28 C
Phnom Penh

អភិបាល​រាជ​ធានី​ថ្មី​សន្យាដោះ​ស្រាយ​ជម្លោះ​​ដី​ធ្លី​​ដ៏​រុាំរៃ ដែល​កើត ​មាន​រវាង​អ្នក​ភូមិ​ និង​ក្រុមហ៊ុន​

ដោយ ឌឹ ខេមបូឌា ដេលី

បទវិភាគ

អភិបាល​រាជ​ធានី​ភ្នំពេញ​ថ្មី​ បាន​យក​ពិធី​ស្បថ​ចូល​កាន់​តំណែង​កាល​ពីថ្ងៃ​សុក្រ​ ដើម្បី​សន្យា​យ៉ាង​ម៉ឺង​ម៉ាត់​ ក្នុង​ការ​ដោះ​ស្រាយ
​ជម្លោះ​​ដី​ធ្លីមួយ​ចំនួន ក្នុង​ចំណោម​ជម្លោះដី​ធ្លី​​​​រ៉ាំ​រ៉ៃ ដែល​មាន​គេ​ដឹង​ឮ​ច្រើននៅ​ក្នុង​រាជ​ធានី​ភ្នំពេញ​។

កាល​ពី​ថ្ងៃ​សុក្រ លោក ប៉ា សុជាតិវង្ស បាន​ឡើង​ជំនួស​តំណែង​​លោក​ កែប ជុតិមា អតី​ត​អភិបាល​រាជ​ធានី​ភ្នំពេញជា​ផ្លូវ​ការ​​។ លោក​ កែប​ ជុតិមា ​បាន​បម្រើ​ការ​ជា​អភិបាល​រាជ​ធានី​ភ្នំពេញ​អស់​រយៈ​ពេល​១០​ឆ្នាំ​មក​ហើយ ហើយ​​រដ្ឋបាល​របស់​លោក ​ទំនង​ជា​គេ​ចង​ចាំ​មិន​ភ្លេច​​ចំពោះ​ការ​ចាក់​​ដី​​លុប​បឹង​កក់​ និង​​ការ​បណ្ដេញ​ចេញ​ពី​ដី​ធ្លី​ដោយ​ហិង្សា​​នៅ​ទី​នោះ​ និង​នៅ​សហគមន៍​បុរី​កីឡា​ ដែល​អ្នក​ដែល​បាត់​បង់​ដី​ធ្លី​​នៅទី​នោះ​ នៅ​តែ​បន្ដ​ការ​តវ៉ា​ជា​ប្រចាំ​ នៅ​ក្នុង​រាជ​ធានី​ភ្នំពេញ​។

លោក ប៉ា សុជាតិវង្ស ​ជា​អតីត​អភិបាល​​រង​រាជ​ធានី​ភ្នំពេញ បាន​មាន​ប្រសាសន៍​នៅ​ក្នុង​ពិធី​ស្បថ​ចូល​កាន់​តំណែង នៅ​ឯ​សាលា​រាជ​ធានី​ភ្នំពេញ ដែល​មាន​ការ​ចូល​រួម​​ពី​លោក ស ខេង រដ្ឋ​មន្ត្រី ក្រសួង​មហាផ្ទៃ​ថា“ ថ្ងៃ​នេះ ​យើង​ខ្ញុំ​ទាំង​អស់​គ្នា​មាន​កិត្តិយស​ប្រកប​ដោយ​ក្ដី​មោទនភាព​ក្រៃ​លែង​ ដែល​ត្រូវ​បាន​រាជ​រដ្ឋាភិបាល​កម្ពុជា​ផ្ដល់​ទំនុក​ចិត្ត​ ក្នុង​ការ​ស្នើ​សុំតែង​តាំង​ខ្ញុំ​បាទ​ជា​អភិបាល​នៃ​គណៈអភិបាល​រាជ​ធានីភ្នំពេញ​។

លោក ប៉ា សុជាតិវង្ស បាន​មាន​ប្រសាសន៍​​បន្ដ​ទៀត​ថា “ យើង​ទាំង​អស់​គ្នា​សច្ចា​ថា នឹង​បន្ដ​ដោះ​ស្រាយ​បញ្ហា​ដែល​នៅ​សេស​សល់​
ដូច​ជា ​សណ្ដាប់​ធ្នាប់​សាធារណៈ​ បញ្ហា​​ចរា​ចរណ៍បរិស្ថាន​​ និង​បញ្ហា​ទីក្រុង​បៃតង​ ហេដ្ឋារចនា​សម្ព័ន្ធ​ ជា​ពិសេស​ផ្លូវ​ថ្នល់ លូទឹក​​ និង​បញ្ហា​ទឹក​ស្អាត​​​ព្រម​ទាំង​ជម្លោះ​ដីធ្លី​ដែល​នៅ​សេស​សល់​មួយ​ចំនួន​ទៀត​​ដូច​ជា​នៅ​តំបន់​បឹង​កក់​ បុរីកីឡា និង​សហគមន៍​ថ្មគោល​ព្រម​ទាំង​អាង​ស្ដុក​ទឹក​នានា​ផង​ដែរ​”។

នៅ​ក្នុង​ការ​ថ្លែង​សុន្ទរកថា​ចុង​ក្រោយ​​ក្នុង​នាម​ជា​អភិបាល​រាជ​ធានី​ភ្នំពេញ​​ លោក កែប ជុតិមា បាន​អះអាង​ថា រាជ​ធានី​ភ្នំពេញ​​មាន​ការ​រី​ក​ចម្រើន​ខាង​ផ្នែក​សេដ្ឋកិច្ច​ អំឡុង​អាណត្តិ​របស់​លោក ហើយ​​​លោក​ក៏​បាន​​ផ្ដោត​ទៅ​លើ​ការ​​បង្ក្រាប​​ឧក្រិដ្ឋ​​ជន​ ការ​ជួញ​ដូរ​គ្រឿង​ញៀន​ អំពើ​ប្លន់​ និង​ភេរវកម្ម​ ក៏​ដូច​ជា​​តម្រូវ​ការ​ហេដ្ឋារចនា​សម្ព័ន្ធ​ផង​ដែរ​”។

លោក កែប​ ជុតិមា បាន​មាន​ប្រសាសន៍​ដោយ​លើក​ឡើង​អំពី​​បញ្ហា​ប្រឈម នៅ​ក្នុង​រាជ​ធានី​ភ្នំពេញ​ថា “ ទោះ​បី​ជាយើង​ខិត​ខំ​ធ្វើ​ការ​ ដើម្បី​អភិវឌ្ឍ​​បង្កើត​ស្នាដៃ​​ទាំង​នេះ​ក្ដី ក៏​រាជ​ធានី​ភ្នំពេញ​​នៅ​តែ​មាន​បញ្ហា​សេស​សល់​មួយ​ចំនួន​ដូច​ជា​សន្ដិសុខ និង​សុវត្ថិភាព​សង្គម ​ជម្លោះ​ដី​ធ្លី​ ការ​កក​ស្ទះ​ចរាចរ​ណ៍​ បញ្ហា​បរិស្ថាន​និង​បញ្ហា​ដឹក​ជញ្ជូន​ដែរ​​”។

លោក​បាន​មាន​ប្រសាសន៍​ថា “ ខ្ញុំ​សង្ឃឹម​ថាអភិបាល​រាជ​ធានី​ភ្នំពេញ​ថ្មី​ នឹង​បន្ដ​ធ្វើ​ឲ្យ​​បាន​​ជោគ​ជ័យ​ ហើយ​​សង្ឃឹមថា រាជ​ធានី​ភ្នំពេញ នឹង​បន្ដ​មាន​សោភ័ណភាព​ស្អាត​​ដូច​ពីមុន​”។

លោក​ កែប ជុតិមា ឥឡូវ​នេះ នឹង​ឈរ​ឈ្មោះ​ជា​បេក្ខជន​តំណាង​រាស្ត្រ​សម្រាប់​គណបក្ស​កាន់​អំណាច​នៅ​ក្នុង​ការ​បោះ​ឆ្នោត​ជាតិ​ ដែល​នឹងប្រព្រឹត្ត​ទៅ​​នៅ​ថ្ងៃ​ទី​២៨​ ខែកក្កដា។

ថ្លែង​អំពី​​អភិបាល​រាជធានី​ភ្នំពេញ​ដែល​ចូល​កាន់​តំណែង​ថ្មី​និង​អភិបាល​ចប់​អាណត្តិ និង​មន្ត្រី​របស់​ខ្លួនផ្សេងៗ​​  លោក ស ខេង បាន
​ផ្ដល់​យោបល់ឲ្យ​មន្ត្រីសាលា​រាជ​ធានី​ភ្នំពេញ​សហការ​ជាមួយ​គ្នា ហើយ​លោក​បាន​ទទួល​ស្គាល់​ថា ​ការ​ដឹក​នាំ​រាជ​ធានី​វា​មិន​មែន​ជា​កិច្ច​ការ​ងាយ​ស្រួល​នោះ​ទេ​។

លោកបាន​មាន​ប្រសាសន៍​ថា “ ខ្ញុំ​ជឿ​ជាក់​ថា រាជ​ធានី​ភ្នំពេញ គឺ​ពិត​ជា​លំបាក​គ្រប់​គ្រង​ ព្រោះ​មាន​បញ្ហា​ជា​ច្រើន​”។
ដោយ​លើក​ឡើង​អំពី​​បញ្ហា​កក​ស្ទះ​ចរា​ចរណ៍កាន់​តែ​ខ្លាំង​ឡើងៗ​នៅ​ក្នុង​រាជ​ធានី​ភ្នំពេញ  លោក​ ស ខេង បាន​មាន​ប្រសាសន៍​ថា
លោក​បាន​ចេញបទ​បញ្ជា​ឲ្យ​នគរ​បាល​ជាតិ​ពង្រឹង​គោល​នយោបាយ​របស់​ខ្លួន​។ ទោះ​ជា​យ៉ាង​ណា លោក ស ខេង បាន​ទទួល​ស្គាល់​ថា មនុស្ស​ខ្លះដែល​មាន​អំណាច​មិន​គោរព​ច្បាប់​ឡើយ​ នៅ​ពេល​ខ្លួន​ធ្វើ​ខុស​”។

លោក​ ស ខេង បាន​លើក​ឡើង​ថា “ ពួក​គេ​បាន​ឈ្លោះ​ប្រកែក​គ្នា​ជា​មួយ​នគរ​បាល​ចរាចរ និង​គំរាម​កំហែង​ពួក​គេ​។ ប៉ុន្ដែ យើង​ទាំង​អស់​គ្នា​ត្រូវ​តែ​គោរព​ច្បាប់​”។

លោក​បាន​លើក​ឡើង​បន្ថែម​ទៀត​ថា “ ខ្ញុំ​គិត​ថា មនុស្ស​ដំបូង​ដែល​គួរ​តែ​គោរព​ច្បាប់​ គឺ​អ្នក​មាន​បុណ្យ​ស័ក្ដិ​ខ្ពស់​ ហើយ​អ្នក​ទី​២ គឺ​អ្នក​មាន​ទ្រព្យ​សម្បត្តិ​ស្ដុក​ស្ដម្ភ។ ប្រសិន​បើ​អ្នក​ទាំង​នេះ​គោរព​ច្បាប់​​ មនុស្ស​ថ្នាក់​ក្រោម​នឹង​ធ្វើ​តាម​ ហើយ​ក៏​គោរព​ច្បាប់​ដែរ​”។

ដោយ​លើក​ឡើង​អំពី​ការ​ប្តេជ្ញា​របស់​អភិបាល​រាជ​ធានី​ភ្នំពេញ​ថ្មី​ថា នឹង​ដោះ​ស្រាយ​​ជម្លោះដី​ធ្លី​ដ៏​រ៉ាំរៃនោះ អ្នកស្រី​ ទេព វន្នី សកម្ម​​
ជន​ប្រឆាំង​ការ​បណ្ដេញ​ចេញ​មក​ពី​សហ​គមន៍​​បឹង​កក់ បាន​អំពាវ​នាវ​ឲ្យ​លោក ប៉ា សុជាតិ​វង្ស រក្សា​តាម​ការ​សន្យា​របស់​​លោក​​”។

អ្នក​ស្រី ទេព វន្នី បាន​លើក​ឡើង​ថា យើង​សង្ឃឹម​ថា លោក​នឹង​ជួយ​ដោះ​ស្រាយ​​បញ្ហា​របស់​យើង​ដូច​អ្វី​ដែល​លោក​បាន​មាន​ប្រសាសន៍​ ហើយ​យើង​សុំ​ស្នើ​ឲ្យ​លោក​ជួយ​ស្វែង​រក​យុត្តិធម៌​ ដើម្បីដោះ​​លែង​​អ្នក​ស្រី យ៉ម បុប្ផា សកម្មជន​បឹងកក់​ ដែល​កំពុង​ជាប់​ពន្ធ​នាគារ​ផង​ដែរ​។ យើង​​សុំ​ស្នើ​ឲ្យ​​លោក​ធ្វើ​តាម​អ្វី​ដែល​លោក​បាន​មាន​ប្រសាសន៍​ថា លោក​នឹង​ធ្វើ​នោះ​”។

អ្នកស្រី​បាន​បន្ថែម​ថា “ ​យើង​ត្រូវ​តែ​រង់​​ចាំ​មើល​ថា តើ​លោក​អាច​ដោះ​ស្រាយ​បញ្ហា​នេះ​សម្រាប់​យើង​បាន​ដែរ​ ឬក៏​អត់​”។
លោក សៀ ភារម្យ ប្រធាន​ក្រុម​ការ​ងារ​ពិសេស​សិទ្ធិ​លំនៅ​ដ្ឋាន​ បាន​មាន​ប្រសាសន៍​ថា លោក​ខ្លាច​ក្រែង​ការ​សន្យា​របស់​អភិបាល​រាជ​ធានី​ភ្នំពេញ​ថ្មី​គ្រាន់​តែ​ធ្វើ​ឡើ​ង​នៅ​មុន​ថ្ងៃ​បោះ​ឆ្នោត​ជាតិ​​នា​​ថ្ងៃ​ទី​២៨ ខែ​កក្កដា​ប៉ុណ្ណោះ​។

លោក​ សៀ ភារម្យ បាន​លើក​ឡើង​ថា “ ខ្ញុំ​ខ្លាច​ក្រែង​ថា លោក​គ្រាន់​តែ​សន្យា​នៅ​មុន​ពេល​បោះ​ឆ្នោត​ប៉ុណ្ណោះ​”។ នៅ​កន្លែង​ផ្សេង​ៗ​ទៀត​ នៅ​ទូទាំង​ប្រទេសមាន​​ពិធី​តែង​តាំង​​អភិបាល​ខេត្ត​​ថ្មី​​​ នៅ​ក្នុង​ខេត្ត​ឧត្ដ​រមាន​ជ័យ​ និង​ខេត្ត​កណ្ដាល។​​

លោក ស ថាវី​ អតីត​អភិបាល​រង​ខេត្ត​ព្រះវិហារ​ ត្រូវ​​បាន​តែង​តាំង​ជា​អភិបាល​ខេត្ត​ឧត្ដរមាន​ជ័យ រីឯ​លោក ឈុន ស៊ីរុន អតីត​អភិបាល​ខេត្ត​កណ្ដាល​ត្រូវ​ជំនួស​ដោយ​លោក អភិបាល​រង​ខេត្ត​ ផៃ ប៊ុនឈឿន៕

ប្រែ​សម្រួល​ដោយ ស៊ា ស៊ុយឈាង

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស