កាលពីថ្ងៃសុក្រ គណបក្សសង្គ្រោះជាតិបានចុះឈ្មោះបេក្ខជនរបស់ខ្លួនចំនួន២៦៤រូប ជាមួយគណៈកម្មាធិការជាតិរៀបចំការបោះឆ្នោត ដើម្បីប្រកួតប្រជែងនៅក្នុងការបោះឆ្នោតជាតិថ្ងៃទី២៨ ខែកក្កដា ដែលការចុះឈ្មោះនេះធ្វើឡើងមុនពេលផុតកំណត់តែបីថ្ងៃប៉ុណ្ណោះ។
លោក យឹម សុវណ្ណ អ្នកនាំពាក្យរបស់គណបក្សសង្គ្រោះជាតិបានមានប្រសាសន៍ថា គណបក្សបានសម្រេចរៀបចំឯកសារចុះឈ្មោះ បន្ទាប់ពីបានគិតអំពីការគាំទ្រគណបក្ស ប៉ុន្តែលោកបានមានប្រសាសន៍ថា គណបក្សនេះនឹងនៅតែបន្ដប្រឆាំងចំពោះការមិនកែទម្រង់នៅក្នុងគណៈកម្មាធិការជាតិរៀបចំការបោះឆ្នោត។
លោកបានមានប្រសសន៍ថា“ យើងទើបតែចុះឈ្មោះនៅរសៀលនេះ ព្រោះយើងយល់ថា យើងមានការគាំទ្រច្រើន។ ប្រជាពលរដ្ឋជាច្រើននឹងបោះឆ្នោតឲ្យយើង។ យើងត្រូវតែការពារឆន្ទៈរបស់ប្រជាពលរដ្ឋ ដើម្បីកំុឲ្យពួកគាត់ខកចិត្ត”។
លោក កឹម សុខា អនុប្រធានគណបក្សសង្គ្រោះជាតិ និងលោកស្រី មូរ សុខហួរ តំណាងរាស្ត្រគណបក្ស សម រង្ស៊ី លោក សុន ឆ័យ ព្រមទាំលោក យឹម សុវណ្ណ គឺស្ថិតក្នុងចំណោមបេក្ខជនទាំងនោះ ប៉ុន្ដែលោក សម រង្ស៊ី ប្រធានគណបក្ស មិនបានស្ថិតក្នុងចំណោមអ្នកទាំងនោះទេ ព្រោះគណៈកម្មាធិការជាតិរៀបចំការបោះឆ្នោតបានលុបឈ្មោះគាត់ចេញពីបញ្ជីឈ្មោះបោះឆ្នោត កាលពីពីរបីខែមុននេះ។
លោក យឹម សុវណ្ណ ថ្លែងថា“ យើងត្រូវដាក់បញ្ជីឈ្មោះបេក្ខជនរបស់យើង និងតវ៉ាឲ្យមានការផ្លាស់ប្ដូរសមាសភាពគណៈកម្មាធិការជាតិរៀបចំការបោះឆ្នោត។ យើងត្រូវតែធ្វើបញ្ជីឈ្មោះបោះឆ្នោតមួួយទៀត។ ពីរសប្ដាហ៍ទៀត យើងនឹងធ្វើបាតុកម្មមួយទៀត”។
លោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតបានបញ្ចាក់ថាបានទទួលបែបបទនោះហើយ ហើយមន្ត្រីមួយក្រុមនឹងពិនិត្យឯកសារទាំងនោះភ្លាមៗតែម្តង៕
ប្រែសម្រួលដោយ ហម សុផាណ្ណា