រដ្ឋាភិបាល និងអង្គការសុខភាពពិភពលោកបានលើកឡើងកាលពីថ្ងៃសុក្រថា កម្ពុជានឹងសម្រេចបាននូវគោលដៅរបស់ខ្លួនមិនឲ្យមានករណីឆ្លងមេរោគហ៊ីវថ្មីទៀតទេ ក្នុងរយៈពេលជិតប្រាំពីរឆ្នាំទៀត។
លោក សាស្ត្រាចារ្យ ដានីញែល តារ៉ាន់តុលា (Daniel Darantola) ដែលដឹកនាំក្រុមត្រួតពិនិត្យបានលើកឡើងនៅក្នុងសេចក្ដីថ្លែងការណ៍មួយថា “ បន្ទាប់ពីបានពិនិត្យទិន្នន័យ ឯកសារ និងរបាយការណ៍ដែលទទួលបាន និងការចុះសង្កេតនិងសាកសួរផ្ទាល់ ការពិនិត្យរបស់ក្រុមឆ្លើយតបក្នុងវិស័យសុខាភិបាលជាតិពាក់ព័ន្ធនឹងមេរោគហ៊ីវបានសន្និដ្ឋានថា កម្ពុជាកំពុងឆ្ពោះទៅរកការសម្រេចបាន
នូវគោលដៅនៃការលុបបំបាត់ការឆ្លងមេរោគហ៊ីវថ្មីៗ នៅក្នុងប្រទេសនេះ ត្រឹមឆ្នាំ២០២០”។
ទោះជាយ៉ាងណា កាលពីថ្ងៃសុក្រ មន្ត្រីសុខាភិបាល និងអ្នកជំនាញបានលើកឡើងថា
គោលដៅនោះមានមហិច្ឆតាខ្ពស់ពេក និងអាស្រ័យលើការបន្ដការប្ដេជ្ញាចិត្ត និងការ
គាំទ្រពីអ្នកផ្តល់ជំនួយ។
លោក ស៊ិន សុមុនី នាយកប្រតិបត្តិអង្គការមេឌីខាំ(Medicam)ដែលជាអង្គការក្រៅរដ្ឋាភិបាលផ្នែកសុខភាព មានប្រសាសន៍ថា“ វាពិបាកមែន ប៉ុន្ដែ វាអាចទៅរួច។ ប្រសិនបើមានការបន្ដរួមចំណែកពីសំណាក់សហគមន៍កម្ពុជានិងអន្ដរជាតិ ព្រមទាំងអនុវត្តយុទ្ធសាស្ត្រថ្មីៗមួយចំនួននោះ វាប្រាកដជាអាចសម្រេចគោលដៅនេះបាន”។
លោកវេជ្ជបណ្ឌិត ឱម សុភាព នាយកប្រតិបត្តិអង្គការខាណា(Khana)ដែលធ្វើការប្រយុទ្ធប្រឆាំងនឹងមេរោគហ៊ីវ និងជំងឺអេដស៍បានមានប្រសាសន៍ថា គោលដៅនេះអាចសម្រេចបាន ដរាបណាការងារដែលយើងកំពុងធ្វើដើម្បីលុបបំបាត់ជំងឺនេះពីកម្ពុជា នៅបន្តនោះ។
លោកបានមានប្រសាសន៍ថា “ ខ្ញុំគិតថា គោលដៅនេះប្រាកដជាអាចសម្រេចបាន។ ប្រសិនបើយើងនៅតែបន្ដធ្វើការងារដូចដែលយើងកំពុងធ្វើនាពេលនេះ យើងប្រាកដជាអាចទៅដល់គោលដៅ”។
ទោះបីជាមានសុទិដ្ឋិនិយមក្នុងចំណោមបុគ្គលិកសុខាភិបាលក៏ដោយ ក៏អត្រាឆ្លងមេរោគហ៊ីវ ក្នុងចំណោមអ្នកប្រើគ្រឿងញៀន និងអ្នករកសីុផ្លូវភេទនៅតែខ្ពស់ដែរនៅកម្ពុជា។
ចំពោះប្រជាជនទូទៅ អត្រាឆ្លងមេរោគហីុវធ្លាក់ចុះប្រហែល០,៧ភាគរយប៉ុន្ដែ ចំពោះអ្នកធ្វើការនៅកន្លែងកម្សាន្ដ និងបុរសដែលរួមភេទជាមួយបុរស អត្រាឆ្លងគឺមានប្រហែល១២ភាគរយ។ ចំណែក អ្នកប្រើប្រាស់ការចាក់ថ្នាំញៀន អត្រាឆ្លងនៅតែខ្ពស់នៅឡើយ គឺ ២៥ភាគរយ។
យោងតាមអង្គការសុខភាពពិភពលោកបានឲ្យដឹងថា ខណៈដែលករណីឆ្លងថ្មីៗមានប្រហែល១៥.៥០០នាក់ក្នុងអំឡុងទសវត្សរ៍ឆ្នាំ១៩៩០នោះ ចំនួននៃការឆ្លងថ្មីក្នុងឆ្នាំ២០១១មានត្រឹមតែ១.០០០នាក់ប៉ុណ្ណោះ។
លោកវេជ្ជបណ្ឌិត ឱម សុភាព បានមានប្រសាសន៍ថា “ កត្តាជាអាទិភាពគឺបុគ្គលិកផ្ដល់សេវាកម្សាន្ដ ទី២គឺបុរសរួមភេទជាមួយបុរស និងពួកខ្ទើយ។ បន្ទាប់មកទៀតគឺអ្នកប្រើប្រាស់ថ្នាំញៀនដែលប្រើប្រាស់សារ៉ាងឬម្ជុលចាក់រួមគ្នា”។
លោកបន្ថែមថា គេបានផ្ដល់សេវាអប់រំជាច្រើនដើម្បីជួយក្រុមដែលប្រឈមនឹងហានិភ័យខ្ពស់នៃការឆ្លងជំងឺនេះ។
រហូតមកដល់ដើមឆ្នាំនេះ អ្នកជំងឺផ្ទុកមេរោគហ៊ីវដែលមានកោសិកាសីុឌី៤ (CD4)ទាប អាចព្យបាលបានដោយប្រើថ្នាំប្រឆំាំងមេរោគ។ការស្រាវជ្រាវអន្ដរជាតិបានបង្ហាញថា គួរតែផ្តល់ថ្នាំឲ្យអ្នកជំងឺដែលមានកោសិកាស៊ីឌី៤ធម្មតា ឬខ្ពស់ជាងនេះ។
លោកវេជ្ជបណ្ឌិត ឱម សុភាព បានមានប្រសាសន៍ថា“ ដើមឆ្នាំនេះ យើងក៏បានចាប់ផ្ដើមព្យាបាលអ្នកជំងឺដែលមានកោសិកាស៊ីឌី៤ [ខ្ពស់ជាងនេះ] ដែរ”៕
ប្រែសម្រួលដោយ ហម សុផាណ្ណា