29 C
Phnom Penh

ក្រុម​ហ៊ុន​វិនិយោគ​មួយ​សម្តែង​ការ​មិន​ពេញ​ចិត្ត​ចំពោះ​ការ​យក​ពន្ធ​លើ​ការ​នាំ​ចេញ​អាហារ​សមុទ្រ

ដោយ ឌឹ ខេមបូឌា ដេលី

បទវិភាគ

ក្រុម​ហ៊ុន​វិនិយោគ​ហុងកុង​ដ៏​សំខាន់​មួយ​នៅ​ក្នុង​ប្រទេស​កម្ពុជា​បាន​លើក​ឡើង​ថា​ ការ​យក​ពន្ធ​របស់​រដ្ឋា​ភិបាល​លើ​ការ​នាំ​ចេញ​អាហារ​សមុទ្រ​ធ្វើ​ឲ្យ​ឧស្សាហកម្ម​កែ​ច្នៃ​ត្រី​នៅ​ប្រទេស​កម្ពុជា​មាន​ការ​រអាក់​រអួល។

សម្ពន្ធ​ សាន់វ៉ា​ (Sunwa)​ ដែល​មាន​មូល​ដ្ឋាន​នៅ​ទី​ក្រុង​ហុង​កុង​បាន​ចាប់​ផ្តើម​ដំណើរ​ការ​រោង​ចក្រ​កែ​ច្នៃ​បង្គា​មួយ​កន្លែង​នៅ​ខេត្ត​ព្រះ​សីហនុ​ កាល​ពី​ឆ្នាំ​១៩៩៤​ ហើយ​ផែន​ការ​របស់​សម្ពន្ធ​នេះ​នៅ​ក្នុង​ប្រទេស​កម្ពុជា​នាពេល​បច្ចុប្បន្ន​នេះ​មាន​ផែន​ការ​សាង​សង់​អគារ​ខ្ពស់​មួយ​កន្លែង​ដែល​មាន​ទំហំ​ទឹក​ប្រាក់​វិនិយោគ​ចំនួន​៤០០​លាន​ដុល្លារ​នៅ​ណ្តាល​រាជ​ធានី​ភ្នំ​ពេញ។

នៅ​ក្នុង​សន្និសីទ​សារព័ត៌​មាន​ កាល​ពី​ថ្ងៃ​អង្គារ​ លោក​ ចូណាថាន់​ ឈ័រ​ (Jonathan Choi)​ ប្រធាន​សម្ពន្ធ​ សាន់វ៉ា​ បាន​មាន​ប្រសាសន៍​ថា​ ការ​យក​ពន្ធ​ចំនួន​១០​ភាគ​រយ​លើ​ការ​នាំ​ចេញ​អាហារ​សមុទ្រ​ បាន​ធ្វើ​ឲ្យ​ក្រុម​ហ៊ុន​នេះ​មិន​អាច​បង្កើន​ប្រតិបត្តិការ​របស់​ខ្លួន​នៅ​ប្រទេស​កម្ពុជា​បាន​ ហើយ​វា​ជា​កត្តា​ដ៏​សំខាន់​មួយ​នៅ​ក្នុង​ឧស្សាហកម្ម​អាហារ​សមុទ្រ​ដែល​មាន​ទ្រង់​ទ្រាយ​តូច​នៅ​ប្រទេស​កម្ពុជា។

លោក​បាន​មាន​ប្រសាសន៍​ថា​ “ ប្រសិន​បើ​អ្នក​យក​ពន្ធ​ចំនួន​១០​ភាគ​រយ​ លើការ​នាំ​ចេញ​នោះ​ផលិត​ផល​ដែល​ផលិត​នៅ​ទីនេះ​មិន​អាច​ប្រកួត​ប្រជែង​បាន​ទេ។​ អ្នក​នេសាទ​ឆ្លាត​​​​ណាស់​ គឺ​ថា​ ប្រសិន​បើ​អ្នក​បញ្ចុះ​ថ្លៃ​១០​ភាគ​រយ​ដោយសារ​តែ​ពន្ធ​ដែល​អ្នក​បង់​ឲ្យ​រដ្ឋា​ភិបាល​ ពេល​នោះ​ពួក​គាត់​នឹង​លក់​ទៅ​ឲ្យ​ប្រទេស​ថៃ​ ពួកគាត់​នឹង​លក់​ទៅ​ឲ្យ​ប្រទេស​វៀត​ណាម​ [​ដែល​គេ​មិន​យក​ពន្ធ​លើ​ការ​នាំ​ចេញ​អាហារ​សមុទ្រ​]​”។

