កាលពីម្សិលមិញ លោក ជាម យៀប តំណាងរាស្ត្រគណបក្សប្រជាជនកម្ពុជាបានផ្ញើលិខិតមួយច្បាប់ជូនលោកនាយករដ្ឋមន្ត្រី ហ៊ុន សែន និងលោក ហេង សំរិន ប្រធានរដ្ឋសភា ដោយស្នើសុំឲ្យរដ្ឋាភិបាលបង្កកប្រាក់ខែរបស់សមាជិកតំណាងរាស្ត្រមកពីគណបក្សសង្គ្រោះជាតិទាំងអស់ ដោយលោកលើកហេតុផលថា គណបក្ស ដែលទើបបង្កើតថ្មីនេះមិនទាន់បានតែងតាំងសមាជិករបស់ខ្លួននៅក្នុងរដ្ឋសភាឲ្យស្របច្បាប់នោះទេ។
យោងតាមលោក ជាម យៀប បានឲ្យដឹងថា គណបក្សសង្គ្រោះជាតិ ដែលកើតឡើងដោយការច្របាច់បញ្ចូលគ្នារវាងគណបក្ស សម រង្ស៊ី និងគណបក្សសិទិ្ធមនុស្សនោះ នៅតែមានឈ្មោះផ្លូវការក្នុងរដ្ឋសភា ក្នុងនាមជាគណបក្សចាស់នៅឡើយ ដូច្នេះពួកគេមិនគួរទទួលបានប្រាក់ខែទេ។
លោក ជាម យៀប បានមានប្រសាសន៍ថា“ គណបក្សសង្គ្រោះជាតិអត់មាននៅក្នុងរដ្ឋសភាទេ”។លោកបន្ថែមថា អាសនៈរបស់សមាជិកសភាមកពីគណបក្សសង្គ្រោះជាតិនៅក្នុងសភា គួរតែទុកឲ្យនៅទំនេររហូតដល់ការបោះឆ្នោតរួច។
លោក ជាម យៀប បានមានប្រសាសន៍ជម្រាបលោកនាយករដ្ឋមន្ត្រីថា“ យើងបានផ្ញើលិខិត…ដើម្បីស្នើសុំការបង្កកប្រាក់ខែរបស់ពួកគេ។ ហើយប្រាក់នោះនឹងត្រូវរក្សាទុក និងត្រូវផ្ទេរចូលក្នុងហិរញ្ញវត្ថុរបស់រដ្ឋាភិបាល…។ ប៉ុន្ដែ ពេលនេះ យើងកំពុងរង់ចាំការសម្រេចរបស់សម្ដេច”។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានមានប្រសាសន៍ថា លិខិតនោះគ្រាន់តែជារូបភាពមួយផ្សេងទៀត ដែល
គណបក្សប្រជាជនកម្ពុជាមានបំណងបង្កភាពច្របូកច្របល់ក្នុងចំណោមអ្នកបោះឆ្នោត និងមានបំណងបំបែកបំបាក់គណបក្សប្រឆាំង។
លោកមានប្រសាសន៍ថា “ គេធ្វើបែបនេះ ព្រោះគេឃើញប្រជាប្រិយភាពរបស់យើងកើនឡើង។ យើងបានលើកឡើងអំពីបញ្ហាជាច្រើនពាក់ព័ន្ធនឹងកំហុសរបស់គណបក្សប្រជាជនកម្ពុជា ដូច្នេះ គេចង់ទាត់យើងចោល តាមវិធីនេះ”។
លោក យឹម សុវណ្ណ ក៏បានមានប្រសាសន៍ផងដែរថា ការដកអាសនៈដែលគណបក្សសង្គ្រោះជាតិមានភាគច្រើននៅក្នុងរដ្ឋសភា គឺរំលោភរដ្ឋធម្មនុញ្ញហើយ។
លោក យឹម សុវណ្ណ បានមានប្រសាសន៍បន្ថែមថា“ បើយោងតាមរដ្ឋធម្មនុញរដ្ឋសភាត្រូវតែមានសមាជិកតំណាងរាស្ត្រយ៉ាងតិច១២០រូប។ បើគ្មានអាសនៈទាំង២៩របស់[គណបក្សសង្គ្រោះជាតិ]ទេនោះនឹងមានអាសនៈសល់តែ៩៤ប៉ុណ្ណោះ។នោះមិនមែនជារដ្ឋសភាទៀតឡើយ។ នោះគឺខុសច្បាប់ហើយ”៕
ប្រែសម្រួលដោយ ហម សុផាណ្ណា