យោងតាមលិខិតមួយច្បាប់ផ្ញើពីក្រសួងកសិកម្ម រុក្ខាប្រមាញ់ និងនេសាទ ទៅឲ្យរដ្ឋបាលព្រៃឈើ កាលពី ខែកុម្ភៈ បានឲ្យដឹងថា ក្រសួងបានចុះហត្ថលេខាលើកិច្ចព្រមព្រៀងថ្មីមួយ ជាមួយក្រុមហ៊ុនទ្រី ភាព អាហរ័ណនីហរ័ណ ដើម្បីផ្ដល់សិទ្ធិផ្ដាច់មុខទៅឲ្យ
ក្រុមហ៊ុននេះ ក្នុងការទិញឈើទាំងអស់ ដែលគេកាប់រួចនៅក្នុងតំបន់ដីសម្បទានសេដ្ឋកិច្ច នៅក្នុងខេត្តរតនគិរី។
ចុះហត្ថលេខាដោយលោក ឡោ រស្មី អគ្គលេខាធិការក្រសួងកសិកម្ម និងផ្ញើជូនទៅឲ្យលោក ឆេង គឹមស៊ុន ប្រធានរដ្ឋបាលព្រៃឈើ
លិខិតនេះ បានលើកឡើងថា ក្រុមហ៊ុនដែលគ្រប់គ្រងដោយលោក ទ្រី ភាព ជាម្ចាស់ក្រុមហ៊ុនរ៉ែ និងកសិកម្ម និងជាម្ចាស់កាស៊ីណូ ត្រូវទទួលបានសិទ្ធិផ្ដាច់មុខក្នុងការទិញឈើនៅខេត្តរតនគិរី ដើម្បីបំពេញតម្រូវការក្នុងស្រុក និងសម្រាប់ការនាំចេញ ព្រមទាំងបង់សួយសាអាករ សម្រាប់បែងចែកចូលថវិកាជាតិ។
លិខិតដែលចុះនៅថ្ងៃទី២៦ ខែកុម្ភៈ បានលើកឡើងថា “ រដ្ឋបាលព្រៃឈើនឹងអនុញ្ញាតឲ្យក្រុមហ៊ុន ទ្រី ភាព អាហរ័ណ នីហរ័ណ អាចទិញឈើពីគ្រប់ដីសម្បទានសេដ្ឋកិច្ចទាំងអស់នៅក្នុងខេត្តរតនគិរី។
ទោះបីជាមន្ត្រីជាន់ខ្ពស់ក្នុងខេត្តរតនគិរីមួយរូបបានមានប្រសាសន៍ថា កិច្ចព្រមព្រៀងនេះ នឹងជួយធ្វើឲ្យកាន់តែស្របច្បាប់ក្នុងរកស៊ីឈើ នៅក្នុងខេត្តរតនគិរី តាមរូបភាពទិញឈើ ដែលគេកាប់រួចហើយ ឲ្យទៅក្រុមហ៊ុនតែមួយគត់ក្ដី តែអ្នកឃ្លាំមើលសិទ្ធិដីធ្លីប្រចាំខេត្តរតនគិរី បានលើកឡើងថា កិច្ចព្រមព្រៀងនេះ នឹងបង្កើតឲ្យមានទីផ្សារមួយដែលលើកទឹកចិត្តដល់ការកាប់ឈើខុសច្បាប់ និងធ្វើឲ្យសកម្មភាពបំផ្លាញព្រៃឈើកាន់តែមានការកើនឡើង។
លោក ប៉ាវ ហមផាន អភិបាលខេត្តរតនគិរីថ្លែងថា“ ការផ្ដល់សិទ្ធិផ្តាច់មុខទៅឲ្យក្រុមហ៊ុនទ្រី ភាព ដើម្បីទិញឈើដែលគេកាប់រួច នៅក្នុងតំបន់ដីសម្បទានសេដ្ឋកិច្ច គឺវាមានសារៈសំខាន់ណាស់ ក្នុងការទប់ស្កាត់សកម្មភាពដឹកជញ្ជូនឈើដោយខុសច្បាប់ និងធ្វើឲ្យការគ្រប់គ្រងកាន់តែល្អទៅលើឈើ ដែល គេកាប់រួចនៅតាមបណ្តាដីសម្បទានសេដ្ឋកិច្ចដែលត្រូវបានគេដឹកជញ្ជូនទៅកាន់តំបន់ផ្សេងៗ”។
ទោះបីជាការផ្ដល់ដីសម្បទានសេដ្ឋកិច្ចតម្រូវឲ្យធ្វើឡើងឲ្យស្របតាមច្បាប់ ដែលអនុញ្ញាតឲ្យកាប់ឈើតែនៅក្នុងដីសម្បទានសេដ្ឋកិច្ចរបស់ខ្លួន និងត្រូវបង់សួយសាអាករលើឈើ ដែលពួកគេបានកាប់ក្ដី តែសកម្មជនសហគមន៍ និងអ្នកឃ្លាំមើលបរិស្ថាន បានជំទាស់
ថា ក្រុមហ៊ុនជាច្រើនធម្មតាតែងតែកាប់ឈើនៅខាងក្រៅដីសម្បទានសេដ្ឋកិច្ចរបស់ខ្លួន ហើយបានដឹកជញ្ជូនឈើដោយខុសច្បាប់ឆ្លងកាត់ព្រំដែនយកទៅលក់នៅវៀតណាម។
ទោះជាយ៉ាងណា លោក ប៉ាវ ហមផានមានប្រសាសន៍ថា កិច្ចព្រមព្រៀងជាមួយក្រុមហ៊ុន ទ្រី ភាព និងអនុញ្ញាតឲ្យក្រុមហ៊ុននេះ មានសិទិ្ធគ្រប់គ្រងដីសម្បទានសេដ្ឋកិច្ចដើម្បីធ្វើឲ្យការដឹកជញ្ជូនឈើដោយស្របច្បាប់កាន់តែមានភាពងាយស្រួល និងអនុញ្ញាត
ឲ្យក្រុមហ៊ុននេះផ្ដោតលើការជំរុញសេដ្ឋកិច្ច ដោយដាំដំណាំផ្សេងៗ នៅលើផ្ទៃដី ដែលក្រុមហ៊ុននេះ បានកាប់រានរួច។
លោក ប៉ាវ ហមផាន ថ្លែងថា“ ឥឡូវនេះមានអ្នកទិញឈើស្របច្បាប់ហើយ ហើយក្រុមហ៊ុន ដែលទទួលបានដីសម្បទានសេដ្ឋកិច្ច
មិនចាំបាច់ព្រួយបារម្ភអំពីការស្វែងរកទីផ្សារ សម្រាប់លក់ឈើរបស់ខ្លួនទៀតឡើយ”។
ទោះជាយ៉ាងណា លោក ប៉ែន ប៊ុណ្ណារ៍ អ្នកស៊ើបអង្កេតជាន់ខ្ពស់ទទួលបន្ទុកផ្នែកសិទ្ធិដីធ្លី និងធនធានធម្មជាតិ របស់អង្គការសិទ្ធិមនុស្សអាដហុក លើកឡើងថា កិច្ចព្រមព្រៀងនេះ នឹងមានផលប៉ះពាល់អវិជ្ជមាន ដោយការលើកទឹកចិត្តឲ្យក្រុមហ៊ុនកាប់ឈើនៅខាងក្រៅតំបន់ដីសម្បទានសេដ្ឋកិច្ចរបស់ខ្លួន និងធ្វើឲ្យប៉ះពាល់យ៉ាងខ្លាំងដល់ព្រៃ និងឧទ្យានជាតិដែលត្រូវបានការពារ ក្នុងខេត្តរតនគិរី។
លោក ប៉ែន ប៊ុណ្ណារ៍ បានលើកឡើងថា “ កាលពីដើមឡើយ គ្មានទីផ្សារ ឬក៏អ្នកទិញដោយស្វ័យប្រវត្តិទេ សម្រាប់ឈើទាំងនេះនៅក្នុងប្រទេសកម្ពុជា ហេតុដូច្នេះក្រុមហ៊ុនចាំបាច់ត្រូវតែស្វែងរកអ្នកទិញ និងដឹកជញ្ជូនឈើទាំងអស់នេះដោយខ្លួនឯង។ តែឥឡូវមានទីផ្សារហើយនៅទីនេះ ហេតុដូច្នេះព្រៃឈើនឹងត្រូវរលាយអស់”។