លោក​ ឈ័រ​ បាន​មាន​ប្រសាសន៍​ថា​ លោក​​​បាន​ឃើញ​ទូក​នេសាទ​កម្ពុជា​ទៅ​លក់​ផល​នេសាទ​របស់​ខ្លួន​នៅ​កំពង់​ផែ​វៀត​ណាម​ ដែល​ពួក​គាត់​អាច​ទទួល​បាន​តម្លៃ​ខ្ពស់​ជាង​។

លោក​ បាន​ឲ្យ​ដឹង​ទៀត​ថា​ សម្ពន្ធ​ សាន់វ៉ា​ ដែល​មាន​រោង​ចក្រ​កែ​ច្នៃ​អាហារ​សមុទ្រ​នៅ​ប្រទេស​ថៃ​ និង​វៀត​ណាម​ ហើយ​មាន​ផែន​ការ​សាង​សង់​គម្រោង​អចលន​ទ្រព្យ​ទំនើប​លើ​ផ្ទៃ​ដី​មួយ​ប្លង់​នៅ​ជិត​កាស៊ីណូ​ ណាហ្គា​​​វើល​(NagaWorld)​ ផងដែរ​នោះ​ បាន​កាត់​បន្ថយ​បុគ្គលិក​របស់​ខ្លួន​ពី​ជា​ច្រើន​រយ​នាក់​មក​នៅ​មិន​ដល់​១០០​នាក់​ផង​ ហើយ​បុគ្គលិក​ទាំង​នោះ​ទៀត​សោតធ្វើ​ការ​តាម​រដូវ​កាល​ ដោយ​​​សារ​កង្វះ​វត្ថុ​ធាតុ​ដើម​សម្រាប់​យក​មក​កៃ​ច្នៃ។

លោក​បាន​មាន​ប្រសាសន៍​ថា​ “រោង​ចក្រ​របស់​យើង​ស្ថិត​នៅ​កំពង់​ផែ​ខេត្ត​ព្រះ​សី​ហនុ​អស់​រយៈ​ពេល​២០​ឆ្នាំ​ហើយ​ ហើយ​មិន​អាច​ធ្វើ​ការ​ងារ​បាន​ទេ។​ [វា​ផលិត​]​ បាន​បរិមាណ​តិច​តួច​តែ​ប៉ុណ្ណោះ​”។

លោក​ ឈ័រ​ បាន​បន្ថែម​ទៀត​ថា​ លោក បា​​​ន​បង្ហាញ​គំនិត​​​របស់​លោក​ដល់​រដ្ឋ​មន្ត្រី​នៅ​ក្នុង​រដ្ឋាភិបាល​កម្ពុជា​ហើយ។ លោក​បាន​មាន​ប្រសាសន៍​ថា​ “ខ្ញុំ​បាន​ប្រាប់​​​​ពួក​គាត់​ថា​ ប្រសិន​បើ​លោក​ចង់​ពង្រីក​ឧស្សា​​​ហកម្ម​របស់​លោក​ លោក​គួរ​តែ​លើក​ទឹក​ចិត្ត​ចំពោះ​ការ​នាំ​ចេញ​ ជា​ជាង​ដាក់​ទណ្ឌ​កម្ម​ចំពោះ​ការ​នាំ​ចេញ​”។

លោក​ សុខ​ សុវិទ្យា​ អនុ​ប្រធាន​អង្គភាព​ទំនាក់​ទំនង​សាធារណៈ​នៅ​ឯ​អគ្គនាយក​ដ្ឋាន​គយ​ និង​រដ្ឋាករ​ បាន​មាន​ប្រសាសន៍​ថា​ ការ​​​
យក​ពន្ធ​ចំនួន​១០​ភាគ​រយ​ត្រូវ​បាន​យក​លើ​ផលិត​ផល​ជាក់​លាក់​មួយ​ចំនួន​តែ​ប៉ុណ្ណោះ​ដូចជា​ អាហារ​សមុទ្រ​ ដែល​ត្រូវ​បាន​គេ​ចាត់​ទុក​ថា​ជា​ធន​ធាន​ធម្ម​ជាតិ។

លោក​បាន​​ឲ្យ​ដឹង​​ថា​ “ការ​យក​ពន្ធ​ចំនួន​១០ភាគរយ​គឺ​សម្រាប់​ត្រី​មិន​ទាន់​កែ​ច្នៃ។​ សម្រាប់​​​​ត្រី​ដែល​បាន​កែច្នៃ​រួច​ ការ​យក​ពន្ធ​មាន​កម្រិត​ទាប” ហើយ​លោក​បាន​បន្ថែម​ទៀតថា​ រដ្ឋា​ភិបាល​នឹង​យក​ចិត្ត​ទុក​ដាក់​ចំពោះការ​លើក​ឡើង​ទាំង​នេះ​ពី​សំណាក់​ក្រុម​ហ៊ុន​៕

ប្រែសម្រួល​ដោយ​ ហួង​ កុក​ទៀន

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស