មន្ត្រីក្រសួងប្រៃសណីយ៍ និងទូរគមនាគមន៍ បានឲ្យដឹងកាលពីម្សិលមិញថា ក្រសួងនេះកាលពីថ្ងៃអាទិត្យ បានកែប្រែបទបញ្ជាដែលដាក់ចេញដោយអង្គភាពបញ្ញត្តិកររបស់ខ្លួន ដែលបានបង្ខំក្រុមហ៊ុនទូរស័ព្ទចល័តទាំងប្រាំបួងក្នុងប្រទេសកម្ពុជា ឲ្យគោរពតាមច្បាប់ដែលចែងអំពីតម្លៃអប្បបរមាសម្រាប់សេវាហៅចេញតាមទូរស័ព្ទ ទៅជាអនុញ្ញាតឲ្យក្រុមហ៊ុនទូរស័ព្ទចល័តទាំងនេះបន្តផ្តល់កម្មវិធីផ្តល់ទឹកប្រាក់បន្ថែមរបស់ខ្លួន។
លោក ឡាយ ម៉ារីវ៉ូ នាយករងបញ្ញត្តិករទូរគមនាគមន៍កម្ពុជា បានមានប្រសាសន៍ថា “ អង្គភាពបញ្ញត្តិករកំពុងតែអនុវត្តបទបញ្ញារបស់ក្រសួង ហើយយើងកំពុងតែពិនិត្យករណីនេះឡើងវិញ សម្រាប់ជាផលប្រយោជរបស់ប្រជាជន និងសាធារណជន”។
លោក ម៉ារីវ៉ូ បានពន្យល់ថា ក្រសួងប្រៃសណីយ៍ និងទូរគមនាគមន៍ កាលពីថ្ងៃអាទិត្យ បានបោះបង់ចោលសេចក្តីសម្រេចរបស់បញ្ញត្តិករទូរគមនាគមន៍កម្ពុជា កាលពីសប្តាហ៍មុន ដែលបានបង្គាប់ឲ្យក្រុមហ៊ុនទូរស័ព្ទចល័តទាំងអស់ គោរពតាមសេចក្តីប្រកាសឆ្នាំ២០០៩ ដែលចែងថា តម្លៃអប្បបរមា៤,៥សេនក្នុងមួយនាទី សម្រាប់សេវាហៅចេញក្នុងប្រព័ន្ធ និង៥,៩៥សេនក្នុងមួយនាទី សម្រាប់ការហៅចេញឆ្លងប្រព័ន្ធ។
យោងតាមសេចក្តីប្រកាស ដែលលោក សូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានបង្ហាញថា បញ្ញត្តិករទូរគមនាគមន៍កម្ពុជា បានជួបជាមួយក្រុមហ៊ុនប្រតិបត្តិការទូរស័ព្ទចល័ត កាលពីថ្ងៃទី២២ ខែមេសានិងម្តងទៀតនៅថ្ងៃទី២៦ខែមេសា ដើម្បីភាក្សាអំពីការអនុវត្តសេចក្តីប្រកាសនេះ។ ទោះបីជាយ៉ាងណាក៏ដោយ សេចក្តីសម្រេចថា ត្រូវអនុវត្តតាមសេចក្តីប្រកាសឆ្នាំ២០០៩
នេះ បច្ចុប្បន្នត្រូវបានលុបចោលវិញ។
សេចក្តីប្រកាសនេះមានខ្លឹមសារថា “ សូមបញ្ឈប់ការអនុវត្តសេចក្តីសម្រេចនៃកិច្ចប្រជុំ រវាងបញ្ញត្តិករទូរគមនាគមន៍កម្ពុជានិងក្រុមហ៊ុនទូរស័ព្ទចល័ត។ បញ្ញត្តិករទូរគមនាគមន៍កម្ពុជា ត្រូវបន្តពិភាក្សាជាមួយក្រុមហ៊ុនទូរស័ព្ទចល័ត ដោយយោងតាមច្បាប់ និងបទប្បញ្ញត្តិផ្សេងៗទៀត ដើម្បីកែសម្រួលគោលនយោបាយ បទដ្ឋាន និងបញ្ញត្តិពាក់ព័ន្ធផ្សេង ដែលផ្ទុយនឹងស្ថានភាពបច្ចុប្បន្ន”។
លោក ម៉ារីវ៉ូ បានមានប្រសាសន៍ថា កិច្ចប្រជុំក្នុងចំណោមក្រុមហ៊ុនទូរស័ព្ទទាំងអស់ ដែលគ្រោងនឹងចាប់ផ្តើមកាលពីរសៀលម្សិលមិញ ដើម្បីពិភាក្សាអំពីដំណោះស្រាយដែលអាចធ្វើទៅបាន ត្រូវបានលុបចោល
វិញ បន្ទាប់ពីលោកទទួលបានបញ្ជាពីក្រសួងប្រៃសណីយ៍ និងទូរគមនាគមន៍។
ក្រុមហ៊ុនទូរស័ព្ទចល័តនានា កាលពីម្សិលមិញ បានបង្ហាញអារម្មណ៍កក់ក្តៅ ចំពោះសេចក្តីសម្រេចរបស់ក្រសួងនេះ ហើយក្រុមហ៊ុនមួយចំនួនបានឲ្យដឹងថា ពួកគេនឹងដាក់ចេញកម្មវិធីផ្តល់ទឹកប្រាក់បន្ថែមរបស់ខ្លួន ក្នុងពេលឆាប់ៗខាងមុខនេះវិញ។
លោក ថូម៉ាស ហាន់ (Thomas Hundt) បានឲ្យដឹងតាមរយៈអុីម៉េលថា “ ក្រុមហ៊ុនទូរស័ព្ទចល័ត ស្មាត នៅតែមានជំហររឹងមាំ ទទួលបានការគាំទ្រពីអតិថិជន។ តម្លៃអប្បបរមាសម្រាប់សេវាទូរគមនាគមន៍នេះ នឹងមិនត្រូវបានអនុវត្ត ដោយរដ្ឋាភិបាលទេ ក៏ប៉ុន្តែ ទុកឲ្យទីផ្សារដំណើរការទៅតាមគោលការណ៍ទីផ្សារសេរី។ ក្រុមហ៊ុនទូរស័ព្ទចល័ត ស្មាត នឹងបន្តដាក់ចេញនូវតម្លៃ និងកម្មវិធីលើកទឹកចិត្តអតិថិជនរបស់ខ្លួនឲ្យបានឆាប់តាមលទ្ធភាពធ្វើទៅបាន”។
តាំងពីបានរួមកម្លាំងគ្នាជាមួយក្រុមហ៊ុនទូរស័ព្ទចល័ត ហេលឡូ កាលពីពាក់កណ្តាលខែកុម្ភៈ ក្រុមហ៊ុន ស្មាត ដែលស្ថិតក្រោមកម្មសិទ្ធិរបស់ក្រុមហ៊ុន អេហ្សៀតា គ្រុប ប៊ីអេជឌី (Axiata Group Bhd) ដែលមានមូលដ្ឋាននៅប្រទេសម៉ាឡេស៊ី បានដាក់ចេញនូវកម្មវិធីផ្តល់ទឹកប្រាក់បន្ថែម៥០០ភាគរយ ជាកម្មវិធីដែលក្រុមហ៊ុន ម៉ូប៊ីថែល បានចាត់ទុកថា ជាកម្មវិធីផ្តល់ជូនហួសកម្រិត៕
ប្រែសម្រួលដោយ កង សុធា