29 C
Phnom Penh

លោក ហ៊ុន សែន សន្យាការ​ពារ​កេរ​ដំណែល បង្ហាញពីស្នាព្រហស្តដ៏រុងរឿង​របស់​សម្តេច​ឪ នរោត្តម​ សីហនុ

ដោយ ឌឹ ខេមបូឌា ដេលី

បទវិភាគ

មាន​ប្រសា​សន៍នៅ​​ឯកំពង់​ផែ​ស្វយ័ត​ក្រុង​ព្រះ​សីហនុ នៅ​ក្នុង​ខេត្ត​ព្រះ​សីហនុ កាលពី​ម្សិល​មិញ លោកនាយក​រដ្ឋ​មន្ត្រី ហ៊ុន សែន បាន​សន្យាថា លោកនឹងរក្សាទុក​ឈ្មោះ​ខេត្ត​នៅ​តំបន់​មាត់ស​មុទ្រ​នេះ​ ហើយ​​កេរដំណែល​នៃឈ្មោះ​របស់​ខេត្ត ដែលឆ្លុះបញ្ចាំងពីភាព​រុងរឿង​ក្រោម​ការ​ដឹកនាំរបស់ព្រះ​មហា​ក្សត្រ​ព្រះបាទ នរោត្តម​ សីហនុ ដែល ព្រះអង្គ​បាន​​​គង់​ជា​​​ព្រះ​ប្រមុខរដ្ឋម្តងទៀត នៅ​ក្នុង​ទស​វត្សរ៍ឆ្នាំ១៩៦០។ 

លោក ហ៊ុន សែន បាន​មាន​ប្រសា​សន៍ក្នុង​រយៈពេល​ពីរថ្ងៃ​បន្ទាប់ពី​លោក​បាន​ថ្លែងក្នុង​សុន្ទ​រកថា នៅ​ក្នុង​ខេត្ត​ព្រៃវែង​ ដែល​លោក​បាន​សម្តែង​ការ​បារម្ភ​ពីការបំផ្លាញចោលកេរ​ដំណែល​របស់​លោក ប្រសិន​បើលោក​ចាញ់​ឆ្នោត​នៅ​អាណត្តិ​ក្រោយ​នេះថា “ បើទោះ​ជា​សម្តេចឪ នរោមត្ត​ សីហនុ បាន​សោយ​ទិវង្គត​ហើយ​ក៏ដោយ ក៏ព្រះ​នាម​របស់​ព្រះ​អង្គ​នៅក្នុង​ខេត្ត​នេះ និង​នៅ​កំពង់​ផែនេះ ស្ថិត​នៅជាមួយ​យើង​ជានិច្ច ហើយ​មិន​មាន​ការ​ប្តូរ​ឈ្មោះ​ទេ”។

លោក ហ៊ុន សែន បាន​មានព្រមាន​កាល​ពី​ថ្ងៃ​ច័ន្ទថា ប្រសិន​បើ​គណបក្ស​ប្រឆាំង​ឈ្នះ​ការ​បោះ​ឆ្នោត​ជាតិ​នៅ​ខែកក្កដា ពួកគេ​នឹង​លុបបំបាត់​កេរ​ដំណែល​របស់​លោក ដោយ​បំផ្លាញ​អគារ​ទាំងឡាយណា ដែលមានដាក់​ឈ្មោះ​របស់​លោក ដែលក្នុង​នោះ​ភាគច្រើន​ជា​សាលា​រៀន​ និងស្នាដៃផ្សេង​ទៀត​សាង​សង់ឡើង ដោយថ្នាក់ដឹកនាំក្នុងជួរ​មេដឹកនាំ​​គណបក្ស​ប្រជាជន​កម្ពុជា។

លោក​មាន​ប្រសាសន៍​ទំនង​ជាសំដៅ​ទៅ​​​រកគណបក្ស​សង្គ្រោះ​ជាតិ​ថា​ “ ខ្ញុំ​សូម​ប្រកាស​​ថា​ នឹង​មិន​មាន​ការ​ប្តូរ​ឈ្មោះ​ខេត្ត​ព្រះ​សីហនុទេ​
ដរាបណា​គណ​បក្ស​ប្រជាជន​កម្ពុជា​នៅ​កាន់​អំណាច។ ប៉ុន្តែ​ បើ​គណបក្ស​ដទៃ​ឈ្នះ​ឆ្នោត​វិញ ពួក​គេ​អាច​សម្រេច​ចិត្ត​ផ្សេង”។

ឈ្មោះ​ខេត្ត​ព្រះ​សីហនុ ត្រូវ​បាន​ប្តូរ​ទៅ​ខេត្ត​កំពង់​សោមម្តងរួចមកហើយ អំឡុង​របប​ លន់ នល់  ក្នុង​ទសវត្សរ៍ឆ្នាំ​១៩៧០ មុន​ពេល​ត្រូវ​បាន​ប្តូរ​មកឈ្មោះ​ដើម​វិញនៅ​ពេល​ ដែល​អតីត​ព្រះ​មហា​ក្សត្រ នរោត្តម សីហនុ បាន​គ្រងរាជ្យ​ជាលើក​ទី​២ នៅពេល​របប​រាជានិយម​នៅ​ក្នុងប្រទេស​កម្ពុជា​ត្រូវ​បាន​បង្កើតឡើង​វិញ​នៅឆ្នាំ​១៩៩៣។

