កាលពីម្សិលមិញ ក្រុមហ៊ុន ប៊ូយ៉ុង គ្រុប (Booyoung Group) ដែលជាក្រុមហ៊ុនមួយរបស់ប្រទេសកូរ៉េខាងត្បូងបានបើកការដ្ឋានសាងសង់ទីក្រុងរណបមួយ ដែលមានទំហំទឹកប្រាក់វិនិយោគចំនួន១,១ពាន់លានដុល្លារ នៅតាមបណ្តោយមហាវិថីសហព័ន្ធរុស្ស៊ី ក្នុងខណ្ឌសែនសុខ ដែលបើកការដ្ឋានធំទី២នៅរាជធានីភ្នំពេញក្នុងរយៈពេលមួយខែមកនេះ។
ទីក្រុងរណប ដែលត្រូវដាក់ឈ្មោះថា ក្រុងប៊ូយ៉ុង១ (Booyoung Town I) នេះ ត្រូវសាងសង់នៅលើផ្ទៃដីទំហំ២៣,៥ហិកតាក្នុងសង្កាត់ទឹកថ្លា។
លោក អឹុម ឈុនលឹម រដ្ឋមន្ត្រីក្រសួងរៀបចំដែនដី បានលើកឡើងក្នុងសុន្ទរកថា កាលពីម្សិលមិញនៅឯពិធីបើកការដ្ឋានសាងសង់នេះថា គម្រោងនេះមានអគារពាណិជ្ជកម្ម គេហដ្ឋានប្រណីតៗ មជ្ឈមណ្ឌលកីឡា និងសាលារៀន។
លោក អឹុម ឈុនលឹម បានមានប្រសាសន៍ថា “ នេះគឺជាការរួមចំណែកដ៏សំខាន់មួយក្នុងការជំរុញកំណើនសេដ្ឋកិច្ច និងការអភិវឌ្ឍនៅក្នុងវិស័យសំណង់ នគរូបនីយកម្ម និងអចលនទ្រព្យនៅក្នុងប្រទេសកម្ពុជា”។ ក៏ប៉ុន្តែ លោកមិនបានផ្តល់ព័ត៌មានលម្អិតណាមួយថា តើក្រុមហ៊ុន ប៊ូយ៉ុង គ្រុប បានទិញដីនេះក្នុងតម្លៃប៉ុន្មាន ឬក៏ថា តើនរណាជាម្ចាស់ដីនេះ កាលពីពេលមុននោះទេ។
ការអភិវឌ្ឍនេះគឺជាការអភិវឌ្ឍលើកដំបូង ដែលក្រុមហ៊ុនអចលនទ្រព្យរបស់ប្រទេសកូរ៉េខាងត្បូងមួយនេះនឹងវិនិយោគនៅក្នុងការអភិវឌ្ឍអចលនទ្រព្យដ៏ធំបែបនេះ ចាប់តាំងពីទីក្រុងកាំកូ ស៊ីធី (Camko City) ជាទីក្រុងរណ៌របស់ប្រទេសកូរ៉េខាងត្បូងមួយផ្សេងទៀតដែលមានទំហំទឹកប្រាក់វិនិយោគចំនួន២ពាន់លានដុល្លារ បានជួបនឹងបញ្ហាលំបាកដោយសារមានការចោទប្រកាន់ថា វិនិយោគិនធំរបស់ខ្លួន គឺធនាគារ ប៊ូសាន សេវវីង (Busan Savings Bank) ជាប់ពាក់ព័ន្ធនឹងការប្រើប្រាស់ហិរញ្ញប្បទានដោយខុសច្បាប់សម្រាប់ការចរចាធ្វើអាជីវកម្មនៅកូរ៉េខាងត្បូង និងនៅបរទេស។
បុរីហ្គ្រែន ភ្នំពេញ នៅខណ្ឌសែនសុខ ព្រមទាំងទីក្រុងរណបមួយចំនួនទៀត ដែលរួមមានការអភិវឌ្ឍបុរី ហ្គាដិន ស៊ីធី (Garden City) របស់លោក លី យ៉ុងផាត់ សមាជិកព្រឹទ្ធសភាមកពីគណបក្សប្រជាជនកម្ពុជាជាដើម ដែលបានបើកការដ្ឋានសាងសង់ កាលពីខែមុន បច្ចុប្បន្ននេះកំពុងតែស្ថិតនៅក្រោមការសាងសង់នៅក្នុងរាជធានីភ្នំពេញ ហើយកំពុងសាងសង់បំពេញផ្ទៃដីសន្សឹមៗ។
លោក សឹុង ប៊ុណ្ណា នាយកក្រុមហ៊ុន ប៊ុណ្ណារៀលធី គ្រុប បានមានប្រសាសន៍ថា ក្រុមហ៊ុន
ប៊ូយ៉ុង គ្រុប មានកម្មសិទ្ធិលើដីមានតម្លៃមួយកន្លែង ក៏ប៉ុន្តែលោកបានមានប្រសាសន៍ថា នៅចាំមើលសិន តើមានតម្រូវការលើការអភិវឌ្ឍបែបនេះប៉ុណ្ណា។
លោកបានលើកឡើងថា “ សម្រាប់ទីក្រុងរណបមួយនេះ វាគឺជាទីតាំងដ៏សំខាន់មួយពីព្រោះវាស្ថិតនៅជិតអាកាសយានដ្ឋាន និងស្ថិតនៅក្នុងតំបន់ដែលមានមនុស្សរស់នៅច្រើន” ហើយលោកបានបន្ថែមទៀតថា រូបលោកមិនទាន់បានឃើញគម្រោងទាំងនេះនៅឡើយទេ។
លោក សឹុង ប៊ុណ្ណា បានបន្តទៀតថា “ ពិតមែនហើយ វាចាំចាច់ត្រូវតែមានការត្រៀមរៀបចំឲ្យបានល្អ ហើយវាត្រូវការសំណង់ល្អ ប្រសិនបើធ្វើបានល្អមែន វាអាចជាការអភិវឌ្ឍដ៏ល្អដាច់គេមួយ” នៅក្នុងទីផ្សារដ៏មានការប្រកួតប្រជែងខ្លាំង៕
ប្រែសម្រួលដោយ ហួង កុកទៀន