29 C
Phnom Penh

​លោក​នាយក​រដ្ឋ​មន្ត្រី​ ហ៊ុន សែន ​​មាន​ប្រសាសន៍​ប្រាប់​អ្នក​ភូមិ​អំពី​​កំណើត​កូន​ប្រុស​ច្បងលោក​

ដោយ ឌឹ ខេមបូឌា ដេលី

បទវិភាគ

លោក​នាយក​រដ្ឋ​មន្ត្រី​ ហ៊ុន សែន ​បាន​ថ្លែង​ប្រាប​់​ប្រជា​ពល​រដ្ឋ​​ប្រហែល​៥.០០០​នាក់​ក្នុង​ខេត្ត​កំពង​់​ចាម​កាល​ពី​ម្សិល​មិញ​ថា កូន​ប្រុស​របស់​លោក គឺ​ លោក ហ៊ុន ម៉ាណែត ប្រ​ហែល​កើត​មក​ពី​​អ្នក​តា​​ ដែល​ប្រែ​កាឡា​ជា​ពន្លឺ​ដ៏​ភ្លឺចែង​ចាំង​ហោះ​ចេញ​ពី​​ដើម​ពោធិ៍​រំលង​​ផ្ទះរបស់​លោក ​ដែល​នៅ​​ពេលនោះ​កូន​​​​ប្រុស​របស់​លោក​បាន​ចាប់​កំណើត​តែ​ម្ដង​​​​​​​​​​។​

​លោក​ ហ៊ុន​ សែន​ បាន​មាន​ប្រសាសន៍​សំសៅ​​​ដល់​​​​​អ្នក​តា​​ដែល​គេ​គោរព​បូជា​នៅខ្ទម​មួយ​ក្រោម​ដើម​ពោធិ៍​នៅ​ក្នុង​ភូមិ​កោះ​ថ្ម ស្រុក​មេមត់ កន្លែង​ដែល​​លោក​ ហ៊ុន សែន ថ្លែង​កាល​ពី​ម្សិល​មិញ​ថា ​លោក​ស្រី ប៊ុន រ៉ានី​ ភរិយា​របស់​លោក​កើត​បាន​ ហ៊ុន ម៉ាណែត​ ក្នុង​
​​ឆ្នាំ​១៩៧៨​ ហើ​យ​លោ​ក​​មាន​ប្រសាសន៍​​ថាម៉ាណែត​ អាច​ជា​កូន​អ្នក​តា​អញ្ចាញ​កោះថ្ម”។

​លោក​ ហ៊ុន សែន បាន​ប្រាប់​អ្នក​ភូមិ​ និង​ព្រះ​សង្ឃ​ដែល​បាន​​ចូល​រួម​ក្នុង​ពិធី​សម្ពោធ​វត្ត​ថ្មី​មួយ​ក្នុង​ឃុំ​ទន្លូងថា “ ពេល [ម៉ាណែត​]​​ចាប់​កំណើត​​មាន​ពន្លឺ​ភ្លឺ​ចែង​ចាំង​ហោះ​រំលង​ដំបូល​ផ្ទះ​របស់​យើង​”។លោក​មាន​ប្រសាសន៍​​បន្ត​​ថា“ តំបន់​នេះ​គឺ​ជា​កន្លែង​ដែល​យើង​រស់​នៅ ហើយ​ប្រឈម​នឹង​ការ​ពិបាក​​ច្រើន​ណាស់​ពេល​កើត​កូន​ច្បង​ ម៉ាណែត”។​​

លោក​មានប្រសាសន៍​មុនពេល​ណែនាំ​​លោក ហ៊ុន ម៉ាណែត​ ដែល​អង្គុយ​នៅ​ក្បែរ​ឪពុក​អំឡុង​សុន្ទរកថា​កាល​ពី​ម្សិល​មិញ​ឲ្យ​ទៅ​គោរព​ផ្នូរ​​សព​បង​ប្រុស​របស់​ខ្លួន​​​ថា “ ខ្ញុំ​ត្រឡប់​មក​ស្រុក​នេះ​ មក​ធ្វើ​បុណ្យ​ស្ទើរ​តែ​រាល់​ឆ្នាំ​”។

​លោក ហ៊ុន សែន​ បាន​មាន​ប្រសាសន៍​ថា កូន​គួរ​តែ​ទៅ​អុជធូប​គោរព​បង​ប្រុស​របស់​កូន​ បន្ទាប់ពី​​យើង​ចប់​ការ​ងារ​នៅ​ទី​​នេះ​​”។
លោក​បានមាន​ប្រសាសន៍​​បន្ថែម​ដោយ​កំប្លែង​លេង​ថា“ កូន​គួរ​តែ​ទៅ​​មើល​ដើម​ពោធិ៍​នោះ​ដែរ ព្រោះ​កូន​​កើត​មក​ពី​ដើម​ពោធិ៍​នោះ”។
លោក ហ៊ុន សែន ​តែង​តែ​​និយាយ​អំពី​​​ព្រលឹង​​អ្នកតា​​ពេលថ្លែង​សុន្ទរកថា​របស់​លោក និង​ពេល​​ចេញ​ទៅ​ណា​ម្តងៗ។​

​គួរ​រំឭក​ថា បន្ទាប​់ពី​ពិធី​ថ្វាយ​ព្រះ​ភ្លើង​ព្រះ​​បរម​សព​សម្ដេច​ឪ​ នរោត្តម សីហនុ កាល​ពី​ខែ​កុម្ភៈ លោក​ ហ៊ុន សែន មាន​ប្រសាសន៍​ថា វិញ្ញាណក្ខន្ធ​អតីត​ព្រះ​មហាក្សត្រប្រាកដ​ជា​បានទត​ឃើញ​ពិធី​បុណ្យ​នោះ ព្រោះ​ថា មានតែលោក ហ៊ុន សែន​ ម្នាក់​គត់​ ដែល​អាច​ថ្វាយ​​ព្រះ​​ភ្លើង​បាន​ បន្ទាប់​ពី​​គ្រួសារ​រាជវង្សបានព្យាយាម​ថ្វាយ​ព្រះ​ភ្លើង​បួន​លើក​ ប៉ុន្ដែ​បរាជ័យ​​។​

​លោកស្រី​ ជា​ វណ្ណាត អ្នក​វិភាគ​នយោ​បាយ​​ឯក​រាជ​្យ​បាន​មានប្រសាសន៍​កាល​ពី​ម្សិល​មិញ​ថា លោក ហ៊ុន សែន​ ដឹង​យ៉ាង​ច្បាស់​អំពី​​សារៈសំខាន់​នៃ​អបិយ​ជំនឿ​នៅ​ក្នុង​សង្គម​ខ្មែរ ជា​ពិសេស​ក្នុង​ចំណោម​មនុស្ស​វ័យ​ចំណាស់។​

​លោកស្រី​ ជា​ វណ្ណាត ​មាន​ប្រសាសន៍​​បន្ដ​ថា “ ប្រជា​ពលរដ្ឋ​ខ្មែរ​ចាស់​ៗ​នៅ​តែ​ជឿ​យ៉ាង​មុត​មាំ​លើ​ជំនឿ​ និង​អព្ភូតហេតុ​ទាំង​នេះរួម​
​ទាំង​ទេព​ច្យុត​ផង​ដែរ​ ដែល​ប្រជា​ពលរដ្ឋ​ខ្មែរ​តែង​មាន​ជំនឿថា មាន​មនុស្ស​អស្ចារ្យ​មក​ចាប់​កំណើត​​នៅ​លើ​ផែន​ដី​”។

លោក​ស្រី​​បន្ថែម​ថា “ អ្នក​នយោ​បាយ​បើក​យុទ្ធ​នាការ​ឃោសនា​ ទៅ​​តាម​វប្បធម៌ និង​​ជំនឿ​ ដើម្បី​ទទួល​បាន​ផល​ប្រយោជន៍”។​
លោក ហ៊ុន សែន ក៏​បាន​មាន​ប្រសាសន៍​​កាល​ពី​ម្សិល​មិញ​ផង​ដែរ​ថា មិន​ដូច​កូន​ប្រុស​របស់​លោក​​ម្នាក់​ទៀត​ គឺ​ ហ៊ុន​ ម៉ានី ដែល​ឈរ​ឈ្មោះ​ជា​តំណាង​រាស្ត្រ​នៅ​ក្នុង​មណ្ឌល​កំពង់​ស្ពឺ​​នោះ​ទេ ម៉ាណែត​ នឹង​មិន​ប្រកួត​ប្រជែង​នៅ​ក្នុង​ការ​បោះ​ឆ្នោត​ជាតិ​ឆ្នាំ​នេះ​ទេ ប៉ុន្ដែ​ត្រូវ​បាន​លោក​តែង​តំាង​ឲ្យ​ធ្វើការ​ជាមួយ​លោក​ ជា សុផារ៉ា រដ្ឋ​មន្ត្រី​ក្រសួង​អភិវឌ្ឍន៍​ជន​បទ​ ​ដើម្បី​ជួយ​អភិវឌ្ឍ​ស្រុក​មេមត់។​