យោងតាមតួលេខ ដែលចងក្រងដោយអង្គការអាដហុក បានឲ្យដឹងថា រដ្ឋាភិបាលកម្ពុជាបានផ្ដល់ដីសម្បទានសេដ្ឋកិច្ចនៅក្នុងខេត្តរតនគិរីទៅឲ្យក្រុមហ៊ុនចំនួន២៧ ដោយគ្របដណ្ដប់លើផ្ទៃដីសរុបទំហំ២២២.៩៣៣ហិកតា។ ជិតពាក់កណ្ដាលនៃដីសម្បទានសេដ្ឋកិច្ចទាំងនេះ មានដីទំហំ១០៨.៥១៣ហិកតាគឺស្ថិតក្នុងតំបន់ការពារឧទ្យានជាតិវីរជ័យដែលជាព្រៃការពារ ដែលត្រូវបានចុះបញ្ជីក្នុងបេតិកភណ្ឌតំបន់អាស៊ាន ដោយបានចាត់ទុកថា ជាតំបន់ការពារដ៏សំខាន់មួយ មានទំហំ៣៣០.០០០ហិកតា។
ទោះបីជារដ្ឋាភិបាលបានផ្ដល់ដីសម្បទានសេដ្ឋកិច្ចទាំងនេះ ក្នុងគោលបំណង ដើម្បីបង្កើនទិន្នផលកសិកម្មនៅក្នុងប្រទេសកម្ពុជានិងបង្កើតការងារធ្វើនៅតាមទីជនបទក្ដីតែអង្គការការពារសិទ្ធិមនុស្ស និងសកម្មជនការពារព្រៃឈើធ្លាប់បានជំទាស់យ៉ាងខ្លាំងចំពោះការផ្តល់សម្បទានដីនេះ ដោយពួកគេបានលើកឡើងថា ដីទាំងនេះត្រូវបានគេប្រើជាមធ្យោបាយ ដើម្បីលាក់បាំងសកម្មភាពរំលោភឱសានវាទឈប់ឲ្យរកស៊ីកាប់បែបពាណិជ្ជកម្ម កាលពីឆ្នាំ២០១២ ។
កាលពីខែកុម្ភៈ ឆ្នាំ២០១១ លោកនាយករដ្ឋមន្ត្រី ហ៊ុន សែន បានផ្ដល់ដីសម្បទានសេដ្ឋកិច្ចចំនួនពីរកន្លែងទំហំ១៨.៨៥៥ហិកតានៅក្នុងឧទ្យានមួយ នៅក្នុងតំបន់ដាច់ស្រយាលភាគឦសានប្រទេសកម្ពុជា ឲ្យទៅក្រុមហ៊ុន ទ្រី ភាព សម្រាប់រយៈពេល៧០ឆ្នាំ។ នៅក្នុងខែឧសភាក្នុងឆ្នាំដដែលនោះ ក្រុមហ៊ុនរបស់លោក ទ្រី ភាព ក៏ទទួលបានដីសម្បទានសេដ្ឋកិច្ចទំហំ៩.៩១៦ហិកតាមួយកន្លែងបន្ថែមទៀត សម្រាប់ធ្វើជាចម្ការ កៅស៊ូនៅក្នុងដែនជម្រកសត្វព្រៃបឹងពែ ក្នុងខេត្តព្រះវិហារ។
បន្ទាប់ពីទទួលបានដីសម្បទានសេដ្ឋកិច្ចនៅក្នុងដែនជម្រកសត្វព្រៃបឹងពែរួច លោកទ្រី ភាព បានផ្ដល់ប្រាក់ចំនួន១៣០.០០០ដុល្លារសម្រាប់គម្រោងគ្រប់គ្រងបរិស្ថាននៅក្នុងដែនជម្រកសត្វព្រៃនោះនិងផ្តល់ថវិកាសម្រាប់សាងសង់ទីស្នាក់ការថ្មីរបស់សាខាគណបក្សប្រជាជនកម្ពុជា នៅតំបន់នោះ ព្រមទាំងសម្រាប់ឲ្យទិញម៉ូតូថ្មីៗ និងកាមេរ៉ាឌីជីថល សម្រាប់មន្ត្រីធ្វើការនៅក្នុងដែនជម្រកសត្វព្រៃនោះផងដែរ។
កាលពីខែមករា ឆ្នាំ២០១១ ក្រុមហ៊ុន ទ្រី ភាព អាហរ័ណ នីហរ័ណ និងក្រុមហ៊ុនមួយចំនួនផ្សេងទៀត ត្រូវរាជរដ្ឋាភិបាលលុបចោលដីសម្បទានសេដ្ឋកិច្ច ដែលខ្លួនទទួលបាន នៅក្នុងខេត្តមណ្ឌលគិរី ដោយសារតែកង្វះការវិនិយោគ ខ្វះការអភិវឌ្ឍនៅក្នុងដីសម្បទានសេដ្ឋកិច្ចរបស់ខ្លួន។
ពេលទាក់ទងបានកាលពីម្សិលមិញលោកប៊ី ជីវ័ន្ដដារ៉ា តំណាងឲ្យក្រុមហ៊ុន ទ្រី ភាព អាហរ័ណ នីហរ័ណ បានបញ្ជាក់ថា ក្រុមហ៊ុនរបស់ខ្លួនទទួលបានសិទ្ធិទិញឈើ ដែលកាប់ក្នុងតំបន់ដីសម្បទានសេដ្ឋកិច្ចទាំងអស់នៅក្នុងខេត្តរតនគិរី ប៉ុន្ដែ មិនបានរៀបរាប់លម្អិតពីគម្រោងទិញឈើរបស់ក្រុមហ៊ុននេះឡើយ។
តែលិខិតពីក្រសួងកសិកម្មបានលើកឡើងថា ក្រុមហ៊ុន ទ្រី ភាព អាហរ័ណ នីហរ័ណ គួរតែទាក់ទងដោយផ្ទាល់ជាមួយក្រុមហ៊ុនដែលទទួលបានដីសម្បទានសេដ្ឋកិច្ចទាំងអស់ ប៉ុន្ដែ មិនបានបញ្ជាក់ឲ្យបានច្បាស់អំពីរបៀប ដែលក្រុមហ៊ុននីមួយៗ នឹងត្រូវសហការគ្នាជាមួយក្រុមហ៊ុននេះ ឬក៏ថា តើនឹងមានការពិន័យណាមួយដែរឬទេ ប្រសិនបើក្រុមហ៊ុនដែលទទួលបានដីសម្បទានសេដ្ឋកិច្ចលក់ឈើទៅឲ្យក្រុមហ៊ុនផ្សេងនោះ។
លោក ទឹម ស៊ីផា ប្រធាននាយកដ្ឋាន នីតិកម្មនិងអនុវត្តច្បាប់របស់រដ្ឋបាលព្រៃឈើ បានលើកឡើងថា លោកមិនបានដឹងពីការសម្រេចនេះទេ ហើយលោកបានបង្វែសំណួរទៅឲ្យថ្នាក់លើរបស់ខ្លួន គឺលោក ឆេង គឹមស៊ុន ដែល
មិនអាចទាក់ទងសុំការអត្ថាធិប្បាយបានទេ កាលពីម្សិលមិញ។
លោក ច័ន្ទ សារុន រដ្ឋមន្ត្រីក្រសួងកសិកម្មនិងលោក ឡោ រស្មី អគ្គលេខាធិការរបស់លោក ដែលបានចុះហត្ថលេខាលើកិច្ចព្រមព្រៀងនេះជាមួយលោក ទ្រី ភាព ក៏មិនអាចទាក់ទងបានដែរ៕
ប្រែសម្រួលដោយ ស៊ា ស៊ុយឈាង