ទីស្ដីការគណៈរដ្ឋមន្ត្រីកាលពីថ្ងៃសុក្របានអនុម័តសេចក្ដីព្រាងច្បាប់ដោយធ្វើវិសោធនកម្មលើមាត្រាចំនួនបី ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ដើម្បីធ្វើឲ្យការវិនិយោគនៅក្នុងប្រទេសកម្ពុជាមានលក្ខណៈប្រសើរ។
សេចក្ដីថ្លែងការណ៍មួយចេញផ្សាយដោយទីស្ដីការគណៈរដ្ឋមន្ត្រីមានខ្លឹមសារថា “ ដោយយល់ឃើញថា រូបភាពនៃការបំផ្លិចបំផ្លាញដែលបណ្ដាលមកពីការសម្អាតប្រាក់ និងហិរញ្ញប្បទានភេរវកម្មមានលក្ខណៈធ្ងន់ ដូច្នេះយើងបានរៀបចំសេចក្ដីព្រាងច្បាប់មួយដើម្បីពង្រឹងកិច្ចសហប្រតិបត្តិការជាមួយបណ្ដាប្រទេសនានាក្នុងតំបន់ និងពិភពលោក”។
ទីស្ដីការគណៈរដ្ឋមន្ត្រីលើកឡើងបន្ដថា “ សេចក្ដីព្រាងច្បាប់ថ្មីនេះនឹងបង្ហាញថា ប្រទេសកម្ពុជាគឺជាកន្លែងមានសុវត្ថិភាពសម្រាប់ការធ្វើវិនិយោគ។ ហើយច្បាប់ថ្មីនេះនឹងចូលជាធរមានជាបន្ទាន់”។ សេចក្ដីថ្លែងការណ៍នោះបានលើកឡើងថា សេចក្ដីព្រាងច្បាប់នេះរួមមានការធ្វើវិសោធនកម្មច្បាប់បច្ចុប្បន្នស្ដីពីនិយមន័យនៃពាក្យបច្ចេកទេស ការដាក់ទណ្ឌកម្មនិង “ ការឃាត់ទុក និងការរឹបអូសទ្រព្យសម្បត្តិ”។
កាលពីខែមុន អង្គភាពស៊ើបអង្កេតផ្នែកហិរញ្ញវត្ថុរបស់ធនាគារជាតិកម្ពុជា មន្ត្រីភ្នាក់ងារអនុវត្តច្បាប់ និងធនាគារឯកជន បានបើកវគ្គបណ្ដុះបណ្ដាលរយៈពេលមួយសប្ដាហ៍ ក្រោមការឧបត្ថម្ភរបស់ស្ថានទូតចក្រភពអង់គ្លេស ក្នុងគោលបំណងឲ្យអាជ្ញាធរកម្ពុជាទទួលបានចំណេះដឹងចាំបាច់ដើម្បីទប់ស្កាត់សកម្មភាពកេងប្រវ័ញ្ចលើបទប្បញ្ញត្ដិដែលនៅខ្សោយស្ដីអំពីបទឧក្រិដ្ឋហិរញ្ញវត្ថុរបស់ប្រទេសនេះ។
ទោះបីជាបានអនុម័តច្បាប់មួយកាលពីឆ្នាំ២០០៧ស្ដីពីការសម្អាតប្រាក់ និងហិរញ្ញប្បទានភេរវកម្ម ហើយក្នុងឆ្នាំ២០០៨បានបង្កើតអង្គភាពស៊ើបអង្កេតផ្នែកហិរញ្ញវត្ថុក៏ដោយ ក៏មានមនុស្សតិចតួចណាស់ត្រូវបានផ្ដន្ទាទោសពីបទសម្អាតប្រាក់នៅកម្ពុជា។
នៅក្នុងកិច្ចប្រជុំកាលពីថ្ងៃសុក្រនោះដែរ លោកនាយករដ្ឋមន្ត្រី ហ៊ុន សែន បានណែនាំឲ្យក្រសួងហិរញ្ញវត្ថុពិចារណាគិតគូររៀបចំបៀវត្សរ៍ជូនកងយោធពលខេមរភូមិន្ទនិងនគរបាលជាតិឲ្យបានសមស្របទៅនឹងឋានន្ដរស័ក្ដិ របស់ពួកគេ។ នៅពេលសួរថា តើនគរបាល និងមន្ត្រីយោធិន ទាំងនោះទទួលបានប្រាក់ខែមិនត្រឹមត្រូវឬយ៉ាងណា លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីបានមានប្រសាសន៍ថា នេះគ្រាន់តែជាបញ្ហារដ្ឋាភិបាលប៉ុណ្ណោះ។
លោក ផៃ ស៊ីផាន បានបកស្រាយថា នគរបាលនិងយោធិនមួយចំនួនត្រូវបានដំឡើងប្រាក់ខែឲ្យស្របតាមឋានន្ដរស័ក្ដិថ្មីរបស់ពួកគេ។ លោកមានប្រសាសន៍ថា “ បន្ទាប់មក យើងនឹងបើកសងវិញ ដូច្នេះពួកគេនឹងទទួលបានប្រាក់ខែបង្គ្រប់វិញ ដោយគិតចាប់តាំងពីថ្ងៃដំឡើងនោះមក”។
លោកនាយករដ្ឋមន្ត្រីក៏បានសម្ដែងមោទនភាពផងដែរចំពោះការកើនឡើងនៃការនាំអង្ករពីកម្ពុជាទៅទីផ្សារអន្ដរជាតិឆ្នាំនេះ ដោយមានប្រសាសន៍ថា គ្រាន់តែក្នុងមួយត្រីមាសដំបូង កម្ពុជានាំអង្ករចេញបានរហូតដល់៩៥.២២៨តោន។ លោក ហ៊ុន សែន បានមានប្រសាសន៍ថា ត្រឹមឆ្នាំ២០១៥ លោកសង្ឃឹមថា កម្ពុជានឹងអាចនាំអង្ករចេញចំនួន១លានតោន ក្នុងមួយឆ្នាំ៕
ប្រែសម្រួលដោយ ហម សុផាណ្ណា