស់គាត់តែម្តង។
ដូចគ្នានឹងពិធីមង្គលការនៅតាមភូមិនានាដែរ ការរាំសប្បាយកាលពីយប់ថ្ងៃអង្គារបានទាក់ទាញមនុស្សម្នាមកពីភូមិជុំវិញនោះមកចូលរួម។ អ្នកស្រី សាម៉ន បានមានប្រសាសន៍ថា សពកូនស្រីរបស់គាត់ និងកូនស្រីរបស់គាត់ម្នាក់ទៀត ព្រមទាំងអ្នកជិតខាងម្នាក់ បានធ្វើដំណើរចម្ងាយ៥០០មែ៉ត្រពីផ្ទះរបស់ខ្លួននៅក្នុងភូមិចម្ការលើ ទៅកាន់ពិធីនោះ ពីព្រោះកូនប្រុសរបស់អ្នកស្រីនិងយុវជនមួយចំនួនទៀតដែលមកពីភូមិជាមួយ អ្នកស្រី ក៏នៅឯពិធីនោះដែរ។
អ្នកស្រថ្លងថា ពេលដែលពួកគាត់មកដល់ ក្មេងស្ទាវមួយក្រុមបានឈ្លោះប្រកែកគ្នារួចទៅហើយជាមួយនឹងក្មេងស្ទាវមួយក្រុមទៀតមកពីភូមិផ្សេង។ តន្ត្រីក៏បានបិទដែរ ចំណែកឯ មន្ត្រីនគរបាលឈ្មោះ នុច ភក្ត្រាបានប្រើកាំភ្លើងបាញ់ភ្ជុចដី ដើម្បីព្រមានក្រុមស្ទាវ។
អ្នកស្រី សាម៉ន មានប្រសាសន៍ថា កូនរបស់អ្នកស្រី និងមនុស្សប្រហែល២០ទៅ៣០នាក់មកពីភូមិជាមួយគ្នា បាននាំគ្នាចាកចេញពីពិធីនោះ ដោយដេើរបានចម្ងាយប្រហែល១០០ម៉ែត្រ ស្រាប់តែតន្ត្រីក៏បានចាប់ផ្ដើមម្ដងទៀត។ទាំងអស់គ្នាក៏បានស្រែកហ៊ោទះដៃ ដែលបានធ្វើឲ្យ នុច ភ័ក្ត្រា និងមន្ត្រីនគរបាលមិនស្គាល់ឈ្មោះម្នាក់ទៀតខឹង និងចាប់ផ្ដើមដេញតាមអ្នកភូមិឡូឡាទាំងនោះ។
អ្នកស្រី សាម៉ន ថ្លែងថា កូនស្រីពៅរបស់គាត់បានប្រឈមជាមួយនឹងមន្តរីនរគបាលទាំងពីរ ដោយលើកហេតុផលថា មនុស្សទាំងអស់នេះមិនបានធ្វើអ្វីខុសនោះទេ។ អ្នកស្រីបានអះអាងថា “ បន្ទាប់មក នុច ភក្ត្រា បានប្រើកាំភ្លើងភ្ជង់កូនស្រីរបស់គាត់ និងបានបាញ់នាងតែម្ដង។ ខ្ញុំតក់ស្លុតខ្លាំងណាស់ ព្រោះខ្ញុំបានឃើញនគរបាលបាញ់សម្លាប់កូនស្រីខ្ញុំផ្ទាល់ភ្នែក។ ឈាមរបស់កូនស្រីខ្ញុំបានខ្ទាតមកលើខ្លួនរបស់ខ្ញុំ ហើយកូនរបស់ខ្ញុំក៏ដួលទៅលើដីតែម្តង”៕
ប្រែសម្រួលដោយ ហម សុផាណ្ណា