កាលពីថ្ងៃច័ន្ទ សាលាឧទ្ធរណ៍បានបើកសវនាការជំនុំជម្រះរឿងក្តីជម្លោះដីធ្លីមួយរវាងស្ត្រីអាយុ៧០ឆ្នាំម្នាក់មកពីខេត្តកំពង់ឆ្នាំង
និងក្រុមហ៊ុនមួយរបស់ភរិយារដ្ឋមន្ត្រីក្រសួងឧស្សាហកម្ម រ៉ែ និងថាមពល រឿងដីមួយកន្លែងទំហំ៣.០០០ម៉ែត្រក្រឡា។
កាលពីខែឧសភា ឆ្នាំ២០១២ សាលាដំបូងខេត្តកំពង់ឆ្នាំងបានបង្គាប់ឲ្យឈ្មោះ ចាត បាត ជាកសិកររស់នៅក្នុងឃុំតាចេស ស្រុកកំពង់ត្រឡាច សងជំងឺចិត្តចំនួន២.៥០០ដុល្លារទៅក្រុមហ៊ុនអភិវឌ្ឍន៍ KDC របស់លោកស្រី ជា ខេង ភរិយារបស់លោក ស៊ុយ សែម។
អ្នកស្រី ចាត បាត បានលើកឡើងនៅក្នុងតុលាការកាលពីថ្ងៃច័ន្ទថា អ្នកស្រីមានសិទ្ធិស្របច្បាប់រស់នៅលើដីនេះ ពីព្រោះអ្នកស្រីបាននិងកំពុងរស់នៅទីនោះអស់រយៈពេលជាង៣០ឆ្នាំមកហើយ។
អ្នកស្រីបានបន្តថា“ ខ្ញុំរស់នៅលើដីនោះ និងធ្វើស្រែចម្ការនៅលើដីនេះតាំងពីឆ្នាំ១៩៧៩មក ហើយខ្ញុំមិនដែលលក់ដីនេះឲ្យទៅនរណាទេ”។
ច្បាប់ភូមិបាលរបស់ប្រទេសកម្ពុជាចែងថាប្រសិនបើជនណាបាននិងកំពុងតែរស់នៅលើដីឯកជនគ្មានជម្លោះរយៈពេលលើសពីប្រាំឆ្នាំមុនឆ្នាំ២០០១ ពួកគេមានសិទ្ធិស្របច្បាប់ទទួលប័ណ្ណកម្មសិទ្ធិកាន់កាប់ដីនោះ។
លោក ផាត់ ពៅស៊ាង មេធាវីតំណាងឲ្យក្រុមហ៊ុន KDC ក្នុងជម្លោះនេះ បានមានប្រសាសន៍ថា ដីនេះជារបស់លោកស្រី ជា ខេង ពីព្រោះលោកស្រីទទួលបានប័ណ្ណកម្មសិទ្ធិស្របច្បាប់កាន់កាប់ដីនេះ និងដីមានជម្លោះ១៤៥ហិកតាថែមទៀតនៅក្នុងតំបន់នេះ កាលពីឆ្នាំ២០០៧។
លោក ប្រាក់ ច័ន្ទដំបូរ ចៅក្រមប្រធានក្រុមប្រឹក្សាជំនុំជម្រះ បានមានប្រសាសន៍ថា សាលក្រមនឹងប្រកាសនៅថ្ងៃទី៧ ខែឧសភា៕
ប្រែសម្រួលដោយ ចេវ ប៊ុននី