27 C
Phnom Penh

អឺរ៉ុបនឹងក្លាយ​ជា​ទីផ្សារ​នាំ​ចេញ​​ធំ​បំផុត​របស់​កម្ពុជា យ៉ាង​ឆាប់​រហ័ស

ដោយ ឌឹ ខេមបូឌា ដេលី

បទវិភាគ

យោងតា​ម​តួលេខថ្មីបំផុតរបស់​សហ​ភាព​អឺរ៉ុប​ ដែលនិយាយអំពី​ពាណិជ្ជ​កម្ម​ ​បង្ហាញ​ថា ការ​នាំ​ចេញ​របស់ប្រទេស​កម្ពុជា ទៅកាន់​បណ្តា​ប្រទេសជា​សមាជិក​សហ​ភាព​អឺរ៉ុប ​(EU) បាន​កើន​ឡើង​ដល់​២,៣២​ពាន់​លាន​ដុល្លារ​ក្នុង​ឆ្នាំ២០១២ គឺ​កើន​ឡើង​២៣​ភាគ​រយ​ បើ​ប្រៀប​ធៀប​ទៅ​នឹងឆ្នាំ២០១១។

តួលេខ​ដែលការិយាល័យ​ពាណិជ្ជកម្ម​របស់​គណៈ​កម្ម​ការ​អឺរ៉ុ​ប​ចេញផ្សាយជា​សាធារណៈ​នៅក្នុង​សប្តាហ៍​នេះ​ បានបង្ហាញ​ពី​​តួនាទី​ដ៏​មានសារៈសំខាន់​​របស់​តំបន់​នេះក្នុងនាម​ជា​ដៃ​គូ​ពាណិជ្ជ​កម្មជាមួយប្រទេស​កម្ពុជាដោយ​សារតែ​គម្រោង​ពាណិជ្ជ​កម្ម​របស់​សហ​ភាព​អឺរ៉ុប​ដែល​មាន​ឈ្មោះ​ថា ទំនិញ​គ្រប់​យ៉ាង​លើកលែង​តែ​អាវុធ (Everything But Arms) ដែល​អនុញ្ញាត​ឲ្យប្រទេស​កម្ពុជា និង​បណ្តា​ប្រទេស​កំពុង​អភិវឌ្ឍន៍​រាប់​សិប​ទៀត​
អាច​នាំ​ចេញ​ទំនិញ​ភាគ​ច្រើន​ទៅ​កាន់​បណ្តា​ប្រទេស​ជា​សមា​ជិក​របស់សហភាពអឺរ៉ុប ដោយ មិន​ចាំ​បាច់​បង់​ពន្ធ។

យោងតាម​តួលេខ​នេះ​ បង្ហាញ​ថា ការ​នាំ​ចេញ​ទៅ​កាន់​សហ​ភាព​អឺរ៉ុប​បាន​កើន​ឡើង​រហូត​ដល់ទៅ​ទ្វេដង​ បើ​ប្រៀប​ធៀប​ទៅ​នឹង​ការ​នាំ​ចេញ​ទៅ​កាន់​បណ្តា​ប្រទេស​ជា​ដៃ​គូ​ពាណិជ្ជកម្ម​ផ្សេងៗ​ទៀត​របស់កម្ពុជា នា​ឆ្នាំ​២០១២។ ហើយ​សេដ្ឋ​វិទូជាច្រើន និយាយ​ថាវា​គ្មាន​អ្វី​គួរ​ឲ្យ​ភ្ញាក់​ផ្អើល​នោះទេ ប្រសិ​ន​បើ​ការ​នាំ​ចេញ​ទៅ​សហភាព​អឺរ៉ុប​ក្នុង​​ពេល​ឆាប់ៗ
នេះ​​មាន​ចំនួន​រហូត​ដល់​ទៅ​ពាក់​កណ្តាល​នៃ​ការ​នាំ​ចេញ​ទាំង​អស់​របស់​កម្ពុជា ដែល​ផលិត​
ផលភាគច្រើនជា​សម្លៀក​បំពាក់​។