​លោក ហ៊ុន សែន ក៏​បាន​លើកឡើង​នៅ​ក្នុង​សុន្ទរកថារបស់​លោក​ផង​ដែរ​ថា លោក​មាន​ការ​ភ្ញាក់​ផ្អើល​យ៉ាង​ខ្លាំង​ពេល​បាន​ស្ដាប់ឮ​​​​
លោក សម រង្ស៊ី ​ប្រ​ធាន​គណ​បក្ស​សង្គ្រោះជាតិ​និង​លោក កឹម សុខា ​​អនុ​ប្រធាន​របស់​បក្ស​​​នេះ​ប្រកែក​គ្នា​​អំពី​នរណា​ជា​អាយ៉ង​របស់
គណ​បក្ស​ប្រជា​ជន​តាម​​ខ្សែអាត់​សំឡេងមួយ​ ដែល​ថត​អំឡុង​ពេល​ធ្វើ​យុទ្ធ​នាការ​ឃោស​នា​​បោះ​​ឆ្នោត​ ក្នុង​ឆ្នាំ​២០០៨ ដែល​កាល​ណោះ​លោក​ទាំង​ពីរ​កំពុងឃោស​នា​ឲ្យ​គណបក្ស​ប្រឆាំង​។

​លោក​បាន​មានប្រសាសន៍​អំពី​ខ្សែអាត់​សំឡេងដែល​បាន​ចេញ​ផ្សាយ​ដោយ​អង្គភាព​​ព័ត៌មាន​និង​ប្រតិកម្មរហ័ស​នៃ​ទី​ស្ដី​ការ​គណៈ​រដ្ឋ​មន្ត្រី​កាល​ពី​ដើម​សប្ដាហ៍​នេះ និង​ត្រូវ​បាន​ផ្សាយ​តាម​ទូរ​ទស្សន៍រដ្ឋ​​មួយ​ចំនួន​ដែល​គាំ​ទ្រ​គណបក្ស​​កាន់​អំណាច​កាល​ពីពីរ​​ថ្ងៃ​មុន​នេះ។

​លោក កឹម សុខា អតីត​ប្រធាន​គណបក្ស​សិទ្ធិ​មនុស្ស​ មុន​ពេល​​រួម​បញ្ចូល​​ជាមួយ​​គណ​បក្ស​ សម រង្ស៊ី កាល​ពី​ឆ្នាំ​មុន​មាន​ប្រសាសន៍​​ថា លោកមិន​ភ្ញាក់​ផ្អើល​ទេ ដែល​លោក ហ៊ុន​សែន និង​គណបក្ស​ប្រជាជន​កម្ពុជា​​លើកយក​​ខ្សែអាត់​សំឡេង​ដែល​មាន​អាយុ​កាល​៥​ឆ្នាំ​ទៅ​ហើយ​ ​មក​ផ្ចាញ់​គណបក្ស​​ប្រឆាំង​នោះ។

​លោក កឹម សុខា បានមានប្រសាសន៍​ថា “ គ្មាន​អ្វី​ថ្មី​នោះទេចំពោះ​ខ្ញុំ។ គាត់​តែង​តែ​ព្យាយាម​បំបែក​បំបាក់​ទំនាក់​ទំនង​របស់​យើង​ និង​បង្អាក់​ទឹក​ចិត្ត​ប្រជាពលរដ្ឋ”។

​លោក​បាន​បន្ដ​ថា “ [លោក ហ៊ុន សែន ]​គ្មាន​គំនិត​អ្វី​ទេ ពេល​នេះ​គាត់​​កំពុង​តែ​​ភ័យ​​ខ្លាច ព្រោះ​ប្រជា​ពល​រដ្ឋ​កំពុង​តែ​បាត់​បង់ជំនឿលើ​​គាត់​​”៕​​​​​​​​​​​​​​​​​

ប្រែសម្រួល​ដោយ ហម សុផាណ្ណា

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស