អ្នកនយោបាយមកពីគណបក្សប្រឆាំង និងអ្នកគាំទ្ររាប់ពាន់នាក់ កាលពីម្សិលមិញ បានមកប្រមូលផ្តុំគ្នានៅក្នុងសមាជរបស់គណបក្សសង្គ្រោះជាតិលើកទី១ ដើម្បីដាក់ចេញនូវគោលនយោបាយរបស់បក្សសម្រាប់ការបោះឆ្នោតជាតិនៅពេលខាងមុខនេះ និងជ្រើសតាំង
មន្ត្រីនយោបាយសំខាន់ៗមួយចំនួនផងដែរ។
ថ្លែងនៅក្នុងសមាជនេះ ដែលធ្វើឡើងនៅទីវាលមួយដែលមានរោងចក្រកាត់ដេរនៅព័ទ្ធជំុវិញនៅជាយរាជធានីភ្នំពេញ លោកកឹម សុខា អនុប្រធានគណបក្សសង្គ្រោះជាតិ មានប្រសាសន៍ថា ស្ថិតក្រោមការដឹកនាំារបស់គណបក្សកាន់អំណាច គឺគណបក្សប្រជាជនកម្ពុជា ធនធានជាច្រើនរបស់ប្រទេសកម្ពុជា ត្រូវអ្នកមានទ្រព្យសម្បត្តិស្តុកស្តម្ភមួយចំនួនបំផ្លិចបំផ្លាញ ហើយលោកបានសន្យាថា នឹងយកដីធ្លីពីអ្នកជំនួញស្តុកស្តម្ភមកវិញ ប្រសិនបើគណបក្សសង្គ្រោះជាតិឈ្នះនៅក្នុងការបោះឆ្នោតជាតិនៅខែកក្កដា។
លោកថ្លែងថា “ ស្ថិតក្រោមការដឹកនាំរបស់គណបក្សប្រជាជនកម្ពុជា ប្រទេសកម្ពុជាបានទទួលរងការឈឺចាប់ ហើយធនធាន ដីស្រែ ព្រៃឈើបឹងបួ ត្រូវធ្លាក់ចូលក្នុងកណ្តាប់ដៃរបស់វិនិយោគិន និងឧកញ៉ាមួយក្រុមតូច”។ លោកបានមានប្រសាសន៍បន្តថា“ នៅពេលគណបក្សសង្គ្រោះជាតិ ឈ្នះឆ្នោត និងដឹកនាំរដ្ឋាភិបាល យើងនឹងត្រួតពិនិត្យដីសម្បទានសេដ្ឋកិច្ច ដែលប៉ះពាល់ដល់ជាតិនិងផលប្រយោជន៍របស់ប្រជាពលរដ្ឋឡើងវិញ។ យើងនឹងយក [ដីធ្លី] ប្រគល់ឲ្យប្រជាពលរដ្ឋខ្មែរវិញ”។
លោក កឹម សុខា ក៏លើកឡើងពីគោលនយោបាយប្រាំពីរចំណុច របស់គណបក្សសង្គ្រោះដែលបានបង្កើតឡើងពេលគណបក្ស សម រង្ស៊ី និងគណបក្សសិទ្ធិមនុស្ស រួមបញ្ចូលគ្នាកាលពីខែកក្កដាផងដែរ។ គោលនយោបាយនោះរួមមាន ការផ្តល់ប្រាក់ខែអប្បបរមា២៥០ដុល្លារ ដល់មន្ត្រីរាជការ និងកងកម្លាំងប្រដាប់អាវុធ ការផ្តល់ប្រាក់ខែជាទូទៅ១៥០ដុល្លារដល់កម្មករកម្មការិនីរោងចក្រកាត់ដេរ ការផ្តល់ប្រាក់ចំនួន១០ដុល្លារសម្រាប់ការថែទាំសុខភាពប្រចាំខែ ដល់មនុស្សចាស់ដែលមានអាយុចាប់ពី៦៥ឆ្នាំឡើងទៅ ផ្តល់សេវាថែទាំសុខភាព និងការអប់រំសម្រាប់ប្រជាពលរដ្ឋក្រីក្រដោយឥតគិតថ្លៃ និងធ្វើឲ្យតម្លៃប្រេង ជី អង្ករ និងអគ្គិសនីចុះថ្លៃ។
គណបក្សសង្គ្រោះជាតិ ក៏បានបោះឆ្នោតជ្រើសរើសអគ្គលេខាធិការគណបក្សព្រមទំាងគណៈកម្មាធិការនាយកដែលមានសមាជិកចំនួន១២៦រូប ដែលឥឡូវេនះរួមមានព្រះអង្គម្ចាស់ ស៊ីសុវត្ថិ ធម្មិកោ អតីតសមាជិកគណបក្សហ៊្វុនស៊ិនប៉ិច និងអតីតទីប្រឹក្សារបស់សម្តេចឪ នរោត្តម សីហនុ ផងដែរ ហើយព្រះអង្គជាបុគ្គលមួយរូបដែលតែងតែប្រឆាំងនឹងលោកនាយករដ្ឋមន្ត្រី ហ៊ុន សែន។
ដោយពន្យល់ថា គណបក្ស ហ៊្វុនស៊ិនប៉ិច ដែលគាំទ្រគណបក្សប្រជាជនកម្ពុជា តែងតែរងការរិះគន់ពីទស្សននយោបាយរបស់ព្រះអង្គនោះ ព្រះអង្គម្ចាស់ ស៊ីសុវត្ថិ ធម្មិកោ បានមានបន្ទូលថា គណបក្សសង្គ្រោះជាតិ គឺជាគណបក្សតែមួយគត់សម្រាប់ព្រះអង្គសម្ដែងក្តីព្រួយបារម្ភអំពីប្រទេសជាតិ។
ព្រះអង្គមានបន្ទូលថា “ ខ្ញុំគាំទ្រគំនិតនិងកម្មវិធីដូចដែលខ្ញុំតែងតែនិយាយ។ អ្វីដែលសំខាន់គឺការរួបរួមគ្នារបស់គណបក្សនិងបុគ្គលនីមួយៗ”។ កាលពីសប្តាហ៍មុន គណបក្សសិទ្ធិមនុស្ស ដែលនៅតែមានតំណាង នៅស្ថាប័នថ្នាក់ជាតិនិងថ្នាក់មូលដ្ឋាន បានតែងតាំងលោក សឺន ស៊ូប៊ែរ្ដិ៍ អតីតសមាជិកក្រុមប្រឹក្សាធម្មនុញ្ញកម្ពុជា និងជាកូនរបស់លោក សឺន សាន អតីតនាយករដ្ឋមន្ត្រី ជាប្រធានគណបក្សថ្មីរបស់គណបក្សនេះ។
ប៉ុន្តែយោងតាម លោក ឃឹម ឡៃ អ្នកស្រាវជ្រាវឯករាជ្យផ្នែកសង្គមនិងសេដ្ឋកិច្ចបានឲ្យដឹងថា នយោបាយរបស់បុគ្គលបានធ្វើឲ្យគណបក្សប្រឆាំងទទួលបរាជ័យនៅក្នុងការបោះឆ្នោតលើកមុនៗ ហើយទោះបីជាមានការចូលរួមពីអ្នកនយោបាយលេចធ្លោមួយចំនួនក៏ដោយ វាគឺជាគោលនយោបាយច្បាស់លាស់និងគួរឲ្យជឿទុកចិត្តដើម្បីទាក់ទាញឲ្យមានការគាំទ្រច្រើនចំពោះគណបក្សសង្គ្រោះជាតិ។
លោកបានលើកឡើងថា “ ខ្ញុំបានឃើញថាឆ្លងតាមរយៈការបោះឆ្នោតជាតិចំនួនបួនលើកកន្លងមក ប្រជាពលរដ្ឋគិតថា បុគ្គលគឺជាការសំខាន់។ ប៉ុន្តែឥឡូវនេះ យើងទាំងអស់គ្នាដែលកំពុងធ្វើការស្ទាបស្ទង់មតិលើអ្នកបោះឆ្នោតយល់ឃើញថា ការគាំទ្រមិនមែនសំដៅលើតែប្រជាជននោះទេ គឺសំដៅលើយុទ្ធសាស្រ្តថ្មីរបស់អ្នកនយាយផងដែរ”។
លោក ឃឹម ឡៃ មានប្រសាសន៍ថា ការសន្យារបស់គណបក្សសង្គ្រោះជាតិដែលថានឹងដំឡើងប្រាក់ខែ និងធ្វើឲ្យតម្លៃទំនិញផ្សេងៗចុះថ្លៃនោះ គឺវាពិបាកនឹងទទួលបានជោគជ័យខ្លាំងណាស់ ប៉ុន្តែអាចទៅរួច ប្រសិនបើរដ្ឋាភិបាលដំឡើងពន្ធបន្ថែមនោះ។
លោកបានថ្លែងថា “ ប្រសិនបើពួកគេគិតអំពីការចំណាយឲ្យមានប្រសិទ្ធភាព ឆក់យកប្រយោជន៍ពីការប្រមូលពន្ធដាក់មនុស្សឲ្យចំជំនាញ ហើយជំរុញឲ្យមានការធ្វើវិមជ្ឈការនោះ ពួកគេអាចធ្វើទៅបាន”។ ទោះជាយ៉ាងណា លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី មានប្រសាសន៍ថាយុទ្ធនាការឃោសនាគោលនយោបាយរបស់គណបក្សសង្គ្រោះជាតិ ដែលថា នឹងលើកកម្ពស់អ្នកក្រនោះ គឺមិនដែលធ្វើតាមការសន្យាឡើយ។
លោកថ្លែងថា “ នេះគ្រាន់តែជាយុទ្ធនាការឃោសនាដើម្បីទាក់ទាញការចាប់អារម្មណ៍ពីប្រជាពលរដ្ឋប៉ុណ្ណោះ។វាមិនមែនជាការតាំងចិត្តពិតប្រាកដនោះទេ។ លោក សម រង្ស៊ី ប្រធានគណបក្សសង្គ្រោះជាតិ បានថ្លែងមកកាន់សមាជនេះតាមរយៈវីដេអូខន់ហ្វឺរិនពីទីក្រុងប៉ារីស ដែលលោកបាននិរទេសខ្លួននោះ អំពីអ្វីដែលលោកហៅថា ជាការចោទប្រកាន់ពាក់ព័ន្ធនឹងរឿងនយោបាយគឺការចោទប្រកាន់ពីបទផ្តល់ព័ត៌មានមិនពិត និងពីបទញុះញង់។ ដោយសារការផ្តន្ទាទោសលោក លោក សម រង្ស៊ី ត្រូវបានរារាំងមិនឲ្យចូលរួមក្នុងការបោះឆ្នោតជាតិនៅខែកក្កដាឡើយ ប៉ុន្តែគណបក្សសង្គ្រោះជាតិនៅតែដាក់លោកជាបេក្ខជននាយករដ្ឋមន្ត្រី។
លោក សម រង្ស៊ី បានមានប្រសាសន៍ថា “ គណបក្សសង្គ្រោះជាតិ នឹងដឹកនាំការតស៊ូដើម្បីប្រទេសកម្ពុជា។ យើងត្រូវតែរួបរួមគ្នាដើម្បីផ្លាស់ប្តូរមេដឹកនាំសព្វថ្ងៃដែលបម្រើប្រទេសវៀតណាម”។ នៅពេល លោក សម រង្ស៊ី មានប្រសាសន៍ថា ការបោះឆ្នោតឆ្នាំនេះ នឹងមិនស្របច្បាប់ បើគ្មានការចូលរួមរបស់លោកនោះ លោក ឡៅ ម៉ុងហៃ អ្នកវិភាគនយោបាយឯករាជ្យបានមានប្រសាសន៍ថា ការនិរទេសខ្លួនរបស់លោក សម រង្ស៊ី បានបង្ខំឲ្យ គណបក្សប្រឆាំង កែប្រែរចនាសម្ព័ន្ធថ្មី។ លោកថ្លែងថា “ ចំពោះខ្ញុំ [អវត្តមានរបស់លោក សម រង្ស៊ី] ហាក់បីដូចជាការលំបាកមុនស្រណុកក្រោយអ៊ីចឹង”។
លោកបានមានប្រសាសន៍ ដោយដកស្រង់គោលនយោបាយដ៏ច្បាស់លាស់របស់គណបក្សប្រឆាំងអំពីប្រាក់ខែ ការផ្តល់សេវាកម្មមូលដ្ឋាន និងកិច្ចខិតខំប្រឹងប្រែងដើម្បីឲ្យមានតំណាងបន្ថែមនៅតាមទីជនបទថា “ នៅក្នុងប្រទេស អ្នករួមការងាររបស់លោក សម រង្ស៊ីអាចរៀបចំខ្លួនឯងបានល្អប្រសើរច្រើន”៕
ប្រែសម្រួលដោយ ស៊ា ស៊ុយឈាង