យោងតាមតួលេខ​ពី​នាយក​ដ្ឋាន​កាំកុង​ត្រូលរបស់ក្រសួង​ពាណិជ្ជ​កម្ម​បានបង្ហាញ​ថា ក្នុង​ចំណោម​ទំនិញ​​មាន​តម្លៃ​ជា​ទឹក​ប្រាក់​៥,៤៩​ពាន់​លាន​ដុល្លារ​ដែល​កម្ពុជាបាន​នាំ​ចេញ​​ កាល​ពី​ឆ្នាំ​មុន ៤២ភាគ​រយ​ នៃការនាំ​ចេញ​ទៅ​កាន់សហ​ភាព​អឺរ៉ុប គឺកើន​ឡើង​ពី​៣៥​ភាគ​រយ​ក្នុង​ឆ្នាំ២០១១។ ចំណែក​​ការ​​​នាំ​ចេញផ្សេង​ទៀត​​​របស់​​ប្រទេស​កម្ពុជា ភាគ​ច្រើនទៅ​កាន់សហ​រដ្ឋ​អាមេរិក ​ហើយ​មួយ​ចំនួន​តូច​ទៅ​កាន់​ប្រទេស​ជប៉ុន ចិន កូរ៉េ​ខាង​ត្បូង និង​បណ្តា​ប្រទេស​មួយ​ចំនួន​ទៀត​នៅ​ក្នុងតំបន់​អាស៊ី​អាគ្នេយ៍។

លោក ដួង ពលំ សេដ្ឋ​វិទូ​​ជាន់​ខ្ពស់​​​របស់​ធនាគារ​អភិវឌ្ឍ៍​អាស៊ី​ប្រចាំ​ប្រទេស​កម្ពុជា បាន​មាន​ប្រ​សាសន៍​ថា កំណើនដ៏​លឿន​នៅ​ក្នុង​ការ​នាំ​ចេញ​ទៅ​កាន់​សហ​ភាព​អឺរ៉ុប​ នឹង​បន្ត​ជួយ​ដល់​សេដ្ឋ​កិច្ចរបស់​ប្រទេស​កម្ពុជា​។

លោក​បាន​មាន​ប្រ​សាស​ន៍​ថា“ ពេល​ណា​មាន​​ការ​គិតគូរ​អំពី​ការ​បង្កើតឱកាស​​ការងារ​ ដោយសារតម្រូវការនៃ​ការ​នាំ​ចេញមាន​កាន់តែច្រើន ដោយសារ​ការរីក​ចម្រើន​ផ្នែក​សេដ្ឋ​កិច្ច​ នឹងជួយ​បង្កើត​ការងារ​​​កាន់​តែ​ច្រើន​សម្រាប់ស្រូប​យក​កម្លាំង​ពលកម្មរបស់​កម្ពុជា”។ លោក​​បន្ថែម​ថា ព្រោះតែ​ទី​ផ្សារ​ក្នុង​ស្រុក​​របស់​ប្រទេស​កម្ពុជា នៅមាន​ទំហំ​តូច “ ការ​នាំ​ចេញ​​ កំពុងដើរ​តួ​នាទី​យ៉ាង​សំខាន់​ក្នុង​ការ​ជួយជំរុញ​កំណើន​សេដ្ឋកិច្ច​របស់​ប្រទេស​កម្ពុជា”។

ផលិតផលសម្លៀក​បំពាក់​ និង​ស្បែក​ជើង​​ គឺជាផលិតផលចម្បងគេ សម្រាប់​បម្រើ​ដល់​ការ​នាំ​ចេញ​របស់​ប្រទេស​កម្ពុជា ទៅ​កាន់​ទីផ្សារក្នុងសហ​ភាព​អឺរ៉ុប ​កាល​ពី​ឆ្នាំ​មុន។ ប៉ុន្តែ​ ការ​នាំ​ចេញនូវ​ផលិត​ផលផ្នែក​​ឧស្សា​ហកម្ម មានដូចជា​គ្រឿង​បន្លាស់​រថ​យន្ត​ ក៏បាន​​កើន​ឡើង​៦​ភាគ​រយ​ មានតម្លៃជា​ទឹកប្រាក់​រហូតដល់​២២៥​លាន​ដុល្លារ ដែល​ជា​ការ​កើន​ឡើង​ខ្លាំង​បំផុត។

ថ្វី​បើ​ពេល​នេះសេដ្ឋ​កិច្ចរបស់​បណ្តា​ក្នុងតំបន់អឺរ៉ុបភាគ​ច្រើន​បានងើប​ឡើងវិញ​ហើយ​ក៏​ដោយ ក៏​លោក ដួង ពលំ បាន​រំពឹង​ថា ការ​នាំ​ចេញ​របស់​ប្រទេស​កម្ពុជា ទៅ​កាន់​ទីផ្សារ​សហ​ភាព​អឺរ៉ុប ​នឹង​បន្ត​កើន​ឡើង​នៅ​ពេល​​សេដ្ឋកិច្ចនៅ​ក្នុង​តំបន់​នេះ​ចាប់ផ្តើម​ដំណើរ ការឡើងវិញ។

លោកបាន​​​មាន​ប្រ​សាសន៍​ថា “ កំណើន​ពាណិជ្ជ​កម្ម​រវាងប្រទេស​កម្ពុជា និង​សហ​ភាព​
​​អឺរ៉ុបត្រូវ​បាន​រំពឹង​ថា ​នឹង​បន្ត​កើន​ឡើង ខណៈ​ពេល​ដែល​វិបត្តិសេដ្ឋកិច្ច​​របស់​សហ​ភាព​អឺរ៉ុបបានធូរស្រាល​ឡើងវិញ​។ កំណើន​សេដ្ឋកិច្ច​នៅ​ក្នុង​តំបន់សហ​ភាព​អឺរ៉ុប​ទំនង​ជា​នៅទ្រឹងក្នុង​ឆ្នាំ​នេះ​ ប៉ុន្តែមាន​ការ​រំពឹង​ថា ​នឹង​មាន​ការ​ធូរ​ស្រាល​នៅ​ក្នុង​ឆ្នាំ​២០១៤”។
តែ​ទោះ​ជា​យ៉ាង​ណា  គម្រោង​ពា​ណិជ្ជកម្ម​ ​មានឈ្មោះថា ទំនិញ​គ្រប់​យ៉ាង​លើក​លែង​​​តែ​​
អាវុធ​ បាន​ទទួល​រង​ការ​រិះ​គន់​នៅ​​កម្ពុជា។

អង្គ​ការ​ការពារសិទ្ធិ​មនុស្ស​មួូយ​ចំនួន​​បាន​បន្ទោស​គម្រោង​នេះ​ថា ផ្តល់ឧបត្ថម្ភ​ធន​ដ៏​មាន​
​ប្រសិទ្ធ​ភាព​ដល់​ពាណិជ្ជ​កម្ម​របស់​ក្រុម​ហ៊ុន​ពីរ​បី​​ ដែល​បច្ចុប្បន្ន​​កំពុងនាំ​ចេញ​ផលិត​ផល​របស់​​​ខ្លួន​ទៅ​កាន់​ទីផ្សារ​សហ​ភាព​អឺរ៉ុប តាម​រយៈការ​ធ្វើ​ស្រែ​លើ​ខ្នង​រាស្ត្រ​​រាប់​រយ​នាក់​ ដែល​ត្រូវ​គេ​បណ្តេញ​ចេញ​ទាំង​បង្ខិត​បង្ខំ​ និង​ដោយ​ហិង្សា។

កសិករ​ទាំង​នោះ​មាន​កំហឹង​យ៉ាង​ខ្លាំង​​ចំពោះ​ចម្ការ​អំពៅពីរកន្លែង​នៅ​ក្នុង​ខេត្ត​កោះ​កុង ដែលកំពុងទទួល​រង​ការ​ចោទប្រ​កាន់​ថា ​​​បាន​បណ្តេញប្រ​ជា​ពល​រដ្ឋ​រាប់​រយ​គ្រួសារ​ចេញ​ពី​ដីស្រែ​ចម្ការ​​ និង​ផ្ទះ​សំបែង​របស់​ខ្លួន រហូតដល់​មាន​ការ​ផ្ទុះ​អាវុធ​យ៉ាង​ខ្លាំងទៀតផង​។

ចម្ការអំពៅ ដែល​ជាកម្មសិទ្ធិ​របស់​​ក្រុម​ហ៊ុន​​ថៃ រកសុីចូលគ្នាជាមួយ​ក្រុម​ហ៊ុន​ចិន​តៃ​វ៉ាន់  បាន​នាំ​ចេញ​ស្ករស​ដែល​មាន​ទំហំ​ទឹក​ប្រាក់​ជិត​១៣​លាន​ដុល្លារ​ទៅ​កាន់​ទីផ្សារសហ​ភាព​អឺរ៉ុប​កាល​ពី​ឆ្នាំ​មុន តាម​រយៈ​កម្មវិធីអនុគ្រោះ​ពន្ធ​ក្នុង​គម្រោង​ពាណិជ្ជ​កម្ម ទំនិញ​គ្រប់​យ៉ាង​លើកលែង​តែ​អាវុធ ។

គ្រួសារ​ប្រ​ជា​ពល​រដ្ឋ ​ដែល​រង​ផល​ប៉ះ​ពាល់​​ចង់​ឲ្យ​សហ​ភាព​អឺរ៉ុប លុបចោលការ​អនុញ្ញាត​
ឲ្យនាំ​ស្ករស​តាមរយៈ​គម្រោង​ ទំនិញ​​គ្រប់​​យ៉ាង​លើកលែង​តែ​អាវុធ។ ក្នុង​សេច​ក្តី​សម្រេច​មួយ​ ដែល​ត្រូវ​បាន​អនុ​ម័​តកាល​ពី​ឆ្នាំ​មុន សភា​អឺរ៉ុបបាន​ស្នើ​ឲ្យ​លោក ការ៉េល ដឺហ្គូច (Karel de Gucht) ឧត្តម​ស្នង​ការ​ទទួល​បន្ទុក​ពាណិជ្ជ​កម្ម​របស់សហ​ភាព​អឺរ៉ុប បានស្នើឲ្យ​មាន​ការ​ស៊ើប​អង្កេតអំពីដី​សម្បទាន​ ដែល​​រដ្ឋាភិបាល​បានប្រគល់ឲ្យ​ទៅក្រុមហ៊ុន​ឯកជននៅក្នុង​ប្រទេស​កម្ពុជា និងឈប់​ផ្តល់​ប្រ​យោជន៍ផ្នែក​ពាណិជ្ជ​កម្មត​ទៅ​ទៀត ប្រសិន​បើ​លទ្ធ​ផល​ពិត​ជា​បង្ហាញ​ថា មាន​ការ​រំលោភ​បំពាន​ដូច​ការ​អះអាង​មែន​នោះ។

នៅក្នុង​សេច​ក្តី​ថ្លែងការណ៍​មួយ​លើក​ឡើង​ពី​ក្តី​ព្រួយ​បារម្ភ​ទាំង​នោះកាលពីខែ​មុន លោក ហ្សង់ ហ្វ្រង់ស័រ កូតាំង (Jean-Francois Cautain) ឯក​អគ្គ​រដ្ឋ​ទូត​សហ​ភាព​អឺរ៉ុប​ប្រ​ចាំ​ប្រទេស​កម្ពុជា បាន​​មាន​ប្រ​សាសន៍​ថា ក្រុម​ការងាររបស់​លោក​កំពុងតែ​ពិនិត្យ​មើល​ទំនាក់​ទំនង រវាង​គម្រោង​ទំនិញ​គ្រប់​យ៉ាង​លើកលែង​តែ​អាវុធ និង​ការ​រំលោភ​បំពាន​សិទ្ធិ​មនុស្ស ប៉ុន្តែ​បានកោតសរសើរ​ចំពោះ​អត្ថ​ប្រ​យោជន៍របស់គម្រោង​នេះ។

លោក​មាន​ប្រ​សាសន៍​ថា “ ប៉ុន្តែមាន​រឿង​ល្អមួយ។ ប្រទេស​កម្ពុជា ជា​ឧទា​ហរណ៍​ដ៏​សំខាន់​សម្រាប់គម្រោង​អ្វី​គ្រប់​យ៉ាង​លើក​លែង​តែ​​អាវុធ​ ដែល​ជា​កម្លាំង​ចលករ​ជំរុញ​កំណើនសេដ្ឋកិច្ច។ ក្នុង​រយៈ​ពេល​១០​ឆ្នាំ​ចុង​ក្រោយ​នេះ ការ​នាំ​ទំនិញ​ចេញ​ទៅ​កាន់​ទីផ្សារ​
សហភាព​អឺរ៉ុប​ដោយ​រួច​ពន្ធ​បាន​ជួយ​ឲ្យ​​ការ​នាំ​ចេញ​របស់​កម្ពុជា ទៅ​កាន់​សហ​ភាព​អឺរ៉ុប​កើន​ឡើង​លើស​ទ្វេ​ដង ​ជាពិសេស​ក្នុង​វិស័យ​វាយ​នភណ្ឌ​ និង​ស្បែក​ជើង ដែល​ផ្តល់​ការ​ងារ​ដោយ​ផ្ទាល់​ដល់​ប្រ​ជា​ពល​រដ្ឋ​កម្ពុជារាប់​សែននាក់”៕ សុខុម​​​​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស