29 C
Phnom Penh

អភិបាល​​​​​ខេត្តកំពង់ធំ​​​ថ្មី​សន្យា​​​ផ្ដល់ដី​​​​​ឲ្យ​អ្នក​​​ភូមិ​​​ជាង​​​៥០០​​​គ្រួសារ ដែល​​​ត្រូវ​​​​បាន​បណ្ដេញ​​​ចេញ​​​ពី​ដី​

ដោយ ឌឹ ខេមបូឌា ដេលី

បទវិភាគ

កាល​​​ពី​​​ថ្ងៃ​​​អង្គារ អភិបាល​​​ខេត្ត​​​កំពង់ធំដែល​​​ទើប​​​តែង​​​តាំង​​​ថ្មីបាន​​​សន្យា​​​ចំពោះ​​​ប្រជា​​​​​​ពលរដ្ឋ​​​ជាង​​​៥០០​​​គ្រួសារ ដែល​​​ត្រូវ​​​បាន​​​ក្រុមហ៊ុន​​​ចម្ការ​​​កៅស៊ូ​​​វៀតណាម​បណ្ដេញ​​​ចេញ​​​ពី​លំនៅ​ដ្ឋាន​របស់​ខ្លួន​ដោយ​​​បង្ខំកាល​ពី​ជាង​​​បី​​​ឆ្នាំ​​​មុន​នោះ​ថា ​ពួក​គាត់​នឹង​​​ទទួល​​​បាន​​​ដីស្រែ​​​ជំនួស​​​វិញ​​​នៅ​​​ដើម​​​ខែ​​​​​​ក្រោយ​​​នេះ ។

កង​​​កម្លាំង​​​សន្តិសុខ បាន​​​បណ្ដេញ​​​​​​អ្នក​​​ភូមិ​​​ចេញ​​​ពីឃុំក្រយា​​​នៅក្នុង​ស្រុកសន្ទុក កាល​​​ពី​​​ខែ​​​ធ្នូ ឆ្នាំ២០០៩ដើម្បី​​​ទុក​ដី​នោះ​​​​ឲ្យក្រុមហ៊ុន​​​អភិវឌ្ឍន៍​​​ចម្ការ​​​កៅស៊ូ តាន់ បៀន (Tan Bien) នៅ​ខេត្ត​កំពង់ធំ ដែល​​​បាន​​​ទទួល​​​ដីសម្បទាន​​​ទំហំ៨.១០០ហិកតា​​​នៅ​​​ក្នុង​​​តំបន់​​​នេះ។​​​

គ្រួសារ​​​​​​ទាំង​​​​​​នេះ បាន​​​រស់​​​នៅ​​​លើ​​​ទី​តាំង​​​ថ្មី​​​មួយ ដែល​គ្មាន​​​ដី​​​ស្រែ​​​ចម្ងាយ​​​​ប្រហែល​​​ប្រាំគីឡូ​​​ម៉ែត្រ​​​អស់រយៈ​ពេលបី​​​ឆ្នាំ​មក​ហើយ​។
លោក​​​ អ៊ុត សំអន អភិបាល​​​ខេត្ត ដែល​​​បាន​​​ស្បថ​​​ចូល​​​កាន់​​​​​តំណែង​​​កាល​​​ពី​​​​​​ថ្ងៃ​​​ច័ន្ទ បាន​​​មាន​​​ប្រសាស​​​ន៍ថា នៅ​​​ពេល​​​នេះ គ្រួសារ​​​ទាំង​​​​​​នេះ​​​នឹង​​​ទទួល​​​បាន​​​ដីស្រែ​​​បន្ថែម​​​​ពី​​​១ ​​​ទៅ​​​១,៥​​​ហិកតាសម្រាប់​​​គ្រួសារ​​​នីមួយៗ​​​នៅ​​​ក្នុង​​​ទីតាំង​​​ដាច់​​​ដោយ​​​ឡែក​​​មួយ ដែល​​​ស្ថិត​​​នៅ​​​ក្បែរនោះ​។

លោកបាន​​​មាន​​​ប្រសាស​​​ន៍​​​ថា “នៅ​​​ដំណាច់​​​​​​ខែឧសភា ឬនៅ​​​ដើម​​​ខែមិថុនា ដី​​​ស្រែ​​​នេះ ​​​នឹង​​​​​​ប្រគល់​​​ឲ្យ​​​គ្រួសារ​​​ទាំង​​​នេះ”។
លោក អ៊ុត សំអន បាន​​​មាន​​​ប្រសាស​​​ន៍​​​បន្ថែម​​​ថា “ គ្រួសារ​​​ទាំង​​​នេះ បាន​​​ជួប​​​ការ​​​លំបាកជា​​​ច្រើន​​​នៅ​​​ក្នុងជីវភាព​​​រស់​​​នៅ​​​របស់​​​ពួកគាត់ ហើយ​​​ជាពិសេស​​​ជន​​​ចាស់​​​ជរា និង​​​ជនពិការ។យើង​​​កំពុង​​​ធ្វើ​​​ការ​​​យ៉ាង​​​ខ្លាំង ​​​ដើម្បី​​​​​​រក​​​ដី​​​ឲ្យ​​​គ្រួសារ​​​ទាំង​​​នេះ ប​​​៉ុន្តែ ដី​​​​​​មួយ​​​ចំនួន​​​ប៉ះពាល់​​​ដល់​​​គ្រួសារ​​​ផ្សេង​​​ទៀត ។

លោក សំ ប៊ុនធឿន អាយុ​​​៤៣​​​ឆ្នាំជា​​​​អ្នក​ភូមិ​ម្នាក់​ក្នុង​​​ចំណោម​​​អ្នក​​​ភូមិ ដែល​​​ត្រូវ​​​បណ្ដេញ​​​ចេញ បាន​​​និយាយ​​​ថា គាត់​​​មិន​​​ទាន់​​​ឃើញ​​​ឈ្មោះ​​​គ្រួសារ​​​របស់​​​គាត់​​​នៅ​​​ក្នុង​​​បញ្ជី របស់​​​អាជ្ញាធរ​​​​​​​​​មូលដ្ឋាននៅ​​​ឡើយ ​​​ហើយ​​​​​​ថា ​​​គាត់បាន​​​រាយ​​​ការណ៍​​​អំពី​​​បញ្ហា​​​នេះ​​​ទៅ​​​មេភូមិ​​​​​​
របស់​​​គាត់​​​រួច​​​ហើយ។

លោក សំ ប៊ុនធឿន បាន​​​និយាយ​​​ថា  “យើង​​​​លំបាក​រស់​នៅ​ទី​នេះ​​​​ខ្លាំង​​​ណាស់​​​ [នៅ​​​ទី​​​​តាំង​​​ថ្មី​​] ពីព្រោះ​​​យើង​​​គ្មាន​​​ដី​​​ស្រែ​​​ធ្វើ។យើង​​​ធ្វើ​​​ការជា​​​កម្មករ​​​នៅ​​​ចម្ការ​​​កៅស៊ូ​​​វៀតណាម​​​នេះ ប៉ុន្តែ វា​​​មិន​​​អាច​​​ទ្រ​​​ទ្រង់​​​ជីវភាព​​​គ្រួសារ​​​បាន​​​ទាំង​​​ស្រុង​​​នោះ​​​ទេ ដោយសារ​​​យើង​​​គ្មាន​​​
ការ​​​ងារ​​​ធ្វើ​​​ប្រចាំ​​​ថ្ងៃ”។

លោក ញែ៉ម សារ៉ាត់ អ្នក​​​សម្រប​​​សម្រួល​​​របស់​​​អង្គការ​​​អាដ​​​ហុក​​​ប្រ​​​ចាំ​​​ខេត្ត​​​កំពង់ធំ បាន​​​មាន​​​ប្រសាស​​​ន​​​៍ថា កង្វះស្បៀង​​​អាហារ គឺជា​​​បញ្ហា​​​ដ៏​​​ធំមួយ​​​សម្រាប់​​​​​​អ្នក​​​ភូមិ ដែល​​​ត្រូវ​​​បណ្ដេញ​​​ចេញទាំង​នេះ។ លោកបាន​​​មាន​​​ប្រសាស​​​ន៍​​​ថា “ បញ្ហា​​​ដែលបង្ក​​​ឡើង​​​ដោយ​​​អាជ្ញាធរ​​​ខេត្ត​ចំពោះ​ការ​​​​មិន​​​បាន​​​ជួយ​​​អ្នក​​​ភូមិ​​​ទាំង​​​នេះ​​​ឲ្យ​​​បាន​ទាន់​​​ពេល​នោះ​ បាន​​ធ្វើ​​​​ឲ្យ​​​ពួក​​​គាត់​​​ខ្វះ​​​អាហារ ហើយ​​​គ្រួសារ​​​មួយ​​​ចំនួន​​​បាន​​​ចាក​​​ចេញ​​​ពី​​​ទីតាំង​​​ថ្មី​​នេះ”៕

ប្រែសម្រួលដោយ ស៊ុំ សុខភុំ

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស