ជនជាតិអង់គ្លេសអតីតប្រធានក្រុមហ៊ុនជីវឥន្ធនៈមានបញ្ហា ដែលជាប់ឃុំនៅពន្ធនាគារព្រៃសក្នុងរាជធានីភ្នំពេញ ពីបទប្រើប្រាស់ឯកសារក្លែងក្លាយនោះ បានអះអាងថា គាត់គឺជាជនរងគ្រោះនៅក្នុងរឿងក្តី ដែលគាត់កំពុងរង់ចាំសវនាការនេះ។
លោក ក្រេក ហ្វ្រាយ៉េត (Gregg Fryett) ត្រូវបានចាប់ខ្លួននៅរាជធានីភ្នំពេញ កាលពីថ្ងៃទី២៣ ខែមីនា និងត្រូវបានសាលាដំបូងខេត្តបន្ទាយមានជ័យចោទប្រកាន់ បន្ទាប់ពីការសើុបអង្កេតរបស់អង្គភាពប្រឆាំងអំពើពុករលួយ។ តុលាការបានបង្គាប់ឲ្យបង្កកទ្រព្យសម្បតិ្តរបស់ក្រុមហ៊ុន Sustainable Agro Energy របស់លោក ក្រេក ហ្វ្រាយ៉េត ដែលមានមូលដ្ឋាននៅក្រុងឡុងដ៍ កាលពីខែកុម្ភៈ ឆ្នាំ២០១២
ខណៈការិយាល័យប្រឆាំងការក្លែងបន្លំកម្រិតធ្ងន់របស់ប្រទេសអង់គ្លេស បានបើកការសើុបអង្កេតលើគម្រោងជាប់ចោទរបស់លោក ក្រេក ហ្វ្រាយ៉េត និងនាយកផ្សេងទៀត។
លោក ក្រេក ហ្វ្រាយ៉េត និងនិយោជិតក្រុមហ៊ុនក្នុងស្រុករបស់គាត់ឈ្មោះ International Green Energy ដែលមានលោក អឿម សំណាង
ជាប្រធាន និងលោក សឿន ដេននី ជាមេការទទួលបន្ទុកគ្រឿងចក្រ ត្រូវបានចោទប្រកាន់ពីបទក្លែងបន្លំឯកសារសាធារណៈ និងការប្រើ
ប្រាស់ឯកសារក្លែងបន្លំ។ការចោទប្រកាន់ទាំងនេះ ពាក់ព័ន្ធទៅនឹងកិច្ចសន្យាមានទឹកប្រាក់រាប់លានដុល្លារ ដែលជាប់គាំងដើម្បីទិញដីសម្បទានសេដ្ឋកិច្ចពីរកន្លែងនៅក្នុងខេត្តបន្ទាយមានជ័យ។
នៅក្នុងសេចក្ដីថ្លែងការណ៍មួយកាលពីថ្ងៃសុក្រ ដែលធ្វើឡើងពីពន្ធនាគារព្រៃសតាមរយៈក្រុមហ៊ុនច្បាប់ Bark & Co ដែលមានមូលដ្ឋាននៅក្រុងឡុងដ៍នោះ លោក ក្រេក ហ្វ្រាយ៉េត បាននិយាយថា មុនពេលមកដល់ប្រទេសកម្ពុជាកាលពីខែមុន អង្គភាពប្រឆាំងអំពើពុករលួយ និងចៅក្រមជំនុំជម្រះ “ បានផ្ដល់ការធានាដ៏ច្បាស់លាស់មួយដល់រូបគាត់ថា គាត់ត្រូវបានចាត់ទុកជាជនរងគ្រោះ និងទទួលបានការការពារដោយសុវត្តិភាព”។
“ ខ្ញុំមានជំនឿថា ទាំងលោក អឿម សំណាងនិងលោក សឿន ដេននី យើងត្រូវបានឃុំខ្លួនបន្ថែមទៀតដើម្បីធ្វើការសើុបអង្កេតឲ្យច្បាស់ថា យើងជាភាគីជនរងគ្រោះ និងជាភាគីទទួលការបង់ខាត។ ប៉ុន្តែ ខ្ញុំយល់ថា យើងជាមនុស្សគ្មានសំណាង ដែលយើងត្រូវបានឃុំខ្លួន។មានប្រព័ន្ធរដ្ឋបាល និងយុត្តិធម៌នៅកម្ពុជា ដែលខ្ញុំគោរព”។
ការចោទប្រកាន់ពីបទក្លែងបន្លំឯកសារនេះពាក់ព័ន្ធនឹងកិច្ចសន្យាទិញដីនៅស្រុកស្វាយចេកសម្រាប់ធ្វើចម្ការល្ហុងខ្វង។លោក ក្រេក ហ្វ្រាយ៉េត បានអះអាងថា ប្រាក់រាប់លានដុល្លារ ត្រូវបានប្រគល់ឲ្យលោកឧត្ដមសេនីយ៍កងយោធពលខេមរភូមិន្ទ ហាន់
ចំរ៉ុង ក្នុងនាមជាភ្នាក់ងារម្នាក់ ដើម្បីទិញដីពីក្រុមហ៊ុនរបស់លោកស្រី ម៉ៅ ម៉ាឡៃ ភរិយា របស់លោក កែ គឹមយ៉ាន អតីតអគ្គមេបញ្ជាការកងយោធពលខេមរភូមិន្ទ។ ប៉ុន្តែ ដីនោះមិនដែលត្រូវបានផ្ទេរមកឲ្យក្រុមហ៊ុនរបស់លោក ក្រេក ហ្វ្រាយ៉េត នោះទេ។
លោក ក្រេក ហ្វ្រាយ៉េត បានសរសេរថា “ ខ្ញុំសូមបញ្ជាក់ម្ដងទៀតថា ក្រុមហ៊ុន Sustainable Agro Energy និងក្រុមហ៊ុន International Green Energy នៅពេលនោះបានធ្វើកិច្ចសន្យាច្បាស់លាស់សម្រាប់ការទិញសិទិ្ធកាន់កាប់ដីទំហំ៦.០៧៩ហិកតានៅស្រុកស្វាយចេក”។ គេនៅមិនទាន់ច្បាស់ថា ការចោទប្រកាន់លោក ក្រេក ហ្វ្រាយ៉េត មានការពាក់ព័ន្ធទៅនឹងការសើុបអង្កេតដែលមិនទាន់ចប់របស់ប្រទេសអង់គ្លេសទៅលើក្រុមហ៊ុនរបស់គាត់យ៉ាងណានោះទេ។
ការិយាល័យប្រឆាំងការក្លែងបន្លំកម្រិតធ្ងន់ បានចោទថា ក្រុមហ៊ុន របស់លោក ក្រេកហ្វ្រាយ៉េត បានបន្តស្វែងរកវិនិយោគិនថ្មី បន្ទាប់ពីក្រុមហ៊ុននេះទំនងជាមិនមានលទ្ធភាពសងប្រាក់ជាង៥៤លានដុល្លារ ដែលអ្នកចូលនិវត្តន៍នៅប្រទេសអង់គ្លេស បានវិនិយោគ
នៅក្នុងក្រុមហ៊ុន Sustainable Agro Energy។
នៅក្នុងសេចក្ដីថ្លែងការណ៍កាលពីថ្ងៃសុក្រ លោក ក្រេក ហ្វ្រាយ៉េត លើកឡើងថាគាត់ “ មានជំនឿថា ការចោទប្រកាន់របស់ការិយាល័យប្រឆាំងការក្លែងបន្លំកម្រិតធ្ងន់នោះមិនត្រឹមត្រូវទេ”។
លោកបានឲ្យដឹងទៀតថា “ ខ្ញុំសង្ឃឹមថា បញ្ហា ដែលមិនទាន់បានដោះស្រាយ ទាំងអស់អាចត្រូវបានបំភ្លឺនៅពេលឆាប់ៗនេះ ហើយយើងអាចបញ្ជាក់ថា ដីស្របច្បាប់ និងគោលជំហរវិនិយោគសម្រាប់អតិថិជន ព្រមទាំងម្ចាស់បំណុល គឺដូចតែគ្នា”៕
ប្រែសម្រួលដោយ ស៊ុំ សុខភុំ