កាលពីម្សិលមិញ នគរបាលបាននិយាយថាកម្មករសំណង់បួននាក់បានសារភាពថា បានសម្លាប់នាយិកាសាលាជនជាតិសិង្ហបុរី ដែលសាកសពរបស់គាត់ត្រូវបានរកឃើញកាលពីព្រឹកថ្ងៃអង្គារ នៅក្នុងខេត្តកំពង់ស្ពឺ។
ស្ថានទូតសិង្ហបុរីប្រចាំរាជធានីភ្នំពេញបានអះអាងថា សាកសពនេះពិតជាសាកសពអ្នកស្រី វ៉េនឌី លីម (Wendy Lim ) អាយុ៥៥ឆ្នាំ ដែលត្រូវជនដៃដល់សម្លាប់នៅសាលាគ្លេត ធីតឌីង អុីនធើណេសិនណល(Glad TidingsInternational) ដែលគ្រប់គ្រងដោយគ្រិស្តសាសនា នៅក្នុងក្រុងច្បារមន ជាកន្លែងដែលអ្នកស្រីស្នាក់នៅ។
លោកវរសេនីយ៍ទោ ស្វាយ យាន នាយការិយាល័យនគរបាលព្រហ្មទណ្ឌខេត្តកំពង់ស្ពឺ បានមានប្រសាសន៍ថា កម្មករសណង់ទាំងបួននាក់ ដែលបានបន្តសាងសង់សាលានេះចាប់តាំងពីមានការសម្លាប់កើតឡើងមក ត្រូវបានហៅមកសាកសួរកាលពីល្ងាចថ្ងៃអង្គារ។
លោកបានមានប្រសាសន៍កាលពីម្សិលមិញថា“ កម្មករទាំងអស់បានសារភាពបន្ទាប់ពីនគរបាលខេត្តកំពង់ស្ពឺបានសាកសួរ ដោយមានការសហការជាមួយនគរបាលព្រហ្មទណ្ឌក្រសួងមហាផ្ទៃ ហើយលោកបានប្រាប់ថា ជនទាំងនេះមានឈ្មោះ តុង សុផល អាយុ២៦ឆ្នាំ ជាអ្នកទទួលខុសត្រូវចំពោះការវាយសម្លាប់ វ៉េនឌី លីម និងអ្នកសមគំនិត ឈ្មោះ កែវ សុវុធ អាយុ៣២ឆ្នាំ យាន ឡាលី អាយុ៣០ឆ្នាំ និង អ៊ូ លីមីហុង ដែលគេមិនដឹងថា មានអាយុប៉ុន្មាននោះទេ”។
“ ពួកគេបានសារភាពថា ពួកគេបានបោកក្បាលជនរងគ្រោះផ្ទប់នឹងទ្វារ។ពួកគេបានសារភាពនៅថ្ងៃនេះថា ពិតជាបានធ្វើសកម្មភាពទាំងអស់នេះមែន”។
លោកវរសេនីយ៍ទោ ស្វាយ យាន បានមានប្រសាសន៍ថា លោកមិនអាចបញ្ជាក់ពីមូលហេតុនៃការសម្លាប់នេះបានទេ ប៉ុន្តែនគរបាលបានរកឃើញទូរស័ព្ទដៃចំនួនបីគ្រឿង ប្រាក់ដុល្លារសិង្ហបុរីចំនួន៣២៥ដុល្លារ (ប្រហែល២៦៤ដុល្លារអាមេរិក) និងលុយខ្មែរប្រហែល ២០.០០០រៀល ដែលជនល្មើស
បានលួចពីបន្ទប់ជនរងគ្រោះ។
យោងតាមលោកវរសេនីយ៍ទោ ស្វាយ យាន បានឲ្យដឹងថា នគរបាលក៏បានរកឃើញផងដែរថាជនសង្ស័យមិនបានយកប្រាក់ដ៏ច្រើនចំនួន៤.១៣២ដុល្លារ ពីកាបូបដៃរបស់ វ៉េនឌី លីម ដែលគាត់បានទុកនៅក្នុងបន្ទប់ដេករបស់គាត់នៅក្នុងអគារសាលាដែលមិនទាន់សាងសង់រួចនេះ។
លោកបានមានប្រសាសន៍ថា “ ការស៊ើបអង្កេតរបស់យើងលើករណីនេះបានបញ្ចប់ហើយ ពីព្រោះពួកគេទាំងអស់បានសារភាពហើយ ហើយរបស់របរជនរងគ្រោះក៏បានរកឃើញដែរ។ ឥឡូវនេះយើងបានរៀបចំឯកសារ និងបញ្ជូនជនសង្ស័យទៅតុលាការ ពីព្រោះ មិនមានអ្នកផ្សេងទៀតជាប់ពាក់ព័ន្ធនៅក្នុងអំពើឃាតកម្មនេះទេ”។
យោងតាមមន្ត្រីម្នាក់ប្រចាំការនៅការិយាល័យព្រះរាជអាជ្ញាតុលាការខេត្ត បានស្នើសុំមិនប្រាប់ឈ្មោះ ពីព្រោះគាត់មិនត្រូវបានអនុញ្ញាតឲ្យនិយាយពីព័ត៌មានលម្អិតនៃករណីនេះទេ ហើយរបាយការណ៍បឋមរបស់នគរបាលបង្ហាញថា ជនសង្ស័យទាំងនេះដែលកំពុងតែស៊ីផឹកនោះ បានសម្រេចចិត្តលបចូលទៅក្នុងបន្ទប់របស់ អ្នកស្រី វ៉េនឌី លីម កាលពីយប់ថ្ងៃច័ន្ទ។
មន្ត្រីរូបនេះបាននិយាយថា ឈ្មោះ សុផលឡើងតាមជញ្ជាំងចូលទៅក្នុងបន្ទប់របស់ជនរងគ្រោះ ដោយមុតនឹងកញ្ចក់បែក ដែលដាក់
នៅលើជញ្ជាំងនោះ មុនពេលលបចូលទៅក្នុងបន្ទប់របស់អ្នកស្រី វ៉េនឌី លីម ហើយបានប្រមូលយករបស់របររបស់អ្នកស្រីមួយចំនួន។
មន្ត្រីរូបនេះបាននិយាយទៀតថា “ ពេលនោះ ជនរងគ្រោះបានភ្ញាក់ដឹងខ្លួន ហើយបានឃើញជននេះ។ ពួកគេបានប្រវាយប្រតប់គ្នា។ជននេះបានចាប់បោចសក់គាត់បោកគាត់ផ្ទប់នឹងទ្វារបន្ទប់ ហើយដួលលើកម្រាលឥដ្ឋ”។
លោក ភឿក ស៊ីណៃ ប្រធានអង្គការកុមារកំព្រា ក្តីសង្ឃឹមថ្មី ជាអង្គការមិនមែនរដ្ឋាភិបាលគ្រិស្តសាសនា ដែលធ្វើការរួមគ្នាជាមួយសាលា
គ្លេត ធីតឌីង អីុនធើណេសិនណលបានមានប្រសាសន៍ថា នគរបាលបានរកឃើញរបស់របរដែលលួចបាននោះ កប់ទុកក្នុងបរិវេណសាលាចម្ងាយប្រហែល២០០ម៉ែត្រពីបន្ទប់របស់ជនរងគ្រោះ។
លោក ភឿក មានប្រសាសន៍ថា អាយភែតមួយគ្រឿង និងទូរស័ព្ទស្មាតហ្វូនម៉ាកសាំស៊ុង ហ្គាឡាស៊ីមួយគ្រឿងស្ថិតក្នុងចំណោមរបស់របរដែលគេរកឃើញកប់ទុកនៅក្នុងបរិវេណសាលានេះ។
លោកបានមានប្រសាសន៍ថា “ ពួកគេបានយករបស់របរទាំងនេះទៅកប់នៅក្រោមដើមឈើ”។ លោកបានបន្ថែមថា នគរបាលបានរកឃើញកន្លែងលាក់នេះ បន្ទាប់ពីបានតាមស្នាមស្រក់ឈាមរបស់ជនល្មើសដែលបានរងរបួស។
លោកក៏បានមានប្រសាសន៍ផងដែរថា ប្រាក់ដុល្លារអាមេរិកដែលគេបានរកឃើញនៅក្នុងបន្ទប់របស់ជនរងគ្រោះ ត្រូវបានដកពីធនាគារ អេអិនហ្សិន រ៉ូយ៉ាល់នៅក្បែរនោះកាលពីថ្ងៃច័ន្ទដើម្បីទុកបើកប្រាក់ខែឲ្យគ្រូបង្រៀននៅសាលានេះ។
លោកបន្ថែមថា កម្មករសាងសង់អគារនេះប្រហែលជាបានដឹងថា ទំនងជាមានប្រាក់នៅក្នុងបន្ទប់នេះ ប៉ុន្តែមិនអាចរកឃើញ។ លោក ភឿក បានមានប្រសាសន៍ថា “ពួកគេបានធ្វើការនៅទីនោះជិតមួយឆ្នាំហើយ”៕
ប្រែសម្រួលដោយ សោម សារុន