យោងតាមតួលេខចេញពីធនាគារជាតិនៃកម្ពុជា បានបង្ហាញថា អត្រាប្រាក់កម្ចីឥតដំណើរការនៅក្នុងប្រទេសកម្ពុជា ស្ថិតនៅកម្រិតថេរ នៅដំណាច់ខែកុម្ភៈកន្លងទៅនេះ ទោះបីជាសកម្មភាពបញ្ចេញប្រាក់កម្ចីកើនឡើងលឿន និងមានការព្រមានពីអង្គការមូលនិធិរូបិយវត្ថុអន្តរជាតិ (International Monetary Fund, IMF) ថា កម្រិតបញ្ចេញប្រាក់កម្ចីនេះ អាចនាំឲ្យអតិផរណាកើនឡើង។
អំឡុងពេលវិស័យសំណង់មានសន្ទុះកំណើន ហើយគម្រោងវិនិយោគក្នុងវិស័យកសិកម្មកើនឡើងនោះ បរិមាណឥណទានដែលធនាគារនានាក្នុងប្រទេសកម្ពុជាបញ្ចេញ បានកើនឡើងដល់៥,៨៩ពាន់លានដុល្លារក្នុងឆ្នាំ២០១២ ឬក៏កើនឡើង៣៤,២ភាគរយ បើធៀបនឹងអត្រាកំណើនកាលពីឆ្នាំមុន។
លោកស្រី ងួន សុខា អគ្គនាយិកាធនាគារជាតិនៃកម្ពុជា បានមានប្រសាសន៍ថា គិតត្រឹមខែកុម្ភៈឆ្នាំនេះ អត្រាប្រាក់កម្ចីឥតដំណើរការនៅក្នុងធនាគារទាំងឡាយ ដែកំពុងតែធ្វើសកម្មភាព នៅក្នុងប្រទេសកម្ពុជា មានតែ២,៥ភាគរយប៉ុណ្ណោះ បើធៀបនឹងអត្រា២,៥ភាគរយ កាលពីខែធ្នូ ឆ្នាំ២០១២។ លោកស្រីបានមានប្រសាសន៍ថា”ប្រសិនបើមិនមានអ្វីកើតឡើងនៅក្រៅទេ ដូចជា វិបត្តិជាដើម នោះខ្ញុំយល់ថា ពួកគេ [ធនាគារទាំងនោះ] នឹងមាននិន្នាការកែលម្អអត្រាឥណទានឥតដំណើរការនេះ”។
លោក ហ្គ្រេន នុកឃី (Grant Knuckey) ប្រធាននាយកប្រតិបត្តិធនាគារ អេអិនហ្សិត រ៉ូយ៉ាល់ បានថ្លែងថា កំណើនឥណទាន មិនមែនមានន័យសំខាន់ថា ប្រាក់កម្ចីឥតដំណើរការនឹងកើនឡើងទេ។ លោកបានថ្លែងថា “ ប្រហែលជាត្រូវមានការពង្រីកសេវាប្រាក់កម្ចីបូកនឹងករណីធ្លាក់ចុះនៃម៉ាក្រូសេដ្ឋកិច្ចតាមរូបភាពណាមួយ” នោះនឹងឃើញបរិមាណឥណទានឥតដំណើរការ កើនឡើងគួរឲ្យកត់សម្គាល់”៕
ប្រែសម្រួលដោយ កង សុធា