ក្នុង​សុន្ទរកថារបស់​លោក កាលពី​ម្សិល​មិញ លោក​ ហ៊ុន សែន​ ក៏បាន​មាន​ប្រសាសន៍​ផងដែរ​ថា ប្រសិន​បើ​មិន​មាន​ការ​ផ្តួលរំលំ​សម្តេច​ នរោត្តម សីហនុ ក្រោមកណ្តាប់​ដៃ​ឧត្តម​សេនីយ៍ លន់ នល់ ដែល​គាំទ្រ​ដោយ​អាមេរិក ក្នុង​ឆ្នាំ​១៩៧០​ទេនោះ ឥឡូវនេះ ប្រទេស​កម្ពុជា សម​នឹង​ក្លាយ​ជា​ប្រទេស​មាន​ការ​រីកចម្រើន​ជាង​​កូរ៉េ​ខាងត្បូង​ទៅ​ទៀត។

លោក​បាន​មាន​ប្រសាសន៍ថា “ ប្រសិន​បើ​មិន​មាន​រដ្ឋ​ប្រហារ [ទម្លាក់​សម្តេច​ នរោត្តម​សីហនុ] ទេ ហើយ​កំពង់​ផែស្វយ័ត​នេះ​បាន​បន្ត​រីកចម្រើន​ស្របគ្នាជាមួយ​នឹង​វិស័យ​ដទៃ​​​ទៀត​នៅ​ទូទាំង​ប្រទេស​ ហើយ​យើង​នឹង​​មិន​មាន​សង្គ្រាមទេ ប្រទេស​របស់​យើង​​នឹង​មាន​ការ​អភិវឌ្ឍជាងនេះ​ទៅទៀត”។

ដោយ​ពន្យល់ថា នៅដើម​ទសវត្សរ៍​១៩៧០ផលិតផល​ក្នុង​ស្រុក​សរុប​ក្នុង​បុគ្គល​ម្នាក់​ក្នុង​ប្រទេស​កម្ពុជា គឺស្មើ​នឹង​២០០ដុល្លារ​ ចំណែក​​​​​​​កូរ៉េ​ខាង​ត្បូង​វិញមាន​តែ៦២​ដុល្លារ​ប៉ុណ្ណោះ​​​។ លោ​ក​មាន​ប្រសាសន៍ថា​ “ ប្រាក់​ចំណូល​របស់​ប្រជាពលរដ្ឋ​យើងអាច​នឹង​ខ្ពស់​ [ជាង​កូរ៉េខាងត្បូងទៅទៀត]”។

យោង​តាម​តួលេខថ្មី​បំផុត​របស់​មូល​និធិ​រូបិយវត្ថុអន្តរជាតិពី​ឆ្នាំ​២០១២ និងពី​ឆ្នាំ​២០១៣ បាន​ឲ្យ​ដឹង​ថា ផលិតផល​ក្នុង​ស្រុក​សរុប​ សម្រាប់​បុគ្គលម្នាក់​នៅ​ក្នុងប្រទេស​កម្ពុជាយើង គឺ​ប្រហែល​៩៣០ដុល្លារ​ ឬ​ប្រហែល៩៦ភាគរយ​តិចជាងផលិតផល​​​​ក្នុង​ស្រុក​​សម្រាប់​បុគ្គលម្នាក់​របស់​ប្រទេស​កូរ៉េខាងត្បូង​គឺ​ប្រហែល​ ២៣.១០០ដុល្លារ។

លោក ឡៅ ម៉ុង​ហៃ អ្នក​វិភាគ​នយោ​បាយឯករាជ្យបាន​មាន​ប្រសាសន៍ថា​ ការ​អភិវឌ្ឍ​ផ្នែកឧស្សាហកម្ម​របស់​ប្រទេស​កម្ពុជា​នៅ​ក្នុង​ទសវត្សរ៍ឆ្នាំ​១៩៦០​ និង​​​ឆ្នាំ​​​១៩៧០​​​មាន​ន័យ​​​ថា ឆ្លើយ​តប​នឹង​តម្រូវ​ការក្នុង​ស្រុក ​ហេតុ​​​ដូច្នោះ​ហើយ សូម្បី​គ្មាន​សង្គ្រាម​រាប់​​​ទសវត្សរ៍ក៏​​​ដោយ ក៏គេ​​មិនឃើញ​មាន​ការ​អភិវឌ្ឍ​ដែល​ប្រទេស​​​​កូរ៉េ​ខាង​ត្បូង​បាន​ពេញចិត្ត​ក្នុង​រយៈពេល​ពីរ​ទសវត្សរ៍​ចុង​ក្រោយ​នេះដែរ។

ដោយ​កត់​សម្គាល់​ឃើញ​ថា ​ កម្ពុជាត្រូវ​​សមាជិក​នៃ​ប្លុក​កុម្មុយនីស្ត ជួយ​ការពារ​បន្ទាប់​ពី​ខ្លួន​បាន​បែក​បាក់​ទំនាក់​ទំនង​ជាមួយ​អាមេរ​ិក​
​ក្នុង​ឆ្នាំ​១៩៦៣​ រួចមកថា “ ប្រទេស​កម្ពុជា​មិន​អាច​មាន​ការ​អភិ​វឌ្ឍ​តាម​របៀប​ដូច​កូរ៉េ​ខាង​ត្បូង​បាន​ទេ ពីព្រោះប្រទេស​កម្ពុជា​បាន​ជ្រើសយក​គំរូ​សេដ្ឋកិច្ច​សង្គម​និយម”៕

    ប្រែ​សម្រួលដោយ សោម សារុន​​

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស