30 C
Phnom Penh

គណបក្ស​នយោបាយ​ប្រាំ​បាន​ចុះឈ្មោះសម្រាប់ការ​បោះ​ឆ្នោតជាតិ​ តែ​គណបក្ស​ប្រឆាំង​កំពុង​ពិចារណា

ដោយ ឌឹ ខេមបូឌា ដេលី

បទវិភាគ

គណៈកម្មាធិការ​ជាតិ​រៀបចំ​ការបោះ​ឆ្នោត​ (គ.ជ.ប.) បាន​ឲ្យ​ដឹង​កាលពីថ្ងៃ​សុក្រថា​ ឥឡូវនេះ​គណបក្ស​នយោ​បាយ​ចំនួន​ប្រាំ​បាន​ចុះឈ្មោះ​សម្រាប់​ការ​បោះ​ឆ្នោត​ជាតិ​នៅ​ថ្ងៃ​ទី​២៨ ខែ​កក្កដា​រួច​ហើយ​ ប៉ុន្តែ​គណបក្ស​ប្រឆំាង​ដ៏សំខាន់​ក្នុង​ប្រទេស​គឺ​គណបក្ស​សង្គ្រោះ​ជាតិ​ មិន​ទាន់​បាន​ចុះ​ឈ្មោះ​បេក្ខ​ជន​​សម្រាប់​ការ​បោះ​ឆ្នោត​នេះ​​នៅ​ឡើយ​ទេ។

នៅ​កិច្ច​ប្រជុំ​ដែល​បាន​ធ្វើឡើង​នៅ​ទី​ស្នាក់​ការ​កណ្តាល​របស់​​គណៈកម្មាធិការ​ជាតិ​រៀប​ចំការ​បោះ​ឆ្នោតនៅក្នុង​បរិវេណ​ក្រសួង​​មហា
ផ្ទៃនោះ មន្ត្រី​​គណៈកម្មាធិការ​ជាតិ​រៀប​ចំការ​បោះ​ឆ្នោត​បាន​ប្រកាសថា គណបក្ស​ប្រជា​ជន​កម្ពុជា​កំពុង​កាន់​អំណាច​របស់​លោក​នាយក​​រដ្ឋ​មន្ត្រី​ ហ៊ុន សែន ត្រូវ​បាន “ ទទួលយក​ជា​ផ្លូវ​ការ​” ថា ជាគណបក្ស​ប្រកួត​ប្រជែង ចំណែក​ឯ​គណបក្ស​ដែលគេ​មិនសូវស្គាល់​ គឺ​គណបក្ស​ សញ្ជាតិ​ខ្មែរត្រូវ​ធ្វើការ​កែប្រែ​ឯកសារ​ដាក់​ពាក្យ​សុំ​របស់​ខ្លួន​ខ្លះ។

លោក​ ទេព នី​ថា អគ្គលេខាធិការ​​គណៈ​កម្មាធិការ​ជាតិ​រៀប​ចំការ​បោះ​ឆ្នោត​បាន​មាន​ប្រសាសន៍ថា “ ទី១ ​គណៈ​កម្មា​ធិការ​ជាតិ​រៀប​
​ចំការ​បោះ​ឆ្នោត​បាន​សម្រេច​​ទទួល​យក​គណបក្ស​ប្រជាជន​កម្ពុជា​និង​បេក្ខជន​របស់​ខ្លួន​​ជា​ផ្លូវ​ការ​​​ និង​ទី​២ ខ្លួនតម្រូវ​ឲ្យ​គណបក្ស​សញ្ជាតិខ្មែរ​ធ្វើ​ការ​កែប្រែ​ខ្លះៗនូវ​ចំណុច​ខ្វះ​ខាត​ [ក្នុង​ការ​ដាក់​ពាក្យ​សំុនេះ]”។

លោក​បាន​មាន​ប្រសាសន៍ថា គណៈ​កម្មា​ធិការ​ជាតិ​រៀប​ចំការ​បោះ​ឆ្នោត​កំពុង​តែ​ដំណើរ​ការ​ចុះឈ្មោះ​គណបក្ស​ហ្វុ៊ន​ស៊ិន​ប៉ិច គណ​បក្ស​សាធារ​ណរដ្ឋ​ប្រជា​ធិប​តេយ្យ និង​គណ​បក្ស​សម្ពន្ធ​ប្រជា​ធិបតេយ្យ​។

នៅ​ពេល​ទាក់ទង​តាម​ទូរស័ព្ទ លោក កឹម សុខា អនុ​ប្រធាន​គណបក្ស​សង្គ្រោះ​ជាតិ​បានមាន​ប្រសាសន៍​ថា គម្រោង​ចុះ​ឈ្មោះ​របស់​គណ​បក្ស​សម្រាប់​ការ​​បោះ​ឆ្នោត​នេះ​កំពុង​ពិចារណានៅ​ឡើយ​ថា​ តើ​​គណៈ​កម្មា​ធិ​ការ​ជាតិ​រៀប​ចំការ​បោះ​ឆ្នោត​នឹង​ធ្វើ​ការ​កែ​ទម្រង​់​តាម​ការ​ទាមទារ​របស់​ខ្លួន​ឬ​យ៉ាងណា រួម​មាន​ការ​ឲ្យ​ផ្លាស់​ប្តូរ​រចនា​សម្ព័ន្ធ​សមាជិក​របស់​គណៈកម្មាធិ​ការ​នេះ​ និង​របៀប​តែង​តាំង​ ព្រមទាំង​របៀប​ដែល​គណៈកម្មាធិការ​នេះ​ចុះឈ្មោះ​​អ្នក​បោះ​ឆ្នោត។

លោក កឹម សុខា បាន​មាន​ប្រសា​សន៍ថា “ យើង​មានគម្រោង​ [ចុះឈ្មោះ​សម្រាប់ការ​បោះ​ឆ្នោត​​នេះ​] ដែរ​ ប៉ុន្តែ​យើង​នឹង​បន្ត​ធ្វើ​ការ
​តវ៉ា​ឲ្យ​មាន​ការ​ផ្លាស់​ប្តូរ​ [ដោយ​សារ​] មាន​ភាព​មិន​ប្រក្រតី​ក្នុង​បញ្ជីឈ្មោះ​បោះ​ឆ្នោត​ ដែល​អង្គការ​សហ​ប្រជាជាតិ​​បាន​លើក​ឡើង​”។

លោក​បានមាន​ប្រសាសន៍​បន្ថែមទៀត​ថា ផែនការ​របស់​គណ​បក្ស​សង្គ្រោះ​ជាតិ​ក្នុង​ការ​ធ្វើការជួប​ជុំ​លើក​ទី២ដើម្បី​ទាម​ទារ​ឲ្យ​​គណៈ​កម្មាធិ​ការ​ជាតិ​រៀប​ចំការ​បោះ​ឆ្នោត​ធ្វើការ​កែ​ទម្រង់នៅ​ពេល​ដែល​លោក សុរិយា ស៊ូបេឌី(Surya Subedi ) អ្នក​ធ្វើ​របាយ​ការណ៍​ពិសេសទទួល​បន្ទុក​សិទ្ធិមនុស្ស​របស់​អង្គ​ការ​សហ​ប្រជាជាតិ​ មក​ដល់​ប្រទេស​​កម្ពុជានៅ​ថ្ងៃ​ទី​១៩​ខែ​ឧសភា។

គណៈកម្មាធិការ​សម្រាប់​ការ​បោះ​ឆ្នោត​ដោយ​សេរី​ និង​យុត្តិធម៌នៅ​កម្ពុជា ហៅ​កាត់ [ខុមហ្វ្រែល] បាន​ប៉ាន់​ប្រមាណ​ថា អ្នក​បោះ​ឆ្នោត​ប្រហែល​មួយលាននាក់​អាច​រងផល​ប៉ះពាល់​អវិជ្ជ​មាន​នៅ​ថ្ងៃ​បោះ​ឆ្នោត​ដោយ​សារ​ភាព​មិន​ប្រក្រតី​ក្នុងការ​ចុះឈ្មោះ​​អ្នក​បោះឆ្នោត។

មាន​ប្រសាសន៍តាម​ទូរស័ព្ទ​បន្ទាប់​ពី​កិច្ច​ប្រជុំ​នេះ​ លោក ទេព នីថា បាន​អះអាងថា​អ្នក​បោះ​ឆ្នោត​មាន​ពេល​ច្រើន​ក្នុង​ការ​​ផ្ទៀង​ផ្ទាត់​ឈ្មោះ​របស់​ខ្លួន​​នៅក្នុង​បញ្ជី​ឈ្មោះ​បោះ​ឆ្នោត​ ដែល​ត្រូវ​បាន​​បិទ​​ផ្សាយ​រួច​ហើយ​នៅ​តាម​ការ​ិយា​ល័យ​ឃុំ សង្កាត់​នៅ​ទូទាំង​ប្រទេស​
​ចាប់​តាំង​ពី​ខែ​មករា​មក។ លោក​បាន​មាន​ប្រសាសន៍ថា ប្រជា​ពល​រដ្ឋ​​ត្រូវហ៊ាន​​ដាក់​ពាក្យ​បណ្តឹងពាក់​ព័ន្ធ​បញ្ហា​បែប​នេះ។

លោក​ ទេព នីថា បាន​មាន​ប្រសា​សន៍ថា​ “ ហេតុអ្វីបាន​ជា​​អស់​លោក​មិន​ដាក់​ពាក្យ​បណ្តឹង? អង្គការ​មិន​មែន​រដ្ឋាភិបាល​នៅ​តែ​និយាយថា ឈ្មោះ​បាន​បាត់​ពី​បញ្ជី​ឈ្មោះ​បោះឆ្នោត។ ប៉ុន្តែ​នៅ​ពេល​​គណៈ​កម្មា​ធិការ​ជាតិ​រៀប​ចំការ​បោះ​ឆ្នោត​សួរ​ឈ្មោះ​ពួក​គាត់​​
ពីរ​បីនាក់​ ដើម្បី​ឲ្យ​យើង​​អាច​ពិនិត្យ​មើល​នៅក្នុង​បញ្ជី​របស់​យើង​ ពួកគេ​មិន​ដែល​​ប្រាប់​​អ្វី​ដល់​យើង​ទេ។ គ្មាន​នរណាម្នាក់​បាន​ដាក់​ពាក្យ​បណ្តឹង​មក​យើង​ទេ នៅពេល​ពួកគេ​មិន​ឃើញ​ឈ្មោះ​របស់​ខ្លួន​នៅ​ក្នុង​បញ្ជី​នោះ”។

គណបក្ស​នយោបាយ​មាន​ពេល​រហូត​ដល់​​ថ្ងៃ​ទី​១៣​ខែ​ឧសភា ដើម្បី​ចុះ​ឈ្មោះ​សម្រាប់​ការ​បោះ​ឆ្នោត​នេះ​​ បន្ទាប់ពី​នោះ ​គណៈ​កម្មា​ធិការ​ជាតិ​រៀប​ចំការ​បោះ​ឆ្នោត​នឹង​ចំណាយ​ពេល​ប្រាំ​ពី​រថ្ងៃ​ដើម្បី​​រៀប​ចំ​បែប​បទ​​នោះ។ ប្រសិន​បើមាន​ការ​កែប្រែ​ គណបក្ស​ទាំងនេះ​មានពេល​ប្រាំ​ថ្ងៃ​ក្នុង​ការ​កែ​ប្រែ​បែបបទ៕

​​ប្រែសម្រួល​ដោយ សោម ​សារុន​